TNGO

பசுமை அமைதி விருதுகள் - හරිත සාම සම්මාන - Green Peace Awards 2025

தமிழ்த்தேசியப் பசுமை இயக்கத்தின்

பசுமை அறிவொளி நிகழ்ச்சி நாவாந்துறையில்

தமிழ்த்தேசியப் பசுமை இயக்கம் மாணவர்களை வலுவூட்டும் நோக்கில் முன்னெடுத்து வரும் பசுமை அறிவொளி நிகழ்ச்சி கடந்த ஞாயிற்றுக்கிழமை (08.02.2026) நாவாந்துறை சென்.மேரிஸ் சனசமூக நிலைய முன்றிலில் நடைபெற்றது.

பசுமை இயக்கத்தின் தலைவர் பொ. ஐங்கரநேசன் தலைமையில் நடைபெற்ற இந்நிகழ்ச்சியில் வளவாளராக மென்பொருள் பொறியியலாளர் வி. திவாகரன் கலந்துகொண்டிருந்தார். பசுமை இயக்கத்தின் சூழல் பாதுகாப்பு அணியின் துணைச் செயலாளர் த. யுகேஸ், யாழ். மாநகரசபையின் கௌரவ உறுப்பினர் அ. அன்ரன் சாள்ஸ், சமூகச் செயற்பாட்டாளர் செ. றேகன் ஆகியோரும் பங்கேற்றிருந்த இந்நிகழ்ச்சியில் நூற்றுக்கணக்கான மாணவர்களும் பெற்றோர்களும் கலந்துகொண்டிருந்தார்கள்.

மாணவர்கள் அனைவருக்கும் கனடா, ரொறன்ரோவின் மனிதநேயக்குரல் அமைப்பின் அனுசரணையுடன் மாணவர் குறிப்பேடுகளும், செல்வன் சேயோன் ராஜா சுப்பிரமணியன் அனுசரணையில் கற்றல் உபகரணங்களும் வழங்கி வைக்கப்பட்டன.

இனங்களை ஒருங்கிணைப்பதற்குப் பயன்பட வேண்டிய தேசியக்கொடி

இலங்கையில் இனங்களுக்கிடையில் பிரிவினையை ஏற்படுத்தியது

பொ.ஐங்கரநேசன் சுட்டிக்காட்டு

இலங்கை சுதந்திரம் அடைந்தபோது விக்கிரமராசசிங்க மன்னனின் சிங்கக் கொடியே தேசியக் கொடியாக ஏற்றப்பட்டது. சிங்கள மக்களை மட்டுமே பிரதிநிதித்துவம் செய்த இந்தக் கொடியைத் தமிழ் - முஸ்லிம் தலைவர்கள் ஆட்சேபித்ததால் கொடியின் ஓரத்தில் தமிழ் மக்களைக் குறிக்கச் செம்மஞ்சள் நிறப் பட்டியும் முஸ்லிம் மக்களைக் குறிக்கப் பச்சைநிறப் பட்டியும் சேர்க்கப்பட்டன. ஆனால், சிங்கள மக்களைக் குறிக்கும் சிவப்பு வர்ணமே கொடியில் பெரும்பங்கு இடம் பெற்றது. பௌத்தக் குறியீடுகளும் இடம்பெற்றன. மூவின மக்களுக்கும் சமமான பிரதிநிதித்துவம் இல்லாது சிங்கள மக்களுக்கான கொடியாகவே தேசியக்கொடி வடிவமைக்கப்பட்டது. இதனால், இனங்களை ஒருங்கிணைப்பதற்குப் பயன்படவேண்டிய தேசியக் கொடி இனங்களுக்கிடையில் பிரிவினையை ஏற்படுத்தியதன் தொடக்கமாக அமைந்தது என்று தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

இலங்கையின் சுதந்திர தினமான கடந்த 4ஆம் திகதி ‘என்று தணியும் இந்த சுதந்திர தாகம்’ என்ற கருப்பொருளில் யாழ்ப்பாணம் வை.எம்.சி.ஏ மண்டபத்தில் தமிழ்த் தேசியப் பேரவையின் கருத்தமர்வு நடைபெற்றது. தமிழ்த் தேசியக் கட்சியின் ஏற்பாட்டில் இடம்பெற்ற இக்கூட்டத்தில் உரையாற்றியபோதே பொ.ஐங்கரநேசன் இவ்வாறு சுட்டிக்காட்டியுள்ளார்.

அங்கு அவர் தொடர்ந்து உரையாற்றுகையில்,

இலங்கைத் தீவின் வரலாற்றுக் காலத்தில் சிங்கம் ஒருபோதும் வாழ்ந்ததாக அறியப்படவில்லை. சிங்கள மக்கள் தமது வரலாற்று நூலாகக் கொண்டாடும் மகாவம்சத்தின் அடிப்படையிலேயே சிங்கள மக்களின் குறியீடாகச் சிங்கம் விக்கிரமராசசிங்க மன்னன் காலம்தொடக்கம் கொடிகளில் பயன்படுத்தப்பட்டு வந்துள்ளது. ஆரம்பத்தில் கொடிக்கம்பத்துக்கு எதிர்ப்புறமாக, வலப்பக்கம் நோக்கியிருந்த சிங்கம் தமிழ் - முஸ்லிம் மக்களைக் குறிக்கும் நிறப்பட்டிகள் சேர்க்கப்பட்டதன் பின்னர் அவற்றை நோக்கித் திருப்பப்பட்டது. தேசியக் கொடியின் வடிவமைப்புக் குழுவில் அங்கத்துவம் வகித்த செனட்டர் நடேசன் கொடியில் இனப்பாகுபாட்டைக் கடுமையாக எதிர்த்தார். இது பிரிவினை வாதத்துக்கு வழிகோலும் என்று எச்சரித்தார். ஆனால், பேரினவாதம் அதனை ஏற்றுக் கொள்வதற்குத் தயாராக இருக்கவில்லை.

இலங்கையின் தேசியக்கொடியில் இலங்கையில் காணப்படாத சிங்கத்தை வாளேந்த வைத்ததன் பின்னர் இலங்கை அரசால் இன்னுமொரு விலங்கைத் தேசிய விலங்காக இதுவரை அறிவிக்க முடியவில்லை. இலங்கைக் காடுகளில் காணப்படும், இலங்கைக்கு மட்டுமே உரித்தான சிறுத்தைப்புலியே தேசிய விலங்காகத் தெரிவு செய்வதற்கு மிகப்பொருத்தமானது. ஆனால், வி.டு.த.லை.ப் பு.லி.கள் தங்களது சின்னமாகப் புலியைத் தெரிவு செய்தார்கள் என்ற ஒரே காரணத்துக்காகச் சிறுத்தைப் புலியைத் தேசிய விலங்காக அங்கீகரிப்பதற்கு இலங்கை அரசாங்கம் தயக்கம் காட்டுகிறது. வாளேந்திய சிங்கம் தங்களை அடக்கியொடுக்குவதாகத் தமிழ் மக்கள் உணர்ந்ததாலேயே தங்களுக்கான தனியான ஒரு சின்னத்தைத் தேடவேண்டிய நிர்ப்பந்தம் ஏற்பட்டது என்பதை இலங்கை அரசு புரிந்துகொள்ள வேண்டும்.

தேசிய மக்கள் சக்தி அரசியல்வாதிகள் இலங்கைத் தீவில் வாழுகின்ற அனைத்து மக்களும் சமமாகவே நடத்தப்பட்டு வருகிறார்கள் என்று பேசிவருகிறார்கள். இவர்கள் மனிதஉரிமைகளைப் பற்றியே பேசுகிறார்கள். இந்த சமத்துவம் உலகமக்கள் அனைவருக்கும் பொதுவானது. ஆனால், நாம் அவாவி நிற்பது இனங்களுக்கிடையிலான சமத்துவம். நாங்கள் நாடோடி மக்கள் கூட்டம் அல்லர். இலங்கைத்தீவில் நாம் ஒரு தனித்துவமான தேசிய இனம். ஒரு தேசிய இனத்துக்கென அங்கீகரிக்கப்பட்ட சுயநிர்ணய உரிமையையே நாம் கோரி வருகின்றோம். தேசிய மக்கள் சக்தி அரசாங்கம் தாங்கள் பேசிவருகின்ற சமத்துவம் இனங்களுகிடையிலான சமத்துவம்தான் என்று சொன்னால், தேசியக்கொடியில் சமத்துவமான மாற்றத்தை ஏற்படுத்துவதன் மூலமே மக்களுக்கு அதனை மெய்ப்பிக்க முடியும் என்றும் தெரிவித்தார்.

என்று தணியும் இந்த சுதந்திர தாகம்

யாழில் இடம்பெற்ற கருத்தரங்கு

தமிழ்த் தேசியப் பேரவையின் சார்பில் அதன் அங்கத்துவக்கட்சிகளில் ஒன்றான தமிழ்த் தேசியக் கட்சியின் ஏற்பாட்டில் "என்று தணியும் இந்த சுதந்திர தாகம்" அரசியல் கருத்தரங்கு இலங்கையின் சுதந்திர தினமான நேற்று [04-02-2026]யாழ்ப்பாணம் மாவட்டச் செயலகத்துக்கு அண்மையில் அமைந்துள்ள வை.எம்.சி.ஏ மண்டபத்தில் இடம்பெற்றது.

வல்வெட்டித்துறை நகரசபையின் நகரபிதா எம்.கே சிவாஜிலிங்கம் தலைமையில் நடைபெற்ற இந்த நிகழ்ச்சியில் அரசியல் ஆய்வாளர் நிலாந்தன் ,தமிழ்த் தேசியச் செயற்பாட்டாளரும் சட்டத்தரணியுமான ச. நவரத்தினம் (கரிகாலன்) ,தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன், தமிழ்த் தேசிய மக்கள் முன்னணியின் செயலாளரும் முன்னாள் நாடாளுமன்ற உறுப்பினருமான செ.கஜேந்திரன் தமிழ்த் தேசியக் கட்சியின் தலைவரும், சட்டத்தரணியுமான சிறீகாந்தா ஆகியோரின் உரைகள் இடம்பெற்றன.

இந்நிகழ்ச்சியில் அரசியல் கட்சிகளின் பிரதிநிதிகள், அரசியல் செயற்பாட்டாளர்கள், பொதுமக்கள் எனப் பலரும் கலந்து கொண்டனர்.

தமிழ்த்தேசியப் போராட்டத்தின் முன்னோடி முத்துக்குமாரசாமி

நினைவுகூர் நிகழ்ச்சி திருநெல்வேலியில் இடம்பெற்றது

அமெரிக்காவில் அண்மையில் இயற்கை எய்திய தமிழ்த்தேசியப் போராட்டத்தின் முன்னோடிகளில் ஒருவரான தம்பித்துரை முத்துக்குமாரசாமியை நினைவுகூரும் அஞ்சலி நிகழ்ச்சி ஞாயிற்றுக்கிழமை, (01.02.2026) திருநெல்வேலி இந்து வாலிபர் சங்க மண்டபத்தில் நடைபெற்றது.

திருநெல்வேலி இந்து வாலிபர் சங்கத்தின் தலைவரும், தமிழ்த்தேசியப் பசுமை இயக்கத்தின் தலைவருமான பொ. ஐங்கரநேசன் தலைமையில் இந்நிகழ்ச்சி நடைபெற்றது. இதில் நாடாளுமன்ற உறுப்பினர் கஜேந்திரகுமார் பொன்னம்பலம், அரசியல் ஆய்வாளர் சி.சு.யோதிலிங்கம், வல்வெட்டித்துறை நகரசபைத் தலைவர் எம்.கே.சிவாஜிலிங்கம், வைத்திய கலாநிதி இ.சிவசங்கர், கணக்காளர் வ. தில்லைநாதன் ஆகியோர் முத்துக்குமாரசாமி தொடர்பான நினைவுகளைப் பகிர்ந்துகொண்டனர்.

இந்து வாலிபர் சங்கத்தின் செயலாளர் யோ. சஜீதராவின் வரவேற்புரையுடன் ஆரம்பமான இந்நினைவுகூர் அஞ்சலி நிகழ்ச்சியில் தமிழ்த் தேசியப் செயற்பாட்டாளர்கள் அமரர் முத்துக்குமாரசாமியின் உறவினர்கள், பொதுமக்கள் என ஏராளமானோர் கலந்துகொண்டு சுடரேற்றி அஞ்சலி செலுத்தினர். இந்நிகழ்ச்சியில் அரசியல் ஆய்வாளர் சி.சு.யோதிலிங்கம் எழுதிய 'தமிழ்த்தேசியப் போராட்டத்தின் ஆரம்பகர்த்தா த. முத்துக்குமாரசாமி' என்ற கையேடும் வெளியிடப்பட்டது.

தமிழ்த் தேசியப் பசுமை இயக்கத்தின் இராசபோசனம்

சங்கானையில் நிகழ்ந்த சிறுதானியப் பொங்கல் விழா

தமிழ்த் தேசியப் பசுமை இயக்கம் தமிழர்களின் பண்பாட்டுப் பெருவிழாவான தைப்பொங்கலை ஆண்டுதோறும் சிறுதானியப் பொங்கல் விழாவாகக் கொண்டாடி வருகிறது. 'இராசபோசனம்' என்ற கருப்பொருளில் நடைபெறும் இச்சிறுதானியப் பொங்கல் விழா இம்முறை சங்கானை ஸ்ரீபுவனேஸ்வரி அம்மன் ஆலய முன்றலில் நேற்று சனிக்கிழமை (31.01.2026) மாலை மிகவும் சிறப்பாக நடைபெற்றுள்ளது.

தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் நடைபெற்ற இவ்விழாவில் பிரதம விருந்தினராகக் கோப்பாய் ஆசிரியர் பயிற்சிக் கலாசாலையின் அதிபர் 'சொல்லருவி' ச.லலீசன் பங்கேற்றிருந்தார். கௌரவ விருந்தினராக நாடாளுமன்ற உறுப்பினர் கஜேந்திரகுமார் பொன்னம்பலம் பங்கேற்றிருந்தார். சிறப்பு விருந்தினர்களாக முன்னாள் நாடாளுமன்ற உறுப்பினர் செ. கஜேந்திரன், சட்டத்தரணி ந.காண்டீபன், பசுமை இயக்கத்தின் கலை, இலக்கிய அணியின் துணைச் செயலாளர் கை. சரவணன், ஆலய அறங்காவலர் சபைத் தலைவர் இ. ஜெயகாந்தன் ஆகியோர் கலந்து கொண்டிருந்தார்கள்.

தமிழர்களின் பாரம்பரிய விளையாட்டுகளில் ஒன்றான உறியடியோடு, சிறார்களின் கலை நிகழ்ச்சிகளும் இடம்பெற்ற இச்சிறுதானியப் பொங்கல் விழாவில் வரகு மற்றும் சாமை அரிசியில் பொங்கலிட்டுப் பரிமாறப்பட்டன. கலை நிகழ்ச்சிகளில் பங்கேற்ற அனைவருக்கும் பரிசுப் பொருட்களும் வழங்கி வைக்கப்பட்டன.

தமிழர்களின் உணவுப் பண்பாட்டில் முன்னர் பிரதான இடத்தைப் பெற்றிருந்த ஆரோக்கிய உணவாகவும் வரண்ட சூழலின் இயற்கைப் பயிர்களாகவும் விளங்கிய சிறுதானியங்கள் இன்று உணவுப் பயன்பாட்டில் வெகுவாக அருகி வந்துள்ளன. இதைக் கருத்திற் கொண்டே பாரம்பரிய உணவான சிறுதானிங்களின் மீள் பயன்பாட்டை ஊக்குவிக்கும் நோக்கில் 'சிறுதானியங்களை மீள முடிசூட்டுவோம்' என்ற மகுட வாசகத்துடன் பசுமை இயக்கம் ஆண்டு தோறும் சிறுதானியப் பொங்கல் விழாவைக் கொண்டாடி வருகின்றமை குறிப்பிடத்தக்கது.

மாணவர்களை வலுவூட்டும் 'பசுமை அறிவொளி'

பசுமை இயக்கம் நல்லூரில் நடாத்தியது

தமிழ்த் தேசியப் பசுமை இயக்கத்தின் மாணவர்களை வலுவூட்டும் 'பசுமை அறிவொளி' நிகழ்ச்சி நேற்று ஞாயிற்றுக்கிழமை (25.01.2026) நல்லூர் திவ்ய ஜீவன சங்க மண்டபத்தில் நடைபெற்றது.

பசுமை இயக்கத்தின் தலைவர் பொ. ஐங்கரநேசன் தலைமையில் நடைபெற்ற இந்நிகழ்ச்சியில் பிரதம விருந்தினராக வவுனியா பிராந்தியத்தின் பிரதி நீர்ப்பாசனப் பணிப்பாளர் எந்நிரி ச. சர்வராஜா கலந்துகொண்டிருந்தார். சிறப்பு விருந்தினராகக் கணிய அளவையாளர் ரோகினி ஜெயராம் பங்கேற்றிருந்தார்.

மாணவர்களுக்குச் சூழல் அறிவைப் போதித்து விழிப்புணர்வை ஏற்படுத்துவதன் மூலம் அவர்களைச் சூழல் பாதுகாப்பில் பங்கேற்பாளராக்கும் நோக்குடனும், அவர்களில் பல்துறை ஆளுமையை விருத்தி செய்யும் நோக்குடனும் தமிழ்த் தேசியப் பசுமை இயக்கம் 'பசுமை அறிவொளி' நிகழ்ச்சித் திட்டத்தைக் கிராமங்களில் நடாத்தி வருகின்றது. இதன் தொடர்ச்சியாகவே கடந்த ஞாயிற்றுக்கிழமை நல்லூரில் நடைபெற்றுள்ளது.

வரவேற்புரையைப் பசுமை இயக்கத்தின் மத்திய குழு உறுப்பினர் பா. காசிநாதன் ஆற்ற, நன்றியுரையை பொதுச் செயலாளர் ம. கஜேந்திரன் ஆற்றியிருந்தார். பொருளாளர் க. கேதீஸ்வரநாதனும் பங்கேற்றிருந்த இந்நிகழ்ச்சியில் நூற்றுக்கும் அதிகமான மாணவர்களும் அவர்களின் பெற்றோர்களும் கலந்து கொண்டிருந்தார்கள்.

மாணவர்கள் அனைவருக்கும் சூழல் விழிப்புணர்வுப் படங்களும், மேற்கோள்களும் பொறிக்கப்பட்டிருந்த அப்பியாசக் கொப்பிகள் வழங்கி வைக்கப்பட்டன. இதற்கான நிதி அனுசரணையைக் கனடாவில் இயங்கிவரும் ரொறன்ரோவின் மனிதநேயக் குரல் அமைப்பு வழங்கியிருந்தமை குறிப்பிடத்தக்கது.

தமிழகத் தலைவர்களை நாம் பொதுவெளியில் விமர்சிப்பதன் மூலம் அவர்களின்

கோடானுகோடித் தொண்டர்களை எங்களிடம் இருந்து நாமே அந்நியப்படுத்துகிறோம்

சமகால அரசியல் அரங்கில் பொ. ஐங்கரநேசன் சுட்டிக்காட்டு

தமிழகத்தின் ஒவ்வொரு பிரபல்யமான திரைப்பட நடிகர்களுக்கும் இங்கே ரசிகர்கள் இருப்பதைப் போன்று, இப்போது தமிழக அரசியல் தலைவர்களுக்கும் ரசிக மனப்பான்மையோடு இங்கே ஆதரவுத்தளம் உருவாகியிருக்கிறது. இவர்கள் பொதுவெளியில் சகட்டு மேனிக்குத் தாங்கள் ஏற்றுக்கொள்ளாத தமிழகத் தலைவர்கள் மீது கடுமையான விமர்சனங்களை முன்வைத்து வருகிறார்கள். இந்த விமர்சனங்கள் மூலம் ஒவ்வொரு தலைவர்களின் பின்னாலும் உள்ள அவர்களது கோடானுகோடித் தொண்டர்களை எங்களிடம் இருந்தும், ஈழப்பிரச்சினையில் இருந்தும் நாமே அந்நியப்படுத்துகிறோம் என்ற கசப்பான உண்மையை நாம் புரிந்துகொள்ள வேண்டும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

தமிழ்த் தேசியப் பசுமை இயக்கத்தின் சமகால அரசியல் உரையரங்கு நிகழ்ச்சி கடந்த செவ்வாய்க்கிழமை நல்லூர் திவ்ய ஜீவன சங்க மண்டபத்தில் நடைபெற்றது. இவ்வுரையரங்குக்குத் தலைமையேற்று உரையாற்றும்போதே பொ. ஐங்கரநேசன் இவ்வாறு சுட்டிக்காட்டியுள்ளார்.

அங்கு அவர் தொடர்ந்து உரையாற்றுகையில்,

முள்ளிவாய்க்காலில் யுத்தம் நடந்துகொண்டிருந்தபோது தமிழகத்தை ஆட்சி செய்துகொண்டிருந்த கலைஞர் கருணாநிதி தலைமையிலான அரசு யுத்தத்தைத் தடுத்து நிறுத்தியிருக்கலாம் என்ற அபிப்பிராயமும் ஆதங்கமும் ஈழத்தமிழ் மக்களிடையே உண்டு. ஈழத்தமிழர்களிடையே இன்றுவரை நீடிக்கும் உணர்வுநிலைப்பட்ட இந்த அபிப்பிராயத்தை எவரும் புரிந்துகொள்ள முடியும். ஆனால், அரசியல் அறிவார்ந்த ரீதியாக இதே அபிபப்பிராயத்தின் அடிப்படையில் தொடர்ந்தும் நாம் தமிழகத்துடனான உறவைப்பேண முடியாது என்பதே யதார்த்தம்.

ஈழத்தமிழர்களுக்காகத் தமிழகத்தில் முத்துக்குமார் உட்பட எத்தனையோ பொதுமக்கள் தீக்குளித்து மரணித்திருக்கிறார்கள். ஆனால், இன்று தமிழக அரசியல் தவைர்கள் சிலர் ஈழப்பிரச்சினை தொடர்பாகப் பேசி வந்தாலும் தமிழக மக்கள் பொதுவாக ஈழத்தமிழர் அரசியல் பிரச்சினைகள் பற்றி அறிவதில் ஆர்வம் குன்றியவர்களாக இருக்கிறார்கள். முள்ளிவாய்க்கால் யுத்தத்தின் பின்னர் எமது அரசியல் தலைவர்கள் தமிழ்நாட்டுடன் அரசியல் ரீதியான உறவைப் பேணாததே இதற்கான காரணம்.

எமது தமிழ்த்தேசிய விடுதலைப் போராட்டத்தில் எப்போதும் பின்தளமாகத் தமிழக மக்களே இருந்து வந்துள்ளார்கள். ஆயுதப் போராட்டத்தில் பின்களப் பணியாளர்கள் அவர்கள்தாம். இந்தத் தொப்பிள்கொடி உறவை நாமாகவே அறுத்துவிடக்கூடாது. அந்த ஏழுகோடித் தமிழ் மக்களின் ஆதரவுப் பலம் எங்களுக்கு எப்போதும் வேண்டும். இதைப் புரிந்துகொண்டு தமிழகத்தின் உட்கட்சி அரசியலுக்குள் நுழைந்து நாம் அரைவேக்காட்டுத்தனமாகக் கருத்துச் சொல்வதை முதலில் தவிர்க்க வேண்டும் வேண்டும் என்றும் தெரிவித்துள்ளார்.

தமிழ்த் தேசியப் பசுமை இயக்கத்தின் சமகால அரசியல் உரையரங்கு

நல்லூரில் நடைபெற்றது

தமிழ்த் தேசியப் பசுமை இயக்கத்தின் சமகால அரசியல் உரையரங்கு நேற்று செவ்வாய்க் கிழமை (13.01.2026) நல்லூர் திவ்ய ஜீவன சங்க மண்டபத்தில் நடைபெற்றது.

பசுமை இயக்கத்தின் தலைவர் பொ. ஐங்கரநேசன் தலைமையில் நடைபெற்ற இவ்வுரையரங்கில் நாடாளுமன்ற உறுப்பினரும், தமிழ்த் தேசிய மக்கள் முன்னணியின் தலைவருமான கஜேந்திரகுமார் பொன்னம்பலம் புதிய அரசியல் அமைப்பு மற்றும் தமிழ்த் தேசியப் பேரவையின் தமிழக அரசியற் தலைவர்களுடனான சந்திப்புப் பற்றி உரையாற்றியிருந்தார். யாழ். பல்கலைக்கழகத்தின் அரசறிவியற் துறையின் முதுநிலை விரிவுரையாளர் பேராசிரியர் கே.ரி. கணேசலிங்கம் வெனிசுலாவில் அமெரிக்க இராணுவத் தலையீடும் அதில் இருந்து அரசற்ற தேசிய இனங்கள் கற்றுக்கொள்ள வேண்டிய பாடமும் பற்றி உரையாற்றியிருந்தார்.

மண்டபம் நிறைந்த அரசியல் ஆர்வலர்கள் கலந்துகொண்ட இக்கூட்டத்தில் பா. காசிநாதன் வரவேற்புரையை ஆற்றியிருந்தார்.

இயற்கையைப் போற்றுகின்ற தைத்திருநாளில்

மண்பானைகளில் பொங்கல் இடுவோம்

பொங்கல் பொதிகள் வழங்கும் நிகழ்ச்சியில் பொ.ஐங்கரநேசன் அழைப்பு

தைப்பொங்கல் மதங்களைக் கடந்து இயற்கையைப் போற்றுகின்ற ஒரு பண்பாட்டுப் பெருவிழா. இத்திருநாளில் தொன்றுதொட்டு இயற்கைக்கு இசைவான மண்பானைகளிலேயே பொங்கி வந்துள்ளோம். ஆனால், மண்பானைகளின் இடத்தை இப்போது அலுமினியப் பானைகள் ஆக்கிரமித்து விட்டன. இயற்கைக்கு நன்றி தெரிவிக்கும் ஒரு பெருவிழாவில் அலுமினியப் பானைகள் பொருத்தம் இல்லாதவை. உடல் நலத்துக்குக் கேடானதாகவும் உள்ளன. எனவே இயற்கையைப் போற்றுகின்ற இத்தைத்திருநாளில் மண்பானைகளில் பொங்கல் இடுவோம் என்று தமிழ்த் தேசியப் பசுமை இயக்கத்தின் தலைவர் பொ.ஐங்கரநேசன் அழைப்பு விடுத்துள்ளார்.

பசுமை இயக்கத்தின் மண்பானைப் பொங்கல் பொதிகள் வழங்கும் நிகழ்ச்சி வட்டுக்கோட்டையில் நேற்று ஞாயிற்றுக்கிழமை (11.01.2026) இடம்பெற்றது. இந்நிகழ்ச்சியில் கலந்து கொண்டு உரையாற்றியபோதே பொ.ஐங்கரநேசன் இந்த அழைப்பை விடுத்துள்ளார்.

அங்கு அவர் தொடர்ந்து உரையாற்றுகையில்,

அலுமினியம் பாரம் இல்லாததால் இலகுவில் கையாளக்கூடியதாக உள்ளது. உலோகம் என்பதால் இலகுவில் வெப்பத்தைக் கடத்த வல்லது. இதனால், சமையலை விரைந்து முடிக்க வல்லது. நெளிந்து வளைந்தாலும் உடைந்துவிடாது, ஒப்பீட்டளவில் விலையும் மலிவானது. இவை போன்ற காரணங்களால் சமையல் அறைகளில் பிரதான பாத்திரங்களாக அலுமினியப் பாத்திரங்கள் இடம்பெற்றுள்ளன. அலுமினியப் பாத்திரங்களில் உணவு சமைக்கும்போது அலுமினியம் உணவுடன் சேர்வதைத் தவிர்க்கும் பொருட்டுப் பாத்திரத்தின் உட்பகுதியில் அலுமினியம் ஒட்சைட்டுப் படலம் பூசப்படுகிறது.

அலுமினியப் பாத்திரங்களைச் சுத்தம் செய்யும்போது பாதுகாப்புப்படலம் தேய்வடைந்து உணவுப் பாதுகாப்பு கேள்விக்குறியாகிறது. சமைக்கப்படும் உணவுப் பொருளின் அமில, கார இயல்பு, சேர்க்கப்படும் உப்பு, சமைக்கும் வெப்பநிலை ஆகியனவற்றைப் பொறுத்து அலுமினியம் உணவுடன் கலப்பதும் கண்டறியப்பட்டுள்ளது. உடலில் சிறுகச் சிறுகச் சேரும் அலுமினியம் மூளை நரம்புகளைப் பாதிக்கிறது. இதனால் நினைவாற்றலும் பேச்சுத் திறனும் தடைப்படுகிறது. ஏற்கனவே சிறுநீரக நோயுடையவர்களின் சிறுநீரகங்கள் மேலும் பாதிப்படைவதோடு எலும்புகளும் பலம் இழப்பதாக ஆய்வுகளில் தெரியவந்துள்ளன.

மண்பானைகள் அவற்றின் மேற்பரப்பில் இயற்கையாகவே உள்ள நுண்ணிய துவாரங்கள் வழியாக வெப்பத்தைப் பரப்பி உணவைச் சீராக வேகவைக்கிறது. மெதுவாகவே சூடுபடுத்துவதால் உணவில் போசணைப்பொருட்களின் அழிவு மட்டுப்படுத்தப்படுகிறது. மண் கார இயல்பு கொண்டதால் உணவில் அமிலத் தன்மையைச் சமன் செய்கிறது. சமைக்கும்போது மண்ணிலிருந்து கனியுப்புகள் உணவுடன் சேர்வதால் உணவின் போசணைப்பெறுமானம் அதிகரிக்கிறது. இவற்றோடு உணவின் வாசனையுடன் மண்ணின் வாசனையும் சேர்ந்து கொள்ள உணவுக்குத் தனியானதொரு சுவையும் கிடைக்கிறது.

எல்லாவற்றையும் அவசரம் அவசரமாகச் செய்துவிட வேண்டும் என்று நினைக்கும் நாம் உடலின் ஆரோக்கியத்தைப் பேணவேண்டிய சமையலையும் அவ்வாறே அவசரகதியில் முடிக்க எண்ணி உலோகப் பாத்திரங்களை நாடியுள்ளோம். இதன் விளைவாக நோய்களுக்கும் ஆளாகி வருகிறோம். மண்பாத்திரங்களுக்கு உடனடியாகத் திரும்;புவது கடினமாக இருக்கலாம். ஆனாலும் தமிழ் மக்களின் இயற்கையைப் போற்றும் தைப்பொங்கல் திருநாளிலாவது மண்பானைகளில் பொங்கல் இடுவோம். இது நலிவடைந்துள்ள மட்பாண்டக் கைவினைஞர்களது வாழ்வு மேம்படவும்; உதவும் என்றும் தெரிவித்துள்ளார்.

தமிழ்த்தேசியப் பசுமை இயக்கத்தால்

மண்பானைப் பொங்கல் பொதிகள் வழங்கிவைப்பு

தைப்பொங்கலை முன்னிட்டுத் தமிழ்த்தேசியப் பசுமை இயக்கம் வட்டுக்கோட்டை, கொக்குவில், வல்வெட்டி ஆகிய பகுதிகளில் இருந்து தெரிவுசெய்யப்பட்ட 50 குடும்பங்களுக்கு மண்பானைப் பொங்கல் பொதிகளை வழங்கியுள்ளது.

தமிழ்த்தேசியப் பசுமை இயக்கம் இயற்கைப் பேரிடர்களாலும் வேறு காரணிகளாலும் பொருளாதார ரீதியாக நலிவுற்றுள்ள குடும்பங்களுக்கு உலர் உணவுப் பொதிகளை வழங்குகின்ற ‘அற்றார் அழிபசி தீர்த்தல்’ என்ற திட்டத்தை முன்னெடுத்து வருகின்றது. கொரோனாப் பெருந்தொற்று ஏற்பட்ட காலப்பகுதியில் இருந்து ‘பகிர்ந்துண்டு வாழ்வோம்’ என்ற கருப்பொருளில் இடம்பெற்று வரும் இத்திட்டத்தின் கீழ் சமீபத்தில் டித்வா புயலால் பாதிக்ப்பட்ட குடும்பங்களுக்கு உலருணவுப் பொதிகள் விநியோகிக்கப்பட்டன. இதன் தொடர்ச்சியாகவே தற்போது பொங்கல் பொதிகள் வழங்கப்பட்டுள்ளன.

தைப்பொங்கல் இயற்கையைப் போற்றுகின்ற தமிழ்ப் பண்பாட்டுப் பெருவிழா என்பதாலும், அலுமினியப் பாத்திரங்களில் சமைப்பது உடல்நலத்தைப் பாதிக்கும் என்பதாலும் பொங்கல் உள்ளீடுகளுடன் மண்பானைகளும் சேர்த்து வழங்கப்பட்டுள்ளன. இதற்கான நிதி அனுசரணையை கனடாவில் உள்ள இலங்கை முன்னாள் வர்த்தகர்களின் சங்கம் வழங்கியிருந்தது.

தமிழ்த்தேசியப் பசுமை இயக்கத்தால்

உலருணவுப் பொதிகள் விநியோகம்

தமிழ்த் தேசியப் பசுமை இயக்கம் இயற்கை பேரிடர்கள் உட்பட பல்வேறு காரணங்களினால் பொருளாதார ரீதியாக நலிவடைந்த குடும்பங்களுக்கு ‘அற்றார் அழிபசி தீர்த்தல்’ என்ற திட்டத்தின் கீழ் உலருணவுப் பொதிகளை வழங்கி வருகின்றது. ‘பகிர்ந்துண்டு வாழ்வோம்’ என்ற கருப்பொருளில் முன்னெடுக்கப்பட்டுவரும் இத்திட்டத்தின் கீழ் நேற்று வியாழக்கிழமை (08.01.2026) அராலி மற்றும் உடுவில் பகுதிகளில் இருந்து தெரிவுசெய்யப்பட்ட 75 குடும்பங்களுக்கு உலருணவுப் பொதிகள் வழங்கப்பட்டுள்ளன.

தமிழ்த் தேசியப் பசுமை இயக்கத்தின் தலைமை அலுவலகத்தில் நடைபெற்ற இதற்கான நிகழ்ச்சியில் அத்தியாவசிய உலருணவுகள் அடங்கிய பொதிகளை பசுமை இயக்கத்தின் தலைவர் பொ. ஐங்கரநேசன் பயனாளிகளுக்குக் கையளித்துள்ளார். இதற்கான நிதி அனுசரணையைக் கனடாவில் உள்ள யாழ்.கந்தர்மடம் மக்கள் ஒன்றியம் வழங்கிவைத்துள்ளமை குறிப்பிடத்தக்கது.

தமிழ்த் தேசியப் பசுமை இயக்கத்தால்

கிளிநொச்சியில் உலருணவுப் பொதிகள் விநியோகம்

தமிழ்த்தேசியப் பசுமை இயக்கம் சமீபத்திய டித்வா புயல் வெள்ளத்தால் பாதிக்கப்பட்ட குடும்பங்களுக்கு 'அற்றார் அழிபசி தீர்த்தல்' என்ற திட்டத்தின் மூலம் உலருணவுப் பொதிகளை வழங்கி வருகிறது. 'பகிர்ந்துண்டு வாழ்வோம்' என்ற கருப்பொருளில் முன்னெடுக்கப்பட்டுவரும் இத்திட்டத்தின்கீழ் நேற்று புதன்கிழமை (31.12.2025) கிளிநொச்சியில் குமாரபுரம், மயில்வாகனபுரம், கனகாம்பிகைக்குளம் ஆகிய பகுதிகளைச் சேர்ந்த தெரிவுசெய்யப்பட்ட 125 குடும்பங்களுக்கு அத்தியாவசிய உலருணவுகள் அடங்கிய பொதிகள் வழங்கி வைக்கப்பட்டுள்ளன.

பசுமை இயக்கத்தின் தலைவர் பொ.ஐங்கரநேசன் தலைமையில் கரைச்சி பிரதேசசபை உறுப்பினர் வி. கிருஸ்ணவேணி, தமிழ்த்தேசிய மக்கள் முன்னணியின் கிளிநொச்சி மாவட்ட அமைப்பாளர் த.ஜெகதீஸ்வரன், பசுமை இயக்கத்தின் இணைப்பாளர்கள் த. திலக்சிகா, ஞா. ரஞ்சிதமணி ஆகியோர் உலருணவுப் பொதிகளை வழங்கி வைத்தார்கள். இதற்கான நிதி அனுசரணையை கனடாவிலுள்ள இலங்கை முன்னாள் வர்த்தகர்கள் சங்கம், இலண்டன் கூடல் அமைப்பு இணைந்து வழங்கியிருந்தன.

தமிழ்த் தேசியப் பசுமை இயக்கம் கொரோனாப் பெருந்தொற்று ஏற்பட்ட 2020ஆம் ஆண்டிலிருந்து பேரிடர்களால் பாதிக்கப்பட்ட, பொருளாதார ரீதியாக நலிவுற்ற குடும்பங்களுக்கு 'அற்றார் அழிபசி தீர்த்தல்' திட்டத்தின்கீழ் உலருணவுப் பொதிகளை வழங்கி வருகின்றமை குறிப்பிடத்தக்கது.

கிளிநொச்சியில் பசுமை இயக்கத்தின்

பசுமை அறிவொளி நிகழ்ச்சி

தமிழ்த் தேசியப் பசுமை இயக்கத்தின் பசுமை அறிவொளி நிகழ்ச்சி கிளிநொச்சி, மயில்வாகனபுரம் பகுதியில் நேற்று புதன்கிழமை (31.12.2025) இடம் பெற்றுள்ளது. தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் பங்கேற்று மாணவர்களிடையே 'இயற்கை அனர்த்தங்களை வீறுகொள்ள வைப்பதில் காலநிலை மாற்றத்தின் பங்கு' குறித்து உரையாற்றியிருந்தார்.

தமிழ்த் தேசியப் பசுமை இயக்கம் மாணவர்களுக்குச் சூழல் அறிவைப் புகட்டி அவர்களிடையே சூழல் பற்றிய விழிப்புணர்வை ஏற்படுத்துவதன் ஊடாக, அவர்களைச் சூழல் பாதுகாப்பில் பங்கேற்பாளர்களாக்கும் நோக்குடன் பசுமை அறிவொளி நிகழ்ச்சித் திட்டத்தை கிராமங்கள் தோறும் முன்னெடுத்து வருகிறது. இதன் தொடராகவே கிளிநொச்சி, மயில்வாகனபுரத்தில் இந்நிகழ்ச்சி இடம் பெற்றுள்ளது. இந்நிகழ்ச்சியில் பங்குபற்றிய மாணவர்கள் அனைவருக்கும் கனடா ரொறன்ரோவின் மனிதநேயக்குரல் அமைப்பின் அனுசரணையுடன் சூழல் விழிப்புணர்வு அப்பியாசக் கொப்பிகள் வழங்கப்பட்டன.

கனடா ரொறன்ரோவின் மனிதநேயக்குரல் அமைப்பின் நிறுவுநர் உதயன் நா. லோகேந்திரலிங்கம் பல வருடங்களாகத் தமிழ்த் தேசியப் பசுமை இயக்கம் பின்தங்கிய பிரதேசங்களிலுள்ள மாணவர்களுக்கு அப்பியாசக் கொப்பிகளை விநியோகிப்பதற்குரிய நிதியை ஏற்பாடுசெய்து வழங்கி வருகின்றமை குறிப்பிடத்தக்கது.

தமிழக முதல்வருடன் தமிழ்த்தேசியப் பேரவையினர் சந்திப்பு

ஏனைய கட்சிகளின் தலைவர்களையும் விரைவில் சந்திக்கவுள்ளனர்

தமிழக முதலமைச்சர் மு.க.ஸ்டாலினை தலைமைச் செயலகத்தில் நேற்று வியாழக்கிழமை (18.12.2025) கஜேந்திரகுமார் தலைமையிலான தமிழ்த்தேசியப் பேரவையினர் சந்தித்துப் பல்வேறு விடயங்கள் தொடர்பாகக் கலந்துரையாடினர். இச்சந்திப்பில் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன், தமிழ்த் தேசிய மக்கள் முன்னணியின் பொதுச் செயலாளர் செல்வராஜா கஜேந்திரன், அக்கட்சியின் உத்தியோகபூர்வ பேச்சாளர் சுகாஸ் கனகரத்தினம், கொள்கைப் பரப்புச் செயலாளர் நடராஜா காண்டீபன், தேசிய அமைப்பாளர் த. சுரேஸ் ஆகியோர் பங்கேற்றிருந்தார்கள்.

இச்சந்திப்பின்போது தமிழ்த்தேசியப் பேரவையினரால் இலங்கை அரசின் மீது அழுத்தங்களைப் பிரயோகித்து ஏக்கிய ராஜ்ய அரசியலமைப்பு நிறைவேற்றப்படுவதைத் தடுத்து நிறுத்தவும், புதிய அரசாங்கம் உருவாக்கவுள்ள புதிய அரசியலமைப்பில் தமிழ்த் தேசத்தின் தனித்துவமான இறைமையின் அடிப்படையில், சுயநிர்ணய உரிமையை அனுபவிக்கக்கூடிய சமஸ்டி முறைமை உருவாக்கப்படுவதனை உறுதிப்படுத்துவதற்குத் தமிழக அரசு இந்நிய மத்திய அரசை வலியுறுத்த வேண்டும் எனக் கேட்டுக்கொண்டுள்ளனர்.

மேலும், பொருளாதார ரீதியாகப் பாரிய பின்னடைவைச் சந்தித்துள்ள இலங்கை அரசாங்கம் இந்தியாவின் பங்களிப்பின்றி வளர்ச்சியடைய முடியாது. தமிழகத்தோடு பொருளாதார ரீதியில் நெருக்கமான உறவையும் தொடர்பாடலையும் உருவாக்காமல் இலங்கையின் பொருளாதார வளர்ச்சியென்பதும் பாரிய சவாலாகவே இருக்கும். இதன் பின்னனியில் இலங்கையின் மீது கணிசமான அழுத்தத்தை ஏற்படுத்தி, தமிழர்கள் விரும்பும் தீர்வை இந்தியாவினால் சாத்தியமாக்க முடியும் என்றும் தெரிவித்தனர்.

அத்தோடு, தமிழக மற்றும் ஈழக் கடற்றொழிலாளர்கள் பிரச்சினை தொடர்பாகவும் உரையாடி இருந்தார்கள். நீண்டகாலமாகத் தீர்க்கப்படாமல் இருக்கும் தமிழக மீனவர்களின் எல்லை தாண்டும் பிரச்சினையை இலங்கை அரசு தனக்கு வாய்ப்பாகப் பயன்படுத்தி தமிழகத்தையும் ஈழத் தமிழர்களையும் நிரந்தரப் பகையாளிகளாக மாற்றும் முயற்சியில் ஈடுபட்டு வருகிறது என்றும், இதனை வாய்ப்பாகப் பயன்படுத்தி இந்திய நலன்களுக்கு முரணான வெளிச்சக்திகள் இலங்கையில் காலூன்றி வருவதனையும் சுட்டிக்காட்டியிருந்தார்கள். எல்லை தாண்டிய மீன்பிடியைக் கட்டுப்படுத்தி இப்பிரச்சினைக்கு நிரந்தர தீர்வைக்காணத் தமிழக அரசு தலையிடவேண்டும் என்றும் கேட்டுக்கொண்டார்கள்.

சந்திப்பின் முடிவில் தமிழ்த்தேசியப் பேரவையின் சார்பில் கஜேந்திரகுமார் பொன்னம்பலம் புதிய அரசியல் அமைப்புத் தொடர்பாகவும் தமிழக மீனவர்கள் எல்லை தாண்டும் பிரச்சினை தொடர்பாகவும் முதலமைச்சர் மு.க. ஸ்டாலினிடம் தனித்தனியான கோரிக்கைக் கடிதங்களைக் கையளித்தார். முதலமைச்சரின் சந்திப்பின் பின்னர் ஏனைய கட்சிகளின் தலைவர்களையும் விரைவில் சந்திக்கவிருப்பதாகத் தமிழ்த் தேசியப் பேரவையின் தரப்பில் தெரிவிக்கப்பட்டுள்ளது. இச்சந்திப்பின்போது இந்திய நாடாளுமன்ற உறுப்பினரும் விடுதலைச் சிறுத்தைகள் கட்சியின் தலைவருமான தொல். திருமாவளவனும் கலந்துகொண்டிருந்தார்.

பசுமை அமைதி விருதுகள் - 2025

பசுமை அமைதி விருதுகளுக்கான சூழல் பொதுஅறிவுப் பரீட்சை

மாணவர்களிடமிருந்து விண்ணப்பங்கள் கோரப்பட்டுள்ளன

நாட்டைப் புரட்டியெடுத்த டிட்வா புயலின் தாக்கங்கள் இன்னும் ஓயவில்லை. வெள்ளம் பாய்ந்த பிரதேசங்களிலிருந்து இடம்பெயர்ந்த மக்களில் பெரும்பாலானோர் இன்றும் முகாம்களிலேயே தங்கியுள்ளனர். பாடசாலைகள் சில பிரதேசங்களில் இன்னமும் முழுமையாகத் திறக்கப்படவில்லை. நாம் எமது சூழல் விரோத செயற்பாடுகள் காரணமாக இயற்கைச் சீற்றங்களை வேகம் கொள்ளவைத்துள்ளதோடு, அவை தாக்குகின்ற தடவைகளையும் அதிகரிக்கச் செய்துள்ளோம். டிட்வா புயல் இவ்வளவு பேரழிவுகளை ஏற்படுத்தியதற்கான பிரதான காரணம் நாம் பூமியை அளவுக்கு அதிகமாகச் சூடுபடுத்தி வருவதுதான் என்று சூழலியலாளர்கள் தெரிவித்துள்ளனர்.

சூழல் பாதுகாப்பில் மிகப்பெரும் பங்கு இளைய தலைமுறையினரான மாணவர்களுக்கு உரியது. அவர்களிடையே சூழற் கல்வியைப் புகட்டி, சூழல் விழிப்புணர்வை ஏற்படுத்துவதன் மூலம் மட்டுமே அவர்களை சூழல் பாதுகாப்பில் பங்குபற்றுநர்களாக்க முடியும். அந்த வகையிலேயே, நாம் ஆண்டுதோறும் மாணவர்களிடையே சூழல் பொதுஅறிவுப் பரீட்சையை நடாத்திப் பசுமை அமைதி விருதுகளை வழங்கி வருகின்றோம். இந்த ஆண்டும் புயல் காரணமாக பாடசாலைகளின் இயல்புநிலை பாதிக்கப்பட்டுள்ளபோதும் இப்பரீட்சையை நடாத்தவேண்டியது அவசியமாகின்றது.

மாணவர்களிடையே 2025ஆம் ஆண்டுக்கான பசுமை அமைதி விருதுக்குரியவர்களைத் தெரிவுசெய்யும் பொருட்டுச் சூழல் பொதுஅறிவுப் பரீட்சை இணையவழியூடாக 28.12.2025 (ஞாயிற்றுக்கிழமை) முன்னிரவு 7.00 மணி தொடங்கி 8.30 மணிவரை நடைபெறவுள்ளது. இப்பரீட்சையில் தரம் 9 முதல் 13 வரை பயிலும் இலங்கையை வதிவிடமாகக் கொண்ட மாணவர்கள் எவரும் தோற்ற முடியும். இலவசமாக நடைபெறவுள்ள இப்பரீட்சையில் தோற்ற விரும்பும் மாணவர்கள் www.tamilnationalgreen.org இணையத்தளத்தின் ஊடாக 25.12.2025 இற்கு முன்பாகப் பதிவுகளை மேற்கொள்ளுதல் வேண்டும்.

இப்பரீட்சையில் சித்தியடையும் அனைத்து மாணவர்களும் பசுமை அமைதிச் சான்றிதழ்கள் வழங்கிக் கௌரவிக்கப்படுவார்கள். இவர்களிலிருந்து முதல் 250 மாணவர்கள் தெரிவு செய்யப்பட்டு பசுமை அமைதிச் சான்றிதழோடு சிறப்புப் பரிசுகளும் வழங்கிக் கௌரவிக்கப்படுவார்கள். இவர்களில் முதல் 3 மாணவர்கள் பசுமை அமைதிச் சான்றிதழ், சிறப்புப் பரிசுகளுடன் சூழலியல் ஆசான் க. சி. குகதாசன் ஞாபகார்த்தப் பசுமை அமைதி விருதும் வழங்கிக் கௌரவிக்கப்படுவார்கள். முதலாம் இடத்தைப் பெறும் மாணவர் 1 பவுண் தங்கப் பசுமை அமைதி விருதும், இரண்டாம் இடத்தைப் பெறும் மாணவர் வெள்ளிப் பசுமை அமைதி விருதும், மூன்றாம் இடத்தைப் பெறும் மாணவர் வெண்கலப் பசுமை அமைதி விருதும் வழங்கிக் கௌரவிக்கப்படுவார்கள்.

தமிழ்த்தேசியப் பசுமை இயக்கத்தால்

உலருணவுப் பொதிகள் விநியோகம்

தமிழ்த்தேசியப் பசுமை இயக்கம் அற்றார் அழிபசி தீர்த்தல் செயற்திட்டத்தின்கீழ் டிட்வா புயல் ஏற்படுத்திய வெள்ளம் காரணமாக பாதிக்கப்பட்ட பொருளாதார ரீதியாக மிகவும் நலிவுற்றிருக்கும் குடும்பங்களில் முதல் கட்டமாக 110 குடும்பங்களைத் தெரிவுசெய்து நேற்று செவ்வாய்க்கிழமை (09.12.2025) அத்தியாவசிய உலருணவுகள் அடங்கிய பொதிகளை வழங்கி வைத்துள்ளது. யாழ். மாவட்டத்தின் வெள்ளத்தால் பாதிக்கப்பட்ட தாழ்நிலப் பிரதேசங்களான நாவாந்துறை, கல்லுண்டாய் ஆகிய பகுதிகளில் இருந்து இக்குடும்பங்கள் தெரிவுசெய்யப்பட்டுள்ளன.

உலருணவுப் பொதிகள் லக்ஸ்மி பிளாசா மண்டபத்தில் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் வழங்கி வைக்கப்பட்டுள்ளன. இதற்கான நிதியை அமரர் பொ. பரமேஸ்வரனின் பிறந்த தினத்தை முன்னிட்டு அவரது பிள்ளைகள் வழங்கியிருந்தனர். இந்நிகழ்ச்சியில் திருமதி பராசக்தி பரமேஸ்வரன், தமிழ்த்தேசியப் பசுமை இயக்கத்தின் பொதுச்செயலாளர் ம.கஜேந்திரன், உப பொதுச்செயலாளர் சண்.தயாளன் ஆகியோர் கலந்துகொண்டு உலருணவுப் பொதிகளை வழங்கி வைத்துள்ளார்கள்.

தமிழ்த்தேசியப் பசுமை இயக்கம் கொரோனாப் பேரிடர் ஏற்பட்ட 2020ஆம் ஆண்டு காலப்பகுதியிலிருந்து பொருளாதார ரீதியான மிகவும் பின்தங்கிய குடும்பங்களுக்கு பகிர்ந்துண்டு வாழ்வோம் என்ற கருப்பொருளில் அற்றார் அழிபசி தீர்த்தல் செயற்திட்டத்தின் மூலம் உலருணவுப் பொதிகளைத் தொடர்ச்சியாக வழங்கி வருகின்றமை குறிப்பிடத்தக்கது.

தாவரங்களை அடையாளம் காணும் தாவராவதானி போட்டி

நல்லூர் திவ்ய ஜீவன சங்க மண்டபத்தில் 26ஆம் திகதி

வடமாகாண மரநடுகை மாதத்தில் தமிழ்த்தேசியப் பசுமை இயக்கம் ஆண்டுதோறும் நடாத்திவரும் தாவராவதானிப் போட்டி இம்முறையும் நடைபெறவுள்ளது. இயற்கை எனது நண்பன் என்று இயற்கையை நேசித்த தமிழர் வாழ்வியல் இன்று இயற்கையில் இருந்து தூரவிலகிச் சென்றுகொண்டிருக்கிறது. இதுவே இன்றைய சூழற் பிரச்சினைகளுக்கெல்லாம் தலையாய காரணம். இதனைக் கருத்திற் கொண்டு தமிழ்த் தேசியப் பசுமை இயக்கம் இயற்கையை நேசிக்கக் கற்றுக் கொடுக்கும் வகையில் தாவரங்களை அடையாளம் காணும் தாவராவதானிப் போட்டியை நடாத்தி வருகிறது. இந்த ஆண்டுக்கான இப்போட்டி எதிர்வரும் 26ஆம் திகதி புதன்கிழமை பிற்பகல் 3 மணிக்கு நல்லூர் திவ்ய ஜீவன சங்க மண்டபத்தில் (சட்டநாதர் ஆலயத்திற்கு அருகாமையில்) நடைபெறவுள்ளது.

தாவராவதானி போட்டியில் மாணவர்கள் மாத்திரம் அல்லாது பால், வயது வேறுபாடின்றி எவரும் முன்பதிவு இல்லாமல் கலந்துகொள்ளமுடியும். போட்டியில் வெற்றி பெறுபவர்களுக்கு தாவராவதானி சான்றிதழோடு பரிசுகளும் வழங்கப்படும் எனவும், மேலதிக விபரங்கள் தேவைப்படின் 0775565460 என்ற இலக்கத்துடன் தொடர்புகொள்ளலாம் எனவும் தமிழ்த் தேசியப் பசுமை இயக்கம் தெரிவித்துள்ளது.

பெரும் வரவேற்பைப் பெற்றுள்ள

'கார்த்திகை வாசம்' மலர்க்கண்காட்சி

தமிழ்த்தேசியப் பசுமை இயக்கம் நல்லூர் சங்கிலியன் பூங்காவில் 'கார்த்திகை வாசம்' என்ற பெயரில் மலர்ச்செடிகள் மற்றும் மரக்கன்றுகளைக் காட்சிப்படுத்தி விற்பனை செய்யும் 'மலர் முற்றம்' என்ற காட்சித் திடலை கடந்த 14ஆம் திகதி (வெள்ளிக்கிழமை) திறந்து வைத்துள்ளது. வடமாகாண மரநடுகை மாதத்தை முன்னிட்டு ஏற்பாடு செய்யப்பட்டுள்ள இம்மலர் முற்றத்தில் யாழ்ப்பாணம், கிளிநொச்சி மாவட்டங்களைச் சேர்ந்த தாவர உற்பத்தியாளர்கள் காட்சிக்கூடங்களை அமைத்துள்ளனர். கூடவே, இயற்கை உரங்கள், இயற்கை கிருமிநாசினிகள், இயற்கை முறையில் விளைவிக்கப்பட்ட பழங்கள் ஆகியனவற்றை விற்பனை செய்யும் காட்சிக்கூடங்களும் அமைந்துள்ளன.

இம் மலர்க்கண்காட்சியில் தினமும் பல நூற்றுக்கணக்கானவர்கள் மலர்ச் செடிகளையும், மரக்கன்றுகளையும், இயற்கை உரங்களையும் ஆர்வத்துடன் வாங்கிச் செல்வதைக் காணக்கூடியதாகவுள்ளது. தமிழ்த்தேசியப் பசுமை இயக்கம் வழமைபோன்றே இந்த ஆண்டும் பாடசாலை மாணவர்களுக்கு இலவசமாக மரக்கன்றுகளை வழங்கி வருகின்றமையால் மாணவர்களும் ஆர்வத்துடன் கலந்துகொள்கின்றனர்.

பொது மக்களிடம் பெரும் வரவேற்பைப் பெற்றுள்ள இம் மலர்க்கண்காட்சியைப் பார்வையாளர்கள் எதிர்வரும் 23ஆம் திகதி (ஞாயிற்றுக்கிழமை) வரை தினமும் காலை 8.30 மணிமுதல் முன்னிரவு 7.00 மணிவரை பார்வையிடலாம் எனத் தெரிவிக்கப்பட்டுள்ளது.

'கார்த்திகை வாசம்' மலர்க்கண்காட்சி

கிட்டு பூங்காவில் கோலாகல ஆரம்பம்

தமிழ்த்தேசியப் பசுமை இயக்கத்தின் 'கார்த்திகை வாசம்' மலர்க்கண்காட்சி நேற்று வெள்ளிக்கிழமை (14.11.2025) நல்லூர் சங்கிலியன் பூங்காவில் (கிட்டு பூங்கா) கார்த்திகைப் பூச்சூடி கோலாகலமாக ஆரம்பமாகியுள்ளது. இவ்விழாவில் இந்திய நாடாளுமன்ற உறுப்பினரும், விடுதலைச் சிறுத்தைகள் கட்சியின் தலைவருமான முனைவர் தொல். திருமாவளவன் பங்கேற்றிருந்தார்.

பசுமை இயக்கத்தின் சுற்றுச்சூழல் பாதுகாப்பு அணியின் துணைச் செயலாளர் தம்பிராசா யுகேஸ் தலைமையில் நடைபெற்ற இவ்விழாவில் பிரதம விருந்தினராக யாழ்ப்பாணப் பல்கலைக்கழகத்தின் தமிழ்த்துறையின் மேனாள் தலைவர் பேராசிரியர் சி.சிவலிங்கராஜா அவர்கள் கலந்து கொண்டிருந்தார். பசுமை இயக்கத்தின் தலைவர் பொ. ஐங்கரநேசன் தொடக்க உரையாற்ற, அரசியல் ஆய்வாளர் நிலாந்தன் சிறப்புரை ஆற்றியிருந்தார். கா.சோ.சிவநேசன் வரவேற்புரையாற்ற, நிகழ்ச்சியை ந.ஐங்கரன் தொகுத்து வழங்கியிருந்தார்.

கண்காட்சித் திடல் நிறைந்த சனத்திரளுடன் இடம்பெற்ற இவ்விழாவில் நீர்வேலி பொன்சக்தி கலாகேந்திரா குழுவினரின் மரநடுகைப் பாடல் நாட்டிய நடன நிகழ்ச்சியும் இடம்பெற்றிருந்தது.

தமிழ்த்தேசியப் பசுமை இயக்கம் தாவர உற்பத்தியாளர்களுடன் இணைந்து நடாத்தும் இம் மலர்க்கண்காட்சி எதிர்வரும் 23ஆம் திகதி வரை தினமும் காலை 8.30 மணி தொடக்கம் இரவு 7.30 மணிவரை நடைபெறவுள்ளது. இக்கண்காட்சியைப் பார்வையிடும் மாணவர்களுக்கு இலவசமாக மரக்கன்றுகள் வழங்கப்படுகின்றன.

தமிழ்த்தேசியப் பசுமை இயக்கம் வடமாகாண மரநடுகை மாதத்தை முன்னிட்டு பொதுமக்கள் மரக்கன்றுகளை இலகுவாகப் பெற்றுக்கொள்ளும் நோக்கில் ஆண்டுதோறும் இக்கண்காட்சியை நடாத்தி வருகின்றமை குறிப்பிடத்தக்கது.

கார்த்திகையில் மரநடுகை தேசத்தை மாத்திரமல்ல ;

தமிழ்த்தேசியத்தின் ஆன்மாவையும் குளிரச்செய்யும்

- பொ. ஐங்கரநேசன் தெரிவிப்பு

வருடத்தில் எத்தனையோ நாட்களில் நாம் பொங்கி அமுதுண்டாலும் இயற்கையைப் போற்றி வழிபடுகின்ற தைப்பொங்கலே தமிழர்களின் தேசியப்பொங்கல் திருநாளாகக் கொண்டாடப்படுகின்றது. அதேபோன்று, வருடத்தில் எல்லா நாட்களிலும் மரங்களை நடுகைசெய்ய இயலுமெனினும் கார்த்திகைமாத மரநடுகையே தமிழர்களின் தேசிய அடையாளத்துடன் கூடியதாகும். கார்த்திகையில் மரங்களை நடுகைசெய்தல் தேசத்தைக் குளிரச்செய்யும் சூழலியற்செயல் மாத்திரமல்ல; அது தமிழ்த்தேசியத்தின் ஆன்மாவையும் குளிரச்செய்யும் ஒரு தேசியச்செயற்பாடும் ஆகும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தெரிவித்துள்ளார்.

வடக்கு மாகாணசபையின் தீர்மானத்துக்கு அமைவாக 2014ஆம் ஆண்டு முதல் கார்த்திகை மாதம் வடமாகாண மரநடுகை மாதமாகக் கடைப்பிடிக்கப்படுகிறது. இதனை முன்னிட்டு பொ. ஐங்கரநேசன் வெளியிட்டுள்ள ஊடகஅறிக்கையிலேயே இவ்வாறு தெரிவித்துள்ளார்.

அந்த அறிக்கையில் அவர் மேலும் குறிப்பிடுகையில்,

பூமி விரைந்து சூடேறி வருவதால் காலநிலையில் படுபாதகமான மாற்றங்கள் ஏற்படத் தொடங்கியுள்ளன. அதிவேகத்துடன் நீண்ட நேரம் நின்று தாக்கும் சூறாவளிகள், காலம் தப்பிக் கொட்டித் தீர்க்கும் அடை மழை, காடுகளில் தீ மூட்டும் கடும் வறட்சி, உயர்ந்து செல்லும் கடல் மட்டம், உயிரினங்களின் பேரழிவு என்று காலநிலை மாற்றத்தின் விளைவுகளை நாம் தற்போது அனுபவிக்கத் தொடங்கியுள்ளோம். இதனால், வெப்பநிலை அதிகரிப்புக்குக் காரணமான கரியமிலவாயுவை உறிஞ்சி அகற்றுவதற்கு மரங்களின் நடுகையை ஒரு பேரியக்கமாக முன்னெடுக்கவேண்டிய கட்டாய நிலைக்கு நாம் தள்ளப்பட்டுள்ளோம்.

மரநடுகையைப் பெருமளவில் மேற்கொள்வதற்கு கூடுதலான மழைவீழ்ச்சியைப் பெறும் கார்த்திகை மிகப்பொருத்தமான மாதமாகும். ஈழத்தமிழர்களின் வாழ்வியலிலும் கார்த்திகை மாதம் தனித்துவமான இன்னுமொரு சிறப்பினைக் கொண்டுள்ளது. இம்மாதத்திலேயே மண்ணுக்காக மரணித்த மறவர்களைக் கூட்டாக நினைவிற்கொள்ளும் நாள் அடங்குகிறது. மரவழிபாட்டைத் தமது ஆதி வழிபாட்டு முறையாகக்கொண்ட தமிழர்கள், இறந்தவர்களின் நினைவாக மரங்களை நடுகைசெய்து, அவற்றை உயிருள்ள நினைவுச்சின்னங்களாகப் போற்றிய பண்பாட்டு மரபைக் கொண்டிருக்கின்றனர்.

தேசியம் என்பது வெறுமனே தட்டையான ஒர் அரசியற் சொல்லாடல் அல்ல. இது ஒரு இனத்தின் வாழ்புலம், மொழி, வரலாறு, பண்பாடு, மத நம்பிக்கைகள் ஆகிய கூறுகளின் திரட்சியான ஒரு வாழ்க்கை முறையாகும். அந்த வகையில், கார்த்திகைமாத மரநடுகை என்பது தமிழ்த்தேசிய நோக்கிலும் மிகவும் பொருத்தப்பாடான ஒன்றாகும். எனவே தமிழ் மக்கள் கார்த்திகை மரநடுகையை ஒரு சூழல்பேண் நடவடிக்கையாக மாத்திரமல்லாது உணர்வெழுச்சியுடன்கூடிய ஒரு தமிழ்த்தேசியச் செயற்பாடாகவும் கொண்டாட வேண்டியது அவசியமாகும் என்றும் தெரிவித்துள்ளார்.

பசுமை இயக்கத்தின் சமகால அரசியல் உரையரங்கு

கொட்டும் மழையின் மத்தியிலும் சிறப்பாக நிகழ்ந்தேறியது

தமிழ்த்தேசியப் பசுமை இயக்கத்தின் ஏற்பாட்டில் சமகால அரசியல் தொடர்பான உரையரங்கு 12.10.2025 (ஞாயிற்றுக்கிழமை) மாலை 3.00 மணியில் இருந்து மாலை 5.30 மணிவரை பருத்தித்துறை வீதியில், நல்லூர் சட்டநாதர் ஆலயத்துக்கு அருகாமையில் அமைந்துள்ள திவ்ய ஜீவன சங்க மண்டபத்தில் நடைபெற்றது.

தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் நடைபெற்ற இவ்வுரையரங்கில் 'தமிழ் மக்களும் செம்மணியும்' என்ற தலைப்பில் சுயாதீன ஊடகவியலாளர் து. ஜெயராஜ் (ஜெரா), 'தமிழ் மக்களும் தேசிய மக்கள் சக்தியின் ஒரு வருடகால ஆட்சியும்' என்ற தலைப்பில் யாழ். பல்கலைக்கழகத்தின் அரசறிவியல் துறையின் முதுநிலை விரிவுரையாளர் பேராசிரியர் கே.ரி. கணேசலிங்கம், 'தமிழ் மக்களும் புதிய அரசியல் அமைப்பும்' என்ற தலைப்பில் கௌரவ நாடாளுமன்ற உறுப்பினர் கஜேந்திரகுமார் பொன்னம்பலம் ஆகியோர் உரையாற்றியிருந்தார்கள்.

செம்மணிப் படுகொலைகள் தொடர்பான கவிதை வாசிப்பும் இடம்பெற்ற இந்நிகழ்ச்சியில் கொட்டும் மழையின் மத்தியிலும் மண்டபம் நிறைந்த அளவுக்குப் பார்வையாளர்கள் கலந்து கொண்டிருந்தார்கள்.

முள்ளியவளையில் மிகவும் சிறப்பாக நடைபெற்ற

'வேர்முகங்கள்' அறிமுக விழா

கலை, இலக்கியப் பேராளுமைகளுடன் தமிழ்த் தேசியப் பசுமை இயக்கத்தின் தலைவரும் வடக்கு மாகாணசபையின் மேனாள் அமைச்சருமான பொ. ஐங்கரநேசன் மேற்கொண்ட நேர்காணல்களின் தொகுப்பு வேர்முகங்கள் என்ற பெயரில் எங்கட புத்தகங்கள் பதிப்பகத்தின் ஊடாக அண்மையில் வெளியிடப்பட்டது . இந்நூலுக்கான அறிமுக விழா கடந்த ஞாயிற்றுக்கிழமை(05.10.2025) , பிற்பகல் 3 மணிக்குத் தண்ணீரூற்று (குமுழமுனைச் சந்தி) முள்ளியவளையில் அமைந்துள்ள பரி-மத்தியா ஆலய மண்டபத்தில் மண்டபம் நிறைந்த பார்வையாளர்களுடன் மிகவும் சிறப்பாக நடைபெற்றது.

முல்லை மாவட்ட மேலதிக அரசாங்க அதிபர் சி. குணபாலன் தலைமையில் நடைபெற்ற இவ்வறிமுக விழாவில் கருத்துரைகளை ஊடகவியலாளர் தி. திவாகர் மற்றும் சமூக ஆய்வாரள் தெ. மதுசூதனன் ஆகியோர் நிகழ்த்தி இருந்தார்கள் .

யாழ்ப்பாணப் பல்கலைக்கழகத் தமிழ்த் துறையின் முதுநிலை விரிவுரையாளர் க. அருந்தாகரன் அறிமுக உரையை நிகழ்த்த, நூலின் அறிமுகப்பிரதியை மூத்த பாடலாசிரியர் பெ. செல்லக்குட்டி வழங்கி வைத்தார்.

பல்துறைக் கலைஞர் செ. மயில்வாசன் தொகுத்து வழங்கிய இந்நிகழ்ச்சியில், வரவேற்புரையை கவிஞர் யோ. புரட்சி ஆற்ற, நிகழ்ச்சியின் இறுதியில் ஏற்புரையை நூலாசிரியர் பொ. ஐங்கரநேசன் நிகழ்த்தினார்.

நிகழ்ச்சியின் ஆரம்பத்தில் பார்வையாளர்களை நூல்வெளியீட்டின் மையப் பொருளை .நோக்கித் திசைமுகப்படுத்தும் நோக்குடன் கவிதை வாசிப்பு இடம்பெற்றமை குறிப்பிடத்தக்கது. கவிஞர் புதுவை இரத்தினதுரை, கவிஞர் சு.வில்வரத்தினம், கவிஞர் கி.பி அரவிந்தன், கவிஞர் இன்குலாப் ஆகியோருடைய கவிதைகளை சி.நாகேந்திரராசா, சு.ஜெயராஜசிங்கம், சிலை வேந்தன், அனுகரி வதனி ஆகியோர் வாசித்தளித்திருந்தனர்.

சிறப்பாக நிகழ்ந்தேறிய

வேர்முகங்கள் நூல் வெளியீடு

பொ. ஐங்கரநேசன் நிகழ்த்திய நேர்காணல்களில் இருந்து இருபது கலை, இலக்கியப் பேராளுமைகளுடனான உரையாடல்கள் தொகுக்கப்பட்டு வேர்முகங்கள் என்ற நூலாக வெளியாகியுள்ளது. இதற்கான வெளியீட்டு விழா யாழ். பல்கலைக்கழகக் கைலாசபதி கலையரங்கில் நேற்று ஞாயிற்றுக்கிழமை (14.09.2025) மிகவும் சிறப்பாக நிகழ்ந்தேறியது.

யாழ். பல்கலைக்கழகச் சைவசித்தாந்தத் துறையின் தலைவர் கலாநிதி தி. செல்வமனோகரனின் தலைமையில் நடைபெற்ற இவ்விழாவில், கருத்துரைகளை ஊடகவியலாளரும் படைப்பாளியுமான சர்மிலா வினோதினி, சமூக ஆய்வாளர் தெ. மதுசூதனன் ஆகியோர் ஆற்றியிருந்தார்கள்.

வெளியீட்டு உரையை இந்நூலை வெளியிட்ட எங்கட புத்தகங்கள் பதிப்பகத்தின் பணிப்பாளர் கு. வசீகரன் ஆற்ற, நூலை மூத்த இலக்கியவாதி க. சட்டநாதன் வெளியிட்டு வைத்தார். சொல்லேர் உழவர் கவிஞர் புதுவை இரத்தினதுரைக்குச் சமர்ப்பணம் செய்யப்பட்டிருந்த இந்நூலின் முதற் பிரதியை அவரது சகோதரி இராஜலட்சுமி பத்மநாதன் பெற்றுக்கொண்டார்.

பல வருடங்களுக்கு முன்னர் தமிழகத்தில் வெளியாகிய வேர்முகங்கள் தொகுப்பு, ஓர் ஆவணப் பதிப்பாக இப்போது புதிதாக மேலும் ஒரு நேர்காணல் உள்ளடக்கப்பட்டு இலங்கையில் வெளியாகியுள்ளது. இந்நூலில் ஈழத்துக் கலை இலக்கிய ஆளுமைகள் கலாநிதி சி. மௌனகுரு, கலாநிதி நா. சுப்பிரமணியன், செங்கை ஆழியான், சு. வில்வரத்தினம், புதுவை இரத்தினதுரை, கலாநிதி பரமு புஸ்பரட்ணம், இ. பத்மநாபஐயர், ஞானரதன், கி.பி.அரவிந்தன் ஆகியோரதும், தமிழகத்தைச் சேர்ந்த பாரதிராஜா, சுஜாதா, டிராட்ஸ்கி மருது, சா. கந்தசாமி, மணவை முஸ்தபா, தி.சு. சதாசிவம், த. ஜெயகாந்தன், அறிவுமதி, டி.திலீப்குமார், பாரதிபுத்திரன், இன்குலாப் ஆகியோரதும் நேர்காணல்கள் இடம்பெற்றுள்ளன.

அரங்கு நிறைந்த பார்வையாளர்களுடன் நடைபெற்ற இவ்விழாவில் வரவேற்புரையை கலை இலக்கியச் செயற்பாட்டாளர் கை. சரவணன் நிகழ்த்த, விழாவின் இறுதியில் ஏற்புரையை நூலின் ஆசிரியர் பொ. ஐங்கரநேசன் நிகழ்த்தினார்.

வன்மம் - கிரிஷாந்தி

கொலை வழக்கு தொடர்பான

நீதிமன்ற விசாரணைகளின் தொகுப்பு

மனித உரிமைச் செயற்பாட்டாளரும் சட்டத்தரணியுமான பகவதாஸ் ஸ்ரீஸ்கந்ததாஸ் தொகுத்த கிரிஷாந்தி கொலை வழக்கு தொடர்பான நீதிமன்ற விசாரணைகள் வன்மம் என்ற பெயரில் அண்மையில் நூலாக வெளியிடப்பட்டுள்ளது. இதன் அறிமுக நிகழ்ச்சி கடந்த செப்டம்பர் 2ஆம் திகதி செம்மணிச் சந்தியில் நடைபெற்றது .

சமூக ஆய்வாளர் தெ.மதுசூதனன் தலைமையில் நடைபெற்ற இந்நிகழ்ச்சியில் தமிழ்த்தேசியப் பசுமை இயக்கத்தின் தலைவர் பொ.ஐங்கரநேசன், நடராஜர் காண்டீபன், நாகமுத்து இன்பநாயகம் ,தரிந்து உடுவரகெதர ,கத்யான அமரசிங்ஹ, ரனித்தா ஞானராஜா உதயசீலன் கற்கண்டு ஆகியோர் உரையாற்றியிருந்தார்கள் .

இந்நிகழ்ச்சியில் தமிழ்த் தேசிய மக்கள் முன்னணியின் தலைவரும் நாடாளுமன்ற உறுப்பினருமான கஜேந்திரகுமார் பொன்னம்பம், பொதுச்செயலாளர் செல்வராஜா கஜேந்திரன் உட்பட ஏராளமானோர் கலந்துகொண்டிருந்தார்கள்.

வீட்டுத்தோட்டம் விவசாயப் பாடம் கற்கும்

மாணவர்களுக்கானது என்ற மனோநிலை மாறவேண்டும்

‘மாணாக்கஉழவர்’ நிகழ்ச்சியில் பொ.ஐங்கரநேசன் இடித்துரைப்பு

பாடசாலைகளில் பயிர்த் தோட்டங்கள் அமைப்பதற்குக் கல்வி அமைச்சும் அரசசார்பற்ற நிறுவனங்களும் பல்வேறு உதவிகளைச் செய்து வருகின்றன. பெரும்பாலன பாடசாலைகளில் விவசாயத்தை ஒரு பாடமாகப் பயிலுகின்ற மாணவர்களே இதில் ஈடுபடுத்தப்படுகிறார்கள். அதே போன்றே, வீட்டுத்தோட்டப் போட்டிகளில் கலந்துகொள்வதற்கும் விவசாயப்பாடம் கற்கின்ற மாணவர்களே அனுப்பிவைக்கப்படுகிறார்கள். பாடசாலைத் தோட்டமோ அல்லது வீட்டுத்தோட்டமோ எல்லா மாணவர்களும் பங்கேற்க வேண்டும். இவை விவசாயப் பாடம் கற்கின்ற மாணவர்களுக்கானது என்ற மனோநிலை மாறவேண்டும் என்று தமிழ்த் தேசியப் பசுமை இயக்கத்திக் தலைவர் பொ. ஐங்கரநேசன் இடித்துரைத்துள்ளார்.

மாணவர்களிடையே வீட்டுத்தோட்டச் செய்கையை ஊக்குவிக்கும் நோக்கில் தமிழ்த் தேசியப் பசுமை இயக்கம் மாணாக்கஉழவர் என்ற வீட்டுத்தோட்டப் போட்டியை நடாத்தி வருகின்றது. இதற்கான விதைகளையும், நாற்றுகளையும் வழங்கி வைக்கும் நிகழ்ச்சி நேற்று (ஞாயிற்றுக்கிழமை 24.08.2025) நல்லூர் திவ்ய ஜீவன சங்க மண்டபத்தில் நடைபெற்றது. இந்நிகழ்ச்சிக்குத் தலைமை வகித்து உரையாற்றியபோதே பொ. ஐங்கரநேசன் இவ்வாறு தெரிவித்துள்ளார்.

அங்கு அவர் தொடர்ந்து உரையாற்றுகையில்,

பெரும்பாலான பெற்றோர்கள் தங்கள் பிள்ளைகளின் கல்வி பாதித்துவிடும் எனக்கருதிக் கற்றலுக்குப் புறம்பான நடவடிக்கைகளில் ஈடுபட அனுமதிப்பதில்லை. பாடப் புத்தகங்கள் தவிர வேறு புத்தகங்கள் வாசிப்பதற்குக்கூட விடுவதில்லை. இவற்றால் பரீட்சைப் பெறுபேறுகள் குறைந்து விடும் என்று அவர்கள் நம்புகிறார்கள். இது தவறான நம்பிக்கை. பாடசாலைகளில் கூடுதலான புள்ளிகளைப் பெறுபவர்களும், உயர்சித்திகளைப் பெற்று முன்னணியில் நிற்பவர்களும் பாடங்களில் மாத்திரம் கவனம் செலுத்துகின்ற புத்தகப் பூச்சிகள் அல்லர். இவர்கள் கற்றலுக்குப் புறம்பான நடவடிக்கைகளில் ஈடுபடுபவர்களுமாகவே உள்ளார்கள்.

மாணவர்கள் கூடுதலான புள்ளிகளைப் பெறவேண்டும் என்பதற்காக அவர்களை எந்நேரமும் படிபடி என்று நச்சரிப்பதும், கற்றலுக்குப் புறம்பான நடிவடிக்கைகளில் அவர்கள் ஈடுபடுவதைத் தடுப்பதும் மாணவர்களின் கல்வி வளர்ச்சியில் உயர்வுக்குப் பதிலாகப் பாதிப்பையே ஏற்படுத்துகின்றன. வீடுகளில் மாணவர்கள் கற்கும்போது நேரஅட்டவணை போட்டு அதன்படிதான் மாணவர்கள் படிக்க வேண்டும் எனப் பெற்றோர்கள் வற்புறுத்துவதுகூடப் பிழையானது என்று உளவியல் நிபுணர்கள் தெரிவித்துள்ளனர். இவை ஏற்படுத்தும் மனஅழுத்தங்களில் இருந்து விடுபடும் ஒரு வழியாகவே மாணவர்கள் தவறான பாதைக்குச் செல்கிறார்கள்.

வீட்டுத்தோட்டங்கள் தேவையான மரக்கறி வகைகளைக் குறைந்த செலவில் தருவனவோ அல்லது நஞ்சற்ற உணவைத் தருவனவோ மாத்திரம் அல்ல. விதைகளில் முளை விடுவது தொடங்கி, அவை நாற்றாக நிமிர்ந்து, செடி கொடியாக உயர்ந்து பூத்துக் காய்க்கின்ற ஒவ்வொரு பருவமும் அவற்றை அவதானிக்கும் மாணவர்களின் மனோநிலையில் ஆரோக்கியமான மாற்றங்களை உண்டுபண்ணுகின்றன. வீட்டுத் தோட்டங்கள் மாணவர்களுக்கு உளவியல் ரீதியான ஒத்தடங்களைத் தருகின்றன என்பதைப் பெற்றோர்கள் புரிந்துகொண்டு அவர்களை வீட்டுத்தோட்டச் செய்கையில் ஈடுபட அனுமதிக்க வேண்டும் என்றும் குறிப்பிட்டுள்ளார்.

மாணாக்க உழவர் - 2025

வீட்டுத்தோட்டப் போட்டிக்கான

விதைப்பொதிகள் விநியோகமும்

செயன்முறை வழிகாட்டலும்

தமிழ்த்தேசியப் பசுமை இயக்கம் ஆண்டுதோறும் மாணவர்களிடையே நடாத்தி வரும் மாணாக்க உழவர் வீட்டுத்தோட்டப் போட்டி இந்த ஆண்டும் நடைபெறவுள்ளது. இதில் பங்கேற்பதற்காக முன்பதிவு செய்திருந்த மாணவர்களில் இருந்து முதற்கட்டமாகத் தெரிவு செய்யப்பட்ட 150 மாணவர்களுக்குரிய விதைப்பொதிகள் விநியோகமும் செயன்முறை வழிகாட்டல் கருத்தமர்வும் இன்று ஞாயிற்றுக்கிழமை[ 24-08-2025] நல்லூர் திவ்ய ஜீவன சங்க மண்டபத்தில் நடைபெற்றது.

தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் நடைபெற்ற இந்நிகழ்ச்சியில் முல்லைத்தீவு மாவட்ட பிரதி விவசாயப் பணிப்பாளர் கிருபவதனி சிவதீபன், இயற்கை விவசாயச் செயற்பாட்டாளர் திரு . காரை சி. நிரோசன், சூழகம் அமைப்பின் செயலாளர் .க.நாவலன், கல்வி மேம்பாட்டுச் செயற்பாட்டாளர் . சி. கணபதிப்பிள்ளை[ கணா ]ஆகியோர் வழிகாட்டல் கருத்துரைகளை வழங்கியிருந்தார்கள் .

தமிழ்த்தேசியப் பசுமை இயக்கம் நாட்டில் நிலவும் பொருளாதார நெருக்கடி, உணவுப்பற்றாக்குறை, மாணவர்களில் காணப்படும் போசாக்குப் பற்றாகுறைவு, நஞ்சற்ற உணவுற்பத்தி, மாணவர்களை மனஅழுத்தங்களில் இருந்து விடுவித்தல் ஆகியவனவற்றை நோக்காகக் கொண்டு மாணாக்க உழவர் என்னும் இந்தத் திட்டத்தைக் கடந்த சில வருடங்களாக முன்னெடுத்து வருகின்றது.

ஏராளமான மாணவர்கள் ஆர்வத்துடன் பங்கேற்றுவரும் இந்தப் போட்டியில் பங்கேற்கும் அனைவருக்கும் மாணாக்க உழவர் சான்றிதழ் வழங்கப்படுவதோடு , சிறப்பாக வீட்டுத்தோட்டச் செய்கையை மேற்கொள்பவர்களுக்குச் சிறப்புப் பரிசுகள் வழங்கப்பட்டு வருகின்றமையும் குறிப்பிடத்தக்கது.

மாணாக்க உழவர் - 2025

வீட்டுத்தோட்டப் போட்டிக்கான விண்ணப்பங்கள் கோரப்பட்டுள்ளன

தமிழ்த்தேசியப் பசுமை இயக்கம் மாணவர்களிடையே வீட்டுத்தோட்டச் செய்கையை ஊக்குவிக்கும் முகமாக மாணாக்க உழவர் என்னும் வீட்டுத்தோட்டப் போட்டியை ஆண்டுதோறும் நடாத்தி வருகிறது. நாட்டில் நிலவும் பொருளாதார நெருக்கடி, உணவுப்பற்றாக்குறை, நஞ்சற்ற உணவுற்பத்தி, மாணவர்களை மனஅழுத்தங்களில் இருந்து விடுவித்தல் ஆகியவனவற்றை நோக்காகக் கொண்டு முன்னெடுக்கப்பட்டுவரும் இப்போட்டியின் இந்த ஆண்டுக்கான விண்ணப்பங்கள் கோரப்பட்டுள்ளன. ஏற்கனவே வீட்டுத்தோட்டச் செய்கையில் ஈடுபட்டுள்ள மாணவர்களும், புதிதாக ஈடுபட விரும்பும் மாணவர்களும் இந்த ஆண்டுக்குரிய மாணாக்க உழவர் போட்டியில் கலந்துகொள்ள முடியும்.

போட்டியில் பங்கேற்கும் மாணவர்களுக்கான செயன்முறை வழிகாட்டற் கருத்தமர்வும் விதைப்பொதிகள் விநியோகமும் எதிர்வரும் 24.08.2025 (ஞாயிற்றுக்கிழமை) காலை 9.00 மணிக்கு பருத்தித்துறை வீதியில், நல்லூர் சட்டநாதர் ஆலயத்திற்கு அருகாமையில் அமைந்துள்ள திவ்ய ஜீவன சங்க மண்டபத்தில் நடைபெறவுள்ளது.

தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் நடைபெறவுள்ள இந்நிகழ்ச்சியில் பிரதி விவசாயப் பணிப்பாளர் கிருபவதனி சிவதீபன், இயற்கை விவசாயச் செயற்பாட்டாளர் காரை சி. நிரோசன் ஆகியோர் சிறப்புரையாற்ற உள்ளனர்.

இப்போட்டியில் கலந்துகொள்ள விரும்பும் மாணவர்கள் இம் மாதம் 22ஆம் திகதி (வெள்ளிக்கிழமை) காலை 10.30 மணிக்கு முன்பாக 0777969644 அல்லது 0741471759 என்ற தொலைபேசி இலக்கத்துடன் தொடர்புகொண்டு தங்கள் பெயர்களைப் பதிவு செய்துகொள்ளல் வேண்டும். இவ்வாறு பெயர்களைப் பதிவு செய்பவர்கள் மாத்திரமே 24ஆம் திகதி நடைபெறவுள்ள செயன்முறை வழிகாட்டல் கருத்தமர்வில் பங்கேற்க அனுமதிக்கப்படுவார்கள்.

போட்டியில் பங்கேற்கும் அனைத்து மாணவர்களுக்கும் மாணாக்க உழவர் சான்றிதழ்களும் சிறப்பாக வீட்டுத்தோட்டச் செய்கையை மேற்கொள்பவர்களுக்குச் சிறப்புப் பரிசுகளும் வழங்கப்படவுள்ளன.

இலங்கையர் தினத்தைத் கொண்டாடுவதால் மட்டும்

தமிழ் மக்களின் மனங்களை வெல்ல முடியாது

கறுப்பு யூலை நினைவுக் கருத்தரங்கில்

பொ. ஐங்கரநேசன்

மகாவலி கங்கை நாடெங்கள் நாடே என்று பெருமை பொங்கப் பாடியவர்கள் தமிழர்கள். சிங்களமும் செந்தமிழும் சேர்ந்திங்கு வாழ்வதுந்தன் பெருமையம்மா என்று சகோதரத்துவம் பாடியவர்கள் தமிழர்கள். இலங்கை என்பது எம் தாய்த்திருநாடு என்று இறுமாந்து பாடியவர்கள் தமிழர்கள். ஆனால், தமிழர்கள் தங்களை இலங்கையர்கள் என்று எவ்வளவுதான் உரத்துச் சொன்னாலும் இல்லை நீ தமிழன் என்றே பேரினவாதம் சொன்னது. தமிழர்கள் என்ற ஒரே காரணத்துக்காகவே காலத்துக்குக் காலம் தமிழர்களுக்கெதிரான கலவரங்கள் நிகழ்த்தப்பட்டன. முள்ளிவாய்க்கால் வரை இதுவே நீண்டது. இப்போது ஆடிக்கலவர நாளில் சகோதர தினத்தை முன்னெடுத்துள்ள ஜே.வி.பி அரசாங்கம் விரைவில் இலங்கையர் தினத்தைக் கொண்டாடவுள்ளது. ஆனால், இந்தத் தினங்களைக் கொண்டாடுவதால் மட்டும் தமிழ் மக்களின் மனங்களை வெல்ல முடியாது என்று தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் தெரிவித்துள்ளார்.

கறுப்பு யூலை நினைவுக் கருத்தரங்கு நேற்று ஞாயிற்றுக்கிழமை (27.07.2025) யாழ்ப்பாணம் வை.எம்.சி.ஏ மண்டபத்தில் நடைபெற்றது. இதில் கலந்து கொண்டு உரையாற்றியபோதே பொ. ஐங்கரநேசன் இவ்வாறு தெரிவித்துள்ளார்.

அங்கு அவர் தொடர்ந்து உரையாற்றுகையில்,

நினைவேந்தல்கள் வரலாற்றை நினைவுபடுத்துகின்றன. வரலாறு ஒருவரை எங்கு கொண்டு வந்து நிறுத்தியிருக்கின்றதோ அங்கிருந்துதான் அவர் தனது அடுத்த பயணத்தைத் தொடரமுடியும். நதிகளைப் போன்றே வரலாறும் பின்னோக்கிப் பாய்வதில்லை. இதுவே வரலாற்றின் நியதி. வரலாறு தமிழ் மக்களை முள்ளிவாய்க்காலில் கொண்டு வந்து நிறுத்தியது. ஆயுதப் போராட்டம் முடிவுக்குக் கொண்டுவரப்பட்ட அந்த இடத்தில் இருந்துதான் அஞ்சலோட்டம் போன்று அடுத்த போராட்டத்தைத் தமிழ் மக்கள் ஜனநாயக வழியில் முன்னெடுத்திருக்கவேண்டும். முள்ளிவாய்க்கால் பேரழிவு சர்வதேச நாடுகளை எமது போராட்டத்தின் நியாயப்பாடுகளை ஏற்றுக்கொள்ள வைப்பதற்கான சாத்தியங்களைத் தன்னகத்தே கொண்டிருந்தது. ஆனால், அதைச் செய்யத் தவறிய எமது தலைவர்கள், மாறாக இலங்கை அரசுக்கு ஐக்கிய நாடுகள் சபையில் பிணை எடுத்துக்கொடுத்தார்கள்.

வரலாறு இன்னுமொரு சந்தர்ப்பமாகச் செம்மணியில் மனிதப் புதைகுழிகளை அடையாளப்படுத்தியுள்ளது. போரின் சாட்சிகளாக, இன அழிப்பின் சாட்சிகளாக எம்முன்னால் பலர் இன்றும் உள்ளார்கள். இவர்களால் உயிர்ப்பயம் காரணமாக உண்மைகளை அதிகம் வெளிப்படுத்த முடியாது. உயிருள்ள சாட்சியங்களைவிட வலுவான சாட்சியங்களாக இன்று எம்முன்னே செம்மணி மனிதப்புதைகுழிகளும் அவற்றில் இருந்து வெளிப்படும் எமது உறவுகளின் எலும்புக்கூடுகளும் உள்ளன. எலும்புக்கூடுகள் தனது கழுத்தை இறுக்கப் போகின்றது என்று அஞ்சும் பேரினவாதம் இதனைத் திசை திருப்புவதற்கான சகல எத்தனங்களிலும் தீவிரமாக ஈடுபட்டுள்ளது. செம்மணிப் புதைகுழிகள் தந்துள்ள அரியவாய்ப்பை எமது தலைவர்கள் சரியாகப் பயன்படுத்தி நீதிக்கான, விடுதலைக்கான எமது பயணத்தை வேகமாகத் தொடர முன்வரவேண்டும் என்றும் தெரிவித்துள்ளார்.

விடுதலை அரசியலில் பண்பாட்டின் வகிபாகம் இன்றியமையாதது

ஆடிப்பிறப்பு விழாவில் பொ. ஐங்கரநேசன் சுட்டிக்காட்டு

விடுதலைக்காகப் போராடும் இனமொன்று மக்களை எழுச்சி கொள்ளவைத்து ஒருங்கிணைக்கத் தேசிய வாதத்தை முன்னிலைப்படுத்துகின்றது. இதில் அந்த இனத்தேசியத்தின் கூறுகளான மொழி, பாரம்பரிய நிலபுலங்கள், பண்பாடு ஆகியவை முதன்மை பெறுகின்றன. ஆனால், தமிழ்த்தேசிய அரசியலை முன்னெடுக்கும் கட்சிகள் மொழி, நிலம் பற்றிப் பேசுகின்ற அளவுக்கு பண்பாட்டைக் கருத்திற் கொள்ளுவதில்லை. பண்பாட்டை உள்வாங்காத தேசியவாதம் முழுமை பெறாது. அதுவும் விடுதலை அரசியலில் பண்பாட்டின் வகிபாகம் மிகவும் இன்றியமையாதது என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

பசுமை இயக்கத்தின் ஆடிப்பிறப்பு விழா கடந்த வியாழக்கிழமை (17.07.2025) நாவற்குழி முத்தமிழ் கிராமத்தில் நடைபெற்றது. இதில் கலந்துகொண்டு உரையாற்றியபோதே பொ. ஐங்கரநேசன் இவ்வாறு சுட்டிக்காட்டியுள்ளார்.

அங்கு அவர் தொடர்ந்து உரையாற்றுகையில்,

ஒரு இனத்தின் தனித்துவமான பண்பாட்டின் வெளிப்பாடுகளாகவே விழாக்களும் பண்டிகைகளும் அமைகின்றன. தமிழ் மக்களின் அறிவு ரீதியான காலக்கணிப்பீட்டையும் பகிர்ந்துண்ணும் ஆரோக்கிய உணவுப் பண்பாட்டையும் பறைசாற்றுகின்ற பண்டிகைகளாகத் தைப்பொங்கலும் ஆடிப்பிறப்பும் கொண்டாடப்படுகின்றன. சூரியன் வடக்கு நோக்கிச் செல்லும் தை முதல் ஆனி வரையான காலப்பகுதி உத்தராயண காலம் எனவும், சூரியன் தெற்கு நோக்கிச் செல்லும் ஆடி முதல் மார்கழி வரையான காலப்பகுதி தட்சணாயண காலம் எனவும் பெயரிடப்பட்டுள்ளன. இவற்றில் உத்தராயண காலத் தொடக்கம் தைப்பொங்கல் ஆகவும், தட்சணாயண காலத்தொடக்கம் ஆடிப்பிறப்பாகவும் கொண்டாடப்படுகிறது.

தைப்பொங்கல் வெகு சிறப்பாகக் கொண்டாடப்படும் அளவுக்கு ஆடிப்பிறப்பு இப்போது கொண்டாடப்படுவதில்லை. ஆடிப்பிறப்புக்கு முக்கியத்துவம் கொடுத்துப் பாடசாலைகளுக்கு விடுமுறை வழங்கிய காலமொன்றும் இருந்தது. ஆனால், இன்று விடுமுறை இல்லை. 'ஆடிப்பிறப்புக்கு நாளை விடுதலை ஆனந்தம் ஆனந்தம் தோழர்களே!' என்ற நவாலியூர் சோமசுந்தரப் புலவரின் பாடல் மாத்திரம்தான் பாடப்படுகின்றது. தமிழர் தாயகமான வடக்குக் கிழக்கிலாவது கல்வியமைச்சு ஆடிப்பிறப்பு நாளுக்கு விடுமுறையை வழங்கி அதற்கு மாற்றீடாக சனிக்கிழமை ஒன்றில் பாடசாலையை நடாத்துவதற்கு முன்வரவேண்டும். அப்போதுதான் எமது இளைய தலைமுறைக்கு ஆடிப்பிறப்புக் கொண்டாட்டத்தின் முக்கியத்துவம் விளங்கும்.

தமிழ்ப்பண்பாடு ஒருபுறம் சிங்களபௌத்த மேலாதிக்கத்தினாலும் இன்னொருபுறம் உலகமயமாக்கலினாலும் அதன் அடையாளத்தை இழந்துகொண்டிருக்கிறது. இவற்றோடு எமது அக்கறையின்மையினாலும் நாம் தொன்றுதொட்டுக் கடைப்பிடித்து வந்த பண்பாட்டு விழுமியங்களும் பாரம்பரிய விழாக்களும் கைவிடப்பட்டுக்கொண்டிருக்கின்றன. ஒருதேசிய இனத்தின் தரத்தை மதிப்பீடு செய்யும் அளவு கோல்களில் அது பேசும் மொழி, அதன் வாழிடம் என்பனவற்றுக்கு நிகராக அதன் தனித்துவமான பண்பாடும் உள்ளது. இதனைத் தமிழ்த்தேசிய அரசியல் தலைமைகள் கருத்தில் எடுத்துப் பண்பாட்டுச் செயற்பாடுகளை மக்களிடையே எடுத்துச்செல்வதற்கு முன்வரவேண்டும் என்றும் தெரிவித்துள்ளார்.

பசுமை இயக்கத்தின் ஆடிப்பிறப்பு விழா

நாவற்குழியில் சிறப்பாக இடம்பெற்றது

தமிழ்த்தேசியப் பசுமை இயக்கத்தின் ஆடிப்பிறப்பு விழா ஆடிப்பிறப்புத் தினமான நேற்று வியாழக்கிழமை (17.07.2025) நாவற்குழி முத்தமிழ் சனசமூக நிலைய முன்றலில் மிகவும் சிறப்பாக நடைபெற்றது.

தமிழ் மக்களின் காலக்கணிப்பீட்டையும் அவர்தம் பகிர்ந்துண்ணும் உணவுப் பண்பாட்டையும் எடுத்தியம்பும் பண்பாட்டுப் பண்டிகைகளாகத் தைப்பொங்கலும் ஆடிப்பிறப்பும் அமைகின்றன.

சூரியன் வடதிசை நோக்கிச் செல்லும் தை தொடக்கம் ஆனி வரையுள்ள ஆறுமாத காலம் உத்தராயண காலம் எனவும், சூரியன் தெற்கு நோக்கிச் செல்லும் ஆடி முதல் மார்கழி வரையிலான காலம் தட்சணாயண காலம் எனவும் அழைக்கப்படுகின்றன. இவற்றில் உத்தராயண காலத் தொடக்க நாள் தைப்பொங்கல் எனவும் தட்சணாயண தொடக்க நாள் ஆடிப்பிறப்பு எனவும் தமிழ் மக்களால் கொண்டாடப்படுகிறது.

தமிழ்த்தேசியப் பசுமை இயக்கம் தமிழ்ப் பண்பாட்டைப் பறைசாற்றும் இவ்விரு தினங்களையும் கிராமங்களில் அவ்வூர் மக்களுடன் இணைந்து ஆண்டுதோறும் கொண்டாடி வருகிறது. அந்த வகையில், இந்த ஆண்டு ஆடிப்பிறப்பை நாவற்குழியில் முத்தமிழ் கிராம மக்களுடன் கூழும் கொழுக்கட்டையும் ஆக்கிக் கொண்டாடியது.

இவ்விழாவில் நானும், இயக்கத்தின் கலை, இலக்கிய அணியின் துணைச் செயலாளர் கை. சரவணன் அவர்களும் பங்கேற்றிருந்தோம்.

இன, மத, மொழித் தேசியவாதங்களால் பிளவுபட்டுக்கொண்டிருக்கும் உலகை

சூழற் தேசியத்தாலேயே ஒருங்கிணைக்க இயலும்

பொ. ஐங்கரநேசன் சுட்டிக்காட்டு

பாரம்பரிய வாழ்விடத்தையும் தனித்துவமான, மொழியையும் பண்பாட்டையும் கொண்டுள்ள மக்கள் கூட்டத்தைத் தேசிய இனங்கள் என்று அரசியல் அறிஞர்கள் வரையறை செய்துள்ளார்கள். இதில் உயர்வென்றும் தாழ்வென்றும் எதுவுமில்லை. ஆனால், எண்ணிக்கையில் பெரும்பான்மையைக் கொண்டிருக்கும் தேசிய இனங்கள் தங்களை உயர்வாகக் கருதிச் சிறுபான்மைத் தேசிய இனங்களை அடக்கியொடுக்கி வருகின்றன. இவ்வொடுக்குமுறைக்கு எதிராகச் சிறுபான்மைத் தேசிய இனங்கள் கிளர்ந்தெழுகின்றன. இன, மத, மொழித் தேசியவாதங்களால் பிளவுபட்டுக்கொண்டிருக்கும் உலகை சூழற்தேசியத்தாலேயே ஒருங்கிணைக்க இயலும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

யாழ்.வீரசிங்கம் மண்டபத்தில் கடந்த ஞாயிற்றுகிழமை (29.06.2025) நடைபெற்ற பசுமை அமைதி விருதுகள் விழாவுக்குத் தலைமை வகித்து உரையாற்றியபோதே பொ. ஐங்கரநேசன் இவ்வாறு சுட்டிக்காட்டியுள்ளார்.

அங்கு அவர் தொடர்ந்து உரையாற்றுகையில்,

காலத்துக்குக்காலம் மானுடத்தை வழிநடத்துவதற்கென்று சிந்தனையாளர்களால் கோட்பாடுகள் முன்மொழியப்பட்டு வந்துள்ளன. சோசலிசக் கோட்பாடு பல தேசிய இனங்களைக் கொண்ட நாடுகளில் இனங்களுக்கிடையில் ஏற்றத்தாழ்வைக் குறைப்பதற்காக உருவானது. ஆனால், சோசலிச நாடுகள் பிற்காலத்தில் முதலாளித்துவப் பொருளாதாரத்துக்கு முகங்கொடுக்க முடியாமல் அடிபணிந்தபோது அங்கு இனங்களுக்கிடையில் மோதல்கள் தலை தூக்கியது. சோவியத் யூனியன் சிதறுண்டதும் ஒரு காலத்தில் ஒன்றாக இருந்த உக்ரைன் மீது சோவியத் ரஸ்யா இப்போது படையெடுப்பதும் சோசலிசச் சித்தாந்தத்தை நடைமுறைப்படுத்தியதில் இருந்த குறைபாடுகளால் ஏற்பட்ட விளைவுகள்தான்.

போர்களில் ஏற்படும் உயிரிழப்புகளைவிட சுற்றுச்சூழல் சீர்குலைவினால் ஏற்படும் உயிரிழப்புகள் அதிகமாகும் காலம் வெகு தொலைவில் இல்லை. வளங்களின் அளவுக்கு மிஞ்சிய நுகர்வால் வளப்பற்றாக்குறைவு ஏற்பட்டு, எஞ்சியுள்ள வளங்களைப் பங்கிடுவதில் முரண்பாடுகளும் மோதல்களும் வெடித்துள்ளன. பூமியின் வெப்ப உயர்வு காரணமாகக் கடல் மட்டம் உயர்ந்து தீவு நாடுகளில் கரையோரப்பகுதிகளை மெல்ல மெல்லக் காவுகொண்டு வருகிறது. காலநிலை மாற்றத்தின் விளைவுகளாகத் காலந்தப்பிய அடை மழை, கடும் வரட்சி, காட்டுத் தீ, உயிரினங்களின் அழிவு, இதுவரை காணாத புதுப்புது நோய்கள் என்று பல்வேறு சூழற் பிரச்சினைகள் தினந்தினம் உலகை அச்சுறுத்திக்கொண்டிருக்கின்றன.

தற்போதுள்ள அரசியற் கொள்கைகள், கோட்பாடுகளினால் சூழற் பிரச்சினைகளுக்கு முகங்கொடுக்க இயலாததாலேயே சூழலியம் என்ற புதிய கோட்பாடு முகிழ்த்து வருகிறது. ஒவ்வொரு தேசிய இனமும் தன்னை முதன்மைப்படுத்தும் மனிதமையச் சிந்தனையைத் தவிர்த்து சூழல்நேயச் சிந்தனைக்கு முதலிடம் கொடுத்தால் மட்டுமே அது வாழுகின்ற சூழலைப் பாதுகாக்க முடியும். இதன் மூலமே ஒட்டுமொத்தப் பூமியும் பாதுகாக்கப்படும். ஆபத்தின் விழிம்பில் நிற்கும் உலகை காப்பாற்றுவதற்குச் சூழலியற்தேசியம் என்ற கோட்பாட்டை உலகை வழிநடத்துகின்ற கோட்பாடாக நாம் ஏற்றுக்கொண்டால் மாத்திரமே எம்மையும் ஏனைய உயிரினங்களையும் பேரழிவுகளிலிருந்து காப்பாற்ற இயலும் என்றும் தெரிவித்துள்ளார்.

கோலாகலமாக நிகழ்ந்தேறிய

பசுமை அமைதி விருதுகள் விழா

தமிழ்த்தேசியப் பசுமை இயக்கத்தின் பசுமை அமைதி விருதுகள் விழா நேற்று ஞாயிற்றுக்கிழமை (29.06.2025) கோலாகலமாக நிகழ்ந்தேறியுள்ளது. மாணவர்களிடையேயும் பொதுமக்களிடையேயும் சூழல் விழிப்புணர்வை ஏற்படுத்தி அவர்களைச் சூழல்பாதுகாப்புச் செயற்பாடுகளில் பங்கேற்பாளர்களாக்கும் நோக்குடன் தமிழ்த்தேசியப் பசுமை இயக்கம் ஆண்டு தோறும் பசுமை அமைதி விருதுகளை வழங்கி வருகிறது. 2024ஆம் ஆண்டுக்கான விருதுகளை வழங்கும் விழா நேற்று யாழ்ப்பாணம் வீரசிங்கம் மண்டபத்தில் இடம்பெற்றுள்ளது.

தமிழ்த்தேசியப் பசுமை இயக்கத்தின் தலைவர் பொ.ஐங்கரநேசன் தலைமையில் நடைபெற்ற இவ்விழாவில் பிரதம விருந்தினராக வவுனியாப் பல்கலைக்கழகத்தின் பதில் துணைவேந்தரும, வியாபாரக் கற்கைகள் பீடத்தின் பீடாதிபதியுமான பேராசிரியர் யோ. நந்தகோபன் கலந்துகொண்டிருந்தார். சிறப்பு விருந்தினராக வடமாகாண நீர்ப்பாசனத் திணைக்களத்தின் பிரதிப் பணிப்பாளர்களில் ஒருவரான எந்திரி ச. சர்வராஜா கலந்துகொண்டிருந்தார்.

இவ் விழாவில் மாணவர்களிடையே அகில இலங்கை ரீதியாக நடாத்தப்பட்ட சூழல் பொது அறிவுப் பரீட்சையில் சித்தியடைந்த மாணவர்களில் முதல் 250 மாணவர்கள் பசுமை அமைதிச் சான்றிதழ் வழங்கிக் கௌரவிக்கப்பட்டார்கள். இவர்களில் முதல் மூன்று இடங்களைப் பெற்ற வெற்றியாளர்களுக்குச் சூழலியல் ஆசான் க.சி. குகதாசன் ஞாபகார்த்தப் பசுமை அமைதி விருதுகள் வழங்கப்பட்டன. முதலாம் இடத்தைப் பெற்ற யாழ்ப்பாணம் வேம்படி மகளிர் கல்லூரியைச் சேர்ந்த ரூபிகா அருந்தவம் ஒரு பவுண் எடையுள்ள தங்கப் பதக்கம் வழங்கிக் கௌரவிக்கப்பட்டார். இரண்டாம் இடத்தைப் பெற்ற யாழ்ப்பாணம் மகாஜனக் கல்லூரியைச் சேர்ந்த கனிவிழி சுதாஜி வெள்ளிப் பதக்கம் வழங்கி கௌரவிக்கப்பட்டார். மூன்றாம் இடத்தைப் பெற்ற மட்டக்களப்பு வின்சற் மகளிர் கல்லூரியைச் சேர்ந்த டிலுக்சினி டன்ஸ்ரன், மன்னார் சேவியர் மகளிர் கல்லூரியைச் சேர்ந்த றித்திக்கா அன்ரன் பிலிப்ஸ், யாழ்ப்பாணம் மகாஜனக் கல்லூரியைச் சேர்ந்த கனிமொழி கணேசானந்தன் ஆகிய மூவரும் வெண்கலப் பதக்கங்கள் வழங்கிக் கௌரவிக்கப்பட்டார்கள்.

தாலகாவலர் மு.க. கனகராசா ஞாபகார்த்தமாக வழங்கப்பட்டுவரும் சிறந்த சூழல்நேயச் செயற்பாட்டாளருக்கான விருதை இம்முறை பாக்கியநாதன் சசிக்குமார், பாக்கியநாதன் ராஜ்குமார் ஆகிய இருவரும் பெற்றிருந்தார்கள். மரநடுகைப் பணியைச் சிறப்பாகச் செய்துவரும் சகோதரர்களான இருவருக்கும் ஒரு இலட்சம் ரூபா பணப்பரிசு பகிர்ந்தளிக்கப்பட்டது. மேலும், தமிழ்த்தேசியப் பசுமை இயக்கத்தால் மாணவர்களிடையே நடாத்தப்பட்ட வீட்டுத்தோட்டப் போட்டியில் சிறந்த செய்கையாளர்களாக அடையாளம் காணப்பட்டவர்கள் மாணாக்க உழவர்களாகவும், தாவரங்களை அடையாளம் காணும் போட்டியில் அதிக எண்ணிக்கையான தாவரங்களை அடையாளம் கண்டவர்கள் தாவராவதானிகளாகவும் சான்றிதழ்களும் பரிசுகளும் வழங்கிக் கௌரவிக்கப்பட்டிருந்தனர்.

புலம்பெயர் தமிழர் கூட்டமைப்பின் அனுசரணையுடன் அரங்கு நிறைந்த பார்வையாளர்களுடன் மிகச் சிறப்பாக இடம்பெற்றுள்ள இவ்விழாவை யாழ்ப்பாணப் பல்கலைக்கழகத்தின் கல்வியியல் துறை விரிவுரையாளர் இ. சர்வேஸ்வரா தொகுத்து வழங்கினார். இலங்கையில் வழங்கப்பட்டுவரும் சூழல்சார் விருதுகளில் தமிழ்த்தேசியப் பசுமை இயக்கத்தின் பசுமை அமைதி விருதுகள் அனைவரினதும் கவனத்தை ஈர்த்த முன்னிலை விருதுகளில் ஒன்று என்பது குறிப்பிடத்தக்கது.

பசுமை அமைதி விருதுகள் விழா

நாளை வீரசிங்கம் மண்டபத்தில்

தமிழ்த்தேசியப் பசுமை இயக்கத்தின் 2024ஆம் ஆண்டுக்கான பசுமை அமைதி விருதுகளை வழங்கும் பரிசளிப்பு விழா நாளை 29ஆம் திகதி (ஞாயிற்றுக்கிழமை) யாழ்ப்பாணம் வீரசிங்கம் மண்டபத்தில் பிற்பகல் 2.30 மணிக்கு நடைபெறவுள்ளது.

இவ்விழாவில் கடந்த ஆண்டு தமிழ்த்தேசியப் பசுமை இயக்கத்தினால் அகில இலங்கை ரீதியாக நடாத்தப்பட்ட சூழல் பொதுஅறிவுப் பரீட்சையில் வெற்றிபெற்ற மாணவர்கள் சூழலியல் ஆசான் க.சி. குகதாசன் ஞாபகார்த்தப் பசுமை அமைதி விருதுகளும், 2024ஆம் ஆண்டின் சிறந்த சூழல்நேயச் செயற்பாட்டாளர் தாலகாவலர் மு.க. கனகராசா ஞாபகார்த்தப் பசுமை அமைதி விருதும் வழங்கிக் கௌரவிக்கப்படவுள்ளனர்.

மேலும், இவ்விழாவில் 2024ஆம் ஆண்டில் மாணவர்களிடையே நடாத்தப்பட்ட வீட்டுத்தோட்டப் போட்டியில் வெற்றிபெற்ற மாணவர்களுக்கு மாணாக்க உழவர் மதிப்பளிப்பும், தாவரங்களை அடையாளம் காணும் போட்டியில் வெற்றி பெற்றவர்களுக்கு தாவராவதானி மதிப்பளிப்பும் இடம்பெறவுள்ளது.

தமிழ்த்தேசியப் பசுமை இயக்கத்தின் தலைவர் பொ.ஐங்கரநேசன் தலைமையில் நடைபெறவுள்ள இவ்விழாவில் பிரதம விருந்தினராக வவுனியாப் பல்கலைக்கழகத்தின் பதில் துணைவேந்தர் பேராசிரியர் யோ. நந்தகோபன் அவர்கள் கலந்துகொள்ளவுள்ளார்கள். சிறப்பு விருந்தினர்களாக வடக்கு மாகாண விவசாயத் திணைக்களத்தின் மாகாணப் பணிப்பாளர் திருமதி சுகந்தினி செந்தில்குமரன் அவர்களும், வடக்கு மாகாணத்தின் நீர்ப்பாசனத் திணைக்களத்தின் பிரதிப் பணிப்பாளர் எந்திரி திரு. ச. சர்வராஜா அவர்களும் கலந்துகொள்ளவுள்ளார்கள்

இலங்கையில் சுற்றுச்சூழல் சார்ந்து வழங்கப்பட்டு வரும் விருதுகளில் தமிழ்த்தேசியப் பசுமை இயக்கத்தினால் ஆண்டுதோறும் வழங்கப்பட்டுவருகின்ற பசுமை அமைதி விருதுகள் முன்னிலை விருதுகளில் ஒன்றாகக் கருதப்படுகின்றமை குறிப்பிடத்தக்கது.

செம்மணியில் அரசியல்வாதிகள் சிலரை வெளியேற்ற முற்பட்ட இழிசெயலை

நீதிக்காகப் புதைகுழியில் காத்திருக்கும் ஆன்மாக்கள் ஒருபோதும் ஏற்றுக்கொள்ளாது

பொ. ஐங்கரநேசன் காட்டம்

செம்மணியில் நடைபெற்ற அணையா விளக்கு எழுச்சிப் போராட்டத்தின் இறுதி நாளன்று இடம்பெற்ற அரசியல்வாதிகள் சிலருக்கு எதிரான அநாகரிக வசை பாடல்கள் தமிழ்ச் சமூகத்தை வெட்கித் தலைகுனிய வைத்துள்ளது. ஐக்கிய நாடுகள் மனித உரிமைகள் ஐக்கிய நாடுகள் மனித உரிமைகள் பேரவையின் ஆணையாளரின் வருகையை எதிர்பார்த்து உணர்வெழுச்சியுடன் நடந்துகொண்டிருந்த போராட்டத்தின் செல்திசையை மடைமாற்றுவதுபோன்று அங்கு வந்திருந்த சிலர் அரசியல்வாதிகள் சிலருக்கு எதிராக மோசமான வார்த்தைப் பிரயோகங்களை மேற்கொண்டு அவர்களைப் போராட்டத்திடலில் இருந்து வெளியேற்றும் இழிசெயலில் ஈடுபட்டிருந்தனர். இதனை நீதிக்காகப் புதைகுழியில் காத்திருக்கும் ஆன்மாக்கள்கூட ஒருபோதும் ஏற்றுக்கொள்ளாது என்று தமிழ்த்தேசியப் பசுமை இயக்கத்தின் தலைவர் காட்டமாகத் தெரிவித்துள்ளார்.

அணையா விளக்குப் போராட்டத்தின் கடைசி நாளான நேற்று சிலர் குழுவாகத் திரண்டு வந்து போராட்டத்திடலில் இருந்து அரசியல்வாதிகளை வெளியேறுமாறு கோசமிட்டு ரகளையில் ஈடுபட்டனர். இதுதொடர்பாக பொ. ஐங்கரநேசன் விடுத்திருக்கும் ஊடக அறிக்கையிலே இவ்வாறு காட்டமாகத் தெரிவித்துள்ளார்.

அந்த அறிக்கையில் அவர் மேலும் தெரிவிக்கையில்,

ஒரு தேசிய இனத்தின் விடுதலைப் போராட்டம் அஞ்சலோட்டம் போன்றது. முள்ளிவாய்க்காலில் ஆயுதப் போராட்டம் தோற்கடிக்கப்பட்டவுடன் போராட்டத்தை ஜனநாயக ரீதியாகத் தமிழ் அரசியல் தலைமைகள் முன்னெடுத்திருக்க வேண்டும். ஆனால், அதைச் செய்வதற்கு அவர்கள் தவறியதாலேயே தமிழ் மக்கள் ஆங்காங்கே ஜனநாயக ரீதியாக ஆர்ப்பாட்டங்களையும் பேரணிகளையும் தங்களால் இயன்ற அளவுக்கு ஏற்பாடு செய்யத் தலைப்பட்டுள்ளனர். மக்கள் செயல் என்ற தன்னார்வ அமைப்பின் மூலம் ஏற்பாடு செய்யப்பட்ட அணையா விளக்குப் போராட்டமும் இத்தகைய ஒரு மக்கள் போராட்டமே ஆகும்.

மக்கள் செயல் அமைப்பு போராட்டத்தில் அனைவரையும் கலந்துகொண்டு ஒத்துழைக்குமாறு அழைப்பை விடுத்ததன் அடிப்படையிலேயே பெருந்திரளாகப் பொதுமக்கள் கலந்துகொண்டிருந்தார்கள். அரசியல்வாதிகளும் கலந்துகொண்டார்கள். போராட்டத்தை ஏற்பாடு செய்த இளைஞர் குழாம் அரசியல்வாதிகளும் போராட்டத்திடலில் அமர இடம் வழங்கிய நிலையில் போராட்டத்தைக் குழப்பும் நோக்குடன் திட்டமிட்டு அங்கு வந்த சிலரே இந்த அநாகரிக செயலை அரங்கேற்றியுள்ளனர். இது போராட்ட ஏற்பாட்டாளர்களே அரசியல் வாதிகளை வெளியேற்றியது போன்ற மாயத் தோற்றத்தையும் ஏற்படுத்தியுள்ளது.

விடுதலை அரசியல் முள்ளிவாய்க்காலின் பின்னர் தேர்தல் அரசியலாக மாத்திரமே சுருங்கிப்போய் உள்ளது. ஆசனங்களுக்காகத் தவங்கிடக்கும் அரசியல்வாதிகளால் கட்சிகளுக்கு இடையேயும் கட்சிகளுக்கு உள்ளேயும் தோற்றுவிக்கப்படுகின்ற முரண்பாடுகளின் விளைவுகளில் ஒன்றே அணையா விளக்குப் போராட்டத்தில் இடம்பெற்ற சம்பவமும் ஆகும். தேர்தல் மேடைகளில் எதிரும் புதிருமாக வசை பாடும் அரசியல்வாதிகள் அதையே நீதிக்கான போராட்டங்களுக்குள்ளும் நுழைப்பதை எவ்விதத்திலும் ஏற்றுக்கொள்ள இயலாது. இத்தகைய இழிசெயல்கள் இனவிடுதலை அரசியலை மென்மேலும் நலிவுபடுத்தும் என்றும் குறிப்பிட்டுள்ளார்.

பிளாஸ்ரிக் பைகளுக்கான மாற்று

எமது மனங்களிலேயே இருக்கிறது

சூழல் தின நிகழ்ச்சியில் பொ. ஐங்கரநேசன் சுட்டிக்காட்டு

பிளாஸ்ரிக் பைகளின் சொகுசுக்குப் பழக்கப்பட்ட எங்களுக்கு அவற்றைக் கைவிடுவதற்கு மனம் இல்லாமல் இருக்கிறது.பிளாஸ்ரிக் பைகளுக்கு மாற்றாக வேறு பைகள் சந்தைக்கு வராமல் எப்படிப் பிளாஸ்ரிக் பைகளைக் கைவிடுவது என்றே பலரும் கேட்கிறார்கள். பிளாஸ்ரிக் பைகளுக்கான மாற்று வேறு எங்கேயும் இல்லை. எமது மனங்களில்தான் இருக்கிறது.பிளாஸ்ரிக் பைகளைக் கைவிடவேண்டும் என்று உளமார விரும்பி , உறுதியாகத் தீர்மானித்தால் மாற்று தானாக வரும் என்று தமிழ்த் தேசியப்பசுமை இயக்கத்தின் தலைவர் பொ. ஐங்கரநேசன் சுட்டிக் காட்டியுள்ளார்.

உலக சுற்றுச்சூழல் தின நிகழ்ச்சி நேற்று வியாழக்கிழமை[ 05.06.2025]யாழ் . இந்து மகளிர் கல்லுரியில் நடைபெற்றது. உலக சுற்றுச்சூழல் தினத்தின் இந்த ஆண்டின் “பிளாஸ்ரிக் மாசுபாட்டை இல்லாதொழிப்போம்‘’ என்ற கருப்பொருளுக்கு அமைவாக கல்லூரி அதிபர் சுமதி கந்தசாமி அவர்களின் தலைமையில் நடைபெற்ற இந்நிகழ்ச்சியில் பொ.ஐங்கரநேசன் கலந்துகொண்டு சிறப்புரை ஆற்றியபோதே இவ்வாறு சுட்டிக்காட்டியுள்ளார்.

அங்கு அவர் தொடர்ந்து உரையாற்றுகையில் ,

மனிதன் சூழலில் குவித்து வருகின்ற கழிவுகளில் இயற்கைக்கும் மனித உடல்நலத்துக்கும் பெரும் ஆபத்தை விளைவிக்கின்ற கழிவுகளில் பிளாஸ்ரிக் கழிவுகள்தான் முதலிடத்தில் உள்ளன. மண்ணோடு மண்ணாக மக்கிப்போகாத இவை சூழலில் பன்னெடுங்காலம் நீடித்து இருக்கக்கூடியவை. நுண்துகள்களாக.உணவுடனும் நீருடனும் சிறுகச்சிறுக எமது உடலினுள் நுழைந்து தேங்கி வருகின்றது. இவற்றை எரிக்கும்போது டையொக்சின் என்னும் நச்சுவாயு வெளியேறுகிறது. இந்த நஞ்சுமனிதர்களில் புற்றுநோய்களையும் மலட்டுத்தன்மையையும் ஏற்படுத்தக்கூடியது.

பிளாஸ்ரிக்கை முற்றாகத் தவிர்க்க முடியாமற்போனாலும் பிளாஸ்ரிக் பைகளையும் ஒரு நாள் பாவித்துவிட்டு வீசுகின்ற பிளாஸ்ரிக்கினால் செய்யப்படட குவளைகள் , தட்டுகள், உணவைப் பொதி செய்யும் பெட்டிகள் போன்றவைகளையும் நாங்கள் முற்றாகவே கைவிடலாம். சூழலில் குவியும் திண்மக் கழிவுகளில் இவற்றின் பங்குதான் மிக அதிகமாக உள்ளது. இவற்றுக்கான மாற்றாகக் கடதாசிப்பைகளையும் துணிப்பைகளையும் பயன்படுத்தலாம். பிளாஸ்ரிக்கை பயன்பாட்டுக்கு வரும்வரைக்கும் நாங்கள் எல்லோரும் இவற்றைத்தானே பயன்படுத்தினோம்.

.கடதாசிப்பைகளையும் துணிப்பைகளையும் பாவிப்பதை இன்றைய தலைமுறை நாகரிகக் குறைவானதாகவும் அவமானகர்மானதாகவும் கருதுகின்றது. இது எங்கள் மனதில் உள்ள பிரச்சினை. உண்மையில் இயற்கைக்கு இசைவான சூழல் நட்பு மிக்க பொருட்களைப் பயன்படுத்துபவர்களே நாகரிகமானவர்கள். நற்பண்புகளைக் கொண்டவர்கள். அந்த வகையில் பிளாஸ்ரிக் பைகளுக்கான மாற்றை சந்தையில் தேடாமல் முதலில் எமது மனங்களில் மாற்றங்களைத் தேடுவோம் என்றும் தெரிவித்துள்ளார்.

நிகழ்ச்சியின் இறுதியில் மாணவிகளிடையே சூழல் தொடர்பான வினா விடைப் போட்டி நடாத்தப்பட்டு வெற்றி பெற்றவர்களுக்குத் தமிழ்த் தேசியப் பசுமை இயக்கத்தினால் பரிசுகள் வழங்கப்பட்டதோடு, கல்லூரி வளாகத்தில் மரக்கன்றுகளும் நடுகை செய்யப்பட்டன.

உலக சுற்றுச்சூழல் தினம் யாழ். இந்து மகளிர் கல்லூரியில் சிறப்பாகக் கொண்டாடப்பட்டது.

உலக சுற்றுச்சூழல் தினம் யாழ் .இந்து மகளிர் கல்லூரியில் இன்று [05.06.2025] மிகவும் சிறப்பாகக் கொண்டாடப்பட்டது.

ஐக்கிய நாடுகள் சபையால் 1973ஆம் ஆண்டில் இருந்து ஆண்டுதோறும் ஜூன் 5ஆம் திகதி உலக சுற்றுச் சூழல் தினமாகக் கடைப்பிடிக்கப்பட்டு வருகிறது.

சுற்றுச்சூழல் பாதுகாப்பில் உலக நாடுகளினது அரசாங்கங்களின் ஒத்துழைப்பை வேண்டியும் , பொது மக்களிடையே விழிப்புணர்வை ஏற்படுத்தும் நோக்கோடும் சுற்றுச்சூழல் தினம் கொண்டாடப்பட்டு வருகின்றது.

சூழல் தினத்துக்கான கருப்பொருளாக அந்த அந்தக் காலப்பகுதியில் முன்னுரிமை பெறவேண்டிய சூழற்பிரச்சினைகள் அடையாளம் காணப்பட்டுத் தெரிவு செய்யப்படுகின்றன.

இந்த ஆண்டுக்கான கருப்பொருள் பிளாஸ்ரிக் மாசுபாட்டை இல்லாதொழிப்போம் என்பதாகும் . இதற்கமைவாக இந்து மகளிர் கல்லூரியின் அதிபர் செல்வி சுமதி கந்தசாமி அவர்களின் தலைமையில் நடைபெற்ற சூழல் தின நிகழ்ச்சியில் தமிழ்த்தேசியப் பசுமை இயக்கத்தின் தலைவர் பொ.ஐங்கரநேசன் சிறப்புரை ஆற்றியிருந்தார்.

மாணவிகளிடையே சூழல் தொடர்பான வினா விடைப் போட்டி நடாத்தப்பட்டு வெற்றி பெற்றவர்களுக்குத் தமிழ்த் தேசியப் பசுமை இயக்கத்தினால் பரிசுகள் வழங்கப்படடதோடு, நிகழ்ச்சியின் இறுதியில் கல்லூரி வளாகத்தில் மரக்கன் றுகள் நடுகை செய்யப்பட்டமையும் குறிப்பிடத்தக்கது.

வடக்கு மாகாண ஆளுநரின் ஏற்பாட்டில் மரநடுகை தொடர்பான கலந்துரையாடல்

தமிழ்த்தேசியப் பசுமை இயக்கம் பங்கேற்பு

வடக்கு மாகாண ஆளுநர் நா. வேதநாயகன் அவர்கள் அவரது அலுவலகத்தில் கடந்த வியாழக்கிழமை (22.05.2025) மரநடுகை தொடர்பான கலந்துரையாடல் ஒன்றை ஏற்பாடு செய்திருந்தார். இக்கலந்துரையாடலில் அவரது அழைப்பின்பேரில் தமிழ்த்தேசியப் பசுமை இயக்கமும் கலந்துகொண்டது.

அன்றைய தினம் வடக்கு மாகாணத்தின் சகல உள்ளூராட்சி மன்றங்களினதும் செயலாளர்களுடன் ஆளுநர் திட்ட மீளாய்வு தொடர்பான கலந்துரையாடலை ஏற்பாடு செய்திருந்தார். மரநடுகை தொடர்பாக உள்ளூராட்சி மன்றங்களின் பங்கேற்பு அவசியம் என்பதால், செயலாளர்களும் பங்கேற்கும் விதமாக மீளாய்வுக் கூட்டத்துக்கு முன்பாக மரநடுகை தொடர்பான கலந்தாய்வு இடம்பெற்றிருந்தது.

ஆளுநரின் தலைமையில் நடைபெற்ற இக்கலந்துரையாடலில் உள்ளூராட்சி அமைச்சின் செயலாளர், உள்ளூராட்சி ஆணையாளர், யாழ். மாநகர ஆணையாளர், பிரதேசசபை மற்றும் நகராட்சி மன்றங்களின் செயலாளர்கள் இலங்கை மின்சாரசபை மற்றும் புகையிரதத் திணைக்களத்தைச் சேர்ந்த உயர் அதிகாரிகள் பங்கேற்றிருந்தனர். சிறப்பு அழைப்பாளர்களாகத் தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன், கிறீன் லேயர் அமைப்பின் நிறுவுநர் பா. சசிக்குமார் ஆகியோர் கலந்துகொண்டார்கள்.

இக்கலந்துரையாடலில், வீதியோரங்களில் உள்ள மரங்கள் மின்சாரசபையாலும், புகையிரதத் திணைக்களத்தாலும் பொதுமக்களின் பாதுகாப்புக் கருதி வெட்டப்படுவது தவிர்க்க முடியாததாக இருந்தாலும், மரங்களை அடியோடு வெட்டிச் சாய்க்காமல் கிளைகளைக் கத்தரிக்க வேண்டும் என்றும், புகையிரதத் திணைக்களம், புகையிரதப் பாதையில் இருந்து மரக்கன்றுகளை நடவுசெய்ய வேண்டிய தூரத்தைப் பொதுமக்களுக்கு ஊடகங்கள் வாயிலாக அறியத் தரவேண்டும் என்றும் பொ. ஐங்கரநேசன் கேட்டுக்கொண்டார். மேலும், வெட்டும் பணி தற்போது ஒப்பந்த அடிப்படையில் தென் இலங்கையைச் சேர்ந்தவர்களுக்கு வழங்கப்படும் நிலையை மாற்றி வருங்காலத்தில் உள்ளூரில் உள்ளவர்களுக்கு வழங்கவேண்டும் என்பதுடன் அவர்களுக்கு மரங்களை வெட்டுவது தொடர்பான முறையான பயிற்சிகளையும் வழங்குவதற்கு திணைக்களங்கள் ஆவன செய்யவேண்டும் எனவும் கேட்டுக்கொண்டார்.

சகல உள்ளூராட்சி மன்றங்களும் இயலுமான இடங்களிலெல்லாம் மரங்களை நடுகை செய்து அவற்றை முறையாகப் பராமரிக்க வேண்டும் என்று ஆளுநர் அறிவுறுத்தியதைத் தொடர்ந்து தேவையேற்படின் தமிழ்த்தேசியப் பசுமை இயக்கம் மரக்கன்றுகளை இலவசமாக வழங்கவும், தேவையான வழிகாட்டுதல்களை வழங்கவும் தயாராக இருப்பதாகவும் பொ. ஐங்கரநேசன் தெரிவித்தார்.

காணி அபகரிப்பு, பௌத்தமயமாக்கலைத் தடுப்பதற்குத்

தலையீடு செய்யுங்கள் அமெரிக்க, ஐரோப்பிய ஒன்றிய,

சுவிற்சர்லாந்துத் தூதுவர்களிடம்

தமிழ்த்தேசியப் பேரவை வேண்டுகோள்

வடக்கிலுள்ள காணிகள் தொடர்பான சமீபத்திய வர்த்தமானி அறிவித்தல், குருந்தூர் மலை, தையிட்டி விகாரை விடயங்கள் உட்பட வடக்கில் மேற்கொள்ளப்பட்டுவரும் காணி அபகரிப்பு, பௌத்தமயமாக்கும் முயற்சிகள் குறித்துத் தமிழ்த்தேசியப் பேரவையினர் அமெரிக்கா, ஐரோப்பிய ஒன்றியம், சுவிற்சர்லாந்து ஆகிய நாடுகளின் தூதுவர்களைச் சந்தித்துக் கலந்துரையாடியதோடு, இவற்றைத் தடுப்பதற்குச் சர்வதேச சமூகம் உடனடியாகத் தலையீடு செய்யவேண்டும் என்றும் கேட்டுக்கொண்டுள்ளனர்.

முதலில் ஐரோப்பிய ஒன்றியத்தின் தூதுவர் கார்மன் மொறினோ அம்மையாருடனும், தொடர்ந்து அமெரிக்கத் தூதுவர் யூலி சங் அம்மையாருடனும் பின்னர் சுவிற்சர்லாந்துத் தூதுவர் சிறி வோல்ற் அம்மையாருடனும் கொழும்பிலுள்ள அவர்களது தூதுவராலயங்களில் இச்சந்திப்பு நேற்று செவ்வாய்க்கிழமை (20.05.2025) நடைபெற்றுள்ளது.

இச்சந்திப்பில், தமிழ்த்தேசியப் பேரவையின் தலைவரும் பாராளுமன்ற உறுப்பினருமான கஜேந்திரகுமார் பொன்னம்பலம் தலைமையில் தமிழ்த்தேசிய மக்கள் முன்னணியின் பொதுச் செயலாளரும் முன்னாள் நாடாளுமன்ற உறுப்பினருமான செ. கஜேந்திரன், தமிழ்த்தேசியப் பசுமை இயக்கத்தின் தலைவரும் வடமாகாண சபையின் முன்னாள் அமைச்சருமான பொ. ஐங்கரநேசன், முன்னாள் நாடாளுமன்ற உறுப்பினர் ஈ. சரவணபவன், தமிழ்த்தேசிய மக்கள் முன்னணியின் பிரசாரச் செயலாளர் சட்டத்தரணி ந. காண்டீபன் ஆகியோர் பங்கேற்றிருந்தார்கள்.

இச்சந்திப்புக் கடந்த 14ஆம் திகதி தமிழ்த்தேசியப் பேரவையினர் பிரித்தானியா, இந்தியா, கனடா, ஐக்கிய நாடுகள் சபை ஆகியனவற்றின் இராஜதந்திரிகளுடன் மேற்கொண்ட சந்திப்பின் தொடர்ச்சியாக இடம்பெற்றுள்ளமை குறிப்பிடத்தக்கது.

பதினாறாவது மே18

முள்ளிவாய்க்கால் கஞ்சி – நினைவுகளைக் கடத்தல்

தமிழ்த் தேசியப் பசுமை இயக்கத்தால் அதன் தலைமை அலுவலகம் முன்பாக இன்று காலை முள்ளிவாய்க்கால் கஞ்சி காய்ச்சிப் பரிமாறப்பட்டது. பெரியவர்கள் முதல் சிறியவர்கள் வரை பல நூற்றுக்கணக்கானவர்கள் முள்ளிவாய்க்கால் கஞ்சியை உணர்வுடன் வாங்கி அருந்திச் சென்றார்கள். ஆம்! முள்ளிவாய்க்கால் கஞ்சி என்பது திருவிழாக்காலங்களில் தண்ணீர்ப் பந்தல்களில் ஊற்றப்படும் தாகசாந்திக்கான பானமோ, அல்லது அன்னதான ஆகாரமோ அல்லவே!

முள்ளிவாய்க்கால் கஞ்சி தமிழ் மக்கள் பட்ட சொல்லொணா வலிகளின் குறியீடு. போரின்போது முள்ளிவாய்க்காலில் அரசபடையினரால் தமிழினம் போர் மரபுகளையும் மீறி, ஈவிரக்கமின்றிக் கொத்துக் கொத்தாகக் கொல்லப்பட்ட கதைகளை, மருந்துகளின்றி உயிர் துறந்த கதைகளை, உணவுக்காக அல்லாடிய கதைகளை, வெறும் கஞ்சியுடனேயே உயிரைக் கையில் பிடித்துவைத்திருந்த கதைகளை,… இன்னும் இவ்வாறு ஏராளமான கதைகளை அடுத்த தலைமுறையினருக்கு எடுத்துச் சொல்லுவதற்கான எமது அரசியல் வேணவாவின் குறியீடு.

இன்று பிள்ளைகளுடன் வந்த பெற்றோர்கள் பலர் பிள்ளைகளுக்குக் கஞ்சியை அருந்தக் கொடுத்தது மாத்திரமல்லாது, இந்தக் கஞ்சி குடித்தலின் உள்ளார்ந்த நோக்கத்தையும் அவர்களுக்குப் புரியக் கூடிய விதத்தில் எடுத்தச் சொன்னதையும் அவதானிக்க முடிந்தது. நம்பிக்கை இன்னமும் மீதமிருக்கிறது.

தமிழ்த்தேசியப் பேரவையினர் கொழும்பில்

உயர் ஸ்தானிகர்களுடன் அவசர சந்திப்பு

தமிழ்த்தேசியப் பேரவையினர் உயர் ஸ்தானிகர்களுடன் அவசர சந்திப்பை மேற்கொண்டுள்ளனர். இச்சந்திப்பு நேற்று புதன்கிழமை (14.05.2025) கொழும்பில் நடைபெற்றுள்ளது. பிரித்தானிய உயர் ஸ்தானிகர் அன்ட்ரூ பற்றிக், கனேடிய உயர் ஸ்தானிகர் எரிக் வோல்ஷ், இந்தியத் துணைத்தூதுவர் சத்யாஞ்சல் பாண்டே, ஐக்கிய நாடுகள் சபையின் வதிவிடப் பிரதிநிதி மார்க் ஆன்ட்ரே பிராஞ்சே ஆகியோருடன் இச்சந்திப்பு இடம்பெற்றுள்ளது.

காணி நிர்ணயக் கட்டளைச் சட்டத்தின் கீழ் வடக்கு மாகாணத்தின் கரையோரப் பகுதிகளிலுள்ள 5941 ஏக்கர்கள் அளவுள்ள காணிகளை அரசுடமையாக்கும் பொருட்டுக் கடந்த மார்ச் 28ஆம் திகதி வர்த்தமானி அறிவித்தல் வெளியிடப்பட்டுள்ளது. காணி அபகரிப்பை நோக்கமாகக் கொண்ட இந்த வர்த்தமானி அறிவித்தலை மீளப்பெறுவதற்கு இலங்கை அரசாங்கத்துக்கு வெளிநாடுகள் உடனடியாக அழுத்தம் கொடுக்க வேண்டும் என்று கோரியே இந்த அவசரச் சந்திப்பு நிகழ்ந்துள்ளது. இச்சந்திப்பில் தமிழ்த்தேசியப் பேரவையினர் காலத்துக்குக் காலம் இலங்கை அரசாங்கத்தால் மேற்கொள்ளப்பட்டு வந்த காணி சுவீகரிப்புகள் பற்றி விரிவாக எடுத்துக்கூறி அதன் தொடர்ச்சியே இந்த வர்த்தமானி அறிவித்தல் என்று சுட்டிக்காட்டியுள்ளனர்.

மேலும், சூழல் பாதுகாப்பு என்ற பெயரில் வனவளத் திணைக்களமும், வனஜீவராசிகள் திணைக்களமும் வர்த்தமானி அறிவிப்புகளின் மூலம் கையகப்படுத்தியுள்ள காணிகள் பற்றியும் தமிழ்த்தேசியப் பேரவையினர் புள்ளி விபரங்களுடன் எடுத்துக் கூறியுள்ளனர். அத்தோடு, குருந்தூர் மலையில் அண்மையில் வயலை உழுதமைக்காக இரண்டு உழவர்கள் கைது செய்யப்பட்டமை, தையிட்டி உட்படத் தனியார் காணிகளில் அத்துமீறி அமைக்கப்பட்டுள்ள பௌத்த விகாரைகள் ஆகியன தொடர்பாகவும் அரசாங்கத்தின் மீது வெளிநாடுகளின் உடனடித் தலையீட்டை வலியுறுத்தியுள்ளனர்.

உயர் ஸ்தானிகர்களுடனான இச்சந்திப்பில் தமிழ்த்தேசியப் பேரவையின் தலைவரும் நாடாளுமன்ற உறுப்பினருமான கஜேந்திரகுமார் பொன்னம்பலம், தமிழ்த்தேசிய மக்கள் முன்னணியின் பொதுச் செயலாளர் செ. கஜேந்திரன், தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன், தமிழ்த்தேசியக் கட்சியின் தலைவர் சிரேஷ்ட சட்டத்தரணி ந. ஸ்ரீகாந்தா, முன்னாள் நாடாளுமன்ற உறுப்பினர் ஈ. சரவணபவன் ஆகியோர் பங்கேற்றிருந்தார்கள்.

சூழலியம் என்பது உலகை உய்விக்க வந்த பெருங்கோட்பாடு மாணவர்கள் மத்தியில்

பொ. ஐங்கரநேசன்

கம்யூனிசம், சோசலிசம், பெரியாரியம் என்று காலத்துக்குக் காலம் மனுக்குலத்தை வழிநடத்தவெனக் கோட்பாடுகள் உருவாகி வந்துள்ளன. தற்போது மானுடத்தையும் தாண்டி ஒட்டுமொத்த உலகையுமே உய்விக்க வந்த பெருங்கோட்பாடாகச் சூழலியம் உருவெடுத்துள்ளது. மாணவர்கள் சுற்றுச்சூழலை சூழலியற் கல்வியின் ஊடாக மாத்திரம் அணுகாமல் சூழலியம் என்ற சித்தாந்தத்தின் ஊடாகவும் அணுக முன்வரவேண்டும். அதுவே உலகளாவிய ரீதியில் நாம் இன்று எதிர்கொண்டுள்ள பல்வேறு சுற்றுச்சூழல் பிரச்சினைகளுக்குமான தீர்வுகளைத் தரும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தெரிவித்துள்ளார்.

யாழ்ப்பாணம் இந்துக் கல்லூரியில் க.பொ.த உயர்தரம் 2027 பிரிவு பயிலுகின்ற மாணவர்களுக்கான திசைமுகப்படுத்தல் செயலமர்வு நேற்று வெள்ளிக்கிழமை (09.05.2025) நடைபெற்றது. இதில் வளவாளராகக் கலந்துகொண்டு உரையாற்றியபோதே பொ. ஐங்கரநேசன் இவ்வாறு தெரிவித்துள்ளார்.

அங்கு அவர் தொடர்ந்து உரையாற்றுகையில்,

சூழலியற் கல்வி சூழல் தொடர்பான விழிப்புணர்வை ஏற்படுத்தும். சூழல் விழிப்புணர்வு சூழல் பாதுகாப்பில் எங்களைப் பங்குபற்றுநர்களாக்க வைக்கும். ஆனால், எமது கல்வி முறைமை பூமியையோ, சுற்றுச் சூழலையே அதன் முழுப் பரிமாணங்களோடும் புரிந்து கொள்வதற்கான வாய்ப்புகளைத் தரவில்லை. நாம் பாடங்களைக் கலைப்பிரிவு, வர்த்தகப் பிரிவு, விஞ்ஞானப் பிரிவு என்றும் புவியியல், உயிரியல், இரசாயனவியல், பௌதிகவியல் என்றும் வரையறுத்தே கற்கிறோம். இந்தப் பாட எல்லைகளைக் கடந்து சிந்திக்க இயலாததால் யாவற்றையும் ஒருங்கிணைத்து நோக்கும் பூரண அணுகுமுறை எங்களிடம் இல்லாமற் போய்விட்டது. இதனால், அந்தகர்கள் யானையைப் பார்ப்பது போன்றே, நாம் ஒவ்வொருவரும் நமது துறைசார் கல்வி அறிவின் ஊடாக மட்டுமே பூமியை மதிப்பீடு செய்து வருகிறோம்.

அறிவியல் என்பது மனுக்குலத்தின் மேம்பாட்டுக்கானவற்றைக் கண்டறிவதற்கென உருவான துறை. ஆனால், அதுவே இன்று இயற்கையைப் பணிவிக்க முயலும், சகல வளங்களையும் அடியோடு அனுபவிக்கத் துடிக்கும் சூழல் விரோத சிந்தனைப் போக்காக உருவெடுத்துள்ளது. ஏனைய உயிரினங்களோடு மனிதனும் ஓர் உயிரினம் என்பதை மறுத்த மனிதனே மையம் என்ற சிந்தனையே சூழல் மீதான ஆக்கிரப்புகளாக வெளிப்படுகின்றது. மனிதனின் ஆக்கிரமிப்புகளுக்கு எதிராகப் பூமியும் அவ்வப்போது தனது எதிர்ப்புகளைக் காட்டி வருகிறது. காலம் தப்பிய அடைமழை, வெள்ளப் பெருக்கு, கடும் வரட்சி, பெரும் புயல், நிலச்சரிவு போன்ற இயற்கைச் சீற்றங்கள் எல்லாம் மனிதர்களின் அடக்கு முறைகளுக்கு எதிரான பூமியின் எதிர்ப்பு நடவடிக்கைகள்தான்.

சூழலியற் கல்வி சுற்றுச்சூழல் பிரச்சினைகளுக்கான தீர்வைக் கண்டடையப் போதுமானதல்ல என்பதாலேயே பூமியை ஒரு தனித்த பேருயிரியாகக் காணுகின்ற கயா கோட்பாடு, பூமியை எங்கள் ஆக்கிரமிப்புகளில் இருந்து விடுதலை செய்வதன் மூலம் பூமியின் எதிர்த்தாக்குதல்களில் இருந்து எங்களை விடுதலை செய்யும் விடுதலைச் சூழலியல் கோட்பாடு என்பன சமீப காலமாக மேலெழுந்து வருகின்றன. இக்கோட்பாடுகள் தமிழர்களுக்குப் புதியது அல்ல. பாரதியாரின் காக்கை, குருவி எங்கள் ஜாதி, கடலும் மலையும் எங்கள் கூட்டம் என்ற பாடலில் பிற உயிரினங்களில் மட்டும் அல்லாது கல்லிலும் மண்ணிலும் எங்களைக் காணுகின்ற சூழல்நேயச் சிந்தனை வெளிப்பட்டிருக்கின்றது. இந்தச் சிந்தனை மரபே அனைத்துச் சூழற் பிரச்சினைகளுக்குமான தீர்வாக அமையும் என்றும் அவர் குறிப்பிட்டுள்ளார்.

தமிழ்த் தேசிய அரசியலில் மீதமிருக்கும்

ஒரே நம்பிக்கை தமிழ்த்தேசியப் பேரவையே

பொ. ஐங்கரநேசன் உறுதிபடத் தெரிவிப்பு

தமிழ் மக்களின் ஆயதப் போராட்டம் முள்ளிவாய்க்காலில் தோற்கடிக்கப்பட்ட பிறகு ஜனநாயக முறையில் போராட்டத்தை முன்கொண்டு செல்ல வேண்டிய பொறுப்பு தமிழ்த்தேசியக் கூட்டமைப்பின் வசமே இருந்தது. ஆனால் அது அந்தப் பொறுப்பை முள்ளிவாய்க்காலிலேயே வீசியெறிந்துவிட்டுத் தங்கள் சுயநல அரசியலை முன்னெடுக்க ஆரம்பித்தது. தமிழ்த் தேசிய மக்கள் முன்னணி மட்டும் எந்த சலுகைகளுக்கும் விலைபோகாது, எந்த நெருக்கடிகளுக்கும் அடிபணியாது தமிழ்த்தேசிய விடுதலைப் உணர்வைக் காவிச் சென்றுகொண்டிருக்கிறது. அந்த வகையில, தற்போது தமிழ்த் தேசிய அரசியலில் மீதமிருக்கும் ஒரே நம்பிக்கையாகத் தமிழ்த் தேசிய மக்கள் முன்னணி ஏனைய தமிழ்த் தேசிய சக்திகளுடன் இணைந்து உருவாக்கியிருக்கும் தமிழ்த் தேசியப் பேரவையே உள்ளது. என்று தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் உறுதியாகத் தெரிவித்துள்ளார்.

உள்ளூராட்சித் தேர்தலில் அகில இலங்கைத் தமிழ்க் காங்கிரசின் சைக்கிள் சின்னத்தில் போட்டியிடும் தமிழ்த் தேசியப் பேரவையின் வேட்பாளர்களை ஆதரித்து யாழ்ப்பாணம் றக்கா வீதி இளங்கதிர் மைதானத்தில் நேற்று (03.05.2025) நடைபெற்ற பரப்புரைக்கூட்டத்தில் உரையாற்றியபோதே பொ.ஐங்கரநேசன் இவ்வாறு தெரிவித்துள்ளார்.

அங்கு அவர் தொடந்து உரையாற்றுகையில்,

ஜே.வி.பி அதன் உருவாக்கம் தொட்டே தமிழினத்துக்கு எதிரான நிலைப்பாட்டையே எடுத்துவந்திருக்கிறது. இந்திய - இலங்கை ஒப்பந்தம் உருவானபோது இந்திய விஸ்தரிப்பு வாதத்துக்கு எதிரான போராட்டம் என்று சொல்லித் தமிழ் மக்களுக்கு எதிரான பேரணிகளையும் ஆர்ப்பாட்டங்களையுமே நடாத்தியது. சுனாமி நிவாரணப் பணிகளுக்கென விடுதலைப் புலிகளுடன் சந்திரிகா அரசாங்கம் செய்துகொள்ளவிருந்த ஒப்பந்தத்தை எதிர்த்துத் தனது பாராளுமன்ற உறுப்பினர்களைப் பதவி விலகச்செய்தது. நீதிமன்றப்படியேறி அந்த ஒப்பந்தத்தை இல்லாமல் ஒழித்தது. வடக்கு கிழக்கின் நிர்வாக ரீதியான இணைப்பைத் துண்டாடியது. சமாதானப் பேச்சு வார்த்தைகளை நிராகரித்து யுத்தவாதத்தை முன்வைத்தது. இந்த வரலாறு தெரியாதவர்களே ஜே.வி.பியைக் கொண்டாடுகிறார்கள்.

வெற்றி கொடுத்த தெம்பில் ஜே.வி.பி தமிழ் மக்கள் தங்களோடுதான் என்றும், அனுர குமார திஸநாயக்கவைத் தமிழ் மக்கள் தங்கள் நம்பிக்கைக்குரிய தலைவராக ஏற்றுக்கொண்டுள்ளார்கள் என்றும் பேசி வருகின்றது.தமிழ் மக்களில் கணிசமானோர் ஜே.வி.பிக்கு வாக்களித்ததன் மூலம் தமிழ் மக்களுக்கு இனப் பிரச்சினை என்று தனியான ஓரு பிரச்சினை இல்லை என்றும் இருப்பது வெறும் பொருளாதாரப் பிரச்சினை என்றும் அபிவிருத்தியின் மூலம் இதனைச் சரிசெய்து விடலாம் என்றும் தென்னிலங்கை அரசியல்வாதிகள் உலக அரங்கில் கூறிவருவதை மெய்ப்பிப்பது போன்ற தோற்றப்பாட்டை ஏற்படுத்தியுள்ளோம். ஜே.வி.பிக்கு வாக்களிக்கும்போது கைவிரல்களில் பூசியது மை அல்ல அது காலாகாலத்துக்குமான கறை என்பதை வாக்களித்தவர்களே இன்று உணர்ந்திருப்பார்கள்.

ஜே.வி.பியை தமிழ்த் தேசியப் பேரவை எதிர்ப்பதற்கும் ஏனைய கட்சிகள் எதிர்ப்பதற்கும் வித்தியாசம் இருக்கிறது. தமிழ்த் தேசியப் பேரவை ஜே.வி.பி வெற்றி பெற்றால் தமிழ் மக்களின் இருப்பு பறிபோய்விடும் என்ற அச்சத்தில் எதிர்க்கிறது. ஏனைய கட்சிகளோ தங்களது ஆசனம் பறிபோய்விடும் என்ற அச்சத்தில் எதிர்க்கின்றன. இக்கட்சிகள் முள்ளிவாய்க்கால் யுத்தத்துக்குப் பின்னரான கடந்த 15 வருடங்களில் தமிழ்த் தேசிய அரசியலை ஒருசில அங்குலங்கள்கூட முன்நகர்த்திச் செல்லவில்லை. தென்னிலங்கை அரசியல் தலைவர்களுடன் கூடிக்குலாவிச் சலுகைகளையும் மதுபான விற்பனை அனுமதிப் பத்திரங்களையும் பெற்றுத் தங்களை வளப்படுத்திக் கொண்டார்கள். இந்தக் கையறு நிலையில் தமிழ் மக்கள் பற்றிக்கொள்ளக் கூடிய ஒரேயொரு சின்னமாக சைக்கிள் சின்னம் மட்டுமே உள்ளது என்றும் தெரிவித்துள்ளார்.

யாழ் நகரில் நடைபெற்ற

தமிழ்த்தேசியப் பேரவையின் பொதுக்கூட்டம்

உள்ளூராட்சித் தேர்தல் எதிர்வரும் செவ்வாய்க்கிழமை (06.05.2025) திகதி நடைபெறவுள்ள நிலையில் தேர்தலில் போட்டியிடுகின்ற கட்சிகள் மற்றும் சுயேட்சைக் குழுக்களின் இறுதிப் பரப்புரை நேற்று சனிக்கிழமை (03.05.2025) நள்ளிரவுடன் முடிவுக்கு வந்தது.

தமிழ்த்தேசியப் பேரவையின் யாழ்மாநகர சபைக்கான இறுதிப் பொதுக்கூட்டம் நேற்று மாலை யாழ்ப்பாணம் றக்கா வீதி இளங்கதிர் மைதானத்தில் நடைபெற்றது.

யாழ் மாநகரசபைக்கான தலைமை வேட்பாளர் ஆரோக்கியநாதன் தீபன் திலிசன் தலைமையில் நடைபெற்ற இப்பொதுக்கூட்டத்தில் அகில இலங்கைத் தமிழ்க் காங்கிரசின் பொதுச் செயலாளரும் பாராளுமன்ற உறுப்பினருமான கஜேந்திரகுமார் பொன்னம்பலம், தமிழ்த்தேசிய மக்கள் முன்னணியின் பொதுச் செயலாளர் செ. கஜேந்திரன், தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன், தமிழ்த்தேசியக் கட்சியின் தலைவர் ந.ஸ்ரீகாந்தா, இக்கட்சியின் பொதுச்செயலாளர் எம்.கே சிவாஜிலிங்கம், சனநாயகத் தமிழரசுக்கட்சியின் தலைவர் சனாதிபதி சட்டத்தரணி கே.வி தவராசா, சமூக-அரசியற் செயற்பாட்டாளர் க.அருந்தவபாலன், தமிழ்த்தேசிய மக்கள் முன்னணியின் ஊடகப் பேச்சாளர் சட்டத்தரணி க. சுகாஸ், முன்னாள் நாடாளுமன்ற உறுப்பினர் ஈ.சரவணபவான் ஆகியோர் கலந்து கொண்டு உரையாற்றினார்கள்.

அகில இலங்கைத் தமிழ்க் காங்கிரசின் சைக்கிள் சின்னத்தில் போட்டியிடும் தமிழ்த்தேசியப் பேரவையில் தமிழ்த்தேசியப் பசுமை இயக்கம், தமிழ்த்தேசியக் கட்சி, சனநாயகத் தமிழரசுக் கட்சி ஆகியன இடம்பெற்றுள்ளன. கடந்த காலங்களில் சைக்கிள் சின்னத்தில் தேர்தல்களை எதிர்கொண்டு வந்த தமிழ்த்தேசிய மக்கள் முன்னணியே இப்போது தமிழ்த்தேசியப்பேரவை என்னும் கூட்டணியாகப் பரிணாமித்துள்ளமை குறிப்பிடத்தக்கது.

தமிழ்த்தேசியப் பசுமை இயக்கத்தின் செம்பசுமை மேதினம்

பாதுகாப்புக் கெடுபிடிகளின் மத்தியிலும்

அரங்கு நிறைந்த மக்கள் பங்கேற்பு

தமிழ்த்தேசியப் பசுமை இயக்கத்தின் செம்பசுமை மேதினப் பொதுக்கூட்டம் நேற்று வியாழக்கிழமை (01.05.2025) நல்லூர் இளங்கலைஞர் மன்ற மண்டபத்தில் பேரெழுச்சியுடன் நடைபெற்றது.

பூவன் மதீசன் குழுவினரின் எழுச்சிப் பாடல்களுடன் ஆரம்பமான இப்பொதுக்கூட்டம் தமிழ்த் தேசியப் பசுமை இயக்கத்தின் இணைப்பாளர் நா. பார்த்தீபன் தலைமையில் நடைபெற்றது.

தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தொடக்கவுரையாற்றினார். சமூக - அரசியற் செயற்பாட்டாளர் க. அருந்தவபாலன், தமிழ்த்தேசியக் கட்சியின் தலைவர் சிரேஷ்ட சட்டத்தரணி ந. ஸ்ரீகாந்தா, சனநாயகத் தமிழரசுக் கட்சியின் தலைவரும் ஜனாதிபதி சட்டத்தரணியுமான கே. வி. தவராசா, தமிழ்த்தேசிய மக்கள் முன்னணியின் தலைவரும் நாடாளுமன்ற உறுப்பினருமான கஜேந்திரகுமார் பொன்னம்பலம் ஆகியோர் சிறப்புரையாற்றினார்கள்.

கூட்டம் ஆரம்பமாவதற்கு முன்னர் திடீரென அரங்கிற்குள் நுழைந்த அதிரடிப் படையினர், காவற்துறையினர் மோப்பநாய் சகிதம் மண்டபத்தை அங்குலம் அங்குலமாகச் சோதனையிட்டனர். வருகைதந்தவர்களின் கைப்பைகளும் சோதனையிடப்பட்டதில் அச்சம் காரணமாகப் பலர் மண்டபத்தினுள் நுழையாமலேயே திரும்பிச் சென்றதை அவதானிக்க முடிந்தது. எனினும், அரங்கு நிறைந்த மக்கள் பங்கேற்புடன் இம் மேதினப் பொதுக்கூட்டம் பேரெழுச்சியுடன் நடைபெற்றமை குறிப்பிடத்தக்கது.

திருகோணமலை நகராட்சியின்

தமிழ்த்தேசியப் பேரவை வேட்பாளர்கள் அறிமுகம்

திருகோணமலை நகரசபைக்கான தேர்தலில் போட்டியிடுகின்ற தமிழ்த்தேசியப் பேரவையின் வேட்பாளர்களை அறிமுகம் செய்துவைக்கும் கூட்டம் நேற்று வியாழக்கிழமை (24.04.2025) திருகோணமலை நகராட்சி மண்டபத்தில் நடைபெற்றது.

தமிழ்த்தேசிய மக்கள் முன்னணியின் மாவட்டச் செயலாளர் கி. ஸ்ரீபிரசாத் தலைமையில் நடைபெற்ற இக்கூட்டத்தில் அகில இலங்கைத் தமிழ்க் காங்கிரசின் பொதுச் செயலாளரும் பாராளுமன்ற உறுப்பினருமான கஜேந்திரகுமார் பொன்னம்பலம், தமிழ்த்தேசிய மக்கள் முன்னணியின் பொதுச் செயலாளர் செ. கஜேந்திரன், தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன், தமிழ்த்தேசியக் கட்சியின் தலைவர் ந.ஸ்ரீகாந்தா, சமூக-அரசியற் செயற்பாட்டாளர் க.அருந்தவபாலன், தமிழ்த்தேசிய மக்கள் முன்னணியின் ஊடகப் பேச்சாளர் சட்டத்தரணி க. சுகாஸ் ஆகியோர் கலந்து கொண்டு உரையாற்றினார்கள். அரங்கு நிறைந்த சனத்திரளுடன் நடைபெற்ற இக்கூட்டத்துக்கான ஏற்பாடுகளை தமிழ்த்தேசிய மக்கள் முன்னணியின் மாவட்ட அமைப்பாளரும், நகர சபைக்கான தலைமை வேட்பாளருமான க. குகன் மேற்கொண்டிருந்தார்.

அகில இலங்கைத் தமிழ்க் காங்கிரசின் சைக்கிள் சின்னத்தில் கடந்த காலங்களில் தேர்தல்களில் போட்டியிட்டு வந்த தமிழ்த்தேசிய மக்கள் முன்னணி இப்போது தமிழ்த்தேசியப் பேரவை என்னும் கூட்டணியாக மாற்றம் பெற்றுள்ளது. இந்த அணியில் தமிழ்த்தேசியப் பசுமை இயக்கம், தமிழ்த்தேசியக் கட்சி, சனநாயகத் தமிழரசுக் கட்சி ஆகியன இணைந்துள்ளன.

திருகோணமலை நகரசபை தேர்தலின் பின்னர் மாநகர சபையாகத் தரமுயர்த்தப்படவுள்ளமை குறிப்பிடத்தக்கது.

கப்பலோட்டிய நாங்கள் காகிதக் கப்பல்களில் பயணிக்க மாட்டோம்

என்ற பதிலை வல்வை மக்கள் ஜே.வி.பியிடம் உரத்துச் சொல்லவேண்டும்

பொ. ஐங்கரநேசன் வேண்டுகோள்

பாராளுமன்றத் தேர்தலில் ஜே.வி.பியை நம்பித் தமிழ் மக்களில் கணிசமானோர் வாக்களித்திருக்கிறார்கள். அந்த நம்பிக்கையில் ஊரும் நமதே என்று சகல உள்ளூராட்சி மன்றங்களையும் கைப்பற்றிவிட வேண்டும் என்று ஜே.வி.பி கடுமையாக முயற்சித்து வருகிறது. உலகில் ஈழத்தமிழினத்தின் முகவரியாக விளங்கும் வல்வெட்டித்துறையைக் கைப்பற்றிவிட வேண்டும் என்பதில் மிகத்தீவிரமாக உள்ளது. ஜே.வி.பியினர் வல்வை மண்ணில் முகாமிட்டுத் தங்களை நம்புங்கள் கரை சேர்ப்போம் என்று முழங்குகிறார்கள். கப்பலோட்டிய நாங்கள் காகிதக் கப்பல்களில் பயணிக்க மாட்டோம் என்ற பதிலை வல்வெட்டித்துறை மக்கள் இந்தத் தேர்தலில் ஜே.வி.பியிடம் உரத்துச்சொல்ல வேண்டும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் வேண்டுகோள் விடுத்துள்ளார்.

வல்வெட்டித்துறை நகரசபையில் போட்டியிடும் தமிழ்த்தேசியப் பேரவையின் வேட்பாளர்களை அறிமுகம் செய்து வைக்கும் கூட்டம் கடந்த சனிக்கிழமை (19.04.2025) வல்வெட்டித்துறை நகரசபை மண்டபத்தில் நடைபெற்றது. இக்கூட்டத்தில் கலந்துகொண்டு உரையாற்றியபோதே பொ. ஐங்கரநேசன் வல்வை மக்களிடம் இந்த வேண்டுகோளை விடுத்துள்ளார்.

அங்கு அவர் தொடர்ந்து உரையாற்றுகையில்,

வல்வெட்டித்துறை மக்கள் அறிவுத்திறன் மிக்கவர்கள். தொழில்நுட்பம் வளர்ச்சியடையாத காலத்திலேயே நூற்றுக்கணக்கான கப்பல்களைக் கட்டித் திரைகடலோடித் திரவியம் தேடியவர்கள். இவர்களது கப்பல்கள்தான் இரண்டாம் உலக யுத்த காலத்தில் உணவுப் பொருட்களைச் சுமந்துவந்து இலங்கை மக்களைப் பட்டினியில் இருந்து காப்பாற்றின. பிரித்தானிய ஏகாதிபத்தியத்திடம் இருந்து சிங்களத் தலைவர்களைக் காப்பாற்றித் தலைமறைவாகத் தமிழகம் கொண்டுசென்று சேர்ப்பித்தன. அன்னபூரணி அம்மாள் என்ற கப்பலின் கட்டுமான அழகில் மயங்கிய அமெரிக்கர்கள் அதனை வாங்கி வல்வை மண்ணின் மாலுமிகளின் உதவியோடு அமெரிக்காவுக்குக் கொண்டு சென்றார்கள்.

வல்வெட்டித்துறை மக்கள் தொன்றுதொட்டுத் தினந்தினம் கடல் அலைகளோடு போராடி வாழ்ந்தவர்கள். இதனால், இயல்பாகவே திடகாத்திரம் உள்ளவர்களாகவும், மரண பயம் அற்றவர்களாகவும், வீரம் செறிந்தவர்களாகவும் திகழ்ந்தார்கள். ஆயுதப் போராட்டம் முளைவிடுவதற்கு முன்பாகவே அத்துமீறிய சிங்களச் சிப்பாய்களை நையப்புடைத்திருக்கிறார்கள். இதன் தொடர்ச்சியாகவே, வல்வை மண்ணில் இருந்து தனியாகக் கடற்படையொன்றை வைத்து ஆளும் அளவுக்கு தமிழினத்துக்கான தலைமை ஒன்று பரிணாமித்தது. ஆனால், இந்த வரலாறுகள் எதுவும் தெரியாததாகவே எமது இளைய தலைமுறை உள்ளது.

எமது தேசிய விடுதலைப் போராட்டத்தின் நியாயப்பாடுகளையும், ஆயுதப் போராட்டம் தோற்கடிக்கப்பட்டாலும் அது கருக்கொண்டதற்கான காரணங்கள் இன்னமும் அப்படியே நீடிப்பதையும் எமது இளைய தலைமுறைக்கு எடுத்துச் சொல்லாமல் எமது அரசியல் தலைவர்கள் தவறிழைத்துவிட்டார்கள். இதனாலேயே, காலங்காலமாகத் தமிழின விரோத நிலைப்பாட்டைக் கடைப்பிடித்து வந்த ஜே.வி.பியினால் இலகுவில் இங்கு காலூன்ற முடிகிறது. பாராளுமன்றத் தேர்தலில் தமிழ் மக்களின் வாக்குகளைப் பெற்ற ருசியில் இப்போது ஊரும் நமதே என்று வந்து நிற்கிறார்கள். ஆனால், ஊர் எங்களதுதான் என்ற தெளிவான பதிலைத் தமிழ் மக்கள் இம்முறை ஜே.வி.பிக்கு சொல்ல வேண்டும் என்றும் தெரிவித்துள்ளார்.

வல்வெட்டித்துறை நகராட்சியின்

தமிழ்த்தேசியப் பேரவை வேட்பாளர்கள் அறிமுகம்

வல்வெட்டித்துறை நகரசபைக்கான தேர்தலில் போட்டியிடுகின்ற தமிழ்த்தேசியப் பேரவையின் வேட்பாளர்களை அறிமுகம் செய்துவைக்கும் கூட்டம் நேற்று சனிக்கிழமை (19.04.2024) வல்வெட்டித்துறை நகராட்சி மண்டபத்தில் நடைபெற்றது.

தமிழ்த்தேசியக் கட்சியின் வல்வை இணைப்பாளர் வி. கவிச்செல்வன் தலைமையில் நடைபெற்ற இக்கூட்டத்தில் அகில இலங்கைத் தமிழ்க் காங்கிரசின் பொதுச் செயலாளரும் பாராளுமன்ற உறுப்பினருமான கஜேந்திரகுமார் பொன்னம்பலம், தமிழ்த்தேசிய மக்கள் முன்னணியின் பொதுச் செயலாளர் செ. கஜேந்திரன், தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன், தமிழ்த்தேசியக் கட்சியின் தலைவர் என். ஸ்ரீகாந்தா, பொதுச் செயலாளரும் வல்வை நகரசபையின் முதன்மை வேட்பாளருமான எம்.கே. சிவாஜிலிங்கம், சமூக-அரசியற் செயற்பாட்டாளர் க. அருந்தவபாலன், தமிழ்த்தேசிய மக்கள் முன்னணியின் ஊடகப் பேச்சாளர் சட்டத்தரணி க. சுகாஸ், யாழ் மாவட்ட அமைப்பாளர் செ. பொன் குணரத்தினம் ஆகியோர் கலந்து கொண்டு உரையாற்றினார்கள்.

அகில இலங்கைத் தமிழ்க் காங்கிரசின் சைக்கிள் சின்னத்தில் கடந்த தேர்தல்களில் போட்டியிட்டு வந்த தமிழ்த்தேசிய மக்கள் முன்னணி இப்போது தமிழ்த்தேசியப் பசுமை இயக்கம், தமிழ்த்தேசியக் கட்சி, சனநாயகத் தமிழரசுக் கட்சி ஆகியனவற்றையும் இணைத்துத் தமிழ்த்தேசியப் பேரவை என்னும் கூட்டணியாக உருப்பெற்றுள்ளமை குறிப்பிடத்தக்கது.

தென்னிலங்கைக் கட்சிகளை நிராகரிக்கும் அதேசமயம் எதற்கு

வாக்களிக்க வேண்டும் என்பதிலும் எமக்கு நிதானம் தேவை

பொ.ஐங்கரநேசன் வேண்டுகோள்

தமிழ்க் கட்சிகள் எல்லாமே உள்ளூராட்சித் தேர்தலில் ஐக்கிய மக்கள் சக்திக்கு வாக்களிக்க வேண்டாம் என்று மக்களைக் கேட்டுவருகின்றன. ஜே.வி.பியை மாத்திரம் அல்ல; தென்னிலங்கைக் கட்சிகள் எதையுமே நாம் ஆதரிக்க முடியாது. தென்னிலங்கைக் கட்சிகளை நிராகரிக்கும் அதேசமயம் எதற்கு வாக்களிக்க வேண்டும் என்பதிலும் எமக்கு நிதானம் தேவை. தமிழ்த் தேசிய அரசியலை வியாபாரப் பண்டமாக்கி மக்களை ஏமாற்றிப் பிழைக்கும் தமிழ் அரசியற் கட்சிகளையும் மக்கள் அடியோடு நிராகரிக்க வேண்டும் என்று தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் வேண்டுகோள் விடுத்துள்ளார்.

வலி.வடக்கு பிரதேசசபைக்கு சைக்கிள் சின்னத்தில் போட்டியிடுகின்ற தமிழ்த் தேசியப் பேரவையின் வேட்பாளர்களை அறிமுகம் செய்து வைக்கும் கூட்டம் நேற்று (16.04.2025) மல்லாகத்தில் நடைபெற்றது. இக்கூட்டத்தில் கலந்துகொண்டு உரையாற்றியபோதே பொ. ஐங்கரநேசன் இவ்வேண்டுகோளை விடுத்துள்ளார்.

அங்கு அவர் தொடர்ந்து உரையாற்றுகையில்,

ஜனாதிபதித் தேர்தலின்போதும் பாராளுமன்றத் தேர்தலின்போதும் வடக்கு கிழக்கு வாழ் தமிழ் மக்களில் கணிசமானோர் ஜே.வி.பி என்னும் ஐக்கிய மக்கள் சக்திக்கு வாக்களித்திருக்கிறார்கள். தமிழ்த் தேசிய அரசியற் பயணத்தில் ஒரு பின்னடைவாக வடக்கு கிழக்கில் ஜே.வி.பி காலூன்றியமைக்கு எமது வாக்காளர்களைக் குற்றம் சாட்டுவது எவ்விதத்திலும் ஏற்புடையது அல்ல. எங்கள் கைவிரல்களாலேயே எங்கள் கண்களைக் குத்துவது போன்று தமிழ்த்தேசிய அரசியல்வாதிகளே தென்னிலங்கைப் பேரினவாதக் கட்சிகளுக்குத் தமிழ் மக்களை வாக்களிக்கப் பழக்கினார்கள்.

முள்ளிவாய்க்காலில் யுத்தம் முடிவுறுத்தப்பட்டவுடன் நடைபெற்ற ஜனாதிபதித் தேர்தலில் தமிழ்த் தேசியக் கூட்டமைப்பின் தலைவர் இரா.சம்பந்தன் சரத் பொன்சேகாவை ஆதரிக்கும் வரலாற்றுப் பிழையான முடிவை எடுத்தார். முள்ளிவாய்க்கால்வரை யுத்தத்தை முன்னின்று நடாத்திய சரத் பொன்சேகாவுக்கு தமிழ் மக்களை அவர் வாக்களிக்க வைத்தார். இதன் மூலம் போர்க்குற்றவாளி என்ற குற்றச்சாட்டிலிருந்து நாமே அவரை விடுதலை செய்தோம். இதன் விளைவாகவே தமிழ்த் தேசிய விடுதலைப் போராட்டத்திற்கு எப்போதுமே எதிரான நிலைப்பாடுகளை எடுத்து வந்த ஜே.வி.பிக்கு இன்று தமிழ் மக்கள் வாக்களிக்கத் தலைப்பட்டுள்ளார்கள்.

எம் மத்தியிலுள்ள பல தமிழ்க் கட்சிகள் உதட்டளவில் தமிழ்த் தேசியம் பேசுவனவாகவும் மனதளவில் பேரினவாதக் கட்சிகளை விசுவாசிப்பனவாகவுமே உள்ளன. மதுபான விற்பனை அனுமதிப் பத்திரங்களை இலஞ்சமாகப் பெற்றும், பன்னாட்டு நிறுவனங்களிடம் பல கோடிகளைப் பெற்றும், மத்திய அரசின் பாதீடுகளை ஆதரித்தும் தமிழ்த் தேசிய விரோத நிலைப்பாடுகளை எடுப்பதற்கு இக்கட்சிகள் ஒருபோதும் தயங்கியதில்லை. தமிழ் மக்கள் இத்தேர்தலில் தென்னிலங்கைக் கட்சிகளோடு இப்போலித் தமிழ்த்தேசியக் கட்சிகளையும் சேர்த்தே நிராகரிக்க வேண்டும் என்றும் தெரிவித்துள்ளார்.

அரசியலில் பிக்குகளுக்கென்று தனியானதொரு அணியை உருவாக்கி

பௌத்த சிங்கள பேரின வாதத்தை நிறுவனமயப்படுத்தியது ஜே.வி.பி மாத்திரமே

பொ. ஐங்கரநேசன் குற்றச்சாட்டு

தென்னிலங்கை அரசியலும் பௌத்தமும் ஒன்றுடன் ஒன்று பின்னிப் பிணைந்தது. சுதந்திரம் பெற்ற காலம் தொட்டு தென்னிலங்கை அரசியலில் பௌத்த சிங்கள பேரினவாதம் கோலோச்சி வந்துள்ளது. ஆனால், அதனை நிறுவனமயப்படுத்தி பிக்குகளுக்கென்று தனியானதொரு அணியை உருவாக்கியது ஜே.வி.பி மாத்திரமே. ஜே.வி.பி இன் முன்னணி அமைப்புகளில் மகளிர் அணி, உயர்கல்வி மற்றும் பல்கலைக்கழக மாணவர்கள் அணிகளுடன் மூன்றாவதாக பிக்குகளுக்கென்று தனியானதொரு அணியும் உருவாக்கப்பட்டது. இந்திய-இலங்கை ஒப்பந்த காலத்தில் இந்திய விஸ்தரிப்புக்கு எதிரான போராட்டம் என்ற பெயரில் தமிழின விரோதப்போக்கை சிங்கள மக்களிடையே இந்தப் பிக்குகள் அணியின் மூலமே ஜே.வி.பி விதைத்தது என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் குற்றஞ்சாட்டியுள்ளார்.

நடைபெறவுள்ள உள்ளூராட்சித் தேர்தலில் போட்டியிடுகின்ற தமிழ்த்தேசியப் பேரவையின் யாழ். மாநகரசபை வேட்பாளர்களின் அறிமுகக்கூட்டம் நேற்று வெள்ளிக்கிழமை (11.04.2025) யாழ்ப்பாணம் வை.எம்.சி.ஏ மண்டபத்தில் நடைபெற்றது. இந்நிகழ்ச்சியில் கலந்துகொண்டு உரையாற்றியபோதே பொ. ஐங்கரநேசன் இவ்வாறு குற்றஞ்சாட்டியுள்ளார்.

அங்கு அவர் தொடர்ந்து உரையாற்றுகையில்,

அமெரிக்கா இலங்கையில் இருந்து இறக்குமதியாகும் பொருட்களுக்கு விதித்துள்ள அதியுயர் வரியை ஜனாதிபதி அனுரகுமர திஸநாயக்க கொரோனாவுக்கும் சுனாமிக்கும் நிகரானதாக ஒப்பிட்டுப் பேசியுள்ளார். இந்தப் பொருளாதார நெருக்கடியை நாம் தேசமாக ஒருங்கிணைந்து எதிர்கொள்ள வேண்டும் என்றும் கேட்டுக்கொண்டுள்ளார். இலங்கையைச் சுனாமி தாக்கியபோது நாடுதழுவிய ரீதியில் நிவாரணப் பணிகளை முன்னெடுப்பதற்காக அப்போதைய ஜனாதிபதி சந்திரிக்கா குமாரதுங்க விடுதலைப்புலிகளுடன் செய்துகொள்ளவிருந்த ஒப்பந்தத்தை அடியோடு ஜே.வி.பி நிராகரித்துப் பேரிணிகளைக்கூட நடாத்தியது. அப்போது சுனாமி நெருக்கடியை தேசமாக எதிர்கொள்ளவிடாது ஜே.வி.பியை தடுத்தது தமிழின விரோதப்போக்கேயன்றி வேறென்ன?

ஜே.வி.பி தன்னை வெளிப்பார்வைக்கு ஒரு இடதுசாரி அமைப்பாகக் காட்டிக்கொண்டாலும் அது உண்மையான மார்க்சியக் கட்சியாக ஒருபோதும் இருந்ததில்லை. ஆரம்பத்தில் மார்க்சியத்தினதும் சிங்களத் தேசியவாதத்தினதும் கலவையாக இருந்த ஜே.வி.பி பின்னர் முழுமையாக சிங்கள தேசியவாதக் கட்சியாகவே மாறியது. சமாதானப் பேச்சுவார்த்தைகளில் நோர்வேயின் மத்தியஸ்த்தத்தை எதிர்த்துத் தீவிரமான பிரச்சாரங்களை முன்னெடுத்தது. இராணுவத் தீர்வை வெளிப்படையாகவே முன்வைத்து மகிந்த ராஜபக்ச அரசாங்கத்தை போரைத் தொடங்குமாறு வலியுறுத்தியது. இந்த கடும் தேசியவாதப் போக்கே ஜே.வி.பியை ஒரு சிங்கள தேசியச் சக்தியாக உருவெடுக்க வைத்து இன்று அதற்குப் பெரும் வெற்றியையும் தேடிக்கொடுத்துள்ளது.

இப்போது ஜே.வி.பி தேசிய மக்கள் சக்தி என்ற முகமூடியை அணிந்துகொண்டாலும் அதன் உண்மையான முகம் மாறப்போவதில்லை. ஜே.வி.பி இன் முகப்பூச்சை நம்பி தமிழ் மக்கள் ஜனாதிபதித் தேர்தலிலும் பாராளுமன்றத் தேர்தலிலும் ஜே.வி.பிக்கு வாக்களித்திருந்தார்கள். ஜே.வி.பி ஆட்சிபீடம் ஏறி இவ்வளவு மாதங்கள் கடந்த பின்னருங்கூட தமிழின விரோதச் செயற்பாடுகளில் தான் ஈடுபட்டமைக்காகச் சிறுவருத்தங்கூட தெரிவிக்கவில்லை. தமிழ் மக்களின் அரசியல் பிரச்சினைகளைத் தீர்ப்பதற்கான ஆக்கபூர்வ அணுகு முறைகள் எதனையும் வெளிக்காட்டவில்லை. தொடர்ந்தும் ஜே.வி.பியை நம்பாமல் உள்ளூராட்சித் தேர்தலில் ஒட்டுமொத்தத் தமிழ் மக்களும் ஜே.வி.பியை அடியோடு நிராகரிக்கவேண்டும் என்றும் தெரிவித்துள்ளார்.

தமிழ்த் தேசியப் பேரவையின் யாழ் . மாநகரசபை வேட்பாளர்கள் அறிமுகம்.

நடைபெறவுள்ள உள்ளூராட்சித் தேர்தலில் அகில இலங்கைத் தமிழ்க் காங்கிரஸ் கட்சியின் சைக்கிள் சின்னத்தில் போட்டியிடுகின்ற தமிழ்த் தேசிய பேரவை பிரதேச ரீதியாக அதன் வேட்பாளர்களை அறிமுகம் செய்து வருகின்றது.நேற்று வெள்ளிக்கிழமை [ 11-04-2025 ] யாழ்ப்பாணம் மாநகரசபைக்குப் போட்டியிடுகின்ற வேட்பாளர்களைஅறிமுகம் செய்து வைக்கின்ற கூட்டம் யாழ்ப்பாணம் வை .எம். சி. ஏ மண்டபத்தில் நடைபெற்றது.

தமிழ்த் தேசிய மக்கள் முன்னணியின் கொள்கை பரப்புச் செயலாளர் சட்டத்தரணி ந. காண்டீபன் தலைமையில் நடைபெற்ற இவ்வறிமுகக் கூட்டத்தில் அகில இலங்கைத் தமிழ்க் காங்கிரசின் பொதுச் செயலாளரும் தமிழ்த் தேசிய மக்கள் முன்னணியின் தலைவருமான நாடாளுமன்ற உறுப்பினர் கஜேந்திரகுமார் பொன்னம்பலம் , தமிழ்த் தேசிய மக்கள் முன்னணியின் பொதுச்செயலாளர் செ.கஜேந்திரன், தமிழ்த் தேசியப் பசுமை இயக்கத்தின் தலைவர் பொ .ஐங்கரநேசன், தமிழ்த் தேசியக் கட்சியின் தலைவர் என். ஸ்ரீ காந்தா , சனநாயக தமிழரசுக்கட்சியின் பிரமுகர் க.நாவலன் ஆகியோர் கலந்துகொண்டு உரையாற்றியிருந்தார்கள்.

தமிழ்த்தேசியப் பேரவையின் யாழ். மாவட்ட வேட்பாளர்கள் அறிமுகம்

நடைபெறவுள்ள உள்ளூராட்சி மன்றங்களுக்கான தேர்தலில் அகில இலங்கைத் தமிழ்க் காங்கிரஸின் சைக்கிள் சின்னத்தில் போட்டியிடும் தமிழ்த்தேசியப் பேரவையின் யாழ். மாவட்ட வேட்பாளர்களின் அறிமுகக்கூட்டம் கடந்த திங்கட்கிழமை (07.04.2025) நல்லூர் இளங்கலைஞர் மன்றத்தில் நடைபெற்றது.

இக்கூட்டத்தில் அகில இலங்கைத் தமிழ்க் காங்கிரசின் பொதுச் செயலாளரும், நாடாளுமன்ற உறுப்பினருமான கஜேந்திரகுமார் பொன்னம்பலம், தமிழ்த்தேசிய மக்கள் முன்னணியின் பொதுச் செயலாளர் செ. கஜேந்திரன், தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன், தமிழ்த்தேசியக் கட்சியின் தலைவர் என். ஸ்ரீகாந்தா, செயலாளர் நாயகம் எம்.கே. சிவாஜிலிங்கம், சனநாயகத் தமிழரசுக் கட்சியின் தலைவர் சட்டத்தரணி கே.வி. தவராசா, அரசியற் செயற்பாட்டாளர். க. அருந்தவபாலன் ஆகியோர் கலந்து கொண்டிருந்தார்கள்.

கடந்த தேர்தல்களில் அகில இலங்கைத் தமிழ்க் காங்கிரசின் சைக்கிள் சின்னத்தில் போட்டியிட்டுவந்த தமிழ்த்தேசிய மக்கள் முன்னணி இப்போது கொள்கை நிலைப்பாட்டில் உறுதியாகவுள்ள அணிகளையும் உள்ளீர்த்துத் தமிழ்த்தேசியப் பேரவையாக விரிவுபெற்றுள்ளது. இக் கூட்டணியில் தமிழ்த்தேசிய மக்கள் முன்னணியுடன் தமிழ்த்தேசியப் பசுமை இயக்கம், தமிழ்த்தேசியக் கட்சி, சனநாயகத் தமிழரசுக் கட்சி, அருந்தவபாலன் அணி ஆகியன இடம்பெற்றுள்ளமை குறிப்பிடத்தக்கது.

தேங்காய் உற்பத்தியில் பாரிய வீழ்ச்சி

வெள்ளை ஈயைக் கட்டுப்படுத்துவதில் அரசு அசமந்தம்

பொ. ஐங்கரநேசன் குற்றச்சாட்டு

இலங்கையில் இந்த ஆண்டின் ஜனவரி மாதத்தில் தேங்காய் உற்பத்தி 32.3 சதவீதத்தால் குறைவடைந்துள்ளது. எதிர்வரும் மாதங்களில் மேலும் குறைவடையும் என எதிர்பார்க்கப்படுகிறது. தேங்காய் உற்பத்தியில் பெரும் சரிவை ஏற்படுத்தி வரும் பிரதான காரணிகளில் தென்னை மரங்களில் பரவி வருகின்ற வெள்ளை ஈக்களின் தாக்கமும் ஒன்றாக உள்ளது. ஆனால், வெள்ளை ஈக்களின் பெருக்கத்தைக் கட்டுப்படுத்த இதுவரையில் அரசாங்கம் போதிய நடவடிக்கைகளை எடுக்காமல் அசமந்தமாக உள்ளது என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

தென்னை மரங்களில் அண்மைக்காலமாக அதிகரித்து வரும் வெள்ளை ஈக்களின் தாக்கம் தேங்காய் உற்பத்தியைப் பாதித்து வருவது தொடர்பாக பொ. ஐங்கரநேசன் விடுத்திருக்கும் ஊடக அறிக்கையிலேயே இவ்வாறு குற்றம்சாட்டியுள்ளார்.

அந்த ஊடக அறிக்கையில் அவர் மேலும் தெரிவிக்கையில்,

இலங்கையில் தமிழ் - சிங்கள மக்களின் உணவிலும் பண்பாட்டிலும் பிரதான இடத்தைப் பிடித்திருக்கின்ற தேங்காய்கள் ஏற்றுமதியின் மூலம் நாட்டுக்குக் கணிசமான அந்நிய செலாவணியையும் ஈட்டித்தருகின்றன. உற்பத்தியாகும் தேங்காய்கள் மூன்றில் இரண்டு பங்கு உள்ளூரில் நுகரப்பட, மூன்றில் ஒருபாகம் உலர்ந்த தேங்காய்த் துருவல்களாகவும், தேங்காய் எண்ணையாகவும் மதிப்புக்கூட்டி ஏற்றுமதி செய்யப்படுகின்றன. இவற்றுக்கென ஆண்டுக்கு 4 பில்லியன் தேங்காய்கள் தேவைப்படும் நிலையில் தற்போது 3 பில்லியன் தேங்காய்கள் வரையிலேயே அறுவடை செய்யப்படுவதாகத் தெங்கு அபிவிருத்தித் திணைக்களம் தெரிவித்துள்ளது.

இலங்கையில் தென்னையுடன் தொடர்புபட்ட இன்னுமொரு அமைப்பான தென்னை ஆராய்ச்சி நிறுவனம் அடுத்த 2026ஆம் ஆண்டில் சுமார் நூறு மில்லியன் தேங்காய்களுக்குப் பற்றாக்குறைவு ஏற்படும் என்று தெரிவித்திருக்கிறது. பற்றாக்குறைகளை ஈடுசெய்வதற்காகத் தேங்காய்ப்பால் உலர்ந்த தேங்காய்த் தூள், குளிர்ந்த தேங்காய்க்கூழ் ஆகியவனவற்றை இறக்குமதி செய்ய அரசாங்கம் முடிவெடுத்திருப்பதாகவும் தெரிவித்திருக்கிறது. இதனால் அதிகம் பாதிக்கப்படப்போவது பொருளாதாரரீதியாகப் பிந்தங்கியுள்ள வறுமைக்கோட்டின் கீழ் வாழுகின்ற ஏழை எளிய மக்கள்தாம்.

வீட்டு வளவுகளில் உள்ள தென்னைமரங்களை உணவாதாரமாகவும் வாழ்வாதாரமாகவும் பயன்படுத்திவந்த மக்கள் இன்று அம்மரங்களில் ஏற்பட்டுள்ள வெள்ளை ஈக்களின் தாக்கத்தால் தேங்காயைச் சொட்டாகப் பயன்படுத்தும் நிலைக்கு ஆளாகியுள்ளனர். பெருமெடுப்பில் கிளீன் ஸ்ரீலங்கா திட்டத்தை முன்னெடுத்து வரும் அரசாங்கம் குப்பை கூழங்களையும் சுவரொட்டிகளையும் அகற்றுவதோடு நிற்காமல் வெள்ளை ஈக்களை அகற்றித் தென்னையைச் சுத்தம் செய்வதையும் அத்திட்டத்தில் உள்வாங்கவேண்டும். விரைந்து செயற்படாவிடின் வீட்டினதும் நாட்டினதும் தெங்குப் பொருளாதாரம் மென்மேலும் வீழ்ச்சியடையும் என்றும் தெரிவிக்கப்பட்டுள்ளது.

உப்பின் பெயரில் ஆனையிறவைத் தவிர்ப்பதற்கு

அது ஒன்றும் உப்புச்சப்பற்ற இடப்பெயர் அல்ல

பொ. ஐங்கரநேசன் சுட்டிக்காட்டு

இலங்கையில் உப்பளங்களை நிர்வகித்து வருகின்ற தேசிய உப்பு வரையறுக்கப்பட்ட நிறுவனம் (National Salt Ltd) ஆனையிறவில் விளையும் உப்புக்கு றஜலுனு (Rajalunu) எனப் பெயரிட்டுள்ளது. இதுகாலவரையில் ஆனையிறவு உப்பு என விழிக்கப்பட்டு வந்த உப்பு றஜலுனு எனப் பெயரிடப்படும் அளவுக்கு, ஆனையிறவு ஒன்றும் உப்புச்சப்பற்ற இடப்பெயர் அல்ல. அது தமிழ் மக்களின் வரலாற்றில், வாழ்வியலில், பொருளியலில், போரியலில் பின்னிப்பிணைந்து அவர்தம் ஆன்மாவுடன் இரண்டறக் கலந்துவிட்ட பெயர் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

ஆனையிறவில் தயாரிக்கப்படும் உப்புக்கு ‘றஜலுனு’ என்ற வர்த்தக நாமம் சூட்டப்பட்டிருப்பது தொடர்பாக பொ.ஐங்கரநேசன் விடுத்திருக்கும் ஊடக அறிக்கையிலேயே இவ்வாறு சுட்டிக்காட்டியுள்ளார்.

அந்த ஊடக அறிக்கையில் மேலும் அவர் குறிப்பிடுகையில்,

யானைகள் தாவர உண்ணிகள் என்பதால் அவற்றின் உடலில் உப்புச்சத்துப் பற்றாக்குறைவு ஏற்படும்போது அவை உப்பைத்தேடிச்சென்று உண்பது வழமை. ஆனையிறவு என்ற பெயர் நிலவுவதற்கு, வன்னிக் காட்டுயானைகள் உப்பைத் தேடிவந்த கடவை இது என்பதோடு, ஒல்லாந்தர் ஆட்சிக் காலத்தில் வன்னியானைகள் ஏற்றுமதியின் பொருட்டு யாழ்ப்பாணக் குடாநாட்டுக்குள் கொண்டுவரப்பட்ட பாதையாக இது அமைந்தமையுமே காரணமாகும்.

ஆனையிறவுக் கடல் நீரேரிகளின் கரைகளில் உப்பு விளைவதை அவதானித்த ஆங்கிலேயர்கள் 1938இல் ஆனையிறவு உப்பளத்தை அமைத்தனர். இங்கு விளையும் உப்பை மூலப்பொருளாகக் கொண்டு 1954இல் பரந்தன் இரசாயனத் தொழிற்சாலை உருவானது. உப்பளமும், இரசாயனத் தொழிற்சாலையும் யுத்தம் உச்சம்பெறும் வரைக்கும் ஆயிரக்கணக்கானவர்களின் பொருளாதாரத்தை மேம்படுத்தும் வேலைவாய்ப்புகளை வழங்கியிருந்தன.

ஆனையிறவின் கேந்திர முக்கியத்துவம் காரணமாக 1760இல் போர்த்துக்கேயர்கள் தங்களது இராணுவத் தளமாக இங்கு கோட்டையொன்றை உருவாக்கினர். பின்னர் ஒல்லாந்தர், ஆங்கிலேயர் என்று இலங்கையை ஆண்ட அந்நியர்களிடம் கைமாறிய இக்கோட்டை சுதந்திரத்தின் பின்னர் இலங்கையின் வசமாகியது. 1952இல் இக் கோட்டை நவீனவசதிகளுடன் கூடிய இராணுவத் தளமாக வடிவமைக்கப்பட்டது.

ஆனையிறவுப் பாதையால் பயணிப்பது என்பது மரணத்தின் குகையினூடாகச் செல்வதற்கு ஒப்பானது என்று தமிழ் மக்கள் நடுங்கும் அளவுக்கு பின்னாளில் இங்கு அமைந்திருந்த சோதனைச் சாவடிகள் திகிலூட்டுவனவாக அமைந்திருந்தன. சந்தேகத்தின் பேரில் கைதுசெய்யப்படுபவர்கள் இங்கு கொடும் சித்திரவதைகளுக்கு ஆளாக்கப்பட்டனர் என்பதும், பின்னர் இக்கோட்டை விடுதலைப்புலிகள் வசமாகி நிர்மூலமாக்கப்பட்டதும் வரலாறு.

ஆனையிறவு இவ்வளவு முக்கியத்துவங்களோடு இடவமைவு காரணமாக இங்கு விளையும் உப்புக்கு முதல்தரமான உப்பு என்ற பெருமையையும் தேடிக்கொடுத்தது. ஆனால், இவற்றையெல்லாம் புறந்தள்ளி மேலாதிக்க சிந்தனையின் வெளிப்பாடாக றஜலுனு என்று பெயர் சூட்டப்பட்டுள்ளது. உப்பில்லாப் பண்டம் மட்டுமல்ல, அது றஜலுனு உப்பாக இருந்தால் தமிழ் மக்களின் மனோவுணர்வில் அதுவும் குப்பையில்தான் என்று தெரிவிக்கப்பட்டுள்ளது.

உள்ளுராட்சித் தேர்தலில் அகில இலங்கைத் தமிழ்க் காங்கிரசை ஆதரிப்பது எனத் தமிழ்த் தேசியப் பசுமை இயக்கம் முடிவு

2025 மே 06 ஆம் திகதி நடைபெறவுள்ள உள்ளுராட்சி மன்றத் தேர்தலில் அகில இலங்கைத் தமிழ்க் காங்கிரசின் துவிச்சக்கர வண்டிச் சின்னத்தில் போட்டியிடும் தமிழ்த் தேசிய மக்கள் முன்னணியை ஆதரிக்கும் விதமாக அது அமைத்துள்ள கூட்டணியில் இடம்பெறுவது என்று தமிழ்த் தேசியப் பசுமை இயக்கம் முடிவு செய்துள்ளது.இந்த முடிவை தமிழ்த் தேசியப் பசுமை இயக்கத்தின் தலைவர் பொ.ஐங்கரநேசன் 20.06 2025 அன்று தமிழ்த் தேசிய மக்கள் முன்னணயின் தலைமைச் செயலகத்தில் நடைபெற்ற ஊடகவியலாளர் சந்திப்பில் உத்தியோக பூர்வமாக அறிவித்துள்ளார்.

இக்கூட்டணியில் தமிழ்த் தேசியக் கட்சி, சனநாயகத் தமிழரசுக் கட்சி , சமூக அரசியற் செயற்பாட்டாளர் க.அருந்தவபாலன் அணி ஆகியனவும் இடம்பெற்றுள்ளன.

அகில இலங்கைத் தமிழ்க் காங்கிரசின் பொதுச் செயலாளரும் , நாடாளுமன்ற உறுப்பினருமான கஜேந்திரகுமா பொன்னம்பலம் தலைமையில் நடைபெற்ற இந்த ஊடகவியலாளர் சந்திப்பில் கூட்டணியில் இடம்பெறும் மற்றைய கடசிகளின் தலைவர்களும் கலந்து கொண்டிருந்தார்கள்.

தையிட்டியில் விகாரை அமைப்பதற்காகச் சட்டவிரோதமாகக் கையகப்படுத்தப்பட்ட காணிகளை விடுவிக்கக்கோரிப் போராட்டம்

காங்கேசன்துறை தையிட்டியில் திஸ்ஸ ராஜ மகா விகாரையை அமைப்பதற்காகச் சட்டவிரோதமாகக் கையகப்படுத்தப்பட்ட பொது மக்களின் காணிகளை விடுவிக்கக்கோரி கடந்த பௌர்ணமி தினத்தன்று [ 13-03-2025] போராட்டம் நடைபெற்றது.கடந்த இரண்டு வருடங்களாக மாதந்தோறும் பௌர்ணமி நாளில் தையிட்டி விகாரை முன்பாகக் காணிச் சொந்தக்காரர்களும் , பொதுமக்களும் , , தமிழ்த்தேசிய மக்கள் முன்னணியினரும் இணைந்து காணிகளை விடுவிக்கக் கோரிப் போராட்டத்தை முன்னெடுத்து வருகின்றனர். இதன் தொடர்ச்சியாகவே கடந்த பௌர்ணமி நாளன்றும் இப்போராட்டம் இடம்பெற்றது. இதில் தமிழ்த் தேசிய பசுமை இயக்கமும் கலந்து கொண்டது.

தையிட்டி விகாரை வடக்கில் உள்ள மிகப்பெரிய கூட்டுப் படைத்தளத்தின் எல்லைக்குள் படையினரால் கட்டப்பட்டு அவர்களினாலேயே பாதுகாக்கப்பட்டும் வருகிறது.தமிழ் மக்கள் கௌதம புத்தரை ஒருபோதும் புறத்தியாகப் பார்ப்பதில்லை. . தமிழ் மக்கள் பௌத்தத்தை ஒருபோதும் ஒரு பகை மதமாகக் கருதியது இல்லை.ஒரு காலத்தில் அவர்கள் மத்தியில் பௌத்தம் இருந்திருக்கிறது.தமிழ் மொழியின் ஐம்பெரும் காப்பியங்களில் மணிமேகலை, குண்டலகேசி ஆகிய இரண்டு காப்பியங்களும் பௌத்த காப்பியங்கள்தாம். அந்தவகையில் தையிட்டியில் நடைபெற்றுவரும் போராட்டம் புத்த பெருமானுக்கோ அல்லது புத்த மதத்துக்கோ எதிரானது அல்ல. மாறாக, பௌத்தத்தை ஆக்கிரமிப்பு வழிகளில் ஒன்றாக இலங்கை அரசாங்கம் பயன்படுத்தி வருவதையே தமிழ் மக்கள் எதிர்த்து வருகின்றமை குறிப்பிடத்தக்கது.

மல்லாகத்தில் பசுமை இயக்கத்தின்

பசுமை அறிவொளி நிகழ்ச்சி

தமிழ்த்தேசியப் பசுமை இயக்கத்தின் பசுமை அறிவொளி நிகழ்ச்சி நேற்று ஞாயிற்றுக்கிழமை (02.03.2025) மல்லாகத்தில் நடைபெற்றுள்ளது. மாணவர்களுக்குச் சூழல் அறிவைப் புகட்டுவதன் மூலம் சூழல் பற்றிய விழிப்புணர்வை ஏற்படுத்தி, அவர்களைச் சூழல் பாதுகாப்பில் ஈடுபடுத்தும் நோக்குடனும், அவர்களின் பன்முக ஆளுமையை விருத்தி செய்யும் நோக்குடனும் தமிழ்த்தேசியப் பசுமை இயக்கம் பசுமை அறிவொளி என்னும் நிகழ்ச்சித் திட்டத்தினை முன்னெடுத்து வருகின்றது. இதன் தொடர்ச்சியாகவே மல்லாகம், கல்லாரை கிராமத்தில் இந்நிகழ்ச்சி நடைபெற்றுள்ளது.

வளர்மதி சனசமூக நிலையத்தின் தலைவர். இ. மிதுஷன் தலைமையில் இடம்பெற்ற இந்நிகழ்ச்சியில் பிரதம விருந்தினராகக் கனடாவில் இருந்து வருகை தந்திருந்த ஸ்காபுறோ ஆதிபராசக்தி குருமன்றத்தின் ஸ்தாபகர் ஞானம்மா திருநாவுக்கரசு அம்மையார் கலந்துகொண்டார். சிறப்பு விருந்தினர்களாகத் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன், ஆசிரியர்கள் சி. நாகதீபன், சி. சிவசோதிநாதன் ஆகியோரும் பங்கேற்றிருந்தார்கள். நூற்றுக்கணக்கான மாணவர்களும், பெற்றோர்களும் பங்கேற்றிருந்த இந்நிகழ்ச்சியில் மாணவர்கள் அனைவருக்கும் விசேடமாகத் தயாரிக்கப்பட்ட பசுமை அப்பியாசக் கொப்பிகள் வழங்கப்பட்டன. இதற்கான நிதி அனுசரணையை ஞானம்மா திருநாவுக்கரசு அம்மையார் கனடா ரொறன்ரோவின் மனித நேயக்குரல் அமைப்பினூடாக வழங்கியிருந்தமை குறிப்பிடத்தக்கது.

உள்ளூராட்சித் தேர்தல் தொடர்பாகத் தமிழ்த்தேசியப் பசுமை இயக்கம்

இதுவரையில் முடிவுகள் எதனையும் எடுக்கவில்லை

பொ. ஐங்கரநேசன் தெரிவிப்பு

ஜனநாயகத் தமிழ்த்தேசியக் கூட்டணி அமைத்துள்ள ஒன்பது கட்சிகளின் அணியில் தமிழ்த்தேசியப் பசுமை இயக்கமும் ஒன்றாக இணைந்து உள்ளூராட்சித் தேர்தலில் போட்டியிட உள்ளதாக ஊடகங்களில் செய்திகள் வெளியாகியுள்ளன. உள்ளூராட்சித் தேர்தல் தொடர்பாகத் தமிழ்த்தேசியப் பசுமை இயக்கத்துடன் தமிழரசியல் கட்சிகள் சிலவும், தமிழரசியல் கட்சிகள் சிலவற்றுடன் தமிழ்த்தேசியப் பசுமை இயக்கமும் பேசி வருகின்றது. எனினும், இத்தேர்தலை எவ்வாறு எதிர்கொள்வது என்பது தொடர்பாகத் தமிழ்த்தேசியப் பசுமை இயக்கம் இதுவரையில் எவ்வித முடிவுகளையும் எடுக்கவில்லை என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தெரிவித்துள்ளார்.

ஜனநாயகத் தமிழ்த்தேசியக் கூட்டணி அமைத்துள்ள அணியில் பசுமை இயக்கமும் இடம்பெற்றுள்ளதாக அறிவிப்புகள் வெளியாகியுள்ள நிலையில் அதுபற்றி பொ. ஐங்கரநேசன் வெளியிட்டுள்ள ஊடக அறிக்கையிலேயே அவர் இவ்வாறு தெரிவித்துள்ளார்.

அந்த அறிக்கையில் அவர் மேலும் தெரிவிக்கையில்,

நடைபெற்று முடிந்த பாராளுமன்றத் தேர்தலில் வடக்குக் கிழக்கில் ஜே.வி.பி கணிசமான ஆசனங்களைக் கைப்பற்றியுள்ளது. இவ்வெற்றியைத் தமிழ்த்தேசிய அரசியலில் ஏற்பட்டுள்ள ஒரு பின்னடைவாகவும், உள்ளூராட்சித் தேர்தலிலும் ஜே.வி.பி வெற்றி பெற்றால் அது தமிழ்த்தேசிய அரசியலுக்கு மிகப்பெரும் பாதிப்பை ஏற்படுத்தும் எனவும் அரசியல் ஆய்வாளர்கள் கருதுகின்றனர். ஜே.வி.பி எப்பாடுபட்டேனும் தமிழ் மக்கள் மத்தியில் வேரூன்றிவிடவேண்டும் என்று தீவிரமாகச் செயற்பட்டு வருகிறது. அண்மையில் அரசாங்கம் வெளியிட்ட பாதீட்டு அறிக்கை இதனைத் தெளிவுபடுத்துகிறது. இவற்றைக் கருத்திற்கொண்டு தமிழ்த்தேசிய அரசியற் கட்சிகள் சில கூட்டணி அமைத்து உள்ளூராட்சித் தேர்தலில் போட்டியிடுவது குறித்து அக்கறை காட்டி வருகின்றன.

பாராளுமன்றத் தேர்தலில் தமிழ்த்தேசியக் கட்சிகள் பெற்ற பின்னடைவு கட்சிகளின் பிளவினால் மாத்திரம் ஏற்பட்ட ஒன்று அல்ல. யுத்தத்துக்குப் பின்னரான இளைய தலைமுறையிடம் தமிழ்த்தேசிய அரசியலின் இருப்புக் குறித்துக் கட்சிகள் எடுத்தியம்பாததே பிரதான காரணமாகும். தமிழ்த்தேசியக் கட்சிகளின் வேட்பாளர்கள் சிலர் தாங்கள் அமைத்துள்ள கூட்டணிக்கும் மக்களுக்கும் விசுவாசம் இல்லாது பன்னாட்டு நிறுவனங்களுக்குச் சேவகம் செய்யும் நோக்கில் அந்நிறுவனங்களிடம் இருந்து பலகோடி ரூபா பணத்தைப் பெற்றுக்கொண்டு தேர்தலில் இறங்கியமையும், அரசிடம் இலஞ்சமாக மதுபான அனுமதிப் பத்திரங்ளைப் பெற்று விற்றுச் சம்பாதித்தமையும் தமிழ்த்தேசியக் கட்சிகளின் மீது மக்களுக்கு வெறுப்பை ஏற்படுத்தியுள்ளது.

தமிழ்த்தேசியப் பசுமை இயக்கம் கட்சிகளின் ஒற்றுமை முயற்சிக்கு ஒருபோதும் எதிரானது அல்ல. எனினும், கூட்டு என்பது தேர்தலில் ஆசனங்களை மாத்திரம் குறியாகக் கொண்டிராது கொள்கை அடிப்படையில் அமைய வேண்டும் என்பதே எமது உறுதியான நிலைப்பாடாகும். ஜே.வி.பி வெற்றி பெற்றுவிடக்கூடாது என்பதற்காக அரசியல் தரகர்களையும், தமிழ்த்தேசிய எதிராளிகளையும் ஆதரிப்பது தமிழ்த்தேசியத்தை மேலும் பலவீனமடையச் செய்யும். இது உண்மையான தமிழ்த் தேசியவாதிகளின் வெற்றி வாய்ப்பையும் பறித்துவிடும். இவற்றைக் கருத்திற்கொண்டே பசுமை இயக்கம் உள்ளூராட்சித் தேர்தல் தொடர்பான உபாயங்களை வகுக்கும். இதுபற்றிய முடிவுகளைத் தமிழ்த்தேசியப் பசுமை இயக்கம் மக்களுக்குத் தானே அறியத்தரும் என்றும் தெரிவித்துள்ளார்.

வெளிநாட்டு உணவகங்களின் வருகை

பாராம்பரிய உணவுகளை மேலும் ஓரங்கட்டிவிடும்

சிறுதானியப் பொங்கல் விழாவில் பொ. ஐங்கரநேசன் ஆதங்கம்

ஒரு இனத்தின் தேசிய அடையாளங்களில் உணவுப் பண்பாடும் ஒன்று. தேசியத்தைக் கட்டமைப்பதில் பண்பாட்டின் ஏனைய கூறுகளைப்போன்று உணவுப் பண்பாடும் காத்திரமான பங்களிப்பைச் செய்கிறது. ஆனால், மதப் பண்பாட்டில் பௌத்தத்தின் ஆக்கிரமிப்புக்கு எதிராகக் கிளர்ந்தெழுகின்ற நாம், உணவுப் பண்பாட்டில் நிகழும் ஆக்கிரமிப்புகள் குறித்துக் கண்டுகொள்ளாமல் இருக்கிறோம். அண்மைக்காலமாக வெளிநாட்டு உணவகங்கள் பல இங்கு கிளைகளைத் திறந்துகொண்டிருக்கின்றன. எமது உணவுப் பண்பாட்டில் திணிக்கப்படும் மாற்றங்கள் பற்றி நாம் விழிப்படையாவிட்டால் வெளிநாட்டு உணவகங்கள் எமது பாரம்பரிய உணவுகளை மேலும் ஓரங்கட்டிவிடும். எமது ஆரோக்கியமும் மேலும் வீழ்ச்சியடையும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தனது ஆதங்கத்தை வெளிப்படுத்தியுள்ளார்.

தமிழ்த்தேசியப் பசுமை இயக்கத்தின் சிறுதானியப் பொங்கல் விழா கடந்த ஞாயிற்றுக்கிழமை (16.02.2025) ஊரெழு வளர்பிறை சனசமூக நிலைய முன்றலில் நடைபெற்றது. இவ்விழாவில் பிரதம விருந்தினராகக் கலந்துகொண்டு உரையாற்றிய போதே பொ. ஐங்கரநேசன் இவ்வாறு தனது ஆதங்கத்தைத் தெரியப்படுத்தியுள்ளார்.

அங்கு அவர் தொடர்ந்து உரையாற்றுகையில்,

நெல் அரிசிச் சோற்றின் வருகையுடனேயே எமது உணவுத் தட்டுகளில் இருந்து சாமை, வரகு, கம்பு, குரக்கன், குதிரைவாலி போன்ற சிறுதானியங்கள் ஓரங்கட்டப்பட்டன. நெல் அரிசியுடன் ஒப்பிடும்போது சிறுதானியங்கள் அதிக கலோரிப் பெறுமானம் கொண்டவை. அதிக நார்ச்சத்து உடையவை. அதிக அளவில் மாப்பொருளையும் புரதத்தையும் விற்றமின்களையும் கனியுப்புகளையும் கொண்டவை. மேலதிகமாக, புற்றுநோய் எதிர்ப்புச் சேர்வைகளையும் கொண்டிருக்கின்றன. இவற்றால்தான் எமது முன்னோர்கள் தேக ஆரோக்கியத்துடன் நூற்றாண்டைக் கடந்தும் வாழ்ந்தார்கள்.

சூழலியல் நோக்கிலும் நெல்லைவிட சிறுதானியங்களே முதன்மை பெறுகின்றன. நெல் பயிரிடுவதற்கு ஈரமான தரையும் அதிகளவில் நீர்ப்பாசனமும் தேவைப்படுகிறது. ஆனால், சிறுதானியங்கள் வறண்ட சூழலிலும் குறைந்த நீர்த்தேவையுடன் வளரக்கூடியவை. நெல் நோய்களினதும் பீடைகளினதும் தாக்கத்துக்கு அதிகளவில் ஆளாகும்போது சிறுதானியங்கள் இவற்றுக்கு எதிராகத் தாக்குப் பிடிக்கின்றன. காலநிலை மாற்றம் எம்மை அச்சுறுத்திக் கொண்டிருக்கும் நிலையில் சிறுதானியங்களை நோக்கி நாம் திரும்புவது காலத்தின் கட்டாயமாக உள்ளது.

எமது இளைய தலைமுறை பாரம்பரிய உணவுகளை நாகரிகமற்றதொன்றாகக் கருதும் மனப்பாங்கைக் கொண்டிருக்கின்றது. துரித உணவகங்களையே அதிகம் நாடுகிறார்கள். கொத்து ரொட்டியையும், பிஸ்ஸாவையும், ப்ரைட் றைஸ்சையுமே விரும்புகிறார்கள். மென்பான நிறுவனங்களின் விளம்பரங்களில் மயங்கி இந்த உணவுகளோடு சேர்த்து ஆபத்தான மென்பானங்களையும் அருந்தி வருகிறார்கள். தேசியம் என்பது வெறும் அரசியல் சொல்லாகியுள்ள இன்றைய சூழ்நிலையில் உணவுப் பண்பாட்டுத் தேசியம் பற்றிய புரிதலை எமது மக்களிடம் ஏற்படுத்துவது அவசியம் என்றும் தெரிவித்துள்ளார்.

தமிழ்த்தேசியப் பசுமை இயக்கத்தின் இராசபோசனம்

ஊரெழுவில் நிகழ்ந்த சிறுதானியப் பொங்கல் விழா

தமிழ்த்தேசியப் பசுமை இயக்கம் தைப்பொங்கல் விழாவை ஆண்டுதோறும் சிறுதானியப் பொங்கல் விழாவாகக் கொண்டாடிவருகிறது. இராசபோசனம் என்ற கருப்பொருளில் நடைபெறும் இச் சிறுதானியப் பொங்கல் விழா இம்முறை ஊரெழு வளர்பிறை சனசமூக நிலைய முன்றலில் நேற்று ஞாயிற்றுக்கிழமை (16.02.2025) மாலை மிகச்சிறப்பாக இடம்பெற்றுள்ளது.

வளர்பிறை சனசமூக நிலையத்தின் தலைவர் மு. ஐங்கரன் தலைமையில் நடைபெற்ற இவ்விழாவில் பிரதம விருந்தினராகத் தமிழ்த்தேசியப் பசுமை இயக்கத்தின் தலைவர் பொ.ஐங்கரநேசன் பங்கேற்றிருந்தார். சிறப்பு விருந்தினர்களாகப் பசுமை இயக்கத்தின் கலை, இலக்கிய அணியின் துணைச் செயலாளர் கை. சரவணன், சூழல் பாதுகாப்பு அணியின் துணைச் செயலாளர் த. யுகேஸ், பொருளாளர் க. கேதீஸ்வரநாதன் நாவலம்பதி ஞானவைரவர் ஆலயத்தின் தலைவர் இ. ராதா ஆகியோர் கலந்து கொண்டிருந்தார்கள்.

பாரம்பரிய விளையாட்டுகளில் ஒன்றான உறியடியோடு கலை நிகழ்ச்சிகளும் இடம்பெற்ற இச் சிறுதானியப் பொங்கல் விழாவில் சாமை மற்றும் வரகு அரிசிப் பொங்கல்களும் குரக்கன் கூழும் பரிமாறப்பட்டன. தமிழர்களின் உணவுப் பண்பாட்டில் சிறுதானியங்கள் அருகிவரும் நிலையில், மீளவும் அவற்றின் பயன்பாட்டை ஊக்கிவிக்கும் நோக்கிலேயே சிறுதானியப் பொங்கல்விழா தமிழ்த்தேசியப் பசுமை இயக்கத்தால் ஆண்டுதோறும் எழுச்சிபூர்வமாக் கொண்டாடப்பட்டு வருகின்றமை குறிப்பிடத்தக்கது.

மாணவர்களை வலுவூட்டும் பசுமை அறிவொளி நிகழ்ச்சி

பசுமை இயக்கத்தின் ஏற்பாட்டில் நல்லூரில் நடைபெற்றது

தமிழ்த்தேசியப் பசுமை இயக்கம் மாணவர்களுக்குச் சூழல்அறிவைப் புகட்டிச் சூழல் விழிப்புணர்வை ஏற்படுத்துவதன் மூலம் சூழல் பாதுகாப்பில் அவர்களைப் பங்குபற்றுநர்களாக்கும் நோக்குடனும், அவர்களின் பன்முக ஆளுமையை விருத்தி செய்யும் நோக்குடனும் பசுமை அறிவொளி என்னும் நிகழ்ச்சித் திட்டத்தை முன்னெடுத்து வருகின்றது. மாணவர்களை வலுவூட்டுகின்ற இப்பசுமை அறிவொளி நிகழ்ச்சி நேற்று ஞாயிற்றுக்கிழமை (09.02.2025) நல்லூர் திவ்ய ஜீவன சங்க மண்டபத்தில் நடைபெற்றது.

பசுமை இயக்கத்தின் தலைவர் பொ. ஐங்கரநேசன் தலைமையில், 'மாணவர்களுக்குச் சமூக விழுமியங்களைப் போதிப்பதில் பெற்றோரின் பங்கு' என்ற கருப்பொருளில் இந்நிகழ்ச்சி இடம்பெற்றது. இதில் ஆசிரியப் பார்வையில் வடக்கு மாகாண ஓய்வுநிலை உதவிக் கல்விப் பணிப்பாளர் கௌரி முகுந்தனும், உளவளப் பார்வையில் உளவளத்துணையாளர் ஜீவசர்மிலா வேந்தகுமாரும் வளவாளர்களாகக் கலந்துகொண்டு சிறப்புரைகளை ஆற்றியிருந்தார்கள்.

இந்நிகழ்ச்சியில் நூற்றுக்கும் அதிகமான மாணவர்கள் அவர்களின் பெற்றோர்களுடன் கலந்து கொண்டிருந்தார்கள். நிகழ்ச்சியின் இறுதியில் மாணவர்கள் அனைவருக்கும் சூழல் விழிப்புணர்வு நோக்கில் பிரத்தியேகமாகத் தயாரிக்கப்பட்டிருந்த அப்பியாசக் கொப்பிகள் வழங்கப்பட்டன. இதற்கான நிதி அனுசரணையை இலங்கையில் பல்வேறு சமூகப் பணிகளை முன்னெடுத்து வருகின்ற கனடாவைத் தளமாகக் கொண்ட ரொறன்ரோவின் மனிதநேயக் குரல் அமைப்பு வழங்கியிருந்தமை குறிப்பிடத்தக்கது.

கிளிநொச்சியைச் சேர்ந்த பெண்

மருதானை காவல் நிலையத்தில் தற்கொலை.

உண்மைநிலை உடனடியாகக் கண்டறியப்படவேண்டும்

பொ.ஐங்கரநேசன் கோரிக்கை

மருதானை காவல் நிலையத்தில் தற்கொலைசெய்துகொண்டதாக சொல்லப்படும் தமிழ்ப் பெண்ணின் மரணம் தொடர்பான உண்மைகள் உடனடியாக வெளிக் கொண்டுவரப்படவேண்டும் என்று தமிழ்த் தேசிப்ப பசுமை இயக்கத்தின் தலைவர் பொ .ஐங்கரநேசன் கோரிக்கை விடுத்துள்ளார் .

மருதானை காவல் நிலையத்தில் இடம்பெற்றுள்ள தமிழ்ப் பெண்ணின் தற்கொலை தொடர்பாக பொ .ஐங்கரநேசன் விடுத்துள்ள செய்திக்குறிப்பிலேயே இந்தக் கோரிக்கையை விடுத்துள்ளார்.

அந்தச் செய்திக்குறிப்பில் ,

கிளிநொச்சியைச் சேர்ந்த 32 வயதுடைய பெண்ணொருவர் காவல்துறையால் கைது செய்யப்படு மருதானை காவல் நிலையத்தில் தடுத்துவைக்கப்பட்டிருந்தபோது நேற்று புதன்கிழமை இறந்துள்ளார். மருதானை காவல்துறையினர் இம்மரணத்தைத் தற்கொலை என்று தெரிவித்துள்ளதோடு , கஞ்சா வைத்திருந்ததாலேயே கைதுசெய்யப்பட்டுள்ளார் எனவும் தெரிவித்துள்ளனர்.

செய்தியறிந்து சடலத்தை பார்வையிட்ட தென்னிலங்கை ஊடகவியலாளர்கள் இம்மரணம் தொடர்பாகச் சந்தேகங்களை வெளியிட்டுள்ளனர்.

காலங் காலமாக ஸ்ரீலங்காவில் காவல்துறையினர் பொய்க் க்குற்றச்சாட்டுகளைச் சோடித்து வந்துள்ளநிலையில் , இக்காவல்நிலைய மரணம் தொடர்பான உண்மை நிலையை வெளிக்கொண்டு வருவதற்கு எமது நாடாளுமன்ற உறுப்பினர்கள் விரைந்து உரிய நடவடிக்கைகளை எடுக்க வேண்டும் என்று குறிப்பிட்டுள்ளார்.

யாழ். கலாசார நிலையப் பெயர் மாற்றம்

மக்களின் நாடித்துடிப்பு அறியாத செயல்

பொ.ஐங்கரநேசன் ஆதங்கம்

இந்திய அரசாங்கத்தின் நன்கொடையின் கீழ் கலாசார பாரம்பரியங்களின் மேம்பாட்டுக்காக நிர்மாணிக்கப்பட்டதும் தனித்துவமிக்கதுமான யாழ்ப்பாண கலாசார நிலையம் 2023 பெப்ரவரி 01ஆம் திகதி மக்களுக்கு உரித்தாக்கப்பட்டது. திறப்புவிழாக் கல்வெட்டில் அழியாத எழுத்துகளால் அழகாகப் பொறிக்கப்பட்டிருக்கும் வாசகம் இது. ஆனால், மக்களுக்கு உரித்தாக்கப்பட்டு இரண்டு வருடங்கள்கூடக் கடக்காத நிலையில் அம்மக்களின் அபிப்பிராயங்கள் எதுவும் பெறப்படாது யாழ்ப்பாண கலாசார மத்திய நிலையம் திருவள்ளுவர் கலாசார மையம் எனப் பெயர் மாற்றப்பட்டுள்ளது. இது மக்களின் நாடித்துடிப்பு அறியாத செயல் என்று தமிழ்த்தேசியப் பசுமை இயக்கத்தின் தலைவர் பொ.ஐங்கரநேசன் தனது ஆதங்கத்தை வெளிப்படுத்தியுள்ளார்.

யாழ். கலாசார மத்திய நிலையத்தின் பெயர் மாற்றம் குறித்து பொ.ஐங்கரநேசன் விடுத்துள்ள ஊடக அறிக்கையிலேயே இவ்வாறு தனது ஆதங்கத்தை வெளிப்படுத்தியுள்ளார்.

அந்த ஊடக அறிக்கையில் அவர் மேலும் தெரிவிக்கையில்,

யாழ்ப்பாண கலாசார மத்திய நிலையம் யாழ். மாநகரசபைக்கு உரித்தான காணியில் இந்திய அரசின் நன்கொடையில் உருவானது. இதற்கான உடன்படிக்கையில் யாழ். கலாசார மத்திய நிலையத்தை முகாமைத்துவம் செய்கின்ற குழுவில் யாழ் மாநகரசபையினதும் வடமாகாண சபையினதும் சார்பில் ஒவ்வொருவர் இடம்பெறுவர் எனத் தெரிவிக்கப்பட்டுள்ளது. எனினும், இரண்டு சபைகளினதும் கலந்தாலோசிப்புகளின்றி இப்பெயர் மாற்றம் இடம்பெற்றுள்ளது. கோத்தபாய அரசாங்கம் யாழ். கலாசார மத்திய நிலையத்தின் பெயரை மாற்றுமாறு முன்னர் அழுத்தங்களைப் பிரயோகித்தபோது மாநகரசபையின் எதிர்ப்பால் கைவிடப்பட்டது. இப்போது, இரு சபைகளுக்குமான தேர்தல்கள் நடைபெறவுள்ள நிலையில் திடுதிப்பென்று நிகழ்ந்த இப்பெயர் மாற்றம் இலங்கை அரசாங்கத்தின் கோரிக்கையை இந்தியா நாசுக்காக நிறைவேற்றிக்கொடுத்துள்ளது என்றே எண்ணவைத்துள்ளது.

சமயச்சாயத்தை தன் மீது ஒருபோதும் பூசிக்கொள்ளாத திருவள்ளுவரின் பெருமையை ஈழத்தமிழ் மக்கள் எப்போதும் போற்றுபவர்களாகவே உள்ளார்கள். அவர் தமிழுக்குத்தந்த பெரும் கொடையாம் திருக்குறளின் மகிமையை ஈழத்தமிழ் மக்கள் ஒரு போதும் மறவார்கள். இதனாலேயே, தமிழகத்தில் வள்ளுவர் கோட்டத்தில் உள்ளதைப்போன்று அத்தனை குறள்களையும் காலத்தால் அழியாதவாறு கருங்கல்லில் பொறித்து திருக்குறள் வளாகம் ஒன்றைச் சிவபூமி தாபகர் கலாநிதி ஆறு. திருமுருகன் யாழ்ப்பாணத்தில் உருவாக்கியுள்ளார். ஆனால், இத்தகைய பெரும் பற்றைத் திருவள்ளுவர் மீதும் திருக்குறள் மீதும் கொண்டிருக்கும் ஈழத்தமிழ் மக்களிடையே யாழ் கலாசார மத்திய நிலையத்துக்கு அவர் பெயரைச் சூட்டியுள்ளமை பெரும் அதிருப்தியையே தோற்றுவித்துள்ளது.

யாழ். கலாசார நிலையம் தனித்துவமானதெனத் திறப்புவிழாக் கல்வெட்டில் குறிப்பிடப்பட்டுள்ளதைப் போன்று அது இந்தியா எமக்கு உவந்தளித்த தனித்துவமான பெரும் கொடையே ஆகும். ஆனால், அதன் தனித்துவம் நெடிதுயர்ந்த அழகான அதன் கட்டுமானங்களால் மாத்திரம் உருவானதன்று. பண்பாட்டுச் செழுமையும் பாரம்பரியமும் மிக்க யாழ்ப்பாணம் என்ற பெயரைச் சூடியிருப்பதும் அதன் தனித்துவத்தை வெளிப்படுத்தும் அளப்பரிய ஓர் சிறப்பாகும். இப்போது, பெயர் மாற்றப்பட்டிருப்பதன் மூலம் அதன் தனித்துவம் ஒரு படி கீழிறங்கியுள்ளது என்பதே நிதர்சனம். அது மட்டுமல்ல, இப்பெயர் மாற்றத்தின் மூலம் ஈழத்தமிழ் மக்கள் இந்தியா மீது கொண்டிருக்கும் பெரும் நம்பிக்கையிலும் ஒரு படி கீழிறங்கியுள்ளது என்றும் குறிப்பிட்டுள்ளார்.

தமிழ்த் தேசியப் பசுமை இயக்கத்தால் சண்டிலிப்பாயில்

மண்பானைப் பொங்கல் பொதிகள் விநியோகம்.

தமிழ்த் தேசியப் பசுமை இயக்கத்தின் அற்றார் அழிபசி தீர்த்தல் என்ற திட்டத்தின் கீழ் பொங்கல் பொதிகள் வழங்கும் நிகழ்ச்சி நேற்று சனிக்கிழமை [ 11-01-2025]] சண்டிலிப்பாயில் நடைபெற்றது.பயனாளிகளாக சண்டிலிப்பாய், சங்கானை பகுதிகளில் இருந்து 100 குடும்பங்கள் தெரிவு செய்யப்பட்டிருந்தன.

இந்நிகழ்ச்சியில் தமிழ்த் தேசிய பசுமை இயக்கத்தின் தலைவர் பொ .ஐங்கரநேசன், பொருளாளர் க. கேதீஸ்வரநாதன் ஆகியோர் கலந்துகொண்டு பொங்கல் பொதிகளை வழங்கிவைத்தனர்.

பண்பாட்டுப் பெருநாட்களிலாவது

மட்பாண்டங்களைப் பயன்படுத்துவோம்

பொங்கல் பொதிகள் வழங்கும் நிகழ்ச்சியில் பொ.ஐங்கரநேசன்

தைப்பொங்கல் மதங்களைக் கடந்து தமிழ் மக்கள் அனைவராலும் கொண்டாடப்படுகின்ற ஒர் பண்பாட்டுப் பெருவிழா. இயற்கையைப் போற்றுகின்ற இவ்விழாவில் இயற்கைக்கு இசைவான மண்பானைகளிலேயே தொன்றுதொட்டுப் பொங்கல் இடம்பெற்று வந்துள்ளது. ஆனால், வசதி கருதி மண்பானைகளைத் தவிர்த்து அலுமியப் பானைகளில் பொங்கும் போக்கு எம்மிடையே அதிகரித்துள்ளது. அலுமியப் பாத்திரங்களை முற்றாகத் தவிர்க்க இயலாது போனாலும் தைப்பொங்கல் போன்ற பண்பாட்டுப் பெருநாட்களிலாவது மட்பாண்டங்களைப் பயன்படுத்துவோம் என்று தமிழ்த் தேசியப் பசுமை இயக்கத்தின் தலைவர் பொ.ஐங்கரநேசன் தெரிவித்துள்ளார்.

நல்லூர் திவ்ய ஜீவன சங்க மண்டபத்தில் நேற்று வியாழக்கிழமை (09.01.2025) இடம்பெற்ற பசுமை இயக்கத்தின் மண்பானைப் பொங்கல் பொதிகள் வழங்கும் நிகழ்ச்சியில் கலந்துகொண்டு உரையாற்றியபோதே பொ. ஐங்கரநேசன் இவ்வாறு தெரிவித்துள்ளார்.

அங்கு அவர் தொடர்ந்து உரையாற்றுகையில்,

அலுமினியம் பாரம் இல்லாத ஒரு உலோகம் என்பதால் கையாள்வதற்கு சுலபமானது. உலோகம் என்பதால் இலகுவில் வெப்பத்தைக் கடத்தி சமையலை விரைந்து முடிக்க வல்லது. வளைந்து நெளிந்தாலும் ஒருபோதும் உடைந்துவிடாது, விலையும் மலிவானது. இவை போன்ற காரணங்களால் சமையல் அறைகளில் மட்பாத்திரங்களைப் புறந்தள்ளி அலுமினியம் இன்று கோலோச்சுகின்றது. அலுமினியப் பாத்திரங்களில் உணவு சமைக்கும்போது அலுமினியம் உணவுடன் கலப்பதைத் தடுக்கும் பொருட்டுப் பாத்திரத்தின் உட்பகுதியில் அலுமினியம் ஒட்சைட்டுப் படலம் இடப்படுகிறது.

அலுமினியப் பாத்திரங்களைத் தேய்த்துக் கழுவும்போது அலுமினியம் ஒட்சைட்டு தேய்வடைந்து உணவுப் பாதுகாப்பு கேள்விக்குறியாகி விடுகிறது. மேலும், சமைக்கப்படும் உணவுப் பொருளின் அமில, கார இயல்பு, சேர்க்கப்படும் உப்பு, சமைக்கும் வெப்பநிலை என்பனவற்றைப் பொறுத்து அலுமினியம் கொஞ்சம் கொஞ்சமாகக் கரைந்து உணவுடன் கலப்பது அறியப்பட்டுள்ளது. உணவுடன் உடலில் கலக்கும் அலுமினியம் மூளை நரம்புகளைப் பாதிப்பதோடு ஏற்கனவே சிறுநீரக நோயுடையவர்களின் சிறுநீரகங்களை மேலும் பாதிப்படையவும் செய்கிறது என ஆய்வுகளில் தெரியவந்துள்ளது.

மட்பாத்திரங்கள் அவற்றின் மேற்பரப்பில் இயற்கையாகவே உள்ள நுண்ணிய துவாரங்கள் ஊடாக வெப்பத்தைப் பரவி உணவைச் சீராக வேகவைக்கிறது. மெதுவாகவே சூடுபடுத்துவதால் உணவில் போசணைப் பொருட்களின் அழிவு தவிர்க்கப்படுகிறது. மண் கார இயல்பு கொண்டதால் உணவில் அமிலத் தன்மையை நடுநிலைப்படுத்துகிறது. சமைக்கும்போது மண்ணிலிருந்து கனியுப்புகள் உணவுடன் கலப்பதால் உணவு கூடுதல் போசணைப் பெறுமானம் பெறுகிறது. இவற்றோடு, உணவின் வாசனையுடன் மண் வாசனையும் சேர்ந்து உணவுக்குக் கூடுதல் சுவையும் கிடைக்கிறது.

எல்லாவற்றையும் விரைவாகச் செய்துவிட வேண்டும் என்று நினைக்கும் நாம் உடல் ஆரோக்கியத்தைப் பேண வேண்டிய சமையலையும் அவ்வாறே விரைந்து முடிப்பதற்காக உலோகப் பாத்திரங்களை நாடியுள்ளோம். இதன் விளைவாக நோய்க்கும் ஆளாகி வருகிறோம். மட்பாண்டங்களுக்கு உடனடியாகத் திரும்புதல் இயலாததாக இருக்கலாம். எனினும், தமிழ் மக்களின் இயற்கையைப் போற்றும் தைப்பொங்கல் போன்ற பண்பாட்டுப் பெருநாட்களிலாவது மண்பானைகளில் பொங்குவோம். இது நலிவடைந்துள்ள மட்பாண்டக் கைவினைஞர்களது வாழ்வையும் வளப்படுத்தும் என்றும் தெரிவித்துள்ளார்.

தமிழ்த்தேசியப் பசுமை இயக்கத்தால்

மண்பானைப் பொங்கல் பொதிகள் வழங்கிவைப்பு

தைப்பொங்கலை முன்னிட்டுத் தமிழ்த்தேசியப் பசுமை இயக்கம் அரியாலை, புத்தூர், நல்லூர் பகுதிகளில் இருந்து தெரிவுசெய்யப்பட்ட 200 குடும்பங்களுக்கு மண்பானைப் பொங்கல் பொதிகளை வழங்கியுள்ளது. நல்லூர் திவ்ய ஜீவன சங்க மண்டபத்தில் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் நேற்று வியாழக்கிழமை (09.01.2025) இப் பொங்கல் பொதிகள் வழங்கும் நிகழ்ச்சி நடைபெற்றது.

தமிழ்த்தேசியப் பசுமை இயக்கம் பொருளாதார ரீதியாகப் பின்னடைவைச் சந்தித்துள்ள குடும்பங்களுக்கு உலர் உணவுப் பொதிகளை வழங்குகின்ற அற்றார் அழிபசி தீர்த்தல் என்ற திட்டத்தை முன்னெடுத்து வருகின்றது. கொரோனாப் பெருந்தொற்று ஏற்பட்ட காலப்பகுதியில் இருந்து பகிர்ந்துண்டு வாழ்வோம் என்ற கருப்பொருளில் இடம்பெற்று வரும் இத்திட்டத்தின் தொடர்ச்சியாகவே பொங்கல் பொதிகள் வழங்கப்பட்டுள்ளது. தைப்பொங்கல் இயற்கையைப் போற்றுகின்ற தமிழ்ப் பண்பாட்டுப் பெருவிழா என்பதையும் அலுமினியப் பாத்திரங்களில் சமைப்பதால் ஏற்படக்கூடிய பாதகமான விளைவுகளையும் கருத்திலெடுத்து அனைவருக்கும் மண்பானைகளுடன் கூடிய பொங்கல் பொதிகள் வழங்கி வைக்கப்பட்டுள்ளன. இதற்கான நிதி அனுசரணையை அமரர் பொ. பரமேஸ்வரன் அவர்களின் பிறந்த நாள் நினைவாக அவரது குடும்பத்தினரும், கனடாவில் உள்ள இலங்கை முன்னாள் வர்த்தக சங்கத்தினரும் வழங்கியிருந்தார்கள். இந்நிகழ்ச்சியில் திருமதி பராசக்தி பரமேஸ்வரன் கலந்து கொண்டு பொங்கல் பொதிகளை வழங்கி வைத்தார்.

சுண்ணாம்புக்கல் அகழ்வில் சட்டவிரோத செயற்பாடுகள் யாவும்

உடனடியாக முடிவுக்குக் கொண்டுவரப்பட வேண்டும்

பொ. ஐங்கரநேசன் கோரிக்கை

யாழ்ப்பாணக் குடாநாடு கடலாலும், கடல் நீரேரிகளாலும் சூழப்பட்ட ஒரு தீபகற்பம். பூமி வெப்பமடைவதன் விளைவாக ஏற்பட்டுவரும் கடல்மட்ட உயர்வு குடாநாட்டைப் பெருமளவு பாதிக்கும் என்று எதிர்வு கூறப்பட்டுள்ளது. இந்நிலையில், கட்டுப்பாடற்ற சட்டவிரோத சுண்ணாம்பு அகழ்வு காலநிலை மாற்றத்தால் ஏற்படவுள்ள பாதகங்களை மேலும் விரைவுபடுத்தும், அதிகப்படுத்தும். இவற்றைக் கருத்திற்கொண்டு விவசாய நடவடிக்கையைப் பாதிக்காத வகையில் சுண்ணாம்புக்கல் அகழ்வை நெறிப்படுத்துவதோடு, இதில் நிலவக்கூடிய சட்டவிரோதச் செயற்பாடுகள் அனைத்தும் உடனடியாக முடிவுக்குக் கொண்டுவரப்பட வேண்டும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் கோரிக்கை விடுத்துள்ளார்.

வடமாகாண ஆளுநரிடம் சட்டவிரோத சுண்ணக்கல் அகழ்வை முடிவுறுத்தக்கோரி பொ. ஐங்கரநேசன் இன்று வியாழக்கிழமை (09.01.2024) மனுவொன்றைச் சமர்ப்பித்த பின்னர் நிகழ்த்திய ஊடகவியலாளர் சந்திப்பிலேயே இவ்வாறு தெரிவித்துள்ளார்.

அங்கு அவர் தொடர்ந்து கருத்துத் தெரிவிக்கையில்,

இலங்கையில் சுண்ணாம்புக்கல் வடமேற்கு மாகாணத்திலும், வடக்கு மாகாணத்திலும் கரையோரத்தை அண்டிக் காணப்படும் ஒரு இயற்கை வளமாகும். புவிச்சரித வரலாற்றில் பல மில்லியன் வருடங்களுக்கு முற்பட்ட மயோசின் காலத்தில் கடலின் அடித்தளப் படிவுகளாகத் தோற்றம்பெற்ற இப்பாறைகள் சீமெந்து தயாரிப்பிலும், இதர கட்டுமானங்களிலும் பிரதான மூலப் பொருளாக விளங்குகின்றது. கூடவே, சூழலியல் ரீதியாகக் கடல் நீர் நிலத்தடி நீருடன் கலப்பதைத் தடைசெய்வதிலும், நிலத்தடி நீரோட்டத்திலும் மிகவும் இன்றியமையாத பங்களிப்பையும் வழங்கி வருகிறது.

சமீப நாட்களாகச் சுண்ணாம்புக்கல் அகழ்வும் அதனை வேறு மாவட்டங்களுக்கு எடுத்துச் செல்வதும் பெரும் சர்ச்சைகளைத் தோற்றுவித்துள்ளது. சுண்ணாம்புக்கல் அகழ்வு பயிர்ச் செய்கைக்காக இரண்டடி ஆழம் வரையில் கிளறி எடுத்தல் என்ற நிலையில் இருந்து, இன்று சீமெந்து தயாரிப்புக்காகக் கனரக வாகனங்களைக் கொண்டு அகழ்ந்தெடுத்தல் என்ற நிலைக்கு மாறியுள்ளது. குறிப்பாக, தென்மராட்சி சரசாலையில் அனுமதியின்றிச் சட்டவிரோதமாக அரச காணிகளிலும், தனியார் காணிகளிலும் பாரிய அளவில் சுண்ணாம்புக்கல் அகழ்வு இரவு நேரங்களில் இடம்பெற்று வருகிறது.

காங்கேசன்துறை சீமெந்துத் தொழிற்சாலை இயக்கப்படாதிருப்பதற்குச் சுண்ணாம்புக் கல்லைப் பெறுவதில் உள்ள இடர்பாடுகளே காரணம். கீரிமலையில் சுண்ணாம்புக்கல் அகழ்வில் ஏற்பட்ட பிரமாண்ட குழிகள் இன்னமும் மூடப்படாத நிலையில் இனிமேலும் அகழ்வைத் தொடர்வது சூழல் ரீதியாகப் பல்வேறு பாதிப்புகளை ஏற்படுத்தும் என்பதால் கிளிங்கர்களை எடுத்துவந்து, சீமெந்துத் தொழிற்சாலையை மீள இயக்க முடியும் என்று யாழ் மாவட்ட ஒருங்கிணைப்புக் குழு கூட்டத்தில் முடிவு எட்டப்பட்டுள்ளது. இந்நிலையில் இங்கிருந்து வேறு மாவட்டங்களுக்குச் சுண்ணாம்புக்கல்லை எடுத்துச்செல்வது மக்களிடையே கடும் விசனத்தை ஏற்படுத்தியுள்ளது.

நொறுக்கப்பட்ட சுண்ணாம்புக்கற்களை அரைத் தயாரிப்பாகவோ அல்லது முடிக்கப்பட்ட தயாரிப்புகளாகவோ கருதமுடியாது என்பதால் இதனை எடுத்துச் செல்வதற்குப் போக்குவரத்து உரிமம் அவசியம் எனப் புவிச்சரிதவியல் அளவை சுரங்கங்கள் பணியகம் யாழ். மாவட்டச் செயலருக்குத் தெளிவுபடுத்தியுள்ளது. இந்நிலையில், யாழ்ப்பாணத்தில் இருந்து சுண்ணாம்புக்கல் வெளிமாட்டங்களுக்குத் தங்கு தடையில்லாமல் எடுத்துச் செல்லப்படுகிறது. ஆளுநர் உடனடியாக சுண்ணக்கல் அகழ்வில் நிலவும் சட்டவிரோத செயற்பாடுகளைக் களைய ஆக்கபூர்வமான நடவடிக்கைகளை மேற்கொள்ள வேண்டும் எனவும் தெரிவித்தார்.

அரசியல் கைதிகளின் விடுதலையை வலியுறுத்திக் கையெழுத்துப் போராட்டம்

யுத்தம் முடிந்து 15 வருடங்கள் கடந்துவிட்டபோதும் அரசியல் கைதிகள் இன்னும் சிறையில் வாடுகின்றனர். புனர்வாழ்வு அளிக்கப்பட்டு விடுதலை செய்யப்பட்ட முன்னாள் போராளிகள் பலர் மீளவும் கைது செய்யப்பட்டுச் சிறைகளில் அடைக்கப்பட்டுள்ளனர். இவர்களின் விடுதலைக்காக பல்வேறு தரப்பினராலும் பல்வேறு விதமாகவும் போராட்டங்கள் முன்னெடுக்கப்பட்டபோதும் இதுவரையில் அரசியல் கைதிகளின் விடுதலை முழுமை பெறவில்லை. மாறிமாறி ஆட்சிப் பீடமேறிய அரசாங்கங்கள் தேர்தல்களுக்கு முன்னால் அரசியல் கைதிகளின் விடுதலை தொடர்பாக வாக்குறுதிகளை வழங்கியபோதும் தேர்தல்களின் பின்னர் அவற்றைக் கண்டுகொள்ளவில்லை.

இந்நிலையிலேயே, பிறந்திருக்கும் புத்தாண்டிலாவது அரசியல் கைதிகளின் விடுதலையைச் சாத்தியமாக்கும் நோக்கில் போராளிகள் நலன்காப்பகம் வடக்கு கிழக்கின் பல்வேறு மாவட்டங்களிலும் கையெழுத்துப் போராட்டத்தை முன்னெடுத்துள்ளது.

யாழ் மாவட்டத்தில் இதன் தொடக்க நிகழ்ச்சி இன்று திங்கட்கிழமை (06.01.2025) யாழ்ப்பாணம் பிரதான வீதியில் நடைபெற்றது. இதில் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் கலந்துகொண்டு கையெழுத்திட்டதோடு, அனைத்து மக்களும் கையெழுத்திட்டு அரசியல் கைதிகளின் விடுதலைப் போராட்டத்துக்கு வலுச்சேர்க்க வேண்டும் என்றும் கேட்டுக்கொண்டார்.

ஜனாதிபதித் தேர்தலில் தமிழ்ப் பொதுவேட்பாளரின் தேறிய விளைவு

கட்சியில் இருந்து அவரது நீக்கமும் தேர்தல் கணக்கறிக்கை வழக்கும் மாத்திரமே

அரசியல் அரங்கில் பொ. ஐங்கரநேசன் ஆதங்கம்

ஜனாதிபதித் தேர்தலின்போது தமிழ்த்தேசிய அரசியல் கட்சிகள் சிலவும் தமிழ் மக்கள் பொதுச்சபையும் இணைந்து உருவாக்கிய தமிழ்த்தேசியப் பொதுக்கட்டமைப்பு பொதுவேட்பாளர் ஒருவரை நிறுத்தியிருந்தது. கோட்பாட்டு ரீதியாக இதனை ஏற்றுக்கொண்ட தமிழ்த்தேசியப் பசுமை இயக்கமும் இவரது வெற்றிக்காகக் கடுமையாக உழைத்தும் இருந்தது. அவர் இரண்டு இலட்சத்துக்கும் அதிகமான வாக்குகளைத் திரட்டியிருந்தார். இது தமிழ் மக்களைத் தேசமாகத் திரட்டுவதில் கிடைத்த வெற்றியாகவே நோக்கப்பட்டது. ஆனால், பாராளுமன்றத் தேர்தலில் தேசமாகத் திரட்டப்பட்ட மக்கள் உரிய வழிகாட்டுதல் இல்லாததால் பிரிந்து நின்று தங்கள் விருப்பத்துக்கு வாக்களித்தார்கள். இந்நிலையில் தமிழ்ப்பொதுவேட்பாளரின் தேறிய விளைவாக கட்சியில் இருந்து அவர் நீக்கப்பட்டதும் ஜனாதிபதித் தேர்தலில் அவர் செலவழித்த கணக்கு விபரங்கள் தொடர்பான வழக்கும் மாத்திரமே எஞ்சியுள்ளன என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தனது ஆதங்கத்தை வெளிப்படுத்தியுள்ளார்.

தமிழ்த்தேசியப் பசுமை இயக்கத்தின் சமகால அரசியல் உரையரங்கு நேற்று ஞாயிற்றுக்கிழமை (29.12.2024) ஆவரங்கால் கூட்டுறவு மண்டபத்தில் இடம்பெற்றது. இதற்குத் தலைமை வகித்து அவர் உரையாற்றுகையிலேயே இவ்வாறு தெரிவித்துள்ளார்.

அங்கு அவர் தொடர்ந்து உரையாற்றுகையில்,

யுத்தத்துக்குப் பின்னர் தமிழ் அரசியலை நெறிப்படுத்த சிவில் அமைப்புகள் எனப்படும் குடிசார் அமைப்புகளின் வகிபாகம் இன்றியமையாததாக உணரப்பட்டது. இதன் விளைவாகவே தமிழ் மக்கள் பேரவை தோற்றம் பெற்று வெற்றிகரமாக எழுக தமிழ் பேரணிகளை நடாத்திக் காட்டியிருந்தது. தமிழ் மக்களின் அரசியல் பிரச்சினைக்காகக் குறைந்தபட்டசத் தீர்வுத் திட்டம் ஒன்றையும் முன்வைத்திருந்தது. தமிழ் மக்கள் பேரவையின் மீது மக்கள் மிகுந்த எதிர்பார்ப்பையும் கொண்டிருந்தார்கள். ஆனால், தமிழ் மக்கள் பேரவையின் இணைத் தலைவர்களில் ஒருவராக இருந்த சி.வி.விக்னேஸ்வரன் தனியான ஒரு கட்சியை ஆரம்பித்ததுடன் அது குறை ஆயுளுடன் முடிவுக்கு வந்தது.

குடிசார் அமைப்புகள் இணைந்து உருவாக்கிய தமிழ் மக்கள் பொதுச்சபை மீதும் மக்கள் நம்பிக்கை கொண்டிருந்தார்கள். இதனால்தான் பொதுவேட்பாளருக்கு தமிழ் மக்கள் திரளாக வாக்களித்திருந்தார்கள். ஆனால், அந்த நம்பிக்கையும் இப்போது பொய்த்துப்போய்விட்டது. உரிய வழிவரைபடம் அதனிடம் இல்லாத காரணத்தால் ஜனாதிபதித் தேர்தலைத் தொடர்ந்து குறுகிய கால இடைவெளியில் வந்த பாராளுமன்றத் தேர்தலை அது எதிர்கொள்ளமுடியாமல் பின்வாங்கியது. தமிழ்த்தேசிய உணர்வுடன் தன் பின்னால் திரண்ட மக்களுக்கு அது வழிகாட்டத் தவறியது. இதுவும் வடக்குக் கிழக்கில் ஜே.வி.பி இன் வெற்றிக்கு ஒரு காரணமாக அமைந்தது.

மக்கள் சிவில் சமூக அமைப்புகளை நம்பமுடியாத ஒரு சூழ்நிலையை சிவில் அமைப்புகளே இன்று உருவாக்கி விட்டன. அரசியலில் சிவில் அமைப்புகள் தங்களின் வகிபாகம் குறித்து மீள் பரிசீலனை செய்தாலொழிய அவற்றால் இன்னொரு கட்டத்துக்கு நகர முடியாது. சிவில் அமைப்புகள் சில கட்சிகளின் பினாமிகளாகவே உள்ளன. சிவில் அமைப்புகளின் மூலம் கிடைக்கும் பிரபல்யத்தைப் பயன்படுத்தி சிலர் தேர்தலில் குதிப்பவர்களாகவும் இருக்கிறார்கள். கட்சி அரசியலை முன்னிறுத்தாத, தமிழ்த்தேசிய அரசியலை மட்டுமே குறிக்கோளாகக் கொண்ட ஒரு மக்கள் இயக்கமாக சிவில் சமூகங்கள் மாற்றம் பெற்றாலொழிய தமிழ்த்தேசிய அரசியலை வருங்காலங்களில் அவற்றால் நெறிப்படுத்த முடியாது என்றும் தெரிவித்தார்.

தமிழ்த்தேசியப் பசுமை இயக்கத்தின்

சமகால அரசியல் உரையரங்கு

தமிழ்த்தேசியப் பசுமை இயக்கத்தின் ஏற்பாட்டில் சமகால அரசியல் தொடர்பான உரையரங்கு நேற்று ஞாயிற்றுக்கிழமை [ 29-12-2024] ஆவரங்கால்கூட்டுறவு மண்டபத்தில் நடைபெற்றது..

இவ்வுரையரங்கில் யாழ். பல்கலைக்கழகத்தின் சட்டத்துறை சிரேஷ்ட விரிவுரையாளர் திருமதி கோசலை மதன் தமிழ் மக்களும் புதிய அரசியல் அமைப்பும் என்ற தலைப்பிலும், யாழ். பல்கலைக்கழக கலைப்பீடப் பேராசிரியர் சி. ரகுராம் தமிழ் மக்களும் முறைமை மாற்றமும் (System Change) என்ற தலைப்பிலும் உரையாற்றியிருந்தனர்.

சுற்றுச்சூழல் ஆலோசகர் கா.சோ. சிவநேசனின் வரவேற்புரையுடன் ஆரம்பமான இவ்வுரையரங்குக்குத் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தலைமை வகித்திருந்தார்.

கடற்கோளில் பலியான உறவுகளுக்குப்

பூநகரியில் தமிழ்த்தேசியப் பசுமை இயக்கம் அஞ்சலி

இலங்கையைக் கடற்கோள் தாக்கி 20ஆவது ஆண்டு நிறைவில், இந்த இயற்கைப் பேரிடரில் சிக்கிப் பலியானவர்களை நினைவுகூர்ந்து தமிழ்த்தேசியப் பசுமை இயக்கம் அஞ்சலி செலுத்தியுள்ளது. இந்த அஞ்சலி நிகழ்ச்சி நேற்று வியாழக்கிழமை (26.12.2024) பூநகரியில் வெட்டுக்காடு பாத்திமா தேவாலய முன்றலில் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் நடைபெற்றது. இதில் வெட்டுக்காடு கிராம மக்கள் கலந்துகொண்டிருந்தார்கள்.

முதலில் கடலில் மலர் தூவி அஞ்சலி செலுத்தப்பட்டது. தொடர்ந்து இயற்கையுடன் இசைந்து வாழ்ந்தால் இயற்கைச் சீற்றங்களின் பாதிப்புகளைத் தணிக்க முடியும் என்ற பொருளில் பொ. ஐங்கரநேசனின் சூழல் விழிப்புணர்வு உரை இடம்பெற்றது. பங்கேற்ற அனைவரும் மெழுகுதிரி ஏற்றி அஞ்சலி செலுத்தியதைத் தொடர்ந்து கலந்துகொண்ட மாணவர்கள் அனைவருக்கும் தமிழ்த்தேசியப் பசுமை இயக்கத்தால் கற்றல் உபகரணங்கள் வழங்கி வைக்கப்பட்டது.

இந்தோனேசியாவின் சுமத்திரா தீவின் வடமேற்குக் கரையை அண்டிய இந்து சமுத்திரத்தின் அடித்தளத்தில் 2004ஆம் ஆண்டு டிசம்பர் 26ஆம் திகதி அதிகாலை நிகழ்ந்த பாரிய நில நடுக்கமே கடற்கோளைப் பிரசவித்திருந்தது. இதன்போது இராட்சத வேகத்துடன் மேலெழுந்து வந்த ஆழிப்பேரலைகளில் சிக்கி இந்து சமுத்திரக் கரையோர நாடுகளில் இரண்டரை இலட்சத்து அறுபத்து ஐயாயிரம் பேர் வரையில் கொல்லப்பட்டிருந்தனர். இலங்கையில் மட்டும் முப்பத்தி ஐயாயிரத்துக்கும் அதிகமானோர் பலியாகினார்கள். ஆழிப்பேரலைகளால் அள்ளுப்பட்டு ஐயாயிரத்துக்கும் அதிகமானோர் காணாமல் போயிருந்தார்கள். இவர்களை நினைவுகூர்ந்து கடற்கோள் நினைவு நாளைத் தமிழ்த்தேசியப் பசுமை இயக்கம் ஆண்டுதோறும் இயற்கைப் பேரிடர் தணிப்புத் தினமாக உணர்வு பூர்வமாகக் கடைப்பிடித்து வருகிறது.

கடற்கோள் தாக்கிய நாளை இலங்கை அரசாங்கம் தேசிய பாதுகாப்பு தினம் என்ற பெயரில் கடைப்பிடித்து வருகிறது. இப்பெயரின் பொருத்தமற்ற தன்மை கருதி வடக்கு மாகாண சபை இந்நாளை இயற்கைப் பேரிடர் தணிப்புத் தினமாக பிரகடனப்படுத்தி இருந்தமை குறிப்பிடத்தக்கது.

ஆபிரிக்கப் பெரும் நத்தைகளைக் கட்டுப்படுத்தாவிடில்

விரைவிலேயே பேராபத்துகள் விளையும்

பொ. ஐங்கரநேசன் எச்சரிக்கை

ஆபிரிக்காவைத் தாயகமாகக் கொண்ட பெரும் நத்தைகள் சமீபத்தில் பெய்த பெருமழையின் பின்னர் பல பகுதிகளில் படையெடுக்க ஆரம்பித்துள்ளன. ஆபிரிக்கப் பெரும் நத்தைகள் ஏற்கனவே இங்கு அவதானிக்கப்பட்டபோதும் இப்போது இவற்றின் பெருக்கம் அதிகமாக உள்ளது. பயிர்பச்சைகளையெல்லாம் தின்றுதீர்க்கும் இவை, உள;ளூர் உயிரினங்களுக்கு அச்சுறுத்தலாக இருப்பதோடு நோய்களைப் பரப்பும் காவிகளாகவும் செயற்படுகின்றன. இவற்றை இப்போதே கட்டுப்படுத்தத்தவறின் விரைவில் பேராபத்துகளை விளைவிப்பவையாக இவை அமையும் என்று தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் எச்சரித்துள்ளார்.

ஆபிரிக்க நத்தைகள் தொடர்பாக இன்று ஞாயிற்றுக்கிழமை (22.12.2024) பொ. ஐங்கரநேசன் தமிழ்த்தேசியப் பசுமை இயக்கத்தின் அலுவலகத்தில் நிகழ்த்திய ஊடகவியலாளர் சந்திப்பிலேயே இவ்வாறு எச்சரித்துள்ளார்.

ஊடகவியலாளர் சந்திப்பில் அவர் தொடர்ந்து தெரிவிக்கையில்,

ஆபிரிக்கப் பெரும் நத்தைகள் (African Giant Snail- Lissachtina fulica) பிரித்தானியர் ஒருவரால் பின்விபரீதங்கள் புரியாமல் இலங்கைக்குள் எடுத்துவரப்பட்ட ஓர் அந்நியஇனம். ஒரு நத்தையிலேயே ஆண், பெண் இனப்பெருக்க அமைப்புகள் இரண்டும் இருப்பதால் இரண்டு நத்தைகள் சோடி சேரும்போது இரண்டுமே முட்டைகளை உருவாக்குகின்றன. சராசரியாக 5 தொடங்கி 6ஆண்டுகள் வரை வாழுகின்ற ஒரு நத்தை தன் ஆயுளில் 1000க்கும் அதிகமான முட்டைகளை இடுகின்றது. அந்நிய இனமான இவற்றை இரையாக்க இலங்கையின் இயற்கைச் சூழலில் இரைகௌவிகள் எதுவும் இல்லை. இதனால் பல்கிப்பெருகி இப்போது ஓர் ஆக்கிரமிப்பு இனமாக உருவெடுத்துள்ளது.

உலகின் உயிர்ப்பல்வகைமையின் அழிவுக்கு அந்நிய ஊடுருவல் இனங்களும் ஒரு பெருங்காரணமாக உள்ளது. பகலில் மறைந்திருந்துவிட்டு இரவில் இரைதேடும் ஆபிரிக்க நத்தைகள் பயிர்கள், அலங்காரச் செடிகள், புல்பூண்டுகள் என்று எல்லாவற்றையும் தின்று தீர்த்து வருகின்றன. ஒரு தாவரத்தில் உள்ள நோய்க்கிருமிகளை இன்னொரு தாவரத்துக்குக் காவிச் செல்கின்றன. இவற்றோடு மனிதர்களில் மூளைமென்சவ்வு அழற்சியை ஏற்படுத்தும் ஒட்டுண்ணிப் புழுக்களை இவை காவித்திரிவதும் அறியப்பட்டுள்ளது. ஆபிரிக்க நத்தைகள் பயிர்ச்செய்கைக்கும், உயிர்ப்பல்வகைமைக்கும் அச்சுறுத்தலாக இருப்பதால் இலங்கை அரசாங்கம் இதனை அந்நிய ஊடுருவல் இனமாக அறிவித்துள்ளது.

ஆபிரிக்க நத்தைகளைக் கட்டுப்படுத்துவதற்குத் திணைக்களங்களுக்காகக் காத்திராமல் பொதுஅமைப்புகளும், பொதுமக்களும் முன்வரவேண்டும். உப்பு நீர்க்கரைசல் உள்ள பாத்திரம் ஒன்றில் இவற்றை அமிழ்த்துவதன் மூலம் சுலபமாக அழிக்க முடியும். ஆபிரிக்க நத்தைகள் நோய்க்காவிகளாகவும் இருப்பதால் வெறும் கைகளால் நேரடியாகத் தொடாமல் இலைகள், கடதாசிகள் போன்றவற்றால் இவற்றைப் பிடிப்பதே பாதுகாப்பானது. இதனை ஒரு சமூகக்கடமையாகக்கருதி நாம் விரைந்து செயற்படவில்லையெனில் ஏற்கனவே பாரிய பொருளாதாரச் சீரழிவுக்கும், சுற்றுச்சூழல் சீர்கேட்டுக்கும் ஆளாகியிருக்கும் இலங்கை இந்நத்தையாலும் பெரும் சீரழிவுகளைச் சந்திக்கநேரும் என்றும் தெரிவித்துள்ளார்.

தமிழ்த்தேசியப் பசுமை இயக்கம் வவுணதீவில்

உலருணவுப் பொதிகளை வழங்கியுள்ளது

தமிழ்த்தேசியப் பசுமை இயக்கம் வறுமைக் கோட்டுக்குக்கீழ் வாழுகின்ற மக்களுக்கு உலருணவுப் பொதிகளை வழங்கும் அற்றார் அழி பசி தீர்த்தல் என்ற திட்டத்தை கொரோனாப் பேரிடர் ஏற்பட்ட காலத்திலிருந்து முன்னெடுத்து வருகிறது. இத்திட்டத்தின் தொடர்ச்சியாகக் கடந்த புதன்கிழமை மட்டக்களப்பு வவுணதீவுப் பகுதியில் தெரிவுசெய்யப்பட்ட கர்ப்பிணித் தாய்மார்களுக்கு உலருணவுப் பொதிகளை வழங்கியுள்ளது. தமிழ்த்தேசியப் பசுமை இயக்கத்தின் மட்டக்களப்பு மாவட்ட இணைப்பாளர் இ. சூரியகுமார், சூழல் பாதுகாப்பு அணியின் துணைச் செயலாளர் த.யுகேஸ் ஆகியோர் கர்ப்பிணித் தாய்மார்களிடம் உலருணவுப் பொதிகளை வழங்கி வைத்துள்ளனர்.

வவுணதீவில் சமீபத்தில் ஏற்பட்ட வெள்ளப்பெருக்கினால் பாதிக்கப்பட்ட பாலக்காடு, ஈச்சந்தீவு, சொருவமுனை, இறக்கத்துமுனை, கரவெட்டி ஆகிய பகுதிகளிலிருந்து குடும்பநல உதவியாளர்களினால் அடையாளங் காணப்பட்ட கர்ப்பிணித் தாய்மார்களுக்கே உலருணவுப் பொதிகள் வழங்கப்பட்டுள்ளன.

மட்டக்களப்பில்

பசுமை இயக்கத்தின்

பசுமை அறிவொளி நிகழ்ச்சி

தமிழ்த்தேசியப் பசுமை இயக்கத்தின் பசுமை அறிவொளி நிகழ்ச்சி இன்று புதன்கிழமை (11.12.2024) மட்டக்களப்பு கிரானில் நடைபெற்றுள்ளது. தமிழ்த்தேசியப் பசுமை இயக்கம் மாணவர்களுக்குச் சூழல் அறிவைப் புகட்டுவதன் மூலம் சூழல் பற்றிய விழிப்புணர்வை ஏற்படுத்தி, அவர்களைச் சூழல் பாதுகாப்புச் செயற்பாடுகளில் ஈடுபடுத்தும் நோக்குடனும் மாணவர்களின் பன்முக ஆளுமைத் திறனை மேம்படுத்தும் நோக்குடனும் பசுமை அறிவொளி என்றும் நிகழ்ச்சித் திட்டமொன்றை முன்னெடுத்து வருகின்றது. இதன் தொடர்ச்சியாகவே மட்டக்களப்பு கிரானில் வெஸ்லி மண்டபத்தில் இந்நிகழ்ச்சி இடம்பெற்றுள்ளது.

தமிழ்த்தேசியப் பசுமை இயக்கத்தின் மட்டக்களப்பு மாவட்ட இணைப்பாளர் இ. சூரியகுமார் தலைமையில் நடைபெற்ற இந்நிகழ்ச்சியில் பசுமை இயக்கத்தின் சூழல் பாதுகாப்பு அணியின் துணைச் செயலாளர் த. யுகேஸ் கலந்துகொண்டு சூழல்விழிப்புணர் உரையாற்றியிருந்தார். இதில் கிரான், முறக்கொட்டாஞ்சேனை, பாலையடித்தோணா, கோரகல்லிமடு பகுதிகளைச் சேர்ந்த நூற்றுக்கும் அதிகமான மாணவர்கள் பங்கேற்றிருந்தார்கள். கலந்துகொண்ட மாணவர்கள் அனைவருக்கும் கனடா ரொறன்ரோவின் மனித நேயக்குரல் அமைப்பின் நிதி அனுசரணையுடன் அப்பியாசக் கொப்பிகள் வழங்கப்பட்டன. ரொறன்ரோவின் மனிதநேயக் குரல் மாணவர்களின் கல்வி வளர்ச்சியை நோக்காகக்கொண்டு ஆண்டுதோறும் தமிழ்த்தேசியப் பசுமை இயக்கத்தினூடாக ஆயிரக்கணக்கான மாணவர்களுக்கு அப்பியாசக் கொப்பிகளை வழங்கி வருகின்றமை குறிப்பிடத்தக்கது.

மலக்குழிக் கழிவுநீருடன் கிணற்றுநீர் கலக்கும் அபாயம்

கொதித்தாறிய நீரே பாதுகாப்பானது

பொ. ஐங்கரநேசன் எச்சரிக்கை

கொட்டித் தீர்த்த பெங்கால் புயல்மழை கிணறுகளின் நீரின் தரத்தைக் கேள்விக்கு உள்ளாக்கியுள்ளது. பெருக்கெடுத்த வெள்ள நீர் கிணறுகளை நிரப்பியுள்ளதோடு, பல இடங்களில் மலக்குழிக் கழிவு நீர் கிணற்று நீருடன் கலக்கும் அபாயமும் ஏற்பட்டுள்ளது. இந்நிலையில் கொதித்தாறிய நீரைப் பருகுவதே பாதுகாப்பானது எனத் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் எச்சரித்துள்ளார்.

பெங்கால் புயல் ஏற்படுத்திய வெள்ளப் பெருக்குத் தொடர்பாக பொ. ஐங்கரநேசன் ஊடகங்களுக்கு அனுப்பி வைத்திருக்கும் அறிக்கையிலேயே இவ்வாறு எச்சரித்துள்ளார்.

ஊடக அறிக்கையில் அவர் மேலும் தெரிவிக்கையில்,

பெங்கால் புயல் 2008 நொவம்பரில் தாக்கிய நிசா புயலைவிட வீரியம் குறைவானது. ஆயினும், நிசாவைவிட மிக மோசமான வெள்ளப் பெருக்கை ஏற்படுத்தியுள்ளது. வடக்கு அதன் வருடாந்தச் சராசரி மழைவீழ்ச்சியான 1240 மில்லிமீற்றர் மழையை ஒக்டோபர் மாதம் முடிவடைவதற்கு முன்பாகவே பெற்றிருந்த நிலையிலேயே பெங்கால் புயல் 720 மில்லிமீற்றர் மழையை மேலதிகமாகக் கொண்டு வந்து கொட்டியுள்ளது. ஏற்கனவே நிலம் அதன் நீர்க் கொள்ளளவை எட்டியிருந்த நிலையில் இம் மேலதிக மழைநீர் போக்கிடமின்றி வெள்ளக்காடாக உருவெடுத்ததில் நீர்நிலைகள் மாசடைந்துள்ளன.

வெள்ள நிவாரணப் பணிகளில் நான் ஈடுபட்டிருந்தபோது பல்வேறு பகுதிகளிலுமுள்ள கிணறுகளில் மலக்குழிக் கழிவுநீர் கலக்கும் அபாயம் என்னால் உணரப்பட்டுள்ளது. கிணறுகளில் குளோரின் இட்டுத்தொற்று நீக்குவதும், கிணற்று நீரை இறைப்பதும் அவசியமானவை. எனினும் இவை மாத்திரமே பாதுகாப்புக்குப் போதுமானவையல்ல. வெடிப்புகளையும் துளைகளையும் கொண்ட மயோசின் சுண்ணாம்புப் பாறைகளினூடாக கிணற்றுக்குள் கசியும் நிலத்தடி நீர் இன்னும் சில வாரங்களுக்கேனும் கிருமிகளைக் காவிவரும் அபாயம் உள்ளதால் கொதித்து ஆறிய நீரே முழுப்பாதுகாப்புக்கான உத்தரவாதம் ஆகும்.

வெள்ளச் சேதம் அதிகமானதற்கு வெள்ளநீர் உடனடியாவே கடலைச் சென்றடையக்கூடிய கட்டுமான வசதிகள் எம்மிடம் போதாமையும் ஒரு காரணமாகும் இருக்கின்ற வெள்ள வாய்க்கால்களும் எம்மால் முறையாகப் பராமரிக்கப்படவில்லை. பூமி சூடாகுவதன் விளைவாக ஏற்பட்டுவரும் காலநிலை மாற்றம் வருங்காலத்தில் இன்னும் மோசமான வீரியம் மிக்க புயல்களை உருவாக்குமென ஆய்வாளர்கள் எச்சரித்து வருகின்றனர். இப்போதே நாம் விழித்துக்கொண்டு முற்காப்பு நடவடிக்கைகளை மேற்கொள்ளாவிடின் இயற்கை ஏற்படுத்தப்போகும் பேரனர்த்தங்களில் இருந்து நாம் ஒருபோதும் தப்பமுடியாது என்றும் தெரிவித்துள்ளார்.

வெள்ள அனர்த்தங்களால் பாதிக்கப்பட்ட மக்களுக்குப் பசுமை இயக்கம் உணவுப்பொதிகளை

வழங்கி வருகின்றது

பெருமழையால் ஏற்பட்ட வெள்ளப்பெருக்குக் காரணமாக மக்கள் பெரூம் பாதிப்புக்கு ஆளாகியுள்ளனர் . தாழ்நிலப் பகுதிகளில் மழைநீர் வெள்ளக் காடாகத் தேங்கியுள்ளதால் மக்கள் இடம்பெயர்ந்து ஆலயங்களிலும் பாடசாலைகளிலும் பொதுமண்டபங்களிலும் தங்கியுள்ளனர். இவர்களுக்குப் பல பொது அமைப்புகளும் உதவிகளை வழங்கிவருகின்றன. தமிழ்த் தேசியப் பசுமை இயக்கமும் இம்மக்களின் கோரிக்கைக்கு அமைவாக உணவுப் பொதிகளை வழங்கி வருகின்றது. இந்நிவாரணப் பணிகள் கிராமசேவையா ளர்களின் ஒருங்கிணைப்புடன் மேற்கொள்ளப்பட்டு வருகின்றன.

இதுவரை வேறு அமைப்புகளிடம் இருந்து எந்த வித உதவிகளையும் பெறாதவர்கள் அவசியத் தேவைகள் இருப்பின் தமிழ்த் தேசியப் பசுமை இயக்கத்துடன் தொடர்பு கொள்ளலாம் . எனத் தமிழ்த் தேசியப் பசுமை இயக்கம் வெளியிட்டுள்ள செய்திக் குறிப்பில் தெரிவிக்கப்பதொடர்பு இலக்கம்ட்டுள்ளது.

கொட்டும் மழையின் மத்தியிலும்

ஏராளமானோர் பங்கேற்ற தாவராவதானி போட்டி

தமிழ்த் தேசிய பசுமை இயக்கம் வட மாகாண மரநடுகை மாதத்தை முன்னிட்டு நடாத்தும் தாவரங்களை அடையாளம் காணுகின்ற தாவராவதானி போட்டி இன்று செவ்வாய்க்கிழமை [ 26 - 11 - 2024 ] நல்லூர் திவ்ஜ ஜீவன சங்க மண்டபத்தில் சிறப்பாக நடைபெற்றது.

தமிழ் மக்கள் சூழலை குறிஞ்சி ,முல்லை, மருதம், நெய்தல், பாலை என்று ஐந்திணைகளாக வகுத்து இயற்கையோடு இசைந்து வாழ்ந்தமரபைக் கொண்டவர்கள் . போரின் முற்றுகைக்குள் இருந்தபோதும் இயற்கை எனது நண்பன் என்று சொல்லிச் சுற்றுச் சூழல் பாதுகாப்பில் கண்ணும் கருத்துமாக இருந்த தலைமைத்துவத்தைக் கொண்டிருந்தவர்கள் .ஆனால் , போரின் பின்னர் அபிவிருத்தி என்ற பெயரில் எமது வளங்கள் மிகவும் மோசமாகச் சுரண்டப்படுகின்றன. நாம் மெல்ல மெல்ல இயற்கையை விட்டு விலகிச் செல்ல ஆரம்பித்துள்ளோம்

வாடிய பயிரைக் கண்டபோதெல்லாம் வாடினேன் என்ற வள்ளலாரின் பரம்பரையைச் சேர்ந்த நாம் மரங்களை நேசிக்கத் தொடங்கவேண்டும். அதுவே நாம் இயற்கையை நேசிப்பதற்கான , இயற்கைக்குத் திரும்புவதற்கான முதற் படி. இதை நோக்காகக் கொண்டுதான் எம்மைச் சூழவுள்ள தாவரங்களை அடையாளம் காணுகின்ற தாவராவதானி போட்டியைத் தமிழ்த் தேசிய பசுமை இயக்கம் நடத்தி வருகின்றது.

ஆண்டுதோறும் நடாத்தப்படும் இப்போட்டியில் பால் வயது வேறுபாடின்றி ஆர்வத்தோடு ஏராளமானோர் பங்கேற்று வருகின்றனர்.இம்முறையும் சீரற்ற காலநிலையையும் பொருட்படுத்தாது அதிக எண்ணிக்கையானோர் பங்கேற்றிருந்தார்கள் வெற்றியாளர்களுக்கு அடுத்த ஆண்டின் தொடக்கத்தில் நடைபெறவுள்ள பசுமை அமைதி விருதுகள் விழாவின்போது சான்றிதழ்களோடு பரிசுகளும் வழங்கப்படவுள்ளன.

தமிழ்த்தேசியப் பசுமை இயக்கத்தால்

தொய்வின்றித் தொடரும் மரக்கன்றுகள் விநியோகம்

தமிழ்த்தேசியப் பசுமை இயக்கம் ஆண்டுதோறும் நொவம்பர் மாதத்தில் வடமாகாண மரநடுகை மாதத்தைச் சிறப்பாகக் கொண்டாடி வருகிறது. இதை முன்னிட்டுத் தமிழ்த்தேசியப் பசுமை இயக்கத்தால் நல்லூர் சங்கிலியன் பூங்காவில் நடாத்தப்படும் கார்த்திகை வாசம் மலர்க்கண்காட்சி இம்முறையும் நொவம்பர் 22ஆம் திகதி தொடங்கி 30ஆம் திகதி வரைக்கும் நடைபெறுவதற்குத் திட்டமிடப்பட்டிருந்தது. ஆனால், இக்காலப்பகுதியில் புயலுடன் கூடிய மழை வடபகுதியைத் தாக்கும் என்று வானிலையாளர்கள் கடுமையாக எச்சரித்திருந்ததன் காரணமாக இக்கண்காட்சி திட்டமிட்டவாறு இடம்பெறவில்லை.

எனினும், தமிழ்த்தேசியப் பசுமை இயக்கத்திடம் ஏற்கனவே மரக்கன்றுகள் பெற்றுக்கொள்வதற்காகப் பதிவு செய்திருந்த பொதுமக்களுக்கும் பொது அமைப்புகளுக்கும் மரக்கன்றுகள் இலவசமாக வழங்கப்பட்டு வருகின்றன. இறந்தவர்களை நினைவுகூரும் முகமாக மரக்கன்றுகளை நடுகை செய்யும் வழமை தமிழ் மக்களிடையே தொன்றுதொட்டு நிலவி வருகின்றது. இம்மாதம் வீர மறவர்களை நினைவிற்கொள்ளும் மாதம் என்பதால் சீரற்ற காலநிலையையும் பொருட்படுத்தாது ஏராளமானோர் மரக்கன்றுகளைப் பெற்றுச்செல்வதும், மரநடுகையில் ஈடுபட்டு வருகின்றமை குறிப்பிடத்தக்கது.

தாவரங்களை அடையாளம் காணுகின்ற

தாவராவதானி போட்டி

வட மாகாண மரநடுகை மாதத்தை முன்னிட்டுத் தமிழ்த் தேசிய பசுமை இயக்கம் நடாத்தும் தாவரங்களை அடையாளம் காணுகின்ற தாவராவதானி போட்டி எதிர்வரும் செவ்வாய்க்கிழமை [ 26 - 11 - 2024 ] நல்லூர் திவ்ஜ ஜீவன சங்க மண்டபத்தில் காலை 11 மணிக்கு நடை பெற உள்ளது.

இயற்கை எனது நண்பன் என்ற பிரசித்தமான மேற்கோளுக்கு அமைவாக தாவரங்களை அடையாளம் காண்பதன் மூலம் தாவரங்களையும் இயற்கையையும் நேசிக்கக் கற்றுத்தருவதை நோக்காகக் கொண்டு இப்போட்டி ஒழுங்கமைக்கப்படுள்ளது .

தமிழ்த் தேசியபசுமை இயக்கத்தால் ஆண்டுதோறும் நடாத்தப்படும் இப்போட்டியில் பால் , வயது வேறுபாடின்றி எவரும் பங்கு கொள்ளலாம். முன் பதிவு இல்லாமல் இப்போட்டியில் நேரடியாகக் கலந்து கொள்ள முடியும்.

வெற்றியாளர்களுக்குச் சான்றிதழ்களோடு பரிசுகளும் வழங்கப்படவுள்ளன.. இவ்வாறு தமிழ்த் தேசிய பசுமை இயக்கம் வெளியிட்டுள்ள செய்திக் குறிப்பில் தெரிவிக்கப்படுள்ளது.

சங்கிலியன் பூங்காவில் நாளை ஆரம்பமாகவிருந்த

மலர்க்கண்காட்சி பிற்போடப்பட்டுள்ளது

நல்லூர் சங்கிலியன் பூங்காவில் நாளை (22.11.2024) வெள்ளிக்கிழமை ஆரம்பமாகவிருந்த மலர்க்கண்காட்சி புயலுடன்கூடிய மழை எதிர்பார்க்கப்படுவதன் காரணமாகப் பிற்போடப்பட்டுள்ளது.

வடமாகாண மரநடுகை மாதத்தை முன்னிட்டுத் தமிழ்த்தேசியப் பசுமை இயக்கம் தாவர உற்பத்தியாளர்களுடன் இணைந்து ஆண்டுதோறும் மலர்க்கண்காட்சியை சிறப்பான முறையில் நடாத்தி வந்துள்ளது. இந்த ஆண்டும் மலர்க்கண்காட்சி இம்மாதம் 22ஆம் திகதி தொடங்கி 30ஆம் திகதி வரை சங்கிலியன் பூங்காவில் (கிட்டுப் பூங்கா) ஏற்பாடு செய்யப்பட்டிருந்தது. வங்காள விரிகுடாவில் ஏற்பட்ட தாழமுக்கம் காரணமாக இக் காலப்பகுதியில் புயலுடன் கூடிய மழை எதிர்பார்க்கப் படுவதாக வானிலை ஆய்வாளர்கள் எச்சரித்துள்ளனர். இதன் காரணமாகவே இம்மலர்க்கண்காட்சி பிற்போடப் பட்டுள்ளது. புதிய திகதி பின்னர் அறியத்தரப்படும்.

எனினும், தமிழ்த்தேசியப் பசுமை இயக்கத்திடம் இருந்து இலவசமாக மரக்கன்றுகளை பெற்றுக்கொள்வதற்கு ஏற்கனவே பதிவு செய்திருந்த அனைவரும் தமிழ்த்தேசியப் பசுமை இயக்கத்தின் அலுவலகத்துடன் தொடர்புகொண்டு மரக்கன்றுகளைப் பெற்றுக்கொள்ளலாம்.

இவ்வாறு தமிழ்த்தேசியப் பசுமை இயக்கம் ஊடகங்களுக்கு அனுப்பி வைத்துள்ள செய்திக் குறிப்பில் தெரிவிக்கப் பட்டுள்ளது.

தமிழ்த் தேசியப் பசுமை இயக்கம்

அக்கராயனில் மரக்கன்றுகளை வழங்கியுள்ளது

தமிழ்த்தேசியப் பசுமை இயக்கம் வடமாகாண மரநடுகை மாதத்தை முன்னிட்டுக் கிளிநொச்சியில் அக்கராயன் கரித்தாஸ் குடியிருப்புக்கு மரக்கன்றுகளை வழங்கியுள்ளது.

வடக்கு மாகாணசபை 2014ஆம் ஆண்டு கார்த்திகை மாதத்தை வடமாகாண மரநடுகை மாதமாகப் பிரகடனப்படுத்தியிருந்தது. இதனை ஆண்டுதோறும் தவறாது கடைப்பிடித்து வரும் தமிழ்த்தேசியப் பசுமை இயக்கம் இக்காலப்பகுதியில் பொதுமக்களுக்கும், பொது அமைப்புகளுக்கும் மரக்கன்றுகளை இலவசமாக வழங்கிவருவதோடு, மரக்கன்றுகளை நடுகை செய்தும் வருகிறது. இதன் தொடர்ச்சியாகவே நேற்று ஞாயிற்றுக்கிழமை (17.11.2024) அக்கராயனில் கரித்தாஸ் குடியிருப்பு மக்கள் கேட்டுக் கொண்டதற்கிணங்க அனைத்துக் குடும்பங்களுக்கும் மாமரக்கன்றுகள் வழங்கி வைக்கப்பட்டுள்ளன.

தமிழ்த்தேசியப் பசுமை இயக்கத்தின் இணைப்பாளர் உ.நிறோஜன் தலைமையில் நடைபெற்ற இந்நிகழ்ச்சியில் பசுமை இயக்கத்தின் தலைவர் பொ. ஐங்கரநேசன், சூழல் பாதுகாப்பு அணியின் துணைச் செயலாளர் த. யுகேஸ் ஆகியோர் கலந்துகொண்டு மரக்கன்றுகளை வழங்கிவைத்துள்ளனர்.

பசுமை அரசியலை வீறுடன் முன்னெடுக்கும்

உத்வேகத்தை இத்தேர்தல் எமக்கு வழங்கியிருக்கிறது

பொ. ஐங்கரநேசன் தெரிவிப்பு

பாராளுமன்றத் தேர்தலில் சுயேச்சை அணியாகப் போட்டியிட்ட நாம் பாராளுமன்ற ஆசனத்தை வெல்ல முடியாதபோதும் மக்கள் எமக்குக் கணிசமான வாக்குகளை வழங்கியிருக்கிறார்கள். படைபலம், பணபலம், பன்னாட்டு நிறுவனங்களின் பின்புலம் எதுவுமில்லாத சாமானியர்களின் கட்சியான எமக்குத் தென்னிலங்கை அரசியற் சூறாவளி இங்கு ஏற்படுத்தியிருக்கும் அலைகளின் மத்தியிலும் மக்கள் 7,496 வாக்குகளை வழங்கியிருக்கிறார்கள். இது தமிழ்த்தேசியத்தில் பசுமை அரசியலை வீறுடன் முன்னெடுக்கும் உத்வேகத்தை எமக்கு வழங்கியிருக்கிறது என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தெரிவித்திருக்கிறார்.

தமிழ்த்தேசியப் பசுமை இயக்கம், சனநாயகத் தமிழரசுக் கட்சியுடன் இணைந்து பாராளுமன்றத் தேர்தலில் சுயேச்சையாக மாம்பழம் சின்னத்தில் போட்டியிட்டிருந்தது. இத்தேர்தல் முடிவுகள் தொடர்பாக பொ. ஐங்கரநேசன் விடுத்திருக்கும் ஊடக அறிக்கையிலேயே இவ்வாறு தெரிவித்துள்ளார்.

அந்த அறிக்கையில் அவர் தொடர்ந்து தெரிவிக்கையில்,

தமிழ்த்தேசியப் பசுமை இயக்கம் சுயேச்சையாகத் தேர்தலை எதிர்கொண்டபோதும், தேர்தல்களின்போது மாத்திரம் தோன்றி மறையும் மழைக் காளான் சுயேச்சைகள் அல்லர் நாம். மாறாக, நாம் இந்த மண்ணில் நிலையாகக் காலூன்றிச் சமூக, அரசியற் செயற்பாடுகளைத் தொடர்ச்சியாக முன்னெடுத்து வருகின்ற ஒர் பசுமைக் கட்சி ஆகும். உலக நாடுகளில் சூழல்சார் அரசியல் காத்திரமான முடிவுகளை மேற்கொள்ளும் வகையில் பசுமைக் கட்சிகள் உருவாகி, பாராளுமன்றத்தில் பிரதிநிதித்துவங்களைக் கொண்டிருக்கின்றன. ஆனால், பேரினவாதம் கோலோச்சும் இலங்கையில் சூழலியல் வாதம் இன்னமும் கண்டுகொள்ளப்படாமலேயே உள்ளது.

தமிழ்த்தேசியப் பசுமை இயக்கம் தேசியத்தையும் சூழலியத்தையும் ஒன்றிலிருந்து ஒன்று பிரிக்க முடியாத கோட்பாடுகளாகக் கருதியே பயணித்து வருகின்றது. தமிழ்த்தேசியம் பேசும் கட்சிகளில் சில அணிந்திருக்கும் போலித்தேசிய முகமூடிகளும், கட்சிகளின் உள்ளே நிலவும் எதேச்சாதிகாரமும் ஜனநாயக மறுப்பும், அவற்றின் சூழலியம் பற்றிய ஆழமான புரிந்துணர்வின்மையும் எம்மைத் தனிவழி பயணிக்க வைத்திருக்கிறது. எனினும், உண்மையான தமிழ்த் தேசியக் கட்சிகள், தமிழ்த்தேசியவாதிகள் ஒருங்கிணைந்து பயணிக்க வேண்டியதன் அவசியத்தையும் நாம் தொடர்ந்து வலியுறுத்தியே வந்துள்ளோம்.

பாராளுமன்றத் தேர்தல் முடிவுகள் தமிழ்த்தேசியவாதிகளின் ஒற்றுமையை வலியுறுத்துவனவாகவே அமைந்துள்ளன. உண்மையான தமிழ்த்தேசியவாதிகள் ஒவ்வொருவரும் அடுத்தவரது சுயத்தை அங்கீகரித்தவாறு, ஒருவரில் இன்னொருவர் ஏறிச் சவாரிக்கும் கபட நோக்கு இல்லாது இதய சுத்தியுடன் ஒரு குடையின்கீழ் பயணிப்பதற்கு முன்வரவேண்டும். தமிழ்த்தேசியப் பசுமை இயக்கம் இம்முயற்சிக்கு ஒத்துழைப்பு நல்கும். பாராளுமன்ற உறுப்பினர்களாகத் தெரிவானவர்களுக்கு எமது வாழ்த்துகளைத் தெரிவிப்பதோடு, எம்மை வெற்றிபெற வைக்கவேண்டும் என்று கடுமையாக உழைத்த அனைவருக்கும் எமது நன்றிகளையும் தெரிவித்துக்கொள்கிறோம் என்றும் குறிப்பிட்டுள்ளார்.

தமிழ்த்தேசியத்தில் தடம்மாறாது பயணிக்க விரும்புபவர்கள்

மாம்பழம் சின்னத்துக்கே வாக்களிக்க வேண்டும்

பொ. ஐங்கரநேசன் கோரிக்கை

தமிழ்த்தேசியத்தை, தமிழைத் தங்களது பெயரில் கொண்டுள்ள கட்சிகள் மாத்திரமல்ல, அரசுசார்புக் கட்சிகளின் வேட்பாளர்கள்கூடத் தமிழ்த்தேசியம் பற்றி முழங்கி வருகிறார்கள். தமிழ்த்தேசியத்தை இன்று உச்சரிப்பவர்கள் பலரும் தமிழ்த்தேசியத்தைக் கைவிட்டவர்களாகவும், தமிழ்த்தேசியத்துக்கெதிரான நிலைப்பாட்டில் பயணிப்பவர்களாகவுமே உள்ளார்கள். ஆனால், தமிழ் மக்களின் நெஞ்சில் தமிழ்த்தேசியம் இன்றும் அடைகாக்கப்பட்டுக்கொண்டுதான் இருக்கிறது. இதனால்த்தான் சனாதிபதித் தேர்தலின்போது தமிழ்ப் பொதுவேட்பாளருக்கு இரண்டேகால் இலட்சத்துக்கும் அதிகமான வாக்குகள் கிடைத்தன. நடைபெறவுள்ள பாராளுமன்றத் தேர்தலில் தமிழ்த்தேசியத்தில் தடம் மாறாது பயணிக்க விரும்பும் இம்மக்கள் யாவரும் மாம்பழம் சின்னத்துக்கே வாக்களிக்க வேண்டும் என்று தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் கோரிக்கை விடுத்துள்ளார்.

பாராளுமன்றத் தேர்தலில் சனநாயகத் தமிழரசுக் கூட்டமைப்பின் சார்பில் மாம்பழம் சின்னத்தில் போட்டியிடும் தமிழ்த் தேசியப் பசுமை இயக்கத்தின் தலைவர் பொ. ஐங்கநேசன் சிறுப்பிட்டியில் நேற்று ஞாயிற்றுக்கிழமை (10.11.2024) நடைபெற்ற பரப்புரைக்கூட்டத்தில் உரையாற்றியபோதே இவ்வாறு தெரிவித்தார்.

அங்கு அவர் தொடர்ந்து உரையாற்றுகையில்,

தமிழ்த்தேசியம் என்பது உள்ளுடன் அற்ற ஒரு வெற்றுக்கோது அல்ல. ஒரு இனம் பேசுகின்ற மொழி, அது வாழுகின்ற சூழல், அதன் பண்பாடு ஆகியன பற்றிய ஒருகூட்டுப் பிரக்ஞையே தேசியமாகும். இது அந்த இனத்தின் ஆன்மா போன்றது. தேசியத்தின் கூறுகளாக உள்ள மொழி, சூழல், பண்பாடு ஆகியவனவற்றுக்கு எதிராக ஆக்கிரமிப்பு நிகழுகின்ற போதெல்லாம் உண்மையான தேசியவாதிகள் அதற்கெதிராகக் கிளர்ந்தெழுவார்கள். சிங்கள- பௌத்த தேசியவாதத்தால் தமிழினம் ஆக்கிரமிக்கப்பட்டபோதுதான் தமிழ் மக்களிடையே தமிழ்த்தேசிய உணர்வுநிலை மேலேழுந்து தமிழ்த் தேசிய விடுதலைப் போராட்டத்துக்கு வித்திட்டது.

முள்ளிவாய்க்கால் யுத்தத்துடன் தமிழ்த்தேசிய விடுதலைப் போராட்டத்தின் ஆயுதவழிப் பயணம்தான் முடிவுக்கு வந்தது. தமிழ்த்தேசிய விடுதலைப் போராட்டம் ஜனநாயகரீதியாக முன்னெடுக்கப்பட வேண்டும் என்பதற்காகவே விடுதலைப் புலிகளினால் தமிழ்த் தேசியக் கூட்டமைப்பு உருவாக்கப்பட்டிருந்தது. ஆனால், முள்ளிவாய்க்கால் யுத்தத்தின் முடிவோடு ஒரு தொடர் அஞ்சலோட்டம் போலத் தமிழ்த் தேசிய விடுதலைப் போராட்டத்தை முன்னெடுத்திருக்க வேண்டிய தமிழ்த்தேசியக் கூட்டமைப்பு அந்தப் பாதையில் இருந்து விலக ஆரம்பித்தது. இன்று அது தமிழ்த்தேசியம் என்ற நிலைப்பாட்டில் இருந்து வெகுதூரம் விலகிவிட்டது.

தமிழ்த்தேசியக் கூட்டமைப்பில் பெரும்பான்மை வகித்த தமிழரசுக் கட்சி முதலில் கூட்டமைப்பைப் புலிநீக்கம் செய்தது. இப்போது தமிழ்த்தேசியக் கோட்பாட்டையும் முற்றாக நீக்க முனைந்துள்ளது. தமிழ்த்தேசியப் பசுமை இயக்கம் தேசியத்தையும், சூழலியத்தையும் விடுதலைப் போராட்டத்தின் இலக்கை நோக்கிய இரண்டு வழிமுறைகளாகக்கருதி உறுதியோடு பயணித்து வருகின்றது. தமிழ்த் தேசியத்தில் தடம்மாறாது பயணித்து வரும் நாம் இம்முறை பாராளுமன்றத் தேர்தலில் மாம்பழம் சின்னத்தில் போட்டியிடுகின்றோம். மக்கள் போலித் தமிழ்த்தேசியவாதிகளை நிராகரித்து எம்மை ஆதரிக்க வேண்டும் என்றும் தெரிவித்தார்.

பன்னாட்டு நிறுவனங்களின் பணத்துக்குத் தமிழ்த்தேசியம் பேசும்

வேட்பாளர்கள் சிலரும் சோரம்போயுள்ளனர்

பொ. ஐங்கரநேசன் குற்றச்சாட்டு

இலங்கையில் ஜனாதிபதியாக இருப்பவர், பிரதமராக இருப்பவர் தமது நலன்களைப் பேணுபவராக இருக்க வேண்டும் என்று இந்தியாவோ அல்லது வேறு வல்லாதிக்க நாடுகளோ விரும்புவது வழமை. ஆனால், இப்போது பன்னாட்டு நிறுவனங்களும் தமது திட்டங்களை நிறைவேற்றுவதற்குத் தமக்குச் சேவகம் செய்யக்கூடியதாகப் பாராளுமன்றில் உறுப்பினர்கள் இருக்கவேண்டும் என்று விரும்புகின்றன. நடைபெறவுள்ள பாராளுமன்றத் தேர்தலில் வெவ்வேறு கட்சிகளில் இருந்தும் பணத்துக்கு மசியக்கூடிய வேட்பாளர்களை அடையாளம் கண்டு அவர்களை வெல்லவைத்துப் பாராளுமன்றம் அனுப்புவதற்காகப் பணத்தை தண்ணீராகச் செலவு செய்கின்றன. பன்னாட்டு நிறுவனங்களின் பணத்துக்குத் தமிழ்த்தேசியம் பேசும் வேட்பாளர்கள் சிலரும் சோரம்போயுள்ளனர் என்று தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் குற்றம் சாட்டியுள்ளார்.

பாராளுமன்றத் தேர்தலில் சனநாயத் தமிழரசுக் கூட்டமைப்பின் சார்பில் மாம்பழம் சின்னத்தில் சுயேச்சையாகப் போட்டியிடும் பொ. ஐங்கரநேசன் நல்லூரில் நேற்று சனிக்கிழமை (09.11.2024) நடைபெற்ற பரப்புரைக்கூட்டத்தில் உரையாற்றியபோதே இவ்வாறு குற்றம்சாட்டியுள்ளார்.

அங்கு அவர் தொடர்ந்து உரையாற்றுகையில்,

இப் பாராளுமன்றத் தேர்தலில் தமிழ்த் தேசிய அரசியல் பல்வேறு சவால்களுக்கு முகம்கொடுக்க வேண்டிய நிர்ப்பந்தம் ஏற்பட்டுள்ளது. அண்மையில் ஒருசில பல்கலைக்கழக விரிவுரையாளர்களும் வேறுபுத்திஜீவிகள் சிலரும் இணைந்து ஜே.வி.பிக்கு வாக்களிக்குமாறு ஊடகவியலாளர் சந்திப்பை நிகழ்த்தி மக்களைக் கோரியுள்ளனர். இவர்கள் மாற்றத்துக்காக மாற்றானுக்கு வாக்களிக்குமாறு கோரியுள்ளார்கள். இலங்கைத் தேசியத்துக்குள் தமிழ்த் தேசியத்தைக் கரைத்து எமது தேசிய விடுதலைப் போராட்டத்தை நீர்த்துப்போகச் செய்யும் விதமாகவே இவர்களது கோரிக்கை அமைந்துள்ளது.

தென்னிலங்கையில் ஏற்பட்டுள்ள அரசியல் மாற்றம் தமிழ் மக்களுக்கான அரசியல் மாற்றம் அல்ல. தமிழின வீரோதத்தைக் கக்கிவந்த ஜே.வி.பி. ஆட்சியதிகாரத்தில் ஏறியவுடன் தங்கள் குணத்தை மாற்றிக் கொள்வார்கள் என்று நாம் எதிர்பார்ப்பது முட்டாள்த்தனமானது. தமிழ் மக்களின் இனப்பிரச்சினைக்கான திர்வைப் புறம்தள்ளி ஜே.வி.பி மட்டுமல்ல எந்தவொரு தென்னிலங்கைக் கட்சியாலும் இலங்கையின் பொருளாதாரத்தை விருத்தி செய்யமுடியாது. எமது புத்திஜீவிகள் ஜே.வி.பிக்கான ஆதரவை மக்களிடம் கோருவதற்குப் பதிலாக இனப்பிரச்சினைக்கான தீர்வை முன்வைக்குமாறு ஜே.வி.பிக்கே அழுத்தம் கொடுக்க வேண்டும்.

தமிழ்த் தேசியக் கட்சிகளின் பிளவுகளும், அரசியல்வாதிகளின் மதுபான அனுமதிப்பத்திர வியாபாரங்களும் மக்களிடையே தமிழ் அரசியல்வாதிகள்மீது வெறுப்பையும் சலிப்பையும் ஏற்படுத்தியுள்ளது. தமிழ்க் கட்சிகள் மீது மக்கள் கொண்டிருக்கும் இந்த அதிருப்தியைத் தென்னிலங்கைக் கட்சிகள் தங்களுக்குச் சாதகமாக்கி வருகின்றன. தமிழ் மக்கள் எந்தக்காரணத்துக்காகவும் தென்னிலங்கைக் கட்சிகளுக்கு வாக்களிக்கக்கூடாது. எதற்கும் சோரம்போகாத தமிழ்த் தேசியத்தின் மீது பற்றுறுதி கொண்ட வேட்பாளர்களை அடையாளங்கண்டு அவர்களை வெல்லவைக்க முன்வரவேண்டும் என்றும் கேட்டுக்கொண்டார்.

பாராளுமன்றத்தில் பசுமைக்கட்சிகளின்

பிரதிநிதித்துவம் அவசியம் வேண்டும்

பசுமை இயக்கத் தலைவர் பொ. ஐங்கரநேசன் சுட்டிக்காட்டு

காலநிலையில் படுபாதகமான மாற்றங்கள் ஏற்பட்டுவருவது உலகை அச்சுறுத்தும் தலையாய பிரச்சினையாக உருவெடுத்துள்ளது. இதனை எவ்வாறு எதிர்கொள்ள வேண்டும் என்பது தொடர்பாக ஐக்கியநாடுகள்சபையும் நாடுகளின் அரசாங்கங்களும் முன்னுரிமை கொடுத்துப் பணியாற்றிக் கொண்டிருக்கின்றன. இந்நாடுகள் பலவற்றில் பசுமைக் கட்சிகள் உருவாகி சூழல் அரசியலில் காத்திரமான முடிவுகளை எடுக்கும் வகையில் பாராளுமன்றத்தில் பிரதிநிதித்துவங்களையும் கொண்டிருக்கின்றன. ஆனால் பேரினவாதம் கோலோச்சும் இலங்கையில் மட்டும் சூழலியல்வாதம் இன்னமும் கண்டுகொள்ளப்படாமலேயே உள்ளது. இதனை மாற்றியமைக்கஇ இலங்கைப் பாராளுமன்றத்தில் பசுமைக்கட்சிகளின் பிரதிநிதித்துவம் அவசியம் வேண்டும் என்று தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

நடைபெறவுள்ள பாராளுமன்றத் தேர்தலில் தமிழ்த்தேசியப் பசுமை இயக்கம் சனநாயகத் தமிழரசுக் கட்சியுடன் இணைந்து சனநாயகத் தமிழரசுக் கூட்டமைப்பாக மாம்பழம் சின்னத்தில் போட்டியிடுகின்றது. இதன் பரப்புரைக் கூட்டம் நேற்று வியாழக்கிழமை (07.11.2024) மல்லாகத்தில் நடைபெற்றபோதே பொ. ஐங்கரநேசன் இவ்வாறு சுட்டிக்காட்டியுள்ளார்.

அங்கு அவர் தொடர்ந்து உரையாற்றுகையில்,

ரணில் விக்கிரமசிங்க பிரதமராக இருந்தபோது காலநிலை மாற்றங்களை எதிர்கொள்வது தொடர்பாகத் தனது ஆலோசகராக விடுதலைப் புலிகளினுடனான பேச்சுவார்த்தைக் காலத்தில் ஒருங்கிணைப்பாளராகப் பணியாற்றிய எரிக்சொல்ஹெய்மை நியமித்திருந்தார். ஆனால் எவ்விதமான பணிகளும் முன்னெடுக்கப்படவில்லை. பின்னர் ஜனாதிபதியானதும் காலநிலை மாற்றம் தொடர்பான ஆய்வுகளை மேற்கொள்வதற்குச் சர்வதேசத்தரம் வாய்ந்த பல்கலைக்கழகம் ஒன்றை அமைக்கவிருப்பதாக அறிவித்தார். ஆனால் செயல் வடிவம் பெறவில்லை. இந்த அறிவிப்பை உலகநாடுகளிடமிருந்து கடன் வாக்குவதற்கான ஒரு உத்தியாக மாத்திரமே அவர் பயன்படுத்தினார்.

இலங்கையின் அபிவிருத்தித் திட்டங்களில் பெரும்பாலானவை வளங்களைக் கண்மூடித்தனமாக அழித்துச் சுற்றுச்சூழலைப் பாதிக்கின்றனவாகவே உள்ளன. சுற்றுச்சூழலைப் பலிகொடுத்து நிலையான அபிவிருத்தியை முன்னெடுக்க முடியாது. சூழலை அழித்து ஒருபோதும் பொருளாதாரச் சுமையில் இருந்தும் கடன் சுமையில் இருந்தும் விடுபடமுடியாது. சூழல் அழிவும் வளங்களின் சூறையாடலும் அரசியல் நிலையின்மையையும் பொருளாதார நிலையின்மையையும் ஏற்படுத்தும். இறுதியில் நாட்டில் அமைதியின்மையையும் அரசுக்கெதிரான குழப்பங்களையுமே ஏற்படுத்தும். உலகநாடுகள் பலவற்றின் வரலாறு இதுவாகவே உள்ளது.

தமிழ்த் தேசியப் பசுமை இயக்கம் தேசியத்தையும் சூழலியத்தையும் இரண்டு கண்களாகக் கருதுகின்றது. கம்யூனிசம், சோசலிசம் போன்றே தேசியமும் சூழலியமும் மானுடத்தை வழிநடத்துவதற்கான கோட்பாடுகள்தாம். இலங்கை அரசியலிலேயே தேசியத்தையும் சூழலியத்தையும் வலியுறுத்துகின்ற ஒரேயொரு கட்சி தமிழ்த் தேசியப் பசுமை இயக்கம் மட்டுமே. அந்த வகையில், மாம்பழம் சின்னத்தில் போட்டியிடும் அதன் வேட்பாளர்களை மக்கள் வெல்லவைத்து முடிவெடுக்கும் அதிகார பீடமான பாராளுமன்றத்தில் அவர்களுக்கான பிரதிநிதித்துவங்களை வழங்கவேண்டும் என்று கேட்டுக்கொள்கிறேன் எனவும் தெரிவித்துள்ளார்.

பனை அபிவிருத்திச் சபையின் வளர்ச்சியையே விரும்பாத ஜே.வி.பியா

தமிழ் மக்களுக்கான தீர்வைத் தரப்போகின்றது?

பசுமை இயக்கத் தலைவர் பொ. ஐங்கரநேசன் கேள்வி

பனை அபிவிருத்திச்சபையின் தலைவராக செல்வின் இரேனியஸ்சை கடந்த மாதம் அமைச்சர் விஜிதஹேரத் நியமித்தபோது பனை அபிவிருத்திச்சபைக்கு விடிவுகாலம் பிறந்திருப்பதாகவே நாம் நினைத்தோம். ஆனால், இருவார காலத்துக்குள்ளாகவே அவரது நியமனம் இரத்துச் செய்யப்பட்டு மீண்டும் முருங்கை மரம் ஏறும் வேதாளம் போலப் பொருத்தமற்ற ஒருவர் பனை அபிவிருத்திச்சபையின் தலைவராக நியமிக்கப்பட்டுள்ளார். இந் நியமன மாற்றத்தின் மூலம் பனை அபிவிருத்திச் சபையின் வளர்ச்சி மேலும் பின்நோக்கித் தள்ளப்பட்டுள்ளது. எமது மக்களில் சிலரும் ஜே.வி.பி தமிழ் மக்களுக்கு நல்லது செய்யும் என்று மனப்பால் குடித்துக்கொண்டிருக்கிறார்கள். பனை அபிவிருத்திச் சபையின் வளர்ச்சியையே விரும்பாத ஜே.வி.பியா தமிழ் மக்களுக்கான தீர்வைத் தரப்போகின்றது.

பனை வளத்துறை முகம்கொடுக்கும் சவால்களை எதிர்கொண்டு அதனை வினைத்திறனுடன் இயங்கவைத்து அதனூடாக மக்களின் வாழ்வாதாரத்தை மேம்படுத்தும் நோக்குடனேயே பனை அபிவிருத்திச்சபை 1978ஆம் ஆண்டு உருவாக்கப்பட்டது. இதன் தோற்றத்துக்குக் காரணமாக இருந்த தொழிற்சங்கவாதி கே.சி.நித்தியானந்தா முதலாவது தலைவராக இருந்து திறம்படப் பணியாற்றினார். அதன் பின்னர் தலைவர்களாக இருந்த நடராஜா, கோகுலதாசன் போன்ற ஒருசிலரைத்தவிர பனை அபிவிருத்திச்சபைக்கு தலைவர்களாக நியமிக்கப்பட்டவர்களில் பெரும்பாலானோர் இதற்குப் பொருத்தமற்றவர்களாகவே இருந்தார்கள். தென்னிலங்கை அரசியல் கட்சிகளில் தேர்தல்களில் போட்டியிட்டுத் தோற்றவர்களும் அக் கட்சிகளின் விசுவாசிகளுமே வேறு போக்கிடமின்றி நியமனம் செய்யப்பட்டதுபோல இங்கு அனுப்பிவைக்கப்பட்டார்கள்.

பனை தமிழ் மக்களின் இயற்கை வளங்களில் முதன்மையானது. நீரைப் பற்றிப்பிடிக்கும் நீர்க்காந்தம் போலப் பனை தொழிற்படுவதாலேயே நிலத்தடிநீரை நாம் பெறக்கூடியதாக இருக்கிறது. தமிழ் மக்களின் பிரதானமான பொருளாதார வளமும் பனைதான். ஆனால் பனை இன்று தேடுவாரற்ற, ஒதுக்கப்பட்ட மரம் போல் ஆகிவருகிறது. பனை அபிவிருத்திச்சபை இப்போது இருப்பது போன்றே தொடர்ந்தால் பனை மரத்துக்குச் சாபவிமோசனமே கிடையாது. மத்திய அரசு நிர்வாகத்தின் கீழ் இருக்கும் பனை அபிவிருத்திச்சபையைத் தொடர்ந்தும் நம்பாமல் மாகாண நிர்வாகத்தின் கீழ் அல்லது சுயாதீனமாகவேனும் பனை வளத்தைப்பேணிப் பனைப் பொருளாதாரத்தை ஊக்குவிற்பதற்கு ஒரு அமைப்பை நிறுவவேண்டியது காலத்தின் கட்டாயமாகும். துறைசார் வல்லுநர்கள் இதற்கு முன்வரவேண்டும்.

03-11-2024- யாழ் ஊடக அமையத்தில் இடம்பெற்ற ஊடகவியலாளர் சந்திப்பு. பொ.ஐங்கரநேசன்

பசுமை இயக்கத்தின் மாணாக்க உழவர் - 2024

விதைப்பொதிகள் விநியோகமும் செயன்முறை விளக்கமும்

தமிழ்த்தேசியப் பசுமை இயக்கம் மாணவர்களிடையே வீட்டுத்தோட்டச் செய்கையை ஊக்குவிக்கும் நோக்கில் ‘மாணாக்க உழவர்’ எனும் வீட்டுத்தோட்டப் போட்டியை நடாத்தி வருகின்றது. இந்த ஆண்டுக்கான போட்டிக்குரிய விதைப்பொதிகளையும் செயன்முறை விளக்கங்களையும் மாணவர்களுக்கு வழங்கும் நிகழ்ச்சி இன்று வியாழக்கிழமை (10.10.2024) தமிழ்த் தேசியப் பசுமை இயக்கத்தின் தலைமைச் செயலகத்தில் நடைபெற்றது.

தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் மாணாக்க உழவர் போட்டியில் கலந்து கொள்ள விண்ணப்பித்த மாணவர்களுக்கு விதைப் பொதிகளையும் நாற்றுகளையும் வழங்கிவைத்துச் செயன்முறை விளக்கங்களையும் அளித்தார்.

போட்டியில் பங்கேற்கும் மாணவர்கள் இவ்வருட இறுதியில் நேர்முகத் தேர்வுக்கு அழைக்கப்படுவதோடு, மதிப்பீட்டு குழுவினர் வீட்டுத்தோட்டங்களையும் நேரடியாகப் பார்வையுற்று பரிசுக்குரியவர்களைத் தெரிவுசெய்யவுள்ளார்கள். பங்கேற்கும் அனைவருக்கும் மாணாக்க உழவர் சான்றிதழ்களும், மதிப்பீட்டின் அடிப்படையில் சிறந்த செய்கையாளர்களுக்கு விசேட பரிசுகளும் வழங்கப்படவுள்ளன. பரிசளிப்பு நிகழச்சி 2025ஆம் ஆண்டு தொடக்கத்தில் நடைபெறவுள்ள பசுமை அமைதி விருதுகள் விழாவில் வழங்கப்படுமெனத் தெரிவிக்கப்பட்டுள்ளது.

தமிழ்த்தேசியப் பசுமை இயக்கம் நாட்டில் நிலவுகின்ற பொருளாதார நெருக்கடி, உணவுக்கான நெருக்கடி, இயற்கைப் பசளைகளின் மூலம் நஞ்சற்ற உணவு உற்பத்தி, பாரம்பரிய விதைகளின் பாதுகாப்பு, மாணவர்கள் தங்கள் ஓய்வு நேரங்களை பயனுள்ளதாக் கழிக்க வேண்டிய அவசியம் ஆகிய பல காரணங்களைக் கருத்தில் கொண்டே மாணாக்க உழவர் என்னும் திட்டத்தை முன்னெடுத்து வருகின்றமை குறிப்பிடத்தக்கது.

காலநிலை மாற்றம் தொடர்பாக அரசியற் கட்சிகளின் திட்டங்களைத்

தேர்தல் அறிக்கைகளில் உள்ளடக்க வேண்டும்

தேர்தல்கள் ஆணையத்திடம் தமிழ்த்தேசியப் பசுமை இயக்கம் கோரிக்கை

நடைபெறவுள்ள நாடாளுமன்றத் தேர்தலில் போட்டியிடுகின்ற கட்சிகளைத் தேர்தல் அறிக்கையில் சுற்றுச்சூழல் பாதுகாப்புத் தொடர்பான அவற்றின் எதிர்காலத் திட்டங்களை உள்ளடக்குமாறு தேர்தல் ஆணையம் அறிவுறுத்த வேண்டும் என்று தமிழ்த்தேசியப் பசுமை இயக்கம் இலங்கைத் தேர்தல்கள் ஆணையத்திடம் வேண்டுகோள் விடுத்துள்ளது.

இதுதொடர்பாக தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தேர்தல்கள் ஆணையத்துக்குக் கடிதம் ஒன்றை அனுப்பி வைத்துள்ளார்.

அந்தக் கடிதத்தில்,

உலகம் இன்று எதிர்நோக்கும் தலையாய பிரச்சினைகளில் காலநிலை மாற்றமும்; இதர சுற்றுச்சூழல் பிரச்சினைகளும் முதலிடத்தில் உள்ளன. நாடுகளில் நிலவும் வளப்பற்றாக் குறைவு, வறுமை, பஞ்சம், பட்டினி போன்றனவற்றின் அடிப்படைக் காரணங்களாகவும் இவை உள்ளன.

காலநிலை மாற்றங்களுக்கும் ஏனைய சுற்றுச்சூழல் பிரச்சனைகளுக்கும் நாடு எவ்வாறு முகங்கொடுக்க வேண்டும் என்பது தொடர்பாகத் திட்டங்களை வகுக்கவும், அவற்றை நிறைவேற்றவும் வேண்டிய கடப்பாடு அரசாங்கங்களுக்கே உரியதாகும். இவை தொடர்பாக ஏற்கனவே உலக நாடுகள் பலவும் விழிப்புணர்வு பெற்று வினைத்திறனுடன் செயலாற்றத் தொடங்கியுள்ளன.

இலங்கையும் காலநிலை மாற்றத்தின் விளைவுகள் உட்பட பல்வேறு சுற்றுச்சூழல் பிரச்சினைகளுக்கு முகங்கொடுத்து வருகிறது. இலங்கையின் நாளைய அரசாங்கத்தை இன்று தேர்தலில் ஈடுபடும் கட்சிகளே அமைக்கப் போகின்றன. அந்த வகையில், தேர்தல்களை நடாத்துகின்ற பொறுப்பை ஏற்றுக் கொண்டுள்ள இலங்கைத் தேர்தல்கள் ஆணையம் கட்சிகளுக்குச் சுற்றுச்சூழல் பாதுகாப்புத் தொடர்பான வழிகாட்டுதல்களை வழங்கவேண்டிய கடப்பாடுகளைக் கொண்டிருக்கின்றது.

நடைபெறவுள்ள நாடாளுமன்றத் தேர்தலில் போட்டியிடுகின்ற கட்சிகளைத் தேர்தல் அறிக்கையில் காலநிலை மாற்றங்களைத் தணித்தல் மற்றும் ஏனைய சுற்றுச்சூழல் பிரச்சினைகளை எதிர்கொள்ளுதல் தொடர்பான அவற்றின் எதிர்காலத் திட்டங்களை உள்ளடக்குமாறு தேர்தல்கள் ஆணையம் அறிவுறுத்த வேண்டும் என்று தயவுடன் கேட்டுக்கொள்கிறோம்.

அத்தோடு, தேர்தல் பொதுக்கூட்டங்களில் பிளாஸ்ரிக் கொடிகளையும், ஒருநாள் பாவித்து விட்டு வீசும் பிளாஸ்ரிக் குவளைகளையும் அறவே தவிர்க்குமாறு இறுக்கமாக அறிவுறுத்த வேண்டுமென்றும் தயவுடன் கேட்டுக் கொள்கின்றோம் என்று குறிப்பிடப்பட்டுள்ளது.

பசுமை அமைதி விருதுகளுக்கான சூழல் பொதுஅறிவுப் பரீட்சை

மாணவர்களிடமிருந்து விண்ணப்பங்கள் கோரப்பட்டுள்ளன

சூறையாடப்படும் இயற்கை வளங்கள், கண்மூடித்தனமான நிலப் பயன்பாடு, கட்டுப்பாடற்றுப் பெருகும் மாசுகள், சூடாகிவரும் பூமி, விஸ்வரூபம் பெற்று வரும் காலநிலை மாற்றம் ஆகியனவற்றின் கூட்டுத் தாக்குதல்களினால் இயற்கை மூச்சுத்திணறி வருகிறது. இந்நிலை நீடித்தால் விரைவிலேயே உலகம் பெரும் பிரளயத்துக்குள் தள்ளப்பட்டுவிடும் என்று ஐக்கிய நாடுகள் சபை எச்சரித்துள்ளது. எனினும், இந்த எச்சரிக்கைகளைப் புறந்தள்ளி இயற்கைச் சூழலை நாம் தொடர்ந்து மோசமாகச் சீரழித்துக் கொண்டிருக்கிறோம்.

இயற்கையின் மீதான தாக்குதல்களை நிறுத்தி அதனுடன் ஒரு பசுமை அமைதி ஒப்பந்தத்தை உடனடியாகச் செய்து கொண்டால் மாத்திரமே பேரழிவில் இருந்து எம்மையும் பாதுகாத்து உலகத்தையும் காப்பாற்ற முடியும். இதனைக் கருத்திற்கொண்டு, மாணவர்கள் மத்தியில் சூழற் கல்வி, சூழல் விழிப்புணர்வு மற்றும் சூழல் பாதுகாப்புச் செயற்பாடுகளை ஊக்குவிக்கும் நோக்கோடு தமிழ்த் தேசியப் பசுமை இயக்கம் ஆண்டுதோறும் மாணவர்களுக்குப் பசுமை அமைதி விருதுகளை வழங்கிக் கௌரவித்து வருகிறது.

மாணவர்களிடையே 2024ஆம் ஆண்டுக்கான பசுமை அமைதி விருதுக்குரியவர்களைத் தெரிவு செய்யும் பொருட்டு சூழல் பொது அறிவுப் பரீட்சை இணையவழியூடாக 27.10.2024 (ஞாயிற்றுக்கிழமை) முன்னிரவு 7.00 மணி தொடங்கி 8.30 மணிவரை நடைபெறவுள்ளது. இப்பரீட்சையில் தரம் 9 முதல் 13 வரை பயிலும் இலங்கையை வதிவிடமாகக் கொண்ட மாணவர்கள் எவரும் தோற்ற முடியும். இலவசமாக நடைபெறவுள்ள இப்பரீட்சையில் தோற்ற விரும்பும் மாணவர்கள் www.tamilnationalgreen.org இணையத்தளத்தின் ஊடாக 20.10.2024 இற்கு முன்பாகப் பதிவுகளை மேற்கொள்ளுதல் வேண்டும்.

இப்பரீட்சையில் சித்தியடையும் அனைத்து மாணவர்களும் பசுமை அமைதிச் சான்றிதழ்கள் வழங்கிக் கௌரவிக்கப்படுவார்கள். இவர்களிலிருந்து முதல் 100 மாணவர்கள் தெரிவு செய்யப்பட்டு பசுமை அமைதிச் சான்றிதழோடு சிறப்புப் பரிசுகளும் வழங்கிக் கௌரவிக்கப்படுவார்கள். இவர்களில் முதல் 3 மாணவர்கள் பசுமை அமைதிச் சான்றிதழ், சிறப்புப் பரிசுகளுடன் சூழலியல் ஆசான் க. சி. குகதாசன் ஞாபகார்த்தப் பசுமை அமைதி விருதும் வழங்கிக் கௌரவிக்கப்படுவார்கள். முதலாம் இடத்தைப் பெறும் மாணவர் 1 பவுண் தங்கப் பசுமை அமைதி விருதும், இரண்டாம் இடத்தைப் பெறும் மாணவர் வெள்ளிப் பசுமை அமைதி விருதும், மூன்றாம் இடத்தைப் பெறும் மாணவர் வெண்கலப் பசுமை அமைதி விருதும் வழங்கிக் கௌரவிக்கப்படுவார்கள்.

தமிழ்த்தேசிய உணர்வுத் தளத்தை மீளக் கட்டமைப்பதில்

தமிழ்ப் பொதுவேட்பாளர் காத்திரமான பங்காற்றியுள்ளார்.

பொ.ஐங்கரநேசன் சுட்டிக்காட்டு

முள்ளிவாய்க்கால் யுத்தத்தின் முடிவுவரை தேசமாகத் திரண்டிருந்த தமிழ் மக்கள் அதன் பின்னர் சாதிகளாகவும், சமயங்களாகவும், பிரதேசங்களாகவும், கட்சிகளாகவும் சிதறடிக்கப்பட்டுள்ளனர். தென்னிலங்கை அரசியல்வாதிகளோடு தமிழ் அரசியல்வாதிகள் சிலரும் கைகோர்த்து திட்டமிட்டு இதனை நிறைவேற்றி வந்துள்ளனர். இந்நிலையில், ஜனாதிபதித் தேர்தலில் தமிழ்த் தேசியப் பொதுக்கட்டமைப்பின் சார்பில் தமிழ்ப் பொதுவேட்பாளராகப் போட்டியிட்ட பா.அரியநேத்திரன் சிதறிக்கிடக்கும் தமிழ்த் தேசிய உணர்வுத் தளத்தை மீளக்கட்டமைப்பதில் காத்திரமான பங்காற்றியுள்ளார். என்று தமிழ்த் தேசியப் பசுமை இயக்கத்தின் தலைவர் பொ.ஐங்கரநேசன் சுட்டிக்காட்டியுள்ளார்.

ஜனாதிபதித் தேர்தலில் போட்டியிட்ட தமிழ்ப் பொதுவேட்பாளர் குறித்து பொ.ஐங்கரநேசன் வெளியிட்டுள்ள ஊடக அறிக்கையிலேயே இவ்வாறு சுட்டிக்காட்டியுள்ளார்.

அந்த அறிக்கையில் அவர் மேலும் தெரிவிக்கையில்,

ஒரு இனத்தைத் தேசமாகக் கட்டியமைப்பதில் அந்த இனம் பேசுகின்ற மொழி, தாயகமாகக் கொண்டிருக்கும் நிலப்பரப்பு, பண்பாடு ஆகியன வகிக்கும் பங்களிப்புகளுக்கு நிகராக தேசம் என்ற உணர்வு நிலையும் இன்றியமையாதது. யுத்தத்தின் பின்னரான தமிழர் அரசியலில் தேசம் என்கின்ற உணர்வு நிலை தமிழ்ச் சூழலில் ஊடுருவியுள்ள பெரும்பான்மைக் கடசிகளாலும் அவர்களின் எடுபிடிகளாலும் மழுங்கடிக்கப்பட்டு வந்துள்ளது. இந்நிலையிலேயே தமிழ் மக்களைத் தேசமாக மீளவும் ஒருங்கிணைக்கும் நோக்கோடு நிறுத்தப்பட்ட தமிழ்ப் பொதுவேட்பாளர் தான் பெற்ற கணிசமான வாக்குகளின் மூலம் தமிழ்த் தேசியத்தின் எதிர்காலம் குறித்த நம்பிக்கையை ஊட்டியுள்ளார்.

நடைபெற்ற ஜனாதிபதித் தேர்தலில் தென்னிலங்கை கட்சிகளின் பிரதான வேட்பாளர்கள் வடக்கு, கிழக்கில் கோடான கோடி பணத்தைச் செலவழித்து தமிழ் வாக்குகளை வியாபாரப் பண்டமாக்கிக் கொள்வனவு செய்ய முயன்றனர். இதற்குத் தமிழ் அரசியல்வாதிகள் சிலரும் துணைபோயினர். ஆனால், விலை போகாத தமிழர்களாக இரண்டேகால் இலட்சத்துக்கும் அதிகமான தமிழ் மக்கள் தமிழ்ப் பொதுவேட்பாளரின் சங்குச் சின்னத்துக்குத் தங்கள் வாக்குகளை வழங்கியுள்ளனர். தமிழ்த் தேசிய அரசியலை சீர்செய்து நேர்செய்யும் பயணத்தில் பொதுவேட்பாளர் பெற்றிருக்கும் வாக்குகள் பலமான அடித்தளத்தை உருவாக்கி இருக்கிறது என்றும் தெரிவித்துள்ளார்.

தமிழ்ப் பொதுவேட்பாளரை ஆதரித்து வீரசிங்கம் மண்டபத்தில் நிகழ்ந்த எழுச்சிப் பொதுக்கூட்டம்

நடைபெறவுள்ள ஜனாதிபதித் தேர்தலில் தமிழ் மக்களின் சார்பில் பொதுவேட்பாளராகப் போட்டியிடும் பா. அரியநேத்திரனை ஆதரித்து இன்று திங்கட்கிழமை (16.09.2024) யாழ்ப்பாணம் வீரசிங்கம் மண்டபத்தில் எழுச்சிப் பொதுக்கூட்டம் நடைபெற்றது.

தமிழ்த் தேசியப் பசுமை இயக்கத்தின் தலைவர் பொ.ஐங்கரநேசன் தலைமையில் நடைபெற்ற இவ்வெழுச்சிப் பொதுக்கூட்டத்தில் தமிழ்ப் பொதுவேட்பாளர் பா.அரியநேத்திரன் கலந்து கொண்டு சிறப்புரையாற்றினார்.

இவர்களுடன் மூத்தபோராளி மு.மனோகர் (காக்காண்ணை) , சமூகஅரசியல் செயற்பாட்டாளர் க. அருந்தவபாலன், அரசியல் ஆய்வாளர் நிலாந்தன் ஆகியோரும் உரையாற்றினார்கள்.

தமிழ்த் தேசியப் பசுமை இயக்கம் ஏற்பாடு செய்த இவ்வெழுச்சிப் பொதுக்கூட்டத்தில் ஆயிரத்துக்கும் அதிகமானோர் கலந்துகொண்டு தமிழ்ப் பொதுவேட்பாளருக்குத் தமது ஆதரவை வெளிப்படுத்தியிருந்தார்கள்.

தமிழ் மக்களிடம் எஞ்சியிருக்கும் ஒரே ஆயுதம் வாக்குகள்தான்

இம்முறையாவது இலக்குத் தவறாது பிரயோகிப்போம்

பொ.ஐங்கரநேசன் வேண்டுகோள்

தமிழ் மக்களின் தேசிய விடுதலைப் போராட்டத்தின் பெரும் பலமாக முள்ளிவாய்க்காலில் யுத்தம் முடிவுறும் வரைக்கும் விடுதலைப் புலிகள் இருந்தார்கள். அவர்களின் ஆயுதப் பலம் பேரம் பேசக்கூடிய பெரும் சக்தியா இருந்தது. இப்போது எம்மிடம் எஞ்சியிருக்கும் ஒரேயொரு ஆயுதம் வாக்குகள்தான். யுத்தத்தின் பின்னரான கடந்த மூன்று ஜனாதிபதித் தேர்தல்களிலும் இந்த வாக்குப் பலத்தை நாம் வீணடித்துவிட்டோம். இம்முறையாவது அவற்றை இலக்குத் தவறாது பிரயோகிப்போம் என்று தமிழ்த் தேசியப் பசுமை இயக்கத்தின் தலைவர் பொ.ஐங்கரநேசன் வேண்டுகோள் விடுத்துள்ளார்.

தமிழ்ப் பொதுவேட்பாளர் பா. அரியநேத்திரனை ஆதரித்து கடந்த ஞாயிற்றுக்கிழமை (08.09.2024) ஏழாலை ஐக்கிய நாணயசங்கத்தில் நடைபெற்ற கூட்டத்தில் உரையாற்றியபோதே பொ. ஐங்கரநேசன் இவ்வாறு வேண்டுகோள் விடுத்துள்ளார்.

அங்கு அவர் தொடர்ந்து உரையாற்றுகையில்,

முள்ளிவாய்க்கால் யுத்தத்தின் பின்னர் தமிழினம் அரசியல் ரீதியாக மிகமோசமாகப் பலவீனம் அடைந்துள்ளது. இதனைச் சாதகமாகப் பயன்படுத்தி ஸ்ரீலங்கா அரசு தமிழர் தாயகத்தை வனவளத் திணைக்களம், வனஜீவராசிகள் திணைக்களம், தொல்லியல் திணைக்களம் என்பவற்றின் ஊடாகச் சட்டரீதியாகக் கையகப்படுத்தி வருகின்றது. தமிழர் தாயகத்தின் இயற்கை வளங்களை, பொருளாதாரத்தை, பண்பாட்டைத் திட்டமிட்டுச் சிதைத்து வருகின்றது. இவற்றின் மூலம் கட்டமைக்கப்பட்ட இனஅழிப்பைக் கனகச்சிதமாக நிறைவேற்றி வருகிறது.

தென்னிலங்கைத் தலைவர்கள் தமிழ் மக்களின் பிரச்சினையை வெறுமனே பொருளாதாரப் பிரச்சினையாக மாத்திரமே உலகுக்குக் காட்டி வருகின்றார்கள். இலங்கைத் தீவில் இன்று ஏற்பட்டுள்ள பாரிய பொருளாதார நெருக்கடிக்குத் தமிழ் மக்கள் மீது தொடுத்த யுத்தமே மூலகாரணம் ஆகும். மாறி மாறி ஆட்சிபீடமேறிய அரசாங்கங்கள் கடன் வாங்கி யுத்தத்தை முன்னெடுத்தமையே நாட்டைப் பொருளாதாரப் படுகுழிக்குள் தள்ளியது. ஆனால், இந்தக் கசப்பான உண்மையை ஏற்க எந்தத் தென்னிலங்கைத் தலைவர்களும் தயாராக இல்லை.

கடந்த ஜனாதிபதித் தேர்தல்களில் நாம் விட்ட தவறுகளைத் தொடர்ந்தும் இழைத்துக் கொண்டிருக்க முடியாது. இதனைக் கருத்திற் கொண்டே இம்முறை ஜனாதிபதித் தேர்தலில் தமிழ்ப் பொதுவேட்பாளராகப் பா. அரியநேத்திரன் நிறுத்தப்பட்டுள்ளார். அவர் தனிநபர் அல்ல; ஒட்டுமொத்தத் தமிழ்த் தேசத்தினதும் குரல். அவருக்கு ஒதுக்கப்பட்டுள்ள சங்குச் சின்னத்துக்கு வாக்களிப்பதன் மூலம் தமிழ் மக்களின் அரசியல் அபிலாசைகளை ஒரே குரலில் ஓங்கி ஒலிப்போம் என்றும் தெரிவித்தார்.

தமிழ் மக்களுக்குக் காலம் இட்ட கட்டளையே பொதுவேட்பாளர்

பொ. ஐங்கரநேசன் சுட்டிக்காட்டு

முள்ளிவாய்க்கால் யுத்தத்தின் முடிவு வரைக்கும் தமிழ்த் தேசிய உணர்வோடு தேசமாகத் திரண்டிருந்த தமிழ் மக்கள் யுத்தத்தின் பின்னர் சிதறடிக்கப்பட்டார்கள். அரசின் திட்டமிட்ட நிகழ்ச்சி நிரலில் பிரதேசம், சாதியம், சமயமாகத் தமிழ்த் தேசியம் துண்டாடப்பட்டு வருகிறது. இவற்றால் அரசியல் ரீதியாகத் தமிழினம் மிகவும் பலவீனமாகத் பின்தள்ளப்பட்டுள்ளது. இதனைக் கருத்திற்கொண்டே தமிழ் மக்களைத் தேசமாக மீண்டும் திரளச் செய்து அரசியல் அபிலாசைகளை ஒரே குரலில் வெளிப்படுத்தும் நோக்குடன் ஜனாதிபதித் தேர்தலில் தமிழப் பொதுவேட்பாளர் நிறுத்தப்பட்டுள்ளார். இந்த முடிவு காலம் இட்ட கட்டளை என்று தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

ஜனாதிபதித் தேர்தலில் தமிழ்ப் பொதுவேட்பாளராகப் போட்டியிடும் பா. அரியநேத்திரனுக்கும் கூட்டுறவு அமைப்புகளின் பிரதானிகளுக்குமிடையிலான கலந்துரையாடல் நேற்று சனிக்கிழமை (24.08.2024) நல்லூர் திவ்ய ஜீவன மண்டபத்தில் இடம் பெற்றது. இதற்குத் தலைமை வகித்து உரையாற்றியபோதே பொ. ஐங்கரநேசன் இவ்வாறு சுட்டிக்காட்டியுள்ளார்.

அங்கு அவர் தொடர்ந்து உரையாற்றுகையில்,

தமிழ்ப் பொதுவேட்பாளரை நிறுத்துவது என்பது தமிழ்த் தேசிய அரசியலில் ஒரு கோட்பாட்டு ரீதியான முடிவு. இதனைப் புரிந்து கொள்ள விரும்பாதவர்கள் வெல்ல முடியாத தேர்தலில் எதற்காகப் போட்டி என்று விதண்டாவாதம் புரிகிறார்கள். எண்ணிக்கையில் மிகப் பெரும்பான்மையாகச் சிங்கள மக்களைக் கொண்ட இலங்கைத் தீவில் தமிழன் ஒருபோதும் ஜனாதிபதியாக வர முடியாது என்பது எல்லோருக்கும் தெரியும். பொதுவேட்பாளர் ஜனாதிபதியாக வெற்றிபெற முடியாது. ஆனால், தமிழ் மக்களை மீளவும் தேசமாகத் திரளச் செய்வதில் அவர் வெற்றி பெறுவார்.

தென்னிலங்கை வேட்பாளர்களிடையே நான்கு முனைப் போட்டி நிகழும் நிலையில் பொதுவேட்பாளர் தங்களின் வெற்றி வாய்ப்பைப் பாதிக்கும் என்று அவர்கள் அஞ்சுகிறார்கள். இதனால் பொதுவேட்பாளரை நிறுத்தியுள்ள தரப்புகளுடன் பேச வருமாறு அழைப்புக்கு மேல் அழைப்பு விடுக்கிறார்கள். அதே சமயம் அவர்களுடன் நேரடியாகவும், பின்கதவாலும் தொடர்புகளைப் பேணிவருகின்ற தமிழ் அரசியல்வாதிகளின் மூலம் பொதுவேட்பாளருக்கு எதிரான மூர்க்கத்தனமான கருத்துகளும் பரப்பப்பட்டு வருகின்றன. பொதுவேட்பாளர் துரோகியாகக்கூடச் சித்திரிக்கப்படுகிறார்.

பொது வேட்பாளர் பற்றித் தென்னிலங்கை வேட்பாளர்களின் தேர்தல் விஞ்ஞாபனத்தைப் பார்த்த பின்பே முடிவெடுக்கலாம் என்றும் அவர்களுடன் பேரம் பேசலாம் என்றும் தமிழ் அரசியல்வாதிகள் சிலர் கூறிவருகின்றார்கள். தமிழ் மக்களின் தேசிய இனப்பிரச்சினைக்கான குறைந்தபட்சத் தீர்வையேனும் ஆட்சி அதிகாரங்களில் இருந்த போதுகூடச் செய்ய விரும்பாத தென்னிலங்கைத் தலைமைகளுடன் தேர்தல் நேரத்தில் பேச முற்படுவது அவர்களின் வெற்றிவாய்ப்பை உறுதி செய்வதற்கான ஒரு உத்தியே ஆகும். பொதுவேட்பாளருக்கு எதிரான பரப்புரைகளின் பின்னால் உள்ள கபடத்தனங்களைத் தமிழ் மக்கள் புரிந்து கொள்ள வேண்டும் என்றும் தெரிவித்துள்ளார்.

தமிழ்ப் பொதுவேட்பாளர் - கூட்டுறவு அமைப்புகளின் பிரதிநிதிகள் சந்திப்பு

நடைபெறவுள்ள ஜனாதிபதித் தேர்தலில் தமிழ் மக்களின் சார்பில் பொதுவேட்பாளராகக் களமிறங்கியுள்ள பா. அரியநேத்திரன் பல்வேறு பொது அமைப்புகளின் பிரதிநிதிகளையும் சந்தித்து வருகிறார். இதன் ஒரு கட்டமாக இன்று சனிக்கிழமை (24.08.2024) யாழ் மாவட்டக் கூட்டுறவு அமைப்புகளின் உயர்மட்டப் பிரதிநிதிகளைச் சந்தித்துக் கலந்துரையாடியுள்ளார். இச் சந்திப்பு நல்லூர் திவ்ய ஜீவன சங்க மண்டபத்தில் நடைபெற்றது.

தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் நடைபெற்ற இக் கலந்துரையாடலில் சமூக அரசியற் செயற்பாட்டாளர் க. அருந்தவபாலன், தமிழ் மக்கள் பொதுச் சபையைச் சார்ந்த நிலாந்தன் ஆகியோரும் கலந்துகொண்டு தமிழ் பொதுவேட்பாளருக்கு வாக்களிக்க வேண்டியதன் அவசியம் குறித்து உரையாற்றியிருந்தார்கள்.

தந்தை செல்வா நினைவிடத்தில் அஞ்சலி செலுத்தித்

தமிழ் பொதுவேட்பாளரின் பரப்புரைப் பயணம் ஆரம்பம்

நடைபெறவுள்ள ஜனாதிபதித் தேர்தலில் தமிழ் மக்களின் சார்பில் பா.அரியநேத்திரன் பொது வேட்பாளராக நிறுத்தப்பட்டுள்ளார். அவரை அறிமுகம் செய்து ஆதரித்து நடைபெறவுள்ள முதலாவது பொதுக் கூட்டம் இன்று ஞாயிற்றுக்கிழமை [18-08-2024] முள்ளியவளை செந்தமிழ் விளையாட் டு மைதானத்தில் நடைபெறவுள்ளது. இதை முன்னிட்டு பா.அரியநேத்திரன் யாழ்ப்பாணத்தில் அமைந்துள்ள தந்தை செல்வா நினைவிடத்தில் இன்று காலை அஞ்சலி செலுத்தித் தனது பரப்புரைப் பயணத்தை ஆரம்பித்துள்ளார்.

பொலிகண்டி முதல் பொத்துவில் வரைக்கும் என்று பெயரிடப்பட்டுள்ள இப் பிரச்சாரப் பயணத்தின் தொடக்க நிகழ்ச்சியாகவே தந்தை செல்வா நினைவிடத்தில் அஞ்சலி செலுத்தப்பட் டுள்ளது. தொடர்ந்து பா.அரியநேத்திரன் ஆலயங்களுக்கு சென்று வழிபாட்டில் ஈடுபட்டதுடன் , மதத் தலைவர்களைச் சந்தித்து அவர்களிடம் ஆசீர்வாதமும் பெற்றார். இந்நிகழ்ச்சிகளில் தமிழ்த் தேசியப் பசுமை இயக்கத்தின் தலைவர் பொ .ஐங்கரநேசன், தமிழ் மக்கள் பொதுச் சபையின் பிரதிநிதிகள் பேராசிரியர் கே . ரி . கணேசலிங்கம், த.வசந்தராஜா, நிலாந்தன் ஆகியோரும் கலந்து கொண்டிருந்தார்கள்.

சீன அரிசியில் மறைந்திருக்கும் அரசியலைவிட

அதில் உறைந்திருக்கும் ஆபத்துகள் அதிகம்

பொ. ஐங்கரநேசன் எச்சரிக்கை

இலங்கைக்கும் சீனாவுக்கும் இடையே 1952ஆம் ஆண்டு இறப்பர்-அரிசி உடன்படிக்கை செய்துகொள்ளப்பட்டது. இதற்கு அமைவாக, இலங்கை சீனாவுக்கு இறப்பரை ஏற்றுமதி செய்து பதிலாக அங்கிருந்து அரிசியை இறக்குமதி செய்து வந்துள்ளது. இலங்கையில் 1952ஆம் ஆண்டு ஏற்பட்ட பொருளாதாரச்சரிவு இறப்பர்-அரிசி உடன்பாட்டுக்கு வழி சமைத்ததைப்போன்றே தற்போது நிலவுகின்ற பொருளாதார நெருக்கடி சீனாவில் இருந்து அவ்வப்போது நன்கொடையாக அரிசியைக் கையேந்துவதற்கு வழிகோலியுள்ளது. அண்மையிற்கூட வடக்கு, கிழக்குக் கடற்றொழிலாளர்களுக்கு சீனாவின் நன்கொடை அரிசி விநியோகப்பட்டுள்ளது. இந்நன்கொடையில் மனிதாபிமானத்தை விட பிராந்திய அரசியல் மேலோங்கியிருப்பது வெளிப்படையானது. ஆனால், சீன அரிசியில் மறைந்திருக்கும் அரசியலைவிட அதில் உறைந்திருக்கும் ஆபத்துகள் அதிகம் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் எச்சரித்துள்ளார்.

இலங்கைக்கு சீனா நன்கொடையாக வழங்கிவருகின்ற அரிசி குறித்து பொ. ஐங்கரநேசன் விடுத்துள்ள ஊடக அறிக்கையிலேயே இவ்வாறு எச்சரித்துள்ளார்.

அந்த ஊடக அறிக்கையில் அவர் மேலும் தெரிவிக்கையில்,

உலகில் அதிகளவில் அரிசியை உற்பத்தி செய்யும் நாடாகவும் அதிக அளவில் அரிசியை ஏற்றுமதி செய்யும் நாடாகவும் சீனாவே முதலிடத்தில் உள்ளது. ஆனால், அண்மைக்காலத்து ஆய்வுகளின் முடிவுகள் சீனாவின் அரிசியில் சூழல்மாசு காரணமாகக் கட்மியம் அங்கீகரிக்கப்பட்ட அளவை விடவும் பன்மடங்கு அதிகமாக இருப்பது உறுதிசெய்யப்பட்டுள்ளது. கட்மியம் உடலுக்கு அத்தியாவசியம் இல்லாத ஆபத்தான ஒரு பாரஉலோகம். உணவின் மூலம் உடலில் நுழைந்து நீண்டகாலம் தேங்கியிருக்கக்கூடிய இக்கட்மியம் சிறுநீரகங்களை செயலிழக்க வைப்பதோடு மார்பு, நுரையீரல், சதையம், சிறுநீரகம் போன்றவற்றில் புற்றுநோய் ஏற்படுவதற்கும் காரணமாக உள்ளது கண்டறியப்பட்டுள்ளது. இந்நிலையில், சீனாவில் இருந்து இலங்கைக்கு வழங்கப்பட்டுவரும் தரப்பரிசோதனை செய்யப்படாத அரிசியை நுகர்வது குறித்துப் பொதுமக்கள் விழிப்பாக இருப்பது அவசியமாகும்.

இலங்கை 2023ஆம் ஆண்டு அரிசி உற்பத்தியில் தன்நிறைவைக் கொண்டிருந்தது. கடந்த பெரும் போகத்தில் மழைவெள்ளம் சில பிரதேசங்களில் நெற்செய்கையைப் பாதித்திருந்தாலும் இந்த ஆண்டினது ஒட்டுமொத்த நெல் உற்பத்தியில் வீழ்ச்சி ஏற்படவில்லை. சீனா பாதிக்கப்பட்ட மக்களுக்கு உதவுவதை மாத்திரமே நோக்கமாகக் கொண்டிருப்பின் தனது சந்தேகத்திற்கு இடமான அரிசியை இலங்கையில் விநியோகிப்பதை நிறுத்தி இலங்கையிலேயே அதனைக் கொள்வனவு செய்து விநியோகிப்பதே சாலச்சிறந்தது. இந்நடைமுறை சரியான சந்தை வாய்ப்புகளின்றித் தவிக்கும் எமது விவசாயிகளின் வாழ்வை மேம்படுத்துவதோடு ஆபத்தான பாரஉலோகங்களில் இருந்து எம்மைப் பாதுகாக்கவும் செய்யும். சோற்று அரசியல் சேற்றுக்குள் சிக்கி மென்மேலும் எமது மக்களின் வாழ்வு சீரழியாமல் இருக்க உரிய தரப்புகள் இது குறித்து உடனடியாக ஆவனசெய்ய வேண்டும் என்றும் தெரிவித்துள்ளார்.

தமிழ் மக்கள் கட்சிகளாக இல்லாமல் தமிழ் இனமாகச் சிந்தித்தால்

ஜனாதிபதித் தேர்தலில் தமிழ்ப் பொது வேட்பாளரே ஒரே தெரிவு

விக்கிரமபாகு நினைவு நிகழ்ச்சியில் ஐங்கரநேசன் சுட்டிக்காட்டு

ஜனாதிபதித் தேர்தலில் தமிழ் மக்கள் சார்பில் ஒரு பொது வேட்பாளரை நிறுத்துகின்ற முயற்சிகள் முன்னெடுக்கப்பட்டுள்ளன. இலங்கையில் தமிழர் ஒருவரால் ஒரு போதும் ஜனாதிபதியாக வரமுடியாது என்பது எல்லோருக்கும் தெரியும். ஆனால், முள்ளிவாய்க்கால் யுத்தத்தின் பின்னர் சிதறிப்போய்க் கொண்டிருக்கும் தமிழ்த்தேசிய அரசியலை, தமிழ்த்தேசிய உணர்வு நிலையை சீர் செய்யவும், ஒருமுகப்படுத்தவும் பொதுவேட்பாளரால் இயலும். இது நிகழ்ந்துவிடக்கூடாது என்பதற்காகவே தென்னிலங்கை அரசியல்வாதிகளும், சில தமிழ் அரசியல்வாதிகளும் இதனை மூர்க்கமாக எதிர்க்கிறார்கள். தமிழ் மக்கள் கட்சிகளாக அல்லாமல் இனமாகச் சிந்தித்தால் தமிழ்ப் பொதுவேட்பாளரே ஒரேயொரு தெரிவாக இருக்க முடியும் என்று தமிழ்த்தேசியப் பசுமை இயக்கத்தின் தலைவர் பொ.ஐங்கரநேசன் சுட்டிக்காட்டியுள்ளார்.

தமிழ்த்தேசியப் பசுமை இயக்கத்தின் ஏற்பாட்டில் கலாநிதி விக்கிரமபாகு கருணரட்னவின் நினைவுகூர் நிகழ்ச்சி நேற்று ஞாயிற்றுக்கிழமை(04.08.2024) திருநெல்வேலி பிறைற் இன் திருமண மண்டபத்தில் இடம்பெற்றது. இந்நிகழ்ச்சிக்குத் தலைமை வகித்து உரையாற்றியபோதே பொ.ஐங்கரநேசன் இவ்வாறு சுட்டிக்காட்டியுள்ளார்.

அங்கு அவர் தொடர்ந்து உரையாற்றுகையில்,

தமிழ்த்தரப்பில் ஒரு பொது வேட்பாளரை நிறுத்தவேண்டும் என்ற எண்ணக்கரு 2010ஆம் ஆண்டு ஜனாதிபதித் தேர்தலில் முன்வைக்கப்பட்டது. தமிழ் மக்களின் சுயநிர்ணய உரிமையை அங்கீகரித்து அவர்களின் உரிமைப் போராட்டத்தைத் தொடர்ச்சியாக ஆதரித்துவந்த விக்கிரமபாகு கருணரட்ண தமிழ்தரப்பின் பொது வேட்பாளராக முன்மொழியப்பட்டும் இருந்தார். ஆனால் இதனைத் தமிழ்க் கட்சிகளின் தலைவர்கள் கருத்தில் எடுக்காது முள்ளிவாய்க்கால் யுத்தத்தில் நேரடியாகவே பங்கேற்ற சரத்பொன்சேகாவை ஆதரிப்பதாக முடிவெடுத்தனர்.தமிழ் மக்களைச் சரத்பொன்சேகாவுக்கு வாக்களிக்கவைத்துப் பெரும் வரலாற்றுத் தவறிழைத்தனர். தற்போது, சரத்பொன்சேகா இராணுவம் குற்றமிழைத்திருந்தால் தமிழ் மக்கள் எவ்வாறு தனக்கு வாக்களித்திருக்க முடியும் என்று கேள்வி எழுப்புகின்றார்.

மேட்டுக்குடித் தமிழ் அரசியல்வாதிகள் எப்போதும் தெற்கில் ஐக்கிய தேசியக்கட்சியையே ஆதரித்து வருகின்றார்கள். ரணில் விக்கிரமசிங்கவுக்காகவே யுத்தத்தை முன்னெடுத்த தளபதிக்கு இரத்த நெடில் அகல முன்பாக வாக்குக் கேட்டார்கள். அத்தேர்தலில் விக்கிரமபாகு கருணரட்ன போட்டியிட்டுச் சில ஆயிரக்கணக்கான வாக்குகளையே பெற்றிருந்தார். அவருக்குத் தமிழ் மக்கள் ஆதரவளித்திருந்தால்கூட பேரினவாதத்தை எதிர்த்து அவரால் வெற்றிபெற்றிருக்க முடியாது. ஆனால், அவரை நாம் ஆதரித்திருந்தால் அவரைப்போன்று தமிழ் மக்களின் போராட்டத்தை ஏற்றுக்கொண்டு ஆதரிக்கக்கூடிய பல விக்கிரமபாகுக்களைத் தென்னிலங்கையில் நாம் உருவாக்கியிருக்க முடியும். இவரின் மறைவோடு சிங்கள மக்கள் மத்தியில் எங்களுக்காகப் பேசி வந்த ஒரேயொரு குரலும் இல்லாமற் போய்விட்டது.

மாகாண சபைத்தேர்தலைத் திட்டமிட்டு நடத்தாமல் விட்டவர்களே இப்பொழுது ஜனாதிபதித் தேர்தலைக் கருத்திற் கொண்டு மாகாணசபைத் தேர்தலை நடாத்துவது பற்றிப் பேசுகின்றார்கள். தென்னிலங்கை ஜனாதிபதி வேட்பாளர்களுடன் பேரம் பேசுதல், கனவான ஒப்பந்தம் செய்துகொள்ளல் எல்லாம் கடந்தகாலக் கசப்பான அனுபவங்களாக எம்முன்னால் உள்ளன. தொடர்ந்தும் தவறிழைத்துக்கொண்டிருக்க முடியாது. ஜனாதிபதித் தேர்தல்களில் நாம் விட்ட தவறுகளைச் சரிசெய்ய வேண்டிய நேரம் இது. தமிழ்த்தேசிய அரசியலை நேர்செய்ய வேண்டிய தருணம் இது. தமிழ்ப் பொது வேட்பாளர் தமிழ் இனத்தின் ஒருமித்த ஒரு குறியீடு. அவர் யார்? அவரால் என்ன செய்ய முடியும்? என்று உரசிப்பார்த்துக்கொண்டு இருக்காமல் தமிழ் மக்கள் ஒரு இனமாகச் சிந்தித்து அவருக்கு வாக்களிக்க வேண்டும் என்று தெரிவித்தார்.

தமிழ்த் தேசியப் பசுமை இயக்கத்தின் ஏற்பாட்டில்

விக்கிரமபாகு கருணரட்னவை நினைவுகூரும் நிகழ்ச்சி

தமிழ் மக்களின் உரிமைகளுக்காகத் தொடர்ச்சியாகத் தென் இலங்கையிலிருந்து குரல்கொடுத்து வந்த கலாநிதி விக்கிரமபாகு கருணரட்ன அண்மையில் அமரத்துவம் அடைந்துள்ளார். நவ சம சமாஜக் கட்சியின் தலைவரான அவர் தமிழ் மக்களுக்காக ஜனநாயக ரீதியாகப் பல போராட்டங்களை முன்னெடுத்த ஒருவர். அவரை நினைவுகூரும் நிகழ்ச்சி தமிழ்த் தேசியப் பசுமை இயக்கத்தின் ஏற்பாட்டில் 4ஆம் திகதி (04.08.2024 ஞாயிற்றுக்கிழமை) திருநெல்வேலி சிவன் வீதியில் அமைந்துள்ள பிறைற் இன் (Bright Inn) திருமண மண்டபத்தில் நடைபெற்றது.

தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் நடைபெற்ற இந்நினைவுகூர் நிகழ்ச்சியில் நவ சம சமாஜக் கட்சியின் பொதுச் செயலாளர் தோழர் ரணத் குமார சிங்க , சமூக அரசியற் செயற்பாட்டாளர் திரு. ம. செல்வின் இரேனியஸ் ஆகியோர் உரையாற்றியிருந்தார்கள்.

ஏராளமானோர் உணர்வுபூர்வமாகக் கலந்துகொண்டு அஞ்சலி செலுத்தியிருந்தார்கள்.

கறுப்பு ஜுலை - 41ஆவது நினைவேந்தல்

1983ஆம் ஆண்டு ஜுலை மாதம் 23ஆம் திகதி ஸ்ரீலங்கா அரசால் திட்டமிடப்பட்டு கொழும்பில் தமிழ் மக்கள் மீது ஏவிவிடப்பட்ட வன்முறை கண்டி, நுவெரெலியா, குருநாகல், இரத்தினபுரி எனப் பல பிரதேசங்களுக்கும் பரவி அம்மாதம் நிறைவுறும்வரை நீடித்தது. இதன்போது ஜயாயிரத்துக்கும் அதிகமான தமிழ் மக்கள் கொல்லப்பட்டதுடன் பல நூற்றுக்கணக்கானோர் காணாமல் ஆக்கப்பட்டார்கள். ஆயிரக்கணக்கானோர் காயமடைந்தார்கள். ஆயிரக்கணக்கான தமிழ் மக்களது வீடுகள், வணிகத்தலங்கள் தாக்கி அழிக்கப்பட்டன. பல்லாயிரக்கணக்கான தமிழ் மக்கள் ஏதிலிகளாக இடம்பெயர்ந்தார்கள். வெலிக்கடைச் சிறையில் 25, 27ஆம் திகளில் 53 தமிழ் அரசியல் கைதிகள் சிறைக்காவலர்கள் பார்த்திருக்கப் படுகொலை செய்யப்பட்டனர்.

தமிழர் வரலாற்றில் கறுப்பு ஜுலை எனப் பதியப்பட்டுவிட்ட இந்த ஆடிக்கலவரத்தின் நாற்பத்தியோராவது நினைவேந்தல் கடந்த 25ஆம் திகதி மாலை தந்தை செல்வா கலையரங்கில் இடம்பெற்றது.

இந்நினைவேந்தலில் 2000ம் ஆண்டு ஒக்ரோபர் 24ஆம் திகதி பிந்துனுவெவ புனர்வாழ்வு முகாமில் தடுத்து வைக்கப்பட்டிருந்தபோது படுகொலை செய்யப்பட்ட 26 தமிழ் அரசியல் கைதிகளுக்கும் 2009ஆம் ஆண்டின் பின்னர் சிறைவாசத்தின்போது நோய்வாய்ப்பட்டு இறந்த 11 தமிழ் அரசியல் கைதிகளுக்கும் அஞ்சலி செலுத்தப்பட்டது.

சிறைகளில் வாடும் தமிழ் அரசியல் கைதிகளின் விடுதலைக்காகச் செயற்பட்டு வரும் குரலற்றவர்களின் குரல் எனும் அமைப்பு இந்நினைவேந்தலுக்கான அழைப்பை விடுத்திருந்தது. இந்நிகழ்ச்சியில் தமிழ்த்தேசியப் பசுமை இயக்கமும் கலந்து கொண்டு தனது அஞ்சலியைத் தெரிவித்தது.

ஜனாதிபதித் தேர்தலில் தமிழ்ப் பொதுவேட்பாளரை நிறுத்துவது

தொடர்பான புரிந்துணர்வு உடன்படிக்கை கைச்சாத்து

வரவிருக்கும் ஜனாதிபதித் தேர்தலில் தமிழ் மக்கள் ஒன்றுபட்டுத் தமது அரசியல் அபிலாசைகளை வெளிப்படுத்த வேண்டும் என்பதைப் பிரதான நோக்கமாகக் கொண்டு தமிழ்ப் பொதுவேட்பாளர் ஒருவரை நிறுத்துவது என்று தமிழ்த்தேசிய அரசியல் கட்சிகளும் தமிழ்மக்கள் பொதுச்சபையும் ஏற்கனவே ஓர் இணக்கப்பாட்டுக்கு வந்திருந்தன. அதனை உத்தியோகபூர்வமாக உறுதி செய்யும் பொருட்டு இரண்டு தரப்புகளுக்கும் இடையில் புரிந்துணர்வு உடன்படிக்கை கைச்சாத்தாகியுள்ளது. இன்று திங்கட்கிழமை (22.07.2024) நண்பகல் தந்தை செல்வா கலையரங்கில் இதற்கான நிகழ்ச்சி சம்பிரதாய பூர்வமாக இடம்பெற்றது.

இப்புரிந்துணர்வு உடன்படிக்கையில் ஏழு தமிழ் தேசிய அரசியல் கட்சிகள் கையெழுத்திட்டுள்ளன. தமிழீழ விடுதலை இயக்கத்தின் சார்பில் செல்வம் அடைக்கலநாதன், தமிழ் மக்கள் கூட்டணியின் சார்பில் சி.வி.விக்னேஸ்வரன், தமிழீழ மக்ள் விடுதலைக் கழகம் சார்பில் த.சித்தார்த்தன், தமிழ்த்தேசியக் கட்சி சார்பில் ந.சிறீகாந்தா, ஈழமக்கள் புரட்சிகர விடுதலை முன்னணி சார்பில் சுரேஸ் பிறேமச்சந்திரன், ஜனநாயகப் போராளிகள் கட்சி சார்பில் சி.வேந்தன் ஆகியோர் கையெழுத்திட்டுள்ளனர். முள்ளிவாய்க்கால் யுத்தத்தின் பின்னர் இடம்பெற்ற ஜனாதிபதித் தேர்தல்களின்போது தமிழ்ப் பொது வேட்பாளரின் அவசியம் பற்றித் தமிழ்த் தேசிய பசுமை இயக்கம் தொடர்ச்சியாக வலியுறுத்தி வந்துள்ளது.

தமிழ்த் தேசியப் பசுமை இயக்கத்தின் சம கால அரசியல் அரங்குகளில் இது தொடர்பாக வலியுறுத்தியும் வந்துள்ளது.அந்த வகையில் இந்த உடன்படிக்கையில் தமிழ் தேசிய பசுமை இயக்கமும் இணைந்து கொண்டது. தமிழ்த் தேசியப் பசுமை இயக்கத்தின் சார்பில் அதன் தலைவர் பொ .ஐங்கரநேசன் ஒப்பந்தத்தில் கைச்சாத்திட்டுள்ளார்.

தமிழ்மக்கள் பொதுச்சபை சார்பில் அரசியல், சமூக செயற்பாட்டாளர்களான த.வசந்தராஜா, சி.அ.யோதிலிங்கம், பேராசிரியர் கே.ரி.கணேசலிங்கம், ரா.விக்னேஸ்வரன், ஏ.யதீந்திரா, ம.நிலாந்தன், செல்வின் இரேனியஸ் ஆகியோரும் கையெழுத்திட்டுள்ளனர்.

தமிழ்த்தேசிய கட்சிகள், தமிழ்மக்கள் பொதுச்சபை ஆகிய இரு தரப்பினரும் இணைந்து உருவாகியுள்ள கட்டமைப்பு தமிழ்த்தேசியப் பொதுக்கட்டமைப்பு எனப் பெயரிடப்பட்டுள்ளது. இப்பொதுக்கட்டமைப்பு வேட்பாளரைத் தெரிவு செய்தல், தேர்தல் விஞ்ஞாபனத்தை தயாரித்தல், நிதி தொடர்பான விடயங்கள் மற்றும் பரப்புரைகளை முன்னெடுத்தல் போன்ற அனைத்து அவசியமான செயற்பாடுகளையும் துணைக்குழுக்களை உருவாக்கி முன்னெடுக்கவுள்ளது.

பண்பாட்டை உள்வாங்காமல் தமிழ்த் தேசிய அரசியல் வலுப்பெறாது

ஆடிப்பிறப்பு விழாவில் பொ.ஐங்கரநேசன் சுட்டிக்காட்டு

ஒரு தேசிய இனத்தை மற்றைய தேசிய இனங்களில் இருந்து வேறுபடுத்திக்காட்டும் விடயங்களில் அதன் பண்பாடும் ஒன்று. இது வெறும் அடையாளம் அல்ல. ஒரு இனத்தின் தேசியத்தைக் கட்டமைப்பதில் அந்த இனத்தின் வாழ்புலம், பேசுகின்ற மொழி எந்த அளவுக்கு முக்கியமானதோ அந்த அளவுக்குப் பண்பாடும் இன்றியமையாதது. ஆனால், தமிழ்தேசியக் கட்சிகள் வாழ்புலத்துக்கும் மொழிக்கும் கொடுக்கும் முக்கியத்துவத்தைப் பண்பாட்டுக்குக் கொடுப்பதில்லை. பண்பாட்டை உள்வாங்காமல் தமிழ்த்தேசிய அரசியல் வலுப்பெறாது என்பதை எமது தலைவர்கள் உணர்ந்துகொள்ள வேண்டும் என்று தமிழ்த்தேசியப் பசுமை இயக்கத்தின் தலைவர் பொ.ஐங்கரநேசன் சுட்டிக்காட்டியுள்ளார்.

தமிழ்தேசியப் பசுமை இயக்கத்தின் ஆடிப்பிறப்புவிழா கடந்த புதன் கிழமை அராலி குலனையூரில் நடைபெற்றது. இவ்விழாவுக்குத் தலைமை வகுத்து உரையாற்றும்போதே பொ.ஐங்கரநேசன் இவ்வாறு சுட்டிக்காட்டினார்.

அங்கு அவர் தொடர்ந்து உரையாற்றுகையில்,

தைப்பொங்கலைப் போன்றே ஆடிப்பிறப்பும் தமிழ் மக்களின் வாழ்வியற் பண்பாட்டை அறிவுபூர்வமாக வெளிப்படுத்துகின்ற ஒரு பண்டிகை. இன்று ஆடிப்பிறப்புக் கொண்டாட்டங்கள் தமிழ் மக்களிடையே அருகிவிட்டது. ஆடிப்பிறப்பு நாளில் பாடசாலைகளுக்கு விடுமுறை வழங்கிய காலம் ஒன்று இருந்தது. இப்போது 'ஆடிப்பிறப்புக்கு நாளை விடுதலை ஆனந்தம் ஆனந்தம் தோழர்களே' என்ற நவாலியூர் சோமசுந்தரப்புலவரின் பாடல் மாத்திரம்தான் மிஞ்சியுள்ளது. பண்பாட்டுச் செயற்பாடுகளுக்காக வெள்ளி, ஞாயிற்றுக்கிழமைகளில் தனியார் கல்வி நிறுவனங்களிடம் விடுமுறையைக் கோருகின்ற நாம் ஆடிப்பிறப்பு விடுமுறையை மீளப்பெறுவதற்கும் முயற்சிக்க வேண்டும்.

சுதந்திரத்துக்குப் பின்னரான இலங்கையில் தமிழ்த்தேசிய அரசியலின் காலத்தை தலைமைத்துவ அடிப்படையில் ஜி.ஜி பொன்னம்பலம் காலம், எஸ்.ஜே.வி செல்வநாயகம் காலம், அமர்தலிங்கம் காலம், பிரபாகரன் காலமென்று ஆய்வாளர்கள் பிரித்து வைத்திருக்கின்றனர். இவர்களில் ஆயுதப்போராட்டத்தை முன்னெடுத்த பிரபாகரன் மட்டுமே தமிழ்த்தேசிய அரசியலை வலுப்படுத்துவதில் கலை, இலக்கியங்களினதும் பண்பாட்டினதும் வகிபாகம் குறித்து ஆழமான புரிதலைக் கொண்டிருந்தார். கலை, பண்பாட்டுக்கழகம் என்று தனியான ஒரு அமைப்பு உருவாக்கப்பட்டு போராளிகளின் பாசறைகளில் மாத்திரமல்லாது பொதுமக்களிடையேயும் கலை, இலக்கிய, பண்பாட்டுச் செயற்பாடுகள் உணர்வுபூர்வமாக முன்னெடுக்கப்பட்டன.

தமிழ்ப்பண்பாடு இன்று மும்முனைத் தாக்குதல்களுக்கு ஆளாகியுள்ளது. ஒரு புறம் சிங்கள பௌத்த மேலாதிக்கத்தினால் ஒடுக்கப்பட்டுக் கொண்டிருக்கிறது. இன்னொரு புறம் உலகமயமாக்கலினால் அதன் தனித்துவத்தை இழந்து கொண்டிருக்கிறது. மறுபுறம், எமது அக்கறையின்மையாலும் தொன்று தொட்டு நாம் கடைப்பிடித்து வந்த பண்பாட்டு விழுமியங்கள் கைவிடப்பட்டுக் கொண்டிருக்கின்றன. தமிழ்த்தேசிய இனத்தின் தரத்தை மதிப்பீடு செய்வதற்கான அளவுகோல்களில் பண்பாடும் ஒன்று என்பதை உணர்ந்து மக்களிடையே பண்பாட்டுச் செயற்பாடுகளை ஒரு பேரியக்கமாக முன்னெடுப்பதற்கு எமது தலைவர்கள் முன்வரவேண்டும் என்றும் தெரிவித்தார்.

பசுமை இயக்கத்தின் ஆடிப்பிறப்பு விழா

குலனையூரில் சிறப்பாக நடைபெற்றது

தமிழ்த் தேசியப் பசுமை இயக்கம் ஆடிப்பிறப்பு நாளைத் தமிழர் பண்பாட்டின் திருநாளாக நேற்று புதன்கிழமை (17.07.2024) அராலி வடக்கு குலனையூரில் மிகவும் சிறப்பாகக் கொண்டாடியுள்ளது. தமிழ்த் தேசியப் பசுமை இயக்கத்தின் தலைவர் பொ.ஐங்கரநேசன் தலைமையில் நடைபெற்ற இவ்வாடிப்பிறப்பு விழா குலனையூர் கலைவாணி சனசமூக நிலையம், கலைவாணி விளையாட்டுக்கழகம் ஆகினயவற்றின் அனுசரணையுடன் ஞானவைரவர் ஆலய முன்றலில் இடம்பெற்றுள்ளது.

பிரதம விருந்தினராகக் கோப்பாய் ஆசிரியர் கலாசாலையின் முதல்வரும் யாழ்ப்பாணத் தமிழ்ச்சங்கத்தின் பொதுச்செயலாளருமான ச.லலீசன் கலந்து கொண்டிருந்தார். இவர்களோடு தமிழ்த் தேசியப் பசுமை இயக்கத்தின் பொதுச் செயலாளர் ம.கஜேந்திரன், பொருளாளர் க.கேதீஸ்வரநாதன், கலை இலக்கிய அணியின் துணைச் செயலாளர் கை.சரவணன் ஆகியோரும் பங்கேற்றிருந்தனர்.

கலைவாணி சனசமூகநிலையத்தின் தலைவர் த.மதுசீலனின் வரவேற்புரையுடன் ஆரம்பமாகி, கலைவாணி விளையாட்டுக் கழகத்தின் தலைவர் நே.சாத்வீகனின் நன்றியுரையுடன் நிறைவுற்ற இவ்விழாவில் குலனையூரின் ஏராளமான மக்கள் கலந்துகொண்டிருந்தார்கள். மாணவர்களின் ஆற்றுகையில் கலை நிகழ்ச்சிகள் பலவும் இடம்பெற்றிருந்தன. அனைவருக்கும் ஆடிக்கூழும், கொழுக்கட்டையும் பரிமாறப்பட்டதோடு கலைநிகழ்ச்சிகளில் பங்கேற்ற மாணவர்களுக்குத் தமிழ்த்தேசியப் பசுமை இயக்கத்தால் பரிசுப்பொருட்களும் வழங்கப்பட்டன.

தமிழர்களுக்கே உரித்தான ஒரு பண்பாட்டு அடையாளமான ஆடிப்பிறப்பும் அது சார்ந்த கொண்டாட்டங்களும் தற்போது அருகி வந்துள்ளன. இந்நிலையில் மீளவும் அதனை வெகுசனமயப்படுத்தும் நோக்கில் தமிழ்த்தேசியப் பசுமை இயக்கம் ஆண்டுதோறும் கிராமமட்டத்தில் பொதுமக்களுடன் இணைந்து ஆடிப்பிறப்பைச் சிறப்பான முறையில் கொண்டாடி வருகின்றமை குறிப்பிடத்தக்கது.

ஊடக அடக்குமுறைக்கு எதிராக இன்று

யாழ். நகரில் போராட்டம்

யாழ்ப்பாணம் அச்சுவேலியில் வசிக்கும் சுயாதீ ன ஊடகவியலாளர் த.பிரதீபனின் வீடு கடந்த புதன் கிழமை [12-06-2024]நள்ளிரவு இனம்தெரியாத சிலரால் தாக்குதலுக்கு ஆளானதோடு , மோட்டார் சைக்கிள் உட்பட அவரது உடைமைகளும் தீக்கிரையாக்கப்பட் டன.

ஜனநாயகத்தின் நான்காவது தூண் ஊடகங்கள் . ஆனால் , இலங்கையில் யுத்த காலத்தில் மட்டும் அல்லாது அதன் பின்னரும் ஊடகவியலாளர்களின் மீதான தாக்குதல்களும் அச்சுறுத்தல்களும் தொடர்ந்தவாறுதான் உள்ளன.மக்களிடம் உண்மைகள் சென்று சேர்ந்து விடக்கூடாது என்ற நோக்கில் அரச இயந்திரம் ஊடகங்களின் குரல்வளையை நெரிக்கும் அராஜகத்தின் தொடர்ச்சியே த.பிரதீபன் வீட்டின் மீதான காட்டுமிராண்டித்தனமான தாக்குதல் ஆகும்.

இதனைக் கண்டித்தும் குற்றவாளிகளைக் கைது செய்யக் கோரியும் இன்று புதன் கிழமை [19-04-2024] யாழ் மத்திய பேருந்து நிலையத்துக்கு முன்பாகக் கண்டன ஆர்ப்பாட்டம் நடைபெற்றது.

இக் கண்டன ஆர்ப்பாட்டத்தில் ஊடகவியலாளர்கள்,, அரசியல்வாதிகள்,பொதுமக்கள் என ஏராளமானோர் கலந்துகொண்டார்கள் . தமிழ்த் தேசிய பசுமை இயக்கமும் இதில் கலந்துகொண்டு தனது கண்டன ங்களை வெளிப்படுத்தியது .

தெல்லிப்பளையில் பசுமை இயக்கத்தின்

உலக சூழல்தின நிகழ்ச்சி

தமிழ்த்தேசியப் பசுமை இயக்கம் உலக சுற்றுச்சூழல் தினத்தை முன்னிட்டு தெல்லிப்பளையில் புதன் கிழமை (05.06.2024) பசுமை அறிவொளி நிகழ்ச்சியை நடாத்தியுள்ளது. தமிழ்த்தேசியப் பசுமை இயக்கம் மாணவர்களிடையே சூழல் அறிவைப்புகட்டி விழிப்புணர்வை ஏற்படுத்துவதன் மூலம் அவர்களைச் சூழல் பாதுகாப்பில் பங்குபற்றுநர்களாக்கும் நோக்குடன் பசுமை அறிவொளி என்ற நிகழ்ச்சித் திட்டத்தை முன்னெடுத்து வருகிறது. இதன் தொடர்ச்சியாகவே உலக சுற்றுச்சூழல் தினத்தை முன்னிட்டுத் தெல்லிப்பளை மாவை கலட்டி பொது நோக்கு மண்டபத்தில் இந்நிகழ்ச்சி நடைபெற்றுள்ளது.

உலகம் பூராவும் பொருத்தமற்ற விவசாய நடவடிக்கைகள், காடழிப்பு, காலநிலை மாற்றம் ,வெள்ளப்பெருக்கு, வறட்சி, மண்ணரிப்பு, மண்சரிவு ,மண்ணில் கலக்கும் கழிவுகள் போன்ற பல்வேறு காரணங்களினால் நிலம் தரம் இழந்துவருகின்றது. இலங்கையிலும் அதன் மொத்த நிலப்பரப்பில் 34 வீதமான அளவு நிலம் தரமிழந்து உள்ளதாக அறியப்பட்டுள்ளது. உலகின் தலையாய சூழற் பிரச்சினையாக உருவெடுத்துவரும் இதனைக் கருத்திற் கொண்டு ஐக்கிய நாடுகள் சபை இந்த ஆண்டின் சுற்றுச்சூழல் தினத்தின் கருப்பொருளாக ‘ நிலம் மீள்சீரமைப்பு, பாலைவனமாதல் மற்றும் வறட்சியில் இருந்து மீண்டெழுதல்'என்ற கருப்பொருளைத் தேர்வு செய்துள்ளது. இக்கருப்பொருளுக்கு அமைவாகத் தமிழ்த்தேசியப் பசுமை இயக்கத்தின் தலைவர் பொ.ஐங்கரநேசன் இந்நிகழ்ச்சியில் உரையாற்றி இருந்தார்.மேலும் , மாவை கலட்டி காந்திஜி சனசமூகநிலையத்தின் தலைவர் பா .நவநேசன் , ஆசிரியர் ப. பிரிந்தன் ஆகியோரும் சூழல் பாதுகாப்பின் முக்கியத்துவம் தொடர்பாக உரையாற்றியிருந்தனர்.

இந்நிகழ்ச்சியில் நூற்றுக்கணக்கான மாணவர்கள் கலந்துகொண்டிருந்தார்கள். பங்கேற்ற மாணவர்கள் அனைவருக்கும் ‘பிளாஸ்ரிக்கின் பிடியில்’ என்ற கைநூல் வழங்கப்பட்டன . அத்தோடு, ரொறன்ரோவின் மனிதநேயக் குரலின் அனுசரணையோடு சூழல் விழிப்புணர்வு மேற்கோள்கள் அடங்கிய அப்பியாசக்கொப்பிகள் வழங்கி வைக்கப்பட்டமையும் குறிப்பிடத்தக்கது.

டி.எஸ்.ஐ நிறுவனம் கார்த்திகைப்பூ பொறிக்கப்பட்ட காற்செருப்புகளை

விற்பனையில் இருந்து மீளப்பெறல் வேண்டும்

தமிழ் மக்களின் உணர்வுகளைக் காயப்படுத்தியமைக்காக

வருத்தமும் தெரிவிக்கவேண்டும்

பொ .ஐங்கரநேசன் வலியுறுத்து

கார்த்திகைப் பூ வெறும் பூ அல்ல ; தமிழ் மக்களின் வாழ்வியலிலும் உணர்வுகளிலும் தமிழ்த் தேசிய அரசியலிலும் இரண்டறக்கலந்துள்ள அவர்களின் உயிர்ப்பூ .இது தென்னிலங்கை நிறுவனமான டி .எஸ்.ஐ பாதணி உற்பத்தி நிறுவனத்துக்குத் தெரியாததல்ல. ஆனாலும் ,தமிழ் மக்களின் உணர்வுகளைச் சீண்டிப்பார்க்கும் விதத்தில் இந்நிறுவனம் தனது இலேசுரக காற்செருப்புகளில் கார்த்திகைப்பூவைப் பொறித்து விற்பனைக்கு விட்டுள்ளது.இது மிகவும் வன்மையாகக் கண்டிக்கத்தக்கது. டி.எஸ்.ஐ நிறுவனம் கார்த்திகைப்பூ பொறிக்கப்பட்ட காற்செருப்புகளை விற்பனையில் இருந்து மீளப்பெறல்வேண்டும். தமிழ் மக்களின் உணர்வுகளைக் காயப்படுத்தியமைக்காக வருத்தமும் தெரிவிக்கவேண்டும் என்று தமிழ்த் தேசிய பசுமை இயக்கத்தின் தலைவர் பொ ஐங்கரநேசன் வலியுறுத்தியுள்ளார்.

இன்று செவ்வாய்க்கிழமை [28-05-2024] தமிழ்த் தேசியப் பசுமை இயக்கத்தின் தலைமைச் செயலகத்தில் பொ ஐங்கரநேசன் நிகழ்த்திய ஊடகவியலாளர் சந்திப்பிலேயே இவ்வாறு வலியுறுத்தியுள்ளார்.

ஊடகவியலாளர் சந்திப்பில் அவர் மேலும் தெரிவிக்கையில் ,

இலங்கையில் புத்தபெருமானின் உருவத்தை உடலில் பச்சை குத்தியவர்களும், பெளத்த சின்னங்கள் அச்சிட்ட ஆடைகளை அணிந்தவர்களும் பெளத்தத்தை அவமதித்ததாக,பெளத்த மதத்தினரின் மனதைப் புண்படுத்தியதாகக் கூறி காவல் துறையால் கைது செய்யப்பட்டுள்ளார்கள் . தமிழ் மக்களைப் பொறுத்தவரையில் கார்த்திகைப்பூவும் புனிதமான ஒன்றாக, அவர்களின் தேசிய அடையாளங்களில் ஒன்றாகக் கருதப்படுகின்றது . இதனால் ,கார்த்திகைப்பூவைக் காற்செருப்பில் பொறித்திருப்பதைத் தங்களை இழிவுபடுத்தும் ஒன்றாகவே அவர்கள் கருதுகின்றார்கள். தமிழ் மக்களின் மன உணர்வைப் ப்புரிந்துகொண்டு டி .எஸ்.ஐ நிறுவனம் உடனடியாக இக்காற்செருப்புகளைச் சந்தையில் இருந்து மீளப்பெறல்வேண்டும்.

வடக்கில் தமிழ்ப் பாடசாலையொன்றில் விளையாட்டுப் போட்டியின்போது இல்லங்களை அழகுபடுத்துவதற்கெனக் கார்த்திகைப் பூவின் உருவத்தைக் காட்சிப்படுத்தியமைக்காகக் கல்லூரிச் சமூகமே காவல்துறையால் விசாரணைக்கு அழைக்கப்பட்டிருந்தது.ஆனால் , கார்த்திகைப் பூவைப் பொறித்த காற்செருப்புகளின் விற்பனைக்குக் காவல்துறை எவ்வித குந்தகங்களும் செய்யவில்லை. இதுதான் பேரினவாதத்தின் மனோ நிலை . எனவே ,டி .எஸ்.ஐ நிறுவனம் கார்த்திகைப்பூ பொறிக்கப்பட்ட காற்செருப்புகளை விற்பனையில் இருந்து மீளப்பெறும் வரைக்கும், இந்த அநாகரீக இழிசெயலுக்காக தமிழ் மக்களிடம் வருத்தம் தெரிவிக்கும் வரைக்கும், தமிழ் மக்கள் டி .எஸ்.ஐ நிறுவனத்தின் உற்பத்திகளைக் கொள்வனவு செய்யாது புறக்கணிக்கவேண்டும் என்றும் தெரிவித்துள்ளார்.

தமிழ்த் தேசியப் பசுமை இயக்கத்தினால்

முள்ளிவாய்க்கால் கஞ்சி பரிமாறப்பட்டது.

தமிழ்த் தேசியப் பசுமை இயக்கத்தினால் கந்தர்மடத்தில் அமைந்துள்ள அதன் தலைமைச் செயலகத்துக்கு முன்பாக இன்று வெள்ளிக்கிழமை [17-05-2024] முள்ளிவாய்க்கால் கஞ்சி காய்ச்சிப் பரிமாறப்பட்டது.

பெருமளவிலானோர் ஆர்வத்துடன் கலந்துகொண்டிருந்தார்கள்.பிள்ளைகளைப் பெற்றோர்கள் அழைத்து வந்து கஞ்சி பருக வைத்ததோடு கஞ்சியின் நோக்கத்தைப் பிள்ளைகளுக்கு விளங்கப்படுத்தியதையும். காண முடிந்தது,

போரில் மடிந்தவர்களையும், அதன் அழிவுகளையும் அவலங்களையும் அடுத்த சந்ததிக்கு எடுத்துச்சொல்லும் விதமாக வடக்குக் கிழக்கெங்கும் ஆண்டுதோறும் மே 12 தொடங்கி 18 வரையான காலப்பகுதி முள்ளிவாய்க்கால் வாரமாக உணர்வு பூர்வமாகக் கடைப்பிடிக்கப்படுகிறது. போரில் உயிர் காத்த ஓரேயொரு உணவான கஞ்சி ஒரு நினைவுக்குறியீடாக இக்காலப் பகுதியில் காய்ச்சிப் பரிமாறப்பட்டுவருவது குறிப்பிடத்தக்கது.

தமிழ்த் தேசியப் பசுமை இயக்கத்தின் கஞ்சி பரிமாறுதலின்போது தென்னம்பிள்ளைகளும் வழங்கி வைக்கப்பட்டன.

ரணில் மீட்பர் அல்லர் ; ஒரு பொருளாதார அடியாள்

சர்வதேச நிதி நிறுவனங்களின் சேவகர்

பொ . ஐங்கரநேசன் சாடல்

ராஜபக்ஸ சகோதரர்கள் அரியணையில் இருந்து துரத்தப்பட்டு அவ்விடத்துக்கு ரணில் விக்கிரமசிங்க இரண்டு வருடங்களுக்கு முன்னால் ஜனாதிபதியாகப் பிரதியீடு செய்யப்பட்டார். அவர் ஒரு பொருளாதார நிபுணர் , சரிந்திருக்கும் பொருளாதாரத்தைத் தூக்கி நிமிர்த்துவார், அடித்தட்டுமக்களின் வாழ்வு மேம்படும் என்று சொல்லியே முன்னிறுத்தப்பட்டார். ஆனால் , இன்று இலங்கையின் சனத்தொகையில் கால்வாசிக்கும் அதிகமான மக்கள் வறுமையில் வாடுகின்றனர்.2019ஆம் ஆண்டு பதினோரு சதவீதமாக இருந்த வறுமை இந்த ஆண்டு இருபத்தியாறு சதவீதமாக அதிகரித்திருக்கிறது.ரணில் மீட்பர் அல்லர். அவர் ஒரு பொருளாதார அடியாள் . உலக வங்கி , நாணய நிதியம் ஆகிய சர்வதேச நிதி நிறுவனங்களின் தாழ்பணியும் ஒரு சேவகராகவே அவர் செயற்பட்டுவருகின்றார் என்று தமிழ்த் தேசியப் பசுமை இயக்கத்தின் தலைவர் பொ ஐங்கரநேசன் கடுமையாகச் சாடியுள்ளார்.

பொருளாதாரரீதியாக மிகவும் பின்தங்கிய குடும்பங்களுக்கு உலர் உணவுப்பொதிகளை வழங்கி வைக்கும் தமிழ்த் தேசியப் பசுமை இயக்கத்தின் அற்றார் அழிபசி தீர்த்தல் நிகழ்ச்சி கடந்த ஞாயிற்றுக்கிழமை நல்லூரில் இடம்பெற்றது. இந்நிகழ்ச்சியில் கலந்துகொண்டு உரையாற்றியபோதே பொ ஐங்கரநேசன் இவ்வாறு சாடியுள்ளார்.

அங்கு அவர் தொடர்ந்து உரையாற்றும்போது ,

இலங்கையின் மக்கள் தொகைக்கணக்கெடுப்பு மற்றும் புள்ளிவிபரத் திணைக்களம் 2019ஆம் ஆண்டில் 6,966 ரூபாயாக இருந்த தனி நபர் ஒருவரின் அடிப்படைத்தேவைகளுக்கான மாதாந்த செலவு இப்போது 17,014 ரூபாவாக உயர்ந்துள்ளது எனத் தெரிவித்துள்ளது.உலக வங்கி தன்னுடைய அறிக்கையில் இலங்கையில் அறுபது வீதமான குடும்பங்களின் வருமானம் வீழ்ச்சி அடைந்துள்ளதாகத் தெரிவித்துள்ளது. வாங்கும் திறன் குறைந்ததால் உணவுப்பாதுகாப்பின்மை , ஊட்டச் சத்துக்குறைபாடு , வளர்ச்சிக்குறைபாடு என்று பல இன்னல்களை மக்கள் எதிர்கொள்ளத் தொடங்கியுள்ளார்கள்.பொருளாதார மறுசீரமைப்பு என்ற பெயரில் சர்வதேச நாணய நிதியம் விதிக்கும் கட்டளைகளை சிரமேற்கொண்டு அரசாங்கம் நடைமுறைப்படுத்துகின்ற வரி விதிப்பு முறைகள், அத்தியாவசிய பொருட்களின் விலையேற்றம் எல்லாம் சேர்ந்து சமூகத்தின் மீது தொடுத்திருக்கும் தாக்குதலின் விளைவுகள்தான் இவை.

நாணய நிதியத்தின் சொற்கேட்டு அரச நிறுவனங்களைத் தனியார்மயமாக்கும் நடவடிக்கைகளினாலும் , மூடும் நடவடிக்கைகளினாலும் இலட்சக்கணக்கான மக்களின் வேலைகளை இல்லாதொழிக்கும் நடவடிக்கைகளில் ரணில் விக்கிரமசிங்க ஈடுபட்டுவருகின்றார். நாளுக்கு நாள் வேலை இல்லாதவர்களின் எண்ணிக்கை அதிகரித்துக்கொண்டிருக்கின்றது. ஆனால் ,அமெரிக்கப் பேரரசு ஜனாதிபதி ரணில் விக்கிரமசிங்கவின் பொருளாதார நடவடிக்கைகளை அவ்வப்போது வானளாவப் புகழ்ந்து தள்ளுகின்றது.இதன் பொருள் ரணில் சர்வதேச நிதி நிறுவனங்களுக்கும் பெரும் பன்னாட்டு வணிக நிறுவனங்களுக்கும் இவற்றுக்கூடாகத் தங்களுக்கும் சிறந்த சேவகராக ,ஒரு பொருளாதார அடியாளாக இருக்கின்றார் என்பதுதான்.

ரணில் விக்கிரமசிங்கவை அடிக்கடி வெளிப்படையாகப் பாராட்டுவதன் மூலம் அவரை ஒரு பொருளாதார மீட்பராக மக்கள் மத்தியில் கட்டமைக்க அமெரிக்கா விரும்புகின்றது. ஜனாதிபதித் தேர்தல் நெருங்கும் சமயத்தில் இந்த விம்பம் அவரை வெல்ல வைக்கும் என்றும் அமெரிக்கா நினைக்கின்றது. இலங்கையின் ஜனாதிபதியாக யார் வரவேண்டும் என்பதை மக்கள் அல்ல; வல்லாதிக்க சக்திகளே தீர்மானிக்கின்றன.அதற்கேற்ப மக்களை, வாக்காளர்களை, மக்கள் பிரதிநிதிகளை மூளைச் சலவை செய்யும் வேலைகள் கனகச்சிதமாக இப்போது நிகழ்ந்து கொண்டிருக்கின்றன.எமது மக்கள் இவற்றைப் புரிந்து கொள்ள வேண்டும் என்றும் தெரிவித்துள்ளார்

நல்லூரில் பசுமை இயக்கத்தின்

அற்றார் அழிபசி தீர்த்தல்

தமிழ்த் தேசியப் பசுமை இயக்கம் பொருளாதார ரீதியாக மிகவும் பாதிப்படைந்துள்ள குடும்பங்களுக்கு உலருணவுப் பொதிகளை வழங்கும் 'அற்றார் அழிபசி தீர்த்தல்' என்ற திட்டத்தைச் செயற்படுத்தி வருகின்றது. பகிர்ந்துண்டு வாழ்வோம் என்ற கருப்பொருளில் செயற்படுத்தப்பட்டுவரும் இத்திட்டம் நேற்று ஞாயிற்றுக் கிழமை [12-05-2024]நல்லூரில் முன்னெடுக்கப்பட்டுள்ளது.

தமிழ்த் தேசியப் பசுமை இயக்கத்தின் தலைவர் பொ .ஐங்கரநேசனின் தலைமையில் நடைபெற்ற இந்நிகழ்ச்சியில் நல்லூர் பிரதேச செயலக எல்லைக்கு உட்பட்ட வெவ்வேறு பகுதிகளில் இருந்து தெரிவு செய்யப்பட்ட நூறு குடும்பங்களுக்கு அத்தியாவசிய உலருணவுகள் அடங்கிய பொதிகள் வழங்கி வைக்கப்பட்டுள்ளன.இவற்றுக்கான நிதி அனுசரணையைக் கனடாவில் இருந்து வருகை தந்திருந்த திரு. செல்லையா சத்தியலிங்கம் மற்றும் இலண்டன் வாழ் திரு. சற்குணநாதன் துஷாகரன் ஆகியோர் வழங்கியிருந்தார்கள்.

கொரோனாப் பெருந் தொற்றுக் காலத்தில் ஏற்பட்ட தொழில் இழப்பைத் தொடர்ந்து, நாட்டின் பொருளாதாரத்தில் ஏற்பட்டுள்ள பாரிய வீழ்ச்சி பொருளாதார ரீதியாகப் பின்தங்கியுள்ள குடும்பங்களை வெகுவாகப் பாதித்துள்ளது .இதனைக் கருத்திற்கொண்டு தமிழ்த் தேசியப் பசுமை இயக்கம் கொரோனாப் பேரிடர்க் காலத்தில் ஆரம்பித்த அற்றார் அழிபசி தீர்த்தல் திட்டத்தை இன்றுவரை கைவிடாது தொடர்ந்து செயற்படுத்தி வருகின்றமை குறிப்பிடத்தக்கது.

அரசியல் விவாதங்களில் காலநிலை மாற்றம்,

சுற்றுச்சூழல் பிரச்சினைகள் முன்னுரிமை பெறவேண்டும்

மேதினப் பொதுக்கூட்டத்தில் பொ.ஐங்கரநேசன் சுட்டிக்காட்டு

காலநிலை மாற்றம் சகல தொழில் துறைகளையும் மிக மோசமாகப் பாதித்துக் கொண்டிருக்கிறது. தொழிலாளிகள் தங்கள் தொழில் வாய்ப்புகளை இழந்து வீதிக்கு வந்து கொண்டிருக்கிறார்கள். ஆனால், இவைபற்றி அரசாங்கமோ, அரசியல் கட்சிகளோ சிந்திப்பதாக இல்லை. உழைப்பாளர் தினப் பொதுக் கூட்டங்கள் வெற்று அரசியல் கோசங்களாலேயே நிரம்பி வழிந்து கொண்டிருக்கின்றன. இந்த நிலை மாறவேண்டும். அரசியல் விவாதங்களில் காலநிலை மாற்றம், சுற்றுச்சூழல் பிரச்சினைகள் முன்னுரிமை பெறவேண்டும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

தமிழ்த்தேசியப் பசுமை இயக்கத்தின் செம்பசுமை மேதினப் பொதுக் கூட்டம் நேற்று (01.05.2024) கொக்குவில் பொற்பதி அறிவாலயத்தில் நடைபெற்றது. இப் பொதுக்கூட்டத்தில் உரையாற்றியபோதே பொ.ஐங்கரநேசன் இவ்வாறு சுட்டிக்காட்டியுள்ளார்.

அங்கு அவர் தொடர்ந்து உரையாற்றுகையில்,

பூமி நாளுக்குநாள் சூடேறிக் கொண்டிருக்கிறது. கடந்த 173 ஆண்டுகால வானிலை வரலாற்றில் 2023 ஆம் ஆண்டு மிகவும் வெப்பமான ஆண்டாகப் பதிவாகியிருக்கின்றது. பூமியின் வெப்பநிலை கைத்தொழில் புரட்சிக்காலத்தில் பூமி கொண்டிருந்த வெப்பநிலையைவிட 1.5 பாகை செல்சியஸ் அளவால் மட்டுமே உயரலாம் எனச் சூழல் விஞ்ஞானிகள் எச்சரித்திருக்கிறார்கள். பூமியைச் சூடுபடுத்தும் எமது நடவடிக்கைகளை நாம் உடனடியாகக் கட்டுப்படுத்தாவிடில் பூமியின் வெப்பநிலை வெகுவிரைவில் இந்த எல்லையைக் கடந்துவிடும். மோசமான பேரழிவுகளை ஏற்படுத்தப்போகும் இந்த வெப்ப உயர்வு இதுவரையில் எந்த அரசியல்வாதியையும் உலுக்கியதாகத் தெரியவில்லை.

நாம் காலநிலை மாற்றத்தின் பாதகங்களை ஏற்கனவே வெப்ப அலைகளாகவும், குறுகிய நாளில் கொட்டித் தீர்க்கும் அடைமழைகளாகவும் அனுபவிக்கத் தொடங்கி விட்டோம். காலநிலை மாற்றத்தால் ஒரு புறம் விவசாயம் பொய்த்துப் போக, இன்னொருபுறம் கடலில் மீன்கள் காணாமல் போய்க் கொண்டிருக்கின்றன. இன்று தென்னைகளைத் தாக்கும் வெள்ளை ஈக்களின் படையெடுப்பும் காலநிலை மாற்றத்தின் விளைவுகளில் ஒன்றுதான். ஆனால், இவற்றையெல்லாம் தற்செயலான, தனித்தனியான நிகழ்வுகளாகவே நம்மில் பெரும்பாலானோர் கருதிக் கொண்டிருக்கிறார்கள். இவற்றை ஒன்றுடனொன்று தொடர்புபடுத்திப் பார்க்கும் அளவுக்குச் சமூகம் சூழல் சார்ந்து இன்னும் போதிய அறிவூட்டப்படவில்லை.

இந்திய உச்ச நீதிமன்றம் காலநிலை மாற்றங்களின் பாதிப்புகளில் இருந்து பாதுகாத்துக் கொள்ள வேண்டியது ஒவ்வொருவரினதும் அடிப்படை மனித உரிமை என்று அண்மையில் தெரிவித்திருக்கிறது. இந்தியத் தேர்தல் ஆணையம் தேர்தல் விஞ்ஞாபனங்களில் சுற்றுச்சூழல் பாதுகாப்புத் தொடர்பான தமது திட்டங்களைக் கட்சிகள் அறிவிக்க வேண்டுமென்று கட்டாயப்படுத்தியுள்ளது. ஐனாதிபதித் தேர்தலை எதிர்கொண்டுள்ள இலங்கையில் எந்தவொரு வேட்பாளரும் தமிழ் மக்களின் பிரச்சினைக்கான இனநீதியை முன்வைக்கப் போவதில்லை. சூழல் நீதிக்கேனும் மதிப்பளித்துத் தேர்தல் விஞ்ஞாபனங்களில் காலநிலை மாற்றப் பிரச்சினைகளுக்கான தீர்வுகள் குறித்த வாக்குறுதிகளையேனும் இடம்பெறச் செய்வதற்குத் தேர்தல் ஆணையம் ஆவன செய்ய வேண்டும் என்றும் தெரிவித்துள்ளார்.

பசுமை இயக்கத்தின் மேதினப் பொதுக்கூட்டம்

கொக்குவில் அறிவாலய மண்டபத்தில் இடம்பெற்றது

தமிழ்த் தேசியப் பசுமை இயக்கத்தின் செம்பசுமை மேதினப் பொதுக் கூட்டம் நேற்று புதன் கிழமை (01.05.2024) கொக்குவில் பொற்பதி அறிவாலய மண்டபத்தில் நடைபெற்றது.

தமிழ்த் தேசியப் பசுமை இயக்கத்தின் இணைப்பாளர் நா. பார்த்தீபன் தலைமையில் நடைபெற்ற இந்த உலகத் தொழிலாளர் தினப் பொதுக்கூட்டத்தில் தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன், சமூக அரசியற் செயற்பாட்டாளர் க. அருந்தவபாலன், அரசியல் ஆய்வாளர் நிலாந்தன் ஆகியோர் கருத்துரைகளை ஆற்றியிருந்தார்கள் .

தமிழ்த் தேசியப் பசுமை இயக்கம் ஆண்டுதோறும் மேதினத்தைச் ‘சுற்றுச்சூழல் பாதுகாப்பே உழைப்புக்கான உத்தரவாதம்’ என்ற கருப்பொருளில் செம்பசுமை மேதினமாகக் கொண்டாடி வருகின்றமை குறிப்பிடத்தக்கது.

செம்மணியில் துடுப்பாட்ட மைதானம் அமையின்

அயற்கிராமங்கள் வெள்ளத்தில் மூழ்கும்

கோடையில் கடும் நீர்ப்பஞ்சமும் ஏற்படும்

பொ. ஐங்கரநேசன் எச்சரிக்கை

செம்மணியில் முன்னர் உப்பளம் இருந்த பகுதியில் சர்வதேசத் துடுப்பாட்ட மைதானம் ஒன்றை அமைப்பதற்கான பகீரத முயற்சியில் நகர அபிவிருத்தி அதிகாரசபை ஈடுபட்டுள்ளது. ஏற்கனவே செம்மணியில் கட்டுமானங்களை மேற்கொள்வதற்குப் பல்வேறு தரப்பினராலும் முயற்சிகள் முன்னெடுக்கப்பட்டபோது. வடக்கு மாகாணசபை அவற்றை நிராகரித்திருந்தது. தற்போது வடக்கு மாகாணசபையில் மக்கள் பிரதிநிதித்துவம் இல்லாத நிலையில் செம்மணியில் சர்வதேசத்தரத்தில் துடுப்பாட்ட மைதானம் ஒன்றை அமைப்பதற்கான முயற்சிகள் சாதக பாதகங்களை ஆராயாது முடுக்கிவிடப்பட்டுள்ளன. செம்மணியில் இத் துடுப்பாட்ட மைதானம் அமைந்தால் அயற்பிரதேசங்கள் மாரியில் வெள்ளத்தில் மூழ்கும் அபாயமும், கோடையில் கடும் நீர்ப்பஞ்சத்துக்கு ஆளாகும் அபாயமும் நேரிடும் என்று தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் எச்சரித்துள்ளார்.

செம்மணியில் சர்வதேசத் தரத்திலான துடுப்பாட்ட மைதானத்தை அமைப்பதற்கான முயற்சிகள் முன்னெடுக்கப்பட்டுள்ளமை தொடர்பாக பொ.ஐங்கரநேசன் விடுத்துள்ள ஊடக அறிக்கையிலேயே [19-04-2024]இவ்வாறு எச்சரித்துள்ளார்.

அந்த அறிக்கையில் அவர் மேலும் தெரிவிக்கையில்,

செம்மணி உப்பளப்பகுதி குடா நாட்டின் பிரதான கடல் நீரேரிகளில் ஒன்றான உப்பாற்றுக் கடல் நீரேரியை அண்டிய தாழ்வான ஈரநிலம் ஆகும். வெளிப்பார்வைக்கு முக்கியத்துவமற்ற வெட்டவெளியாகத் தென்படும் இப் பகுதி சூழலியல்ரீதியாக இன்றிமையாத பங்களிப்புகளை வழங்கி வருகிறது. மாரியில் சுற்றயல் கிராமங்களில் இருந்து வரும் வெள்ள நீரைத்தேக்கி வைத்து நிலத்தடி நீர் மட்டத்தைப் பேணுவதோடு, நிலம் உவராவதையும் தடுக்கிறது. கூடவே, மேலதிகநீரைக் குடாநாட்டின் இன்னுமொரு கடல்நீரேரியான யாழ்ப்பாணக் கடல் நீரேரிவழியாகக் கடலுக்குள் அனுப்புவதன் மூலம் குடியிருப்புகளையும் வயல் நிலங்களையும் வெள்ளத்தில் மூழ்காமல் பாதுகாக்கவும் செய்கிறது.

அபிவிருத்தி முதலீட்டாளர்களின் வசதிகளையும் நலன்களையும் மாத்திரமே கருத்திற் கொள்வதாயின் அது நிலைபேறானதாக ஒருபோதும் அமையாது. அபிவிருத்தியில் சுற்றுச்சூழலினதும, அது சார்ந்த சமூகத்தினதும், நலன்கள் முன்னுரிமை பெறும்போதே அது நீடித்த – நிலையான - அபிவிருத்தியாக அமையும். அந்த வகையில் யாழ் நகரின் நுழைவாசல் என்பதற்காக மாத்திரமே செம்மணியில் துடுப்பாட்ட மைதானத்தை அமைப்பதற்கு முற்படுவது எவ்வகையிலும் ஏற்புடையது அல்ல. இதனை இதுவரையில் அபிவிருத்திகள் எதனையும் காணாத தீவகத்தின் பகுதிகளில் ஒன்றில் நிறுவுவதே சாலச்சிறந்தது ஆகும் என்றும் தெரிவித்துள்ளார்.

கார்த்திகைப் பூ புலி இலச்சினை அல்ல;

தமிழ்த் தேசியஇனத்தின் தாயகச்சூழலின் அடையாளம்

பொ. ஐங்கரநேசன் சுட்டிக்காட்டு

கார்த்திகைப்பூவை ஸ்ரீலங்கா அரசு விடுதலைப் புலிகளின் இலச்சினையாகவே பார்க்கிறது. இதனாலேயே தெல்லிப்பளை யூனியன் கல்லூரியின் மெய்வல்லுநர் போட்டியில் இல்லமொன்றை அழகுபடுத்துவதற்காகக் கார்த்திகைப்பூவை வடிவமைத்த மாணவர்கள் காவல்துறையினால் அறிவிலித்தனமாக விசாரணைக்கு அழைக்கப்பட்டுள்ளார்கள். கார்த்திகைப்பூவை விடுதலைப்புலிகள் தேசியமலராகத் தெரிவுசெய்திருந்தார்கள் என்பதற்காக அது விடுதலைப்புலிகளை அடையாளப்படுத்தும் பூ அல்ல. அது தமிழ்த்தேசிய இனத்தின் தாயகச் சூழலின் அடையாளம் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

தெல்லிப்பளை யூனியன் கல்லூரியின் மெய்வல்லுநர் போட்டியில் இல்லமொன்று கார்த்தகைப்பூவின் உருவத்தை உருவாக்கி வைத்திருந்தமையால் மாணவர்கள் சிலரும் கல்லூரி நிர்வாகமும் காவல்துறையினரால் விசாரணைக்கு அழைக்கப்பட்டுள்ளனர். இது தொடர்பாக பொ.ஐங்கரநேசன் வெளியிட்டுள்ள ஊடக அறிக்கையிலேயே இவ்வாறு சுட்டிக்காட்டியுள்ளார்.

அந்த அறிக்கையில் அவர் மேலும் தெரிவிக்கையில்,

தமிழர்கள் சுற்றுச்சூழலைக் குறிஞ்சி, முல்லை, மருதம், நெய்தல், பாலை என்று ஐந்திணைகளாக வகுத்து இயற்கையோடு இசைந்த வாழ்வை மேற்கொண்டு வந்தவர்கள், சங்கத் தமிழர்களால் காந்தள் என அழைக்கப்பட்ட கார்த்திகைப்பூ இப்போதும் தமிழ் வாழ்வுக்கு மிகவும் நெருக்கமான பூக்களில் ஒன்றாகவே இருந்துவருகிறது. சங்கக்கவி கபிலர் தொடங்கி தாயகக்கவி புதுவை இரத்தினதுரை வரை கார்த்திகைப் பூவைப் பற்றிப்பாடாத புலவர்களே இல்லையென்னும் அளவுக்குத் தமிழ் வாழ்வியலில் கார்த்திகைப்பூ மிகுந்த முக்கியத்துவம் பெற்றிருக்கிறது. இதன் காரணமாகவே இந்தியாவில் தமிழ்நாடு கார்த்திகைப்பூவைத் தனது மாநில மலராகத் தேர்வு செய்துள்ளது.

ஸ்ரீலங்கா அரசு தனது பௌத்த பண்பாட்டுச் சூழலுக்கு அமைவாகத் தேசிய மலராக நீலோற்பலத்தையும் தேசிய மரமாக மெசுவா எனப்படும் நாகமரத்தையும் தெரிவு செய்துள்ளது. இலங்கைக்காடுகளில் ஒருபோதும் காணப்படாத சிங்கத்தைத் தேசியக் கொடியில் வாளேந்த வைத்த பின்னர் அதனால் இதுவரையில் இலங்கைக்குரிய தேசிய விலங்கொன்றைத் தெரிவு செய்ய முடியவில்லை. இலங்கைத் தேசிய அடையாளங்கள் தமிழ் மக்களை உள்வாங்காது பௌத்த, சிங்களப் பெரும்தேசியவாதத்தின் குறியீடுகளாக அமைந்ததன் விளைவாகவே விடுதலைப்புலிகள் தேசிய மலராக ஈழத்தமிழ்ச் சூழலின் அடையாளமாக விளங்கும் கார்த்திகைப்பூவைத் தெரிவுசெய்ய நேர்ந்தது.

கார்த்திகைப்பூச்செடியிலுள்ள கொல்கிசின் என்னும் நச்சு இரசாயனம் அருமருந்துகளின் தயாரிப்பில் பயன்படுகிறது. இதன் பொருட்டுத் தமிழகத்தில் ஆயிரக்கணக்கான ஏக்கர்களில் பயிரிடப்படும் கார்த்திகைப்பூச்செடியால் பலகோடி ரூபாய்கள் அந்நியச்செலாவணியாகக் கிடைத்து வருகிறது. ஆனால், கார்த்திகைப்பூச்செடியின் சிறப்புகளை ஸ்ரீலங்கா அரசு ஏற்றுக்கொள்ள மறுப்பதாலேயே கார்த்திகைப்பூவுக்கு உத்தியோகப்பற்றற்ற தடையைப் பேணிவருகிறது. இயற்கை அதன் பரிணாமப்பாதைக்குக் குறுக்காக நிற்கும் எதனையும் தூக்கியெறிந்து தன் பல்லினத்தை நிலைநிறுத்தும் பேராற்றல் பெற்றது என்பதை ஸ்ரீலங்கா அரசு நினைவிற்கொள்ளவேண்டும் என்றும் குறிப்பிட்டுள்ளார்.

தாலகாவலர் மு.க கனகராசா

ஞாபகார்த்தப் பசுமை அமைதி விருது – 2023

சிறந்த சூழல்நேயச் செயற்பாட்டாளர்

திரு. செல்லப்பா கிருபானந்தமூர்த்தி

தமிழ்த் தேசியப் பசுமை இயக்கத்தின் 2023ஆம் ஆண்டுக்கான சிறந்த சூழல்நேயச் செயற்பாட்டாளருக்கான பசுமை அமைதி விருது திரு. செல்லப்பா கிருபானந்தமூர்த்தி அவர்களுக்கு வழங்கப்பட்டுள்ளது. தாலகாவலர் மு.க கனகராசா ஞாபகார்த்தமாக வழங்கப்பட்டுவரும் இவ்விருது கேடயம் மற்றும் சான்றிதழுடன் ஒரு இலட்சம் ரூபா பணப்பரிசையும் உள்ளடக்கியதாகும்.

திரு செல்லப்பா கிருபானந்தமூர்த்தி அவர்கள் கொழும்பை வதிவிடமாகக் கொண்டவர. சிறுதொழில் முயற்சியாளரான இவர் யாழ்ப்பாணத்திலிருந்து முற்றாக அழிந்துபோன சமுத்திரக்கனி மரங்களை கொழும்பில் இருந்து யாழ்ப்பாணத்துக்கு எடுத்து வந்து மீளவும் அறிமுகப்படுத்தியவர் ஆவார். கொழும்பிலிருந்து யாழ்ப்பாணத்துக்குப் புகையிரதம் அல்லது பேரூந்தில் பயணிப்பதை வழக்கமாகக் கொண்ட இவர் ஒவ்வொரு தடவையும் யாழ்ப்பாணம் வரும்போது சிரமங்களைப் பொருட்படுத்தாது நூற்றுக்கணக்கான சமுத்திரக்கனி மரக்கன்றுகளையும், வேறு மரக்கன்றுகளையும் எடுத்து வந்து யாழ்குடா நாட்டில் நடுகை செய்துள்ளார். இதுவரை தமிழ்த்தேசியப் பசுமை இயக்கத்துக்கும் இவர் ஆயிரக்கணக்கான சமுத்திரக்கனி மரக்கன்றுகளைக் கையளித்துள்ளார்.

பெயருக்காகவோ விளம்பரத்துக்காகவோ அல்லாமல் தனது மண்ணில் நிறைவேற்ற வேண்டிய ஒரு சூழலியற் கடப்பாடாகத் தொய்வின்றி இப்பணியைச் செய்துவரும் இவர் மேடையில் ஏறி விருதுகளைப் பெறுவதற்கும் தயக்கம் காண்பித்தார். இவருக்குரிய கேடயம், சான்றிதழ், பணப்பரிசு யாவும் இவரிடம் கையளிக்கப்பட்டுள்ளன. இயற்கை அன்னையின் பேராசீர்வாதம் இவருக்கு எப்போதும் கிடைப்பதாக.

கோலாகலமாக நிகழ்ந்தேறிய

பசுமை அமைதி விருதுகள் விழா

தமிழ்த்தேசியப் பசுமை இயக்கத்தின் பசுமை அமைதி விருதுகள் விழா நேற்று ஞாயிற்றுக்கிழமை (17.03.2024) கோலாகலமாக நிகழ்ந்தேறியுள்ளது. மாணவர்களிடையேயும் பொதுமக்களிடையேயும் சூழல் விழிப்புணர்வை ஏற்படுத்தி அவர்களைச் சூழல்பாதுகாப்புச் செயற்பாடுகளில் பங்கேற்பாளர்களாக்கும் நோக்குடன் தமிழ்த்தேசியப் பசுமை இயக்கம் ஆண்டு தோறும் பசுமை அமைதி விருதுகளை வழங்கி வருகிறது. 2023ஆம் ஆண்டுக்கான விருதுகளை வழங்கும் விழா நேற்று யாழ்ப்பாணம் வீரசிங்கம் மண்டபத்தில் இடம்பெற்றுள்ளது.

தமிழ்த்தேசியப் பசுமை இயக்கத்தின் தலைவர் பொ.ஐங்கரநேசன் தலைமையில் நடைபெற்ற இவ்விழாவில் பிரதம விருந்தினராக யாழ்ப்பாணப் பல்கலைக்கழகத்தின் துணைவேந்தர் பேராசிரியர் சி. சிறிசற்குணராஜா அவர்கள் கலந்துகொண்டிருந்தார். சிறப்பு விருந்தினர்களாக வடமாகாணக் கல்வித் திணைக்களத்தின் பணிப்பாளர் தி. ஜோன் குயின்ரஸ், கிழக்கு மாகாண விவசாயத் திணைக்களத்தின் பணிப்பாளர் திரு. எம். எஸ். ஏ. கலீஸ் ஆகியோர் கலந்து கொண்டிருந்தார்கள்.

இவ் விழாவில் மாணவர்களிடையே அகில இலங்கை ரீதியாக நடாத்தப்பட்ட சூழல் பொது அறிவுப் பரீட்சையில் சித்தியடைந்த மாணவர்களில் முதல் 200 மாணவர்கள் பசுமை அமைதிச் சான்றிதழ் வழங்கிக் கௌரவிக்கப்பட்டார்கள். இவர்களில் முதல் மூன்று இடங்களைப் பெற்ற வெற்றியாளர்களுக்குச் சூழலியல் ஆசான் க.சி. குகதாசன் ஞாபகார்த்தப் பசுமை அமைதி விருதுகள் வழங்கப்பட்டன. முதலாம் இடத்தைப் பெற்ற யாழ்ப்பாணம் மகாஜனக் கல்லூரியைச் சேர்ந்த கனிமொழி கணேசானந்தன் தங்கப்பதக்கம் வழங்கியும், இரண்டாம் இடத்தைப் பெற்ற யாழ்ப்பாணம் இந்துக் கல்லூரியைச் சேர்ந்த் ஆனந்தஜோதி அபிஷாகர், மட்டக்களப்பு புனித மைக்கேல் கல்லூரியைச் சேர்ந்த சுதர்சன் வியாசகன் ஆகிய இருவரும் வெள்ளிப்பதக்கங்கள் வழங்கியும், மூன்றாம் இடத்தைப்பெற்ற ஓட்டமாவடி மத்திய கல்லூரியைச் சேர்ந்த முஹம்மட் முஸ்தபா மஹார் அஹமத் வெண்கலப் பதக்கம் வழங்கியும் கௌரவிக்கப்பட்டனர்.

தாலகாவலர் மு.க. கனகராசா ஞாபகார்த்தமாக வழங்கப்பட்டுவரும் சிறந்த சூழல்நேயச் செயற்பாட்டாளருக்கான விருதை இம்முறை கொழும்பைச் சேர்ந்த செல்லப்பா கிருபானந்தமூர்த்தி பெற்றிருந்தார். இவருக்கு விருதோடு ஒரு இலட்சம் ரூபா பணப்பரிசும் வழங்கப்பட்டது. மேலும்இ தமிழ்த்தேசியப் பசுமை இயக்கத்தால் மாணவர்களிடையே நடாத்தப்பட்ட வீட்டுத்தோட்டப் போட்டியில் சிறந்த செய்கையாளர்களாக அடையாளம் காணப்பட்டவர்கள் மாணாக்க உழவர்களாகவும், தாவரங்களை அடையாளம் காணும் போட்டியில் அதிக எண்ணிக்கையான தாவரங்களை அடையாளம் கண்டவர்கள் தாவராவதானிகளாகவும் சான்றிதழ்களும் பரிசுகளும் வழங்கிக் கௌரவிக்கப்பட்டிருந்தனர்.

புலம்பெயர் தமிழர் கூட்டமைப்பின் அனுசரணையுடன் நடைபெற்ற இவ் விருதுகள் வழங்கும் விழா அரங்கு நிறைந்த பார்வையாளர்களுடன் மிகச் சிறப்பாக இடம்பெற்றுள்ளது.

தென்னிந்தியக் கும்மாள நடிகைகளின் வருகை

சமூகத்தைப் போதை மயப்படுத்தும் இன்னுமொரு நிகழ்ச்சி நிரல்-

பசுமை அறிவொளி நிகழ்ச்சியில் பொ .ஐங்கரநேசன் சுட்டிக்காட்டு

தமிழ்ப் பிரதேசங்களில் தினம் தினம் போதை மரணங்கள் பதிவாகும் அளவுக்கு எமது இளைய தலைமுறை இன்று போதைப்பொருட்களுக்கு அடிமையாகிக் கொண்டிருக்கிறது.போர் முடிவுக்குக் கொண்டுவரப்பட்ட கையோடு இளைஞர்களை இலட்சியப் பாதைகளில் இருந்து திசை திருப்பும் நோக்கில் போதைப் பொருட்கள் திட்டமிட்டு விநியோகிக்கப்பட்டன .இன்று அதைக் கைவிட முடியாத அளவுக்கு போதை பெரும் புற்று நோயாகத் தமிழ்ச் சமூகத்தை அரிக்க ஆரம்பித்து விட்டது. இது போதாது என்று , இப்போது திட்டமிட்டுத் தென்னிந்தியாவில் இருந்து கும்மாள நடிகைகள் வரவழைக்கப்படுகின்றனர்.இதுவும் தமிழ்ச் சமூகத்தைப் போதை மயப்படுத்தும் இன்னுமொரு நிகழ்ச்சி நிரலே என்று தமிழ்த் தேசியப் பசுமை இயக்கத்தின் தலைவர் பொ .ஐங்கரநேசன் சுட்டிக்காட்டியுள்ளார்.

தமிழ்த் தேசியப் பசுமை இயக்கத்தின் பசுமை அறிவொளி நிகழ்ச்சி கடந்த சனிக்கிழமை மல்லாகத்தில் நடைபெற்றது. இதில் கலந்துகொண்டு உரையாற்றியபோதே பொ .ஐங்கரநேசன் இவ்வாறு சுட்டிக்காட்டியுள்ளார்.

அங்கு அவர் தொடர்ந்து உரையாற்றுகையில் ,

எமது மக்களின் பொழுது போக்குக்காக என்று சொல்லி இந்தியாவில் இருந்து கும்மாள நடிகைகள் கூட்டிவரப்படுகின்றனர் .ரம்பா , ஊர்வசி , மேனகாக்களைக் கொண்டு முனிவர்களின் தவத்தைக் கலைத்த கதைகள் புராணங்களில் நிறைய உண்டு.இந்தக் கதைகள்தாம் இப்போது எம் கண்முன்னே அரங்கேறத் தொடங்கி உள்ளன .கஞ்சாவும் மாவாவும் ஐஸும் கெரோயினும் மாத்திரம் போதைப்பொருட்கள் அல்ல. மதியை மயக்கும் எல்லாமே போதைகள்தாம் . அந்தவகையிலேயே , எமது இளைஞர்களை க் குறிவைத்து கும்மாள நடிகைகளின் களியாட்ட நிகழ்ச்சிகள் ஒழுங்கு செய்யப்படுகின்றன. இவை தொடர்ந்து நிகழுவதைத் தவிர்க்கும் முயற்சிகளில் தமிழ்ச் சமூகத்தின் நலனில் அக்கறையுள்ள அனைவரும் ஈடுபடவேண்டும்.

போரினால் பாதிக்கப் பட்ட எமது மக்களின் உள ஆற்றுப்படுத்தலுக்குப் பொழுது போக்குகள் அவசியம் . ஆனால், அந்தப் பொழுதுபோக்குகள் பண்பாட்டுச் சீரழிவுக்கு வித்துடுவனவையாக இருக்கக் கூடாது. பண்பாடு என்பது ஒரு இனத்துக்குத் தனித்துவமான , அந்த இனம் தன்னை யார் என்று உணர்ந்து கொள்ளவும் , மற்றவர்களுக்குத் தன்னை யார் என்று அடையாளப்படுத்தவும் கூடிய ஒரு வாழ்க்கை முறை. இன ஒடுக்குமுறைகளுக்கு எதிராகப் போராடிக்கொண்டிருக்கின்ற நாம் எமது இனத்தின் பண்பாட்டு அடையாளங்களை எந்தக் கேளிக்கைளின் பொருட்டும் இழந்து விடக்கூடாது. நாமும் நமக்கென்று பல கலைகளைக் கொண்டிருக்கிறோம். அவற்றை மேடையேற்ற உணர்வுள்ள பணம் படைத்தவர்கள் முன்வரவேண்டும் என்றும் தெரிவித்துள்ளார்.

மல்லாகத்தில் பசுமை இயக்கத்தின்

பசுமை அறிவொளி நிகழ்ச்சி

தமிழ்த் தேசியப் பசுமை இயக்கத்தின் பசுமை அறிவொளி நிகழ்ச்சி நேற்று சனிக்கிழமை [ 24-02-2024] மல்லாகம் கல்லாரை கிராமத்தில் நடைபெற்றுள்ளது.தமிழ்த் தேசியப் பசுமை இயக்கம் மாணவர்களுக்குச் சுற்றுச்சூழல் பற்றிய அறிவைப் புகட்டுவதன் ஊடாகச் சுற்றுச்சூழல் விழிப்புணர்வை ஏற்படுத்தி அவர்களைச் சுற்றுச்சூழல் பாதுகாப்பில் பங்கேற்றுநர்களாக்கும் நோக்குடனும் , அவர்களின் பன்முக ஆளுமையை விருத்தி செய்யும் நோக்குடனும் பசுமை அறிவொளி என்னும் நிகழ்ச்சித் திட்டமொன்றைக் கிராமங்கள் தோறும் முன்னெடுத்து வருகின்றது. இதன் தொடர்ச்சியாகவே , கல்லாரை வளர்மதி சனசமூக முன்றலில் இந்நிகழ்ச்சி நடைபெற்றுள்ளது .

வளர்மதி சனசமூகத்தின் தலைவர் இ .மிதுஷன் தலைமையில் நடைபெற்ற பசுமை அறிவொளி நிகழ்ச்சியில் தமிழ்த் தேசியப் பசுமை இயக்கத்தின் தலைவர் பொ.ஐங்கரநேசன் கலந்துகொண்டு உரையாற்றியிருந்தார். இவர்களுடன் வளர்மதி சனசமூக நிலையத்தின் உப தலைவர் ஐ . குணசீலன் , ஆலோசகர் சி.நாகதீபன் ஆகியோரும் கலந்து கொண்டிருந்தார்கள். கல்லாரைக் கிராமத்தைச் சேர்ந்த மாணவர்களும் பெற்றோர்களும் பங்கு கொண்டிருந்த இந்நிகழ்ச்சியில் மாணவர்கள் அனைவருக்கும் அவர்களின் கற்றல் தேவைகளின் பொருட்டுப் பசுமை அப்பியாசக் கொப்பிகள் வழங்கிவைக்கப்பட்டுள்ளன.

இதற்கான நிதி அனுசரணையை கனடா ரொறன்றோவின் மனித நேயக் குரல் அமைப்பு வழங்கியிருந்தமை குறிப்பிடத்தக்கது.

மாணவர்களிடையே அதிகரிக்கும் போதைப்பழக்கம்

தடுப்பதில் பெற்றோருக்கே பெரும்பொறுப்பு

பொ. ஐங்கரநேசன் சுட்டிக்காட்டு

பாடசாலைகளில் படையினர் போதைப்பொருள் சோதனைகளை மேற்கொள்ளும் அளவுக்கு மாணவர்களிடையே என்றுமில்லாதவாறு போதைப்பொருட்களின் பாவனை அதிகரித்திருக்கிறது. போதைப்பொருள் பாவனையாளர்களை புனர்வாழ்வு முகாம்களுக்கு அனுப்புகின்ற இராணுவப்பாணி நடவடிக்கைகளையே அரசாங்கம் மேற்கொண்டுள்ளது. இதன் மூலம் மாணவர்கள் போதைப்பொருள் பழக்கத்திற்கு ஆளாகுவதைத் தடுக்கமுடியாது. மாணவர்களிடையே போதைப்பழக்கம் ஏற்படுவதைத் தடுப்பதில் படைத்தரப்புஇ ஆசிரியர்கள் எல்லோரையும் விடப் பெற்றோருக்கே பெரும் பொறுப்பு உண்டு என்று தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

தமிழ்த் தேசியப் பசுமை இயக்கத்தின் பசுமை அறிவொளி நிகழ்ச்சி கடந்த சனிக்கிழமை (27.01.2024) நாவற்குழியில் இடம் பெற்றது. மாணவர்களும் பெற்றோர்களும் கலந்துகொண்ட இந்நிகழ்ச்சிக்குத் தலைமை வகித்து உரையாற்றியபோதே பொ. ஐங்கரநேசன் இவ்வாறு சுட்டிக்காட்டியுள்ளார்.

அங்கு அவர் தொடர்ந்து உரையாற்றுகையில்,

இலங்கை அரசாங்கம் இப்போது மேற்கொண்டுள்ள போதைப்பொருளுக்கு எதிரான யுக்திய நடவடிக்கையால் போதைப்பாவனையை நாட்டிலிருந்து முற்றாக ஒழித்துவிடமுடியாது. பெரும் வலைப் பின்னலாக இயங்கிக்கொண்டிருக்கும் போதை வியாபாரத்தில் சிக்கிவருவது கடத்தல்காரர்களும் சில்லறை வியாபாரிகளும் போதைப்பொருள் பாவனையாளர்களும் மாத்திரம்தாம். இதில் ஈடுபட்டுள்ள பெரும் முதலாளிகள் அரசஉயர்மட்டங்களின் ஆசீர்வாதத்தோடு பாதுகாப்பாகத்தான் உள்ளார்கள் உறங்கு நிலையில் இருக்கும் இவர்கள் விரைவிலேயே மீள எழுவார்கள்.

கஞ்சாவும் கெரோயினும் மாத்திரம்தான் போதைப்பொருள் அல்ல. கைவிடமுடியாத எல்லாப் பழக்கங்களுமே போதைதான். கைவிடமுடியாத அளவுக்கு புகைப்பிடிப்பதும், மது அருந்துவதும நேரகாலம் பாராது தொலைக்காட்சித்தொடர்களில் மூழ்கிக்கிடைப்பதும், இரவில் படுக்கைக்குச் செல்லும் போதும் கைப்பேசிகளுடனேயே செல்வதும் போதைதான். பிள்ளைகள் தங்கள் ஆதர்சவழிகாட்டிகளாக முதலில் பெற்றோர்களையே ஏற்றுக்கொள்கிறார்கள். போதைப்பழக்கங்களுக்கு ஆளாகியுள்ள பெற்றோர்களால் ஒருபோதும் தங்கள் பிள்ளைகளுக்கு வழிகாட்ட இயலாது. பிள்ளைகள் தவறிழைக்கும்போது தட்டிக்கேட்கவும் முடியாது.

பெற்றோர்கள் பாடசாலைகளுக்கும் தனியார் கல்வி நிறுவனங்களுக்கும் பிள்ளைகளை அனுப்பிவைப்பதுடன் தங்கள் கடமைகள் முடிந்துவிட்டதாக நினைக்கிறார்கள். முழுநாட்டையுமே போதைப்பொருட் பாவனை ஒரு புற்றுநோயாகப் பீடித்துவரும் நிலையில் எமது பிள்ளைகள் பெற்றோர்களால் கண்டிப்பாகக் கண்காணிக்கப்படவேண்டும். அவர்களுடைய நண்பர்கள் தொடர்பாகப் பெற்றோர்கள் அறிந்திருக்க வேண்டும். போதைப்பொருட் பாவனை ஒருவழிப்பாதை போன்றது. இதில் ஒருதடவை பிரவேசித்தால் மாணவர்களால் திரும்பிவர முடியாது என்பதைப் பெற்றோர்கள் கவனத்தில் கொள்ளவேண்டும் என்றும் தெரிவித்தார்.

நாவற்குழியில் பசுமை இயக்கத்தின்

பசுமை அறிவொளி நிகழ்ச்சி

தமிழ்த் தேசியப் பசுமை இயக்கத்தின் பசுமை அறிவொளி நிகழ்ச்சி நாவற்குழியில் நேற்று சனிக்கிழமை (27.01.2024) இடம் பெற்றுள்ளது. தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் நாவற்குழி முத்தமிழ் சனசமூக நிலைய முன்றலில் நடைபெற்ற இந் நிகழ்ச்சியில் கனடா இலங்கை முன்னாள் வர்த்தகர்கள் சங்கத்தின் பிரதிநிதிகள் ந. கேதீஸ்வரசிவம், செ. கிருஸ்ணகோபால், கு. கல்யாணசுந்தரன் ஆகியோர் சிறப்பு விருந்தினர்களாகக் கலந்து கொண்டிருந்தார்கள்.

தமிழ்த் தேசியப் பசுமை இயக்கம் மாணவர்களுக்குச் சூழல் அறிவைப் புகட்டி, அவர்களிடையே சூழல் பற்றிய விழிப்புணர்வை ஏற்படுத்துவதன் ஊடாக, அவர்களைச் சூழல் பாதுகாப்பில் பங்கேற்பாளர்களாக்கும் நோக்குடன் பசுமை அறிவொளி நிகழ்ச்சித் திட்டத்தைக் கிராமங்கள் தோறும் முன்னெடுத்து வருகிறது. இதன் தொடராகவே நாவற்குழியில் இந்நிகழ்ச்சி இடம் பெற்றுள்ளது. இந்நிகழ்ச்சியில் அதிக எண்ணிக்கையான மாணவர்களும் பெற்றோர்களும் கலந்து கொண்டிருந்தார்கள். பங்குபற்றிய மாணவர்கள் அனைவருக்கும் கனடா ரொறன்ரோவின் மனிதநேயக்குரல் அமைப்பின் அனுசரணையுடன் சூழல் விழிப்புணர்வு அப்பியாசக் கொப்பிகள் வழங்கப்பட்டமையும் குறிப்பிடத்தக்கது.

தமிழ்த் தேசியப் பசுமை இயக்கத்தின் இராசபோசனம்

சிறுப்பிட்டியில் நிகழ்ந்த

சிறுதானியப் பொங்கல் விழா

தமிழ்த் தேசியப் பசுமை இயக்கத்தின் தைப்பொங்கல் விழா சிறுதானியப் பொங்கல் விழாவாகச் சிறுப்பிட்டியில் இடம் பெற்றுள்ளது. சிறுப்பிட்டி ஜனசக்தி சனசமூகநிலைய முன்றலில் நேற்று ஞாயிற்றுக்கிழமை (21.01.2024) மாலை இராசபோசனம் என்னும் கருப்பொருளில் இப்பொங்கல்விழா கோலாகலமாக நிகழ்ந்துள்ளது. தமிழ்த் தேசியப் பசுமை இயக்கத்தின் தலைவர் பொ. ஐங்கரநேசனின் தலைமையில் நடைபெற்ற இவ்விழாவில் யாழ்ப்பாணப் பல்கலைக்கழகத்தின் இந்துக் கற்கைகள் பீடத்தின் பேராசிரியர் கலாநிதி விக்னேஸ்வரி பவநேசன் பிரதமவிருந்தினராகவும், யாழ். மாவட்ட பனை, தென்னைவள அபிவிருத்திக் கூட்டுறவுச் சங்கங்களின் சமாசத்தின் பொதுமுகாமையாளர் பொ. செல்வராசா சிறப்புவிருந்தினராகவும் கலந்து கொண்டிருந்தார்கள்.

தமிழ்த் தேசியப் பசுமை இயக்கம் பாரம்பரிய உணவான சிறுதானியங்களின் உற்பத்தியை ஊக்குவிக்கும் நோக்கில் இராசதானியம் என்ற திட்டத்தை முன்னெடுத்து வருகிறது. இத்திட்டத்தில் விவசாயிகளுக்குச் சிறுதானிய விதைகளை இலவசமாக வழங்கி அறுவடையின் பின்னர் அவர்களிடமிருந்து வழங்கிய விதைகளின் இரட்டிப்பு மடங்கு விதைகளை மீளப்பெற்று வேறு விவசாயிகளுக்கு வழங்குகின்றது. இதன் ஒரு படியாகவே அருகிப்போய்விட்ட சிறுதானிய உணவுப்பண்பாட்டை மீளுருவாக்கும் நோக்கில் தைப்பொங்கலைக் கிராமங்களில் சிறுதானியப் பொங்கல் விழாவாகக் கொண்டாடி வருகிறது. இந்த ஆண்டு சிறுப்பிட்டி மேற்கில் ஜனசக்தி சனசமூக நிலையத்தினருடன் இணைந்து கொண்டாடியுள்ளது.

ஏராளமானோர் கலந்துகொண்ட சிறுதானியப் பொங்கல் விழாவில் உறியடி, வழுக்குமரம் ஏறுதல் ஆகிய பாரம்பரிய விளையாட்டுக்களோடு கலை நிகழ்ச்சிகளும் இடம் பெற்றிருந்தன. பங்கேற்ற அனைவருக்கும் வரகரிசிப் பொங்கலும், குரக்கன் கூழும் பரிமாறப்பட்டமையும் குறிப்பிடத்தக்கது.

தமிழ்த் தேசியப் பசுமை இயக்கத்தால்

உலருணவுப் பொதிகள் விநியோகம்

தமிழ்த்தேசியப் பசுமை இயக்கம் பொருளாதார ரீதியாக மிகவும் நலிவுற்றுள்ள குடும்பங்களுக்கு உலருணவுப் பொதிகளை வழங்கும் 'அற்றார் அழிபசி தீர்த்தல்' என்ற திட்டத்தைச் செயற்படுத்தி வருகிறது. 'பகிர்ந்துண்டு வாழ்வோம்' என்ற கருப்பொருளில் முன்னெடுக்கப்பட்டுவரும் இத்திட்டம் நேற்று புதன்கிழமை (17.01.2024) சண்டிலிப்பாய், சங்கானை மற்றும் உரும்பிராயில் இடம்பெற்றுள்ளது. பசுமை இயக்கத்தின் தலைவர் பொ.ஐங்கரநேசன் தலைமையில் நடைபெற்ற இந்நிகழ்ச்சியில் இப்பகுதிகளில் இருந்து தெரிவுசெய்யப்பட்ட நூறு குடும்பங்களுக்கு அத்தியாவசிய உலருணவுகள் அடங்கிய பொதிகள் விநியோகிக்கப்பட்டுள்ளன. இதற்கான நிதி அனுசரணையை அமரர் பொ.குமாரசாமி நினைவாக அவரது குடும்பத்தினர் வழங்கி வைத்துள்ளனர்.

கொரோனாப் பெருந்தொற்றுக் காலத்தில் ஏற்பட்ட தொழில்வாய்ப்பு இழப்புகளைத் தொடர்ந்து நாட்டில் தற்போது ஏற்பட்டுள்ள பொருளாதாரப் பிரச்சினைகள் காரணமாக வறுமைக்கோட்டுக்குக் கீழே வாழுகின்ற மக்கள் மிகவும் மோசமாகப் பாதிக்கப்பட்டுள்ளனர். இதனைக் கருத்திற்கொண்டு தமிழ்த்தேசியப் பசுமை இயக்கம் கொரோனாப் பேரிடரின்போது ஆரம்பித்த 'அற்றார் அழிபசி தீர்த்தல்' திட்டத்தைக் கைவிடாது தொடர்ந்து முன்னெடுத்து வருகின்றமை குறிப்பிடத்தக்கது.

மட்டு . மாவட்ட மேய்ச்சல் நில அபகரிப்புக்கு எதிராக

யாழ். நல்லூரில் கவனயீர்ப்புப் போராட்டம்

மட்டக்களப்பு மாவட்டம் மயிலத்தமடு, மாதவனை, ஈரணைக்குளம் கிராமங்களில் மேற்கொள்ளப்படும் மேய்ச்சல்நில அபகரிப்புகளுக்கும் கால்நடை வதைகளுக்கும் எதிராக யாழ்ப்பாணம் நல்லை ஆதீனத்துக்கு அருகில் கவனயீர்ப்புப் போராட்டம் நடைபெற்றது. பட்டிப்பொங்கல் தினத்தன்று (செவ்வாய் 16.01.2024) தமிழர் ஒருங்கிணைந்த கூட்டமைப்பின் அழைப்பில் இடம்பெற்ற இப்போராட்டத்தில் தமிழ்த் தேசியப் பசுமை இயக்கமும் கலந்து கொண்டது.

மயிலத்தமடு, மாதவனை, ஈரணைக்குளம் பகுதிகளிலுள்ள மேய்ச்சல் நிலம் தமிழர்கள் தொன்றுதொட்டுப் பயன்படுத்திவரும் மேய்ச்சல் தரை ஆகும். இப்பகுதிகளில் 800க்கு மேற்பட்ட அத்துமீறிய பயிர்ச்செய்கையாளர்கள் ஆளுக்கு 30 ஏக்கருக்குமேல் அபகரித்துப் பயிர்ச் செய்கையில் ஈடுபட்டுவருகின்றனர். பாரம்பரிய பண்ணையாளர்களை அங்கிருந்து அகற்றும் உள்நோக்குடன் மேய்ச்சலுக்குச் செல்லும் அவர்களது பசுக்களையும், எருமைகளையும் சுட்டுக் கொலை செய்வதோடு, வாய்களில் வெங்காய வெடிவைத்தும், வாளால் வெட்டியும் பாரிய காயங்களையும் விளைவித்தும் வருகின்றனர். கடந்த மூன்று மாதங்களில் 35 பசுக்களையும், எருமைகளையும் சுட்டுக் கொலை செய்துள்ளனர். வெட்டியும், வாயில் வெங்காய வெடிவைத்தும் 191 கால்நடைகளைப் படுகாயங்களுக்கு உள்ளாக்கியுள்ளனர்.

நீதிமன்றம் அத்துமீறிய பயிர்ச் செய்கையாளர்களை மேய்ச்சல் நிலங்களை விட்டு வெளியேறுமாறு உத்தரவிட்டுள்ளபோதும் காவல்துறையின் பாதுகாப்புடன் அத்துமீறிய பயிர்ச் செய்கையாளர்கள் தொடர்ந்தும் அடாவடியில் ஈடுபட்டுவருகின்றனர். இதனைக் கண்டித்து மயிலத்தமடு மக்கள் பட்டிப் பொங்கலைக் கறுப்புப் பட்டிப் பொங்கலாகக் கடைப்பிடித்துள்ளனர். இவர்களுக்குத் தார்மீக ஆதரவை வழங்கும் பொருட்டு யாழ் மாவட்டத்தில் நல்லை ஆதீனத்துக்கு அருகாமையில் பட்டிப்பொங்கல் தினத்தன்று கவனயீர்ப்புப் போராட்டம் நடைபெற்றது.

தமிழ்த் தேசியப் பசுமை இயக்கத்தால்

மண்பானைப் பொங்கல் பொதிகள் வழங்கிவைப்பு

தமிழ்த் தேசியப் பசுமை இயக்கம் தைப்பொங்கலை முன்னிட்டு நாவாந்துறையைச் சேர்ந்த எழுபது குடும்பங்களுக்குப் பொங்கல் பொதிகளை வழங்கி வைத்துள்ளது. தமிழ்த் தேசிய பசுமை இயக்கத்தின் தலைமை அலுவலகத்தில் அதன் தலைவர் பொ. ஐங்கரநேசன் தலைமையில் நேற்று வெள்ளிக்கிழமை [12-01-2024] இப்பொதிகள் வழங்கும் நிகழ்ச்சி இடம்பெற்றுள்ளது.

தமிழ்த் தேசியப் பசுமை இயக்கம் பொருளாதார ரீதியாக மிகவும் பின்தங்கிய குடும்பங்களுக்கு அனுசரணையோடு உலர் உணவுப் பொதிகளை வழங்கும் அற்றார் அழி பசி தீர்த்தல் என்ற திட்டத்தை முன்னெடுத்து வருகின்றது. பகிர்ந்துண்டு வாழ்வோம் என்ற கருப்பொருளுடன் கொரோனாப் பெருந்தொற்று ஏற்பட்ட காலத்தில் இருந்து இடம்பெற்றுவரும் இத்திட்டத்தின் தொடர்ச்சியாகவே பொங்கல் பொதிகள் வழங்கப்பட்டுள்ளன. தைப்பொங்கல் இயற்கையைப் போற்றுகின்ற தமிழ்ப் பண்பாட்டுப் பெரு விழா என்பதையும், அலுமினியப் பானைகளில் சமைப்பதால் ஏற்படக்கூடிய பாதகங்களையும் கருத்திற் கொண்டு அனைவருக்கும் மண்பானைகளுடன் பொங்கற் பொருட்கள் வழங்கப்பட்டமை குறிப்பிடத்தக்கது. இதற்கான நிதி அனுசரணையை கனடாவில் உள்ள இலங்கை முன்னாள் வர்த்தகர்கள் சங்கத்தின் சார்பில் ந.கேதீஸ்வரசிவம், பி. எஸ். சுதாகரன் ஆகியோர் வழங்கியிருந்தார்கள்.

பங்கமில்லா வாழ்வுபெறப் பொங்கலை

மண்பானையில் கொண்டாடுவோம்

பொ.ஐங்கரநேசன் அழைப்பு

தமிழ் மக்களின் தேசியத் திருநாட்களில் ஒன்றாகக் கொண்டாடப்படும் தைப்பொங்கல் இயற்கையைப் போற்றுகின்ற ஒரு பண்பாட்டுப் பெருவிழாவாகும். தொன்றுதொட்டு இவ்விழாவில் இயற்கைக்கு இசைவான மண்பானைகளிலேயே பொங்கல் இடம்பெற்று வந்துள்ளது. ஆனால், மண்பானைகளின் இடத்தை இப்போது அலுமினியப் பானைகள் ஆக்கிரமித்து வருகின்றன. அலுமினியப் பானைகள் இயற்கையைப் போற்றுகின்ற ஒரு விழாவுக்குப் பொருத்தமற்றது என்பதோடு, உடல் நலத்துக்குக் கேடானதாகவும் உள்ளன. தமிழர் பண்பாடும் உடல் நலமும் பங்கமில்லாத வாழ்வுபெறப் பொங்கலை மண்பானையில் கொண்டாடுவோம் என்று தமிழ்த் தேசியப் பசுமை இயக்கத்தின் தலைவர் பொ.ஐங்கரநேசன் அழைப்பு விடுத்துள்ளார்.

தைப்பொங்கலில் மண்பானைகளின் முக்கியத்துவம்பற்றி பொ.ஐங்கரநேசன் வெளியிட்டுள்ள ஊடக அறிக்கையிலேயே இவ்வாறு அழைப்பை விடுத்துள்ளார்.

அந்த அறிக்கையில் அவர் மேலும் தெரிவிக்கையில்,

அலுமினியம் மிகவும் இலேசானது. உலோகம் ஆகையால் இலகுவில் வெப்பத்தைக் கடத்த வல்லது. இதனால், சமையலை விரைந்து முடிக்க வல்லது. நெளிந்து வளைந்தாலும் உடைந்துவிடாது, ஒப்பீட்டளவில் விலை மலிவானது. இவை போன்ற காரணங்களால் சமையல் அறைகளில் பிரதான பாத்திரங்களாக அலுமினியப் பாத்திரங்கள் இடம்பெற்றுள்ளன. அலுமினியப் பாத்திரங்களில் உணவு சமைக்கும்போது அலுமினியம் உணவுடன் சேர்வதைத் தவிர்க்கும் பொருட்டுப் பாத்திரத்தின் உட்பகுதியில் அலுமினியம் ஒட்சைட்டுப் படலம் இடப்படுகிறது.

அலுமினியப் பாத்திரங்களைத் தேய்த்துச் சுத்தம் செய்யும்போது பாதுகாப்புப்படலம் தேய்வடைந்து உணவுப் பாதுகாப்பு கேள்விக்குறியாகி விடுகிறது. மேலும், சமைக்கப்படும் உணவுப் பொருளின் அமிலகார இயல்பு, சேர்க்கப்படும் உப்பு சமையல் வெப்பநிலை ஆகியனவற்றைப் பொறுத்து அலுமினியம் கரைந்து உணவுடன் கலப்பதும் அவதானிக்கப்பட்டுள்ளது. உடலுடன் சேரும் அலுமினியம் மூளை நரம்புகளைப் பாதிப்பதுடன் ஏற்கனவே சிறுநீரக நோயுடையவர்களின் சிறுநீரகங்களை மேலும் பாதிப்படையவும் செய்கிறது என மருத்துவ ஆய்வுகள் தெரிவித்துள்ளன.

மட்பாத்திரங்கள் அவற்றின் மேற்பரப்பில் இயற்கையாகவே உள்ள நுண்துளைகள் ஊடாக வெப்பத்தைப் பரவி உணவைச் சீராக வேகவைக்கிறது. மெதுவாகவே சூடுபடுத்துவதால் உணவில் போசணைப்பொருட்களின் அழிவு தவிர்க்கப்படுகிறது. மண் கார இயல்பு கொண்டதால் உணவில் அமிலத் தன்மையை சமன் செய்கிறது. சமைக்கும்போது மண்ணிலிருந்து கனியுப்புகள் உணவிற்கு விடுவிக்கப்படுவதால் உணவு கூடுதல் போசணைப்பெறுமானம் பெறுகிறது. மேலும் உணவின் வாசனையுடன் மண்ணின் வாசனையும் சேர்ந்து உணவுக்குக் கூடுதல் சுவையையும் தருகிறது.

எதனையுமே அவசரகதியில் செய்துவிடத் துடிக்கும் நாம் உடல் ஆரோக்கியத்தைப் பேண வேண்டிய சமையலையும் அவ்வாறே விரைந்து முடிக்கத் தலைப்பட்டு உலோகப் பாத்திரங்களை நாடியுள்ளோம். இதன் விளைவாக நோயின் வாய்ப்பட்டும் வருகிறோம். மட்பாண்டங்களுக்கு முழுமையாகத் திரும்புதல் இயலாததாக இருக்கலாம். எனினும் தமிழ் மக்களின் இயற்கையைப் போற்றும் தைப்பொங்கல் திருநாளிலாவது மண்பானைகளில் பொங்கல் இடுவோம். இது நலிவடைந்துள்ள மட்பாண்டக் கைவினைஞர்களது வாழ்வு வளம்பெறவும் உதவும் என்றும் தெரிவித்துள்ளார்.

ஜனாதிபதித் தேர்தலில் பொது வேட்பாளர் மூலம்

தமிழர்கள் தமது நிலைப்பாட்டை வெளிப்படுத்த முடியும்

அரசியல் ஆய்வாளர் நிலாந்தன் தெரிவிப்பு

ஜனாதிபதித் தேர்தல் புதிய ஆண்டில் நடைபெறுவதற்கான வாய்ப்பு அதிகளவில் உள்ளது. இதில் தமிழர் தரப்பு எவ்வாறு நடந்துகொள்ள வேண்டும் என்பது பற்றி வெவ்வேறு கருத்துகள் முன்வைக்கப்படுகின்றன. தென்னிலங்கை ஜனாதிபதி வேட்பாளர்களுடன் இனப்பிரச்சினைக்கான தீர்வுப் பற்றிப்பேசி அதில் இணக்கம் காண்பவரை ஆதரிப்பது, தமிழ்த் தரப்பில் ஒரு பொது வேட்பாளரை நிறுத்துவது, தமிழ் மக்கள் தேர்தலைப் பகிஸ்கரிப்பது என்று மூன்று விதமான அபிப்பிராயங்கள் உள்ளன. இதில் பொது வேட்பாளர் ஒருவரை நிறுவத்துவதன் மூலம் தமிழர்கள் உள்நாட்டுக்கும் சர்வதேசத்துக்கும் தமது அரசியல் நிலைப்பாட்டைத் தெளிவாக வெளிப்படுத்த முடியும் என்று அரசியல் ஆய்வாளர் நிலாந்தன் தெரிவித்துள்ளார்.

தமிழ்த்தேசியப் பசுமை இயக்கத்தின் சமகால அரசியல் உரையரங்கு அதன் தலைவர் பொ. ஐங்கரநேசன் தலைமையில் ஞாயிற்றுக்கிழமை (31.12.2023) கோண்டாவிலில் நடைபெற்றது. இவ்வுரையரங்கில் கலந்துகொண்டு உரையாற்றியபோதே நிலாந்தன் இவ்வாறு தெரிவித்துள்ளார்.

அங்கு அவர் தொடர்ந்து உரையாற்றுகையில்,

தமிழ்த் தரப்பு பெரும்பான்மை இனத்தைச் சேர்ந்த வேட்பாளர்களுடன் பேசினாலும் எவரும் வெளிப்படையாகத் தமது வாக்குறுதிகளைத் தரப்போவதில்லை. தமிழர் தரப்புக்கு ஆதரவாகக் காட்டிச் சிங்கள மக்களின் வாக்குகளை இழப்பதற்கு அவர்கள் ஒருபோதும் சம்மதிக்க மாட்டார்கள். வெளிப்படையாகத் தராத எந்தவொரு உத்தரவாதமும் தேர்தலின் பின்னர் கண்டுகொள்ளப்படாது என்பதே கடந்த கால வரலாறு. சரத் பொன்சேகாவைத் தமிழர்கள் ஆதரித்ததன் மூலம் மஹிந்த ராஜபக்சவையே இறுதியில் வெல்ல வைக்க முடிந்தது என்பதை நினைவிற்கொள்ள வேண்டும்.

ஒப்பீட்டளவில் தமிழ்த் தரப்பின் முன்னால் உள்ள தெரிவு பொது வேட்பாளர்தான். இதில் ஒருபோதும் தமிழ் வேட்பாளர் வெற்றிபெறப் போவதில்லை. ஆனால், தாம் விரும்பம் அரசியல் தீர்வை வெளிப்படையாக முன்வைத்துத் திரளான தமிழ் வாக்குகளைப் பெறுவதன் மூலம் தமது அபிலாசையை வெளிப்படுத்த முடியும். இது சமஸ்டியாகவும் இருக்கலாம் தனி நாடாகவும் இருக்கலாம். ஒருவகையில் இதனைத் தமிழ் மக்களிடையே நடாத்தப்படும் பொது வாக்கெடுப்பாகக்கூடக் கருதலாம். ஆனால், இதன் வெற்றி என்பது ஒட்டுமொத்தத் தமிழ் மக்களினதும் வாக்குகளைக் திரட்டக்கூடிய ஒரு பொது வேட்பாளரைத் தெரிவு செய்வதிலேயே தங்கியுள்ளது என்றும் தெரிவித்துள்ளார்.

பசுமை இயக்கத்தின்

சமகால அரசியல் அரங்கு

கோண்டாவிலில் இடம்பெற்றது

தமிழ்த்தேசியப் பசுமை இயக்கத்தின் சமகால அரசியல் அரங்கு நேற்று ஞாயிற்றுக்கிழமை (31.12.2023) கோண்டாவில் வேதபாராயண சனசமூக நிலைய மண்டபத்தில் நடைபெற்றது. பசுமை இயக்கத்தின் தலைவர் பொ. ஐங்கரநேசன் தலைமையில் நடைபெற்ற இவ்வுரையரங்கு தமிழ் அரசியல் நோக்கில் என்பதைத் தொனிப்பொருளாகக்கொண்டு இடம்பெற்றுள்ளது. உத்தேச கடற்சட்டத்திருத்த வரைவு என்னும் தலைப்பில் சமூகச் செயற்பாட்டாளர் இரேனியஸ் செல்வின், புத்தாண்டை எதிர்கொள்ளல் என்னும் தலைப்பில் அரசியல் ஆய்வாளர் நிலாந்தன் மற்றும் இமாலயப் பிரகடனம் எனனும் தலைப்பில் யாழ்ப்பாணப் பல்கலைக்கழகத்தின் அரசறிவியல் துறைத்தலைவர் பேராசிரியர் கே.ரி.கணேசலிங்கம் ஆகியோர் தமிழ் அரசியல் நோக்கு நிலையில் இருந்து உரையாற்றியிருந்தனர்.

தமிழ்த்தேசியப் பசுமை இயக்கம் இலங்கை மற்றும் சர்வதேச அளவில் அரசியலில் முக்கியத்துவம் பெறும் விடயங்கள் பற்றி பொதுமக்களுக்கு விழிப்புணர்வை ஏற்படுத்தும் விதமாகச் சமகால அரசியல் உரையரங்கு என்னும் நிகழ்ச்சியைத் தொடர்ச்சியாக முன்னெடுத்து வருகின்றமை குறிப்பிடத்தக்கது.

சூறையாடப்படும் கடலைப் பாதுகாக்கவேண்டிய பெரும் பொறுப்பு

நெய்தல் நில மக்களிடமே உள்ளது

கடற்கோள் நினைவு நாளில் பொ.ஐங்கரநேசன் சுட்டிக்காட்டு

கடல் வாழ்க்கை நில வாழ்க்கையைவிடச் சவால்கள் நிறைந்தது. கடலில் போனால் திரும்பி வருவோமா என்று தெரியாத நிச்சயமற்ற வாழ்க்கை மரணபயத்தை அறவே இல்லாததாக்கியது. சூறைக் காற்றுக்கும் கொந்தளிக்கும் அலைகளுக்கும் எதிராக மேற்கொள்ளும் பயணம் பெரும் பயிற்சியாக அமைந்து உடலையும் மனதையும் வலுவாக்கியது. நிச்சயமற்ற வருவாய் பொருள் இழப்புக் குறித்த கவலையை இல்லாமல் ஒழித்தது. இக்கடல்சார் பாரம்பரிய குணவியல்புகளுடன் இலட்சிய உறுதியும் சேர்ந்து தலைவர் பிரபாகரனுக்குப் பேராண்மையைப் பெற்றுத் தந்தது. அவரால் கடலையும் நிலத்தையும் குறிப்பிட்ட காலம் வரையிலேனும் கட்டிக்காக்க முடிந்தது. இன்று அவர் இல்லாத நிலையில் சூறையாடப்படும் கடலைப் பாதுகாக்கவேண்டிய பெரும் பொறுப்பு நெய்தல் நில மக்களிடமே உள்ளது என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

தமிழ்த்தேசியப் பசுமை இயக்கத்தின் கடற்கோள் நினைவுநாள் நிகழ்ச்சி செவ்வாய்க்கிழமை (26.12.2023) மாதகல் விநாயகர் இறங்குதுறையில் நடைபெற்றது. இதில் கலந்துகொண்டு உரையாற்றியபோதே பொ. ஐங்கரநேசன் இவ்வாறு சுட்டிக்காட்டியுள்ளார்.

அங்கு அவர் தொடர்ந்து உரையாற்றுகையில்,

பூமியின் வெப்பநிலை மிக உயர்வாக இருந்த ஆண்டாக நடப்பு 2023 ஆம் ஆண்டு பதிவாகி உள்ளது. வரவிருக்கும் 2024 ஆம் ஆண்டில் பூமியின் வெப்பநிலை கைத்தொழில்புரட்சி ஆரம்பமானபோது இருந்ததைவிட 1.5 பாகை செல்சியஸ் அளவில் உயரும் என்று விஞ்ஞானிகளால் எதிர்வுகூறப்பட்டுள்ளது. இது பூமியின் காலநிலையில் கடுமையான மாற்றங்களை ஏற்படுத்தும் என்று அஞ்சப்படுகிறது. பூமி சூடாகுவதால் காலநிலையில் ஏற்பட்டுவரும் மாற்றங்களால் நாம் ஏற்கனவே ஒருபுறம் கடும் மழையும் வெள்ளப்பெருக்கும், இன்னொருபுறம் கடும் வரட்சி, பனிமலைகளின் உருகுதல், கடல்மட்ட உயர்வு, பயிர் உற்பத்தி பாதிப்பு, உயிரினங்களின் அழிவு என்று பல பாதகங்களை அனுபவிக்க ஆரம்பித்துவிட்டோம்.

பூமியின் காலநிலையில் நிலத்தைவிட கடல் ஆற்றுகின்ற பங்களிப்புப் பெரியது. பூமியின் மீது சூரியனில் இருந்து வீழுகின்ற வெப்பத்தின் பெரும் பகுதியைக் கடல்தான் உறிஞ்சிவைத்திருக்கிறது. உறிஞ்சிய வெப்பத்தைச் சமுத்திர நீரோட்டங்களின் மூலம் பூமி முழுவதும் சமனாகப் பரவச்செய்கிறது. பூமியைச் சூடுபடுத்தும் கரியமில வாயுவைத் தன்னுள் ஈர்த்துக் கரைத்துவைத்திருக்கும் மிகப்பெரும் காபன் தொட்டியாகச் செயலாற்றுகிறது. கடல்தான் பூமியின் சூட்டைத் தணிவிக்கும் மழை பொழிவதற்குக் காரணமாகவும் உள்ளது. ஆனால், கடலின் இருப்பும் உயிர்ப்பும் தான் எமது இருப்பும் உயிர்ப்பும் என்று தெரியாத நாம் கடலை மெல்ல மெல்லச் சாகடித்துக் கொண்டிருக்கிறோம்.

எமது பொருத்தமற்ற மீன்பிடி முறைகளாலும் அளவுக்கு அதிகமான மீன்பிடியாலும், கடலட்டை வளர்ப்புப் போன்ற ஒற்றையினப் பண்ணைகளாலும் கடலில் மீன் இனங்கள் அழிந்து வருகின்றன. இன்று கடலில் மீன்களை விடப் பிளாஸ்ரிக் துகள்களே அதிகமாகக் காணப்படுகின்றன. கடலில் அதிக அளவில் பிளாஸ்ரிக்கைத் தள்ளிக் கொண்டிருக்கின்ற நாடுகளின் பட்டியலில் இலங்கை 14ஆவது இடத்தில் உள்ளது. கடலை எமது கழிவுகளைக் குவிக்கின்ற ஒரு குப்பைத் தொட்டியாகவே நாம் பாவித்துக்கொண்டிருக்கின்றோம். சூழல்மாசுபாட்டால் ஒட்சிசன் குறைவு ஏற்பட்டுப் பல இடங்களில் கடல் இறக்கத் தொடங்கியிருப்பதாகக் கடலியல் ஆய்வாளர்கள் கண்டறிந்துள்ளார்கள்.

கடல்தான் காலநிலைமாற்றப் பாதகங்களைத் தடுக்கும் கேடயம் என்பதை உணர்ந்து கடற்சூழற் பாதுகாப்புக்கு முன்னுரிமை கொடுக்கவேண்டும். கடலைப் பாதுகாக்க வேண்டிய கடப்பாடு அனைத்து மக்களுக்கும் உண்டு. ஆனாலும் கடலின் பங்காளிகளான, கடலையே வாழ்வாதாரமாகக் கொண்ட கடற்றொழிலாளர்களுக்கு இந்தக் கடப்பாடு அதிகமாகவே இருக்கிறது. அதற்கான பட்டறிவும், பராக்கிரமும் இவர்களிடம்தான் அதிகளவில் இருக்கிறது. கடற்சூழலைப் பாதுகாக்கும் நடவடிக்கைகளை அவசரப் பணியாக விரைந்து மேற்கொள்வதே பூமியில் எமது இருப்புக்கான உத்தரவாதமாக அமையும். இதுவே, கடற்கோளில் பலியான எம் உறவுகளுக்கு நாம் செலுத்துகின்ற உண்மையான அஞ்சலியாகவும் இருக்கும் என்றும் தெரிவித்துள்ளார்.

பசுமை இயக்கத்தின்

கடற்கோள் நினைவுநாள் நிகழ்ச்சி

மாதகல் கடற்கரையில்

உணர்வுபூர்வமாக இடம்பெற்றது

தமிழ்த்தேசியப் பசுமை இயக்கத்தின் கடற்கோள் நினைவுநாள் நிகழ்ச்சி நேற்று செவ்வாய்க்கிழமை (26.12.2023) மாதகல் கடற்கரையில் உணர்வுபூர்வமாக இடம்பெற்றுள்ளது. தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் இடம்பெற்ற இந்நிகழ்ச்சியில் பொதுச் செயலாளர் ம.கஜேந்திரன், பொருளாளர் க.கேதீஸ்வரநாதன், கலை-பண்பாட்டு பிரிவின் துணைச் செயலாளர் கை.சரவணன், வடமாகாண கடற்றொழிலாளர்கள் இணையத்தின் தலைவர் வி.சுப்பிரமணியம், எந்திரி ச.சர்வராஜா ஆகியோர் கலந்துகொண்டிருந்தனர். கடற்கோளில் பலியானவர்களுக்குக் கடலில் மலர் தூவி ஆரம்பமான இந்நிகழ்ச்சியில் ஏராளமான பொதுமக்களும் கலந்துகொண்டிருந்தார்கள்.

இந்தோனேசியா, சுமத்திரா தீவுக்கு அருகே கடலின் அடியில் 2004ஆம் ஆண்டு நொவம்பர் 26ஆம் திகதி நிகழ்ந்த பூகம்பத்தால் ஏற்பட்ட கடற்கோள் இந்து சமுத்திரக் கரையோர நாடுகளில் இரண்டே கால் இலட்சத்துக்கும் அதிகமானோர்களைப் பலியெடுத்தது. இலங்கையிலும் முப்பத்தையாயிரத்துக்கும் மேலானோர் பலியானார்கள். பலகோடி ரூபா சொத்து அழிவுகள் ஏற்பட்டது. இலங்கையின் வரலாற்றில் தீராத வலியை ஏற்படுத்திச் சென்ற இந்நாளை இலங்கை அரசாங்கம் தேசிய பாதுகாப்புத் தினமாகக் கொண்டாடி வருகிறது. வடக்கு மாகாண சபை இந்நாளை இயற்கைப் பேரிடர் தணிப்புத் தினமாகப் பிரகடனப்படுத்தியுள்ளது.

தமிழ்த்தேசியப் பசுமை இயக்கமும் ஆண்டுதோறும் கடற்கோள் நினைவுநாளை இயற்கைப் பேரிடர் தணிப்புத் தினமாகக் கடைப்பிடித்து வருகிறது. இதற்கு அமைவாக, மாதகல் விநாயகர் இறங்குதுறையில் நடைபெற்ற இந்நிகழ்ச்சியில் கடற்சூழலின் முக்கியத்துவம், அவற்றின் பாதுகாப்பு, இயற்கைப் பேரிடர்களைத் தணிவிக்கும் செயற்பாடுகள் தொடர்பான விழிப்புணர்வுரைகள் இடம்பெற்றதோடு, நிகழ்ச்சியின் இறுதியில் அனைவரும் மெழுகுதிரி ஏற்றி அஞ்சலி செலுத்தியிமிருந்தனர். பங்கேற்ற மாணவர்கள் அனைவருக்கும் பசுமை அறிவொளி நிகழ்ச்சித் திட்டத்தினூடாகக் கற்றல் உபகரணங்கள் வழங்கிவைக்கப்பட்டமையும் குறிப்பிடத்தக்கது.

கொக்குத் தொடுவாயில் பசுமை இயக்கத்தின்

பசுமை அறிவொளி நிகழ்ச்சித் திட்டம்

தமிழ்த்தேசியப் பசுமை இயக்கத்தின் பசுமை அறிவொளி நிகழ்ச்சி நேற்று சனிக்கிழமை (23.12.2023) முல்லைத்தீவு கொக்குத்தொடுவாய் மகா வித்தியாலயத்தில் இடம்பெற்றுள்ளது. மாணவர்களுக்குச் சூழல் அறிவைப்புகட்டி அவர்களுக்குச் சூழல் பற்றிய விழிப்புணர்வை ஏற்படுத்துவதன் மூலம் அவர்களைச் சூழல் பாதுகாப்பில் பங்குபற்றுநர்களாக்கும் நோக்குடனும், மாணவர்களின் பன்முக ஆளுமையை விருத்தி செய்யும் நோக்குடனும் தமிழ்த்தேசியப் பசுமை இயக்கம் பசுமை அறிவொளி என்னும் நிகழ்ச்சித் திட்டமொன்றை முன்னெடுத்து வருகிறது. இதன் தொடர்ச்சியாகவே கொக்குத்தொடுவாய் மகா வித்தியாலயத்தில் இந்நிகழ்ச்சி நடைபெற்றுள்ளது.

கொக்குத்தொடுவாய் மகா வித்தியாலயத்தின் அதிபர் க.நரேந்திரன் தலைமையில் நடைபெற்ற இந்நிகழ்ச்சியில் பிரதம விருந்தினராகக் கனடா - உதயன் பத்திரிகையின் பிரதம ஆசிரியரும், ரொறன்ரோவின் மனிதநேயக் குரல் அமைப்பின் தாபகத் தலைவருமான ஆர்.என்.லோகேந்திரலிங்கம் கலந்துகொண்டிருந்தார். தமிழ்த்தேசியப் பசுமை இயக்கத்தின் தலைவர் பொ.ஐங்கரநேசன், விவசாயப் போதனாசிரியர் த.துளசிராம் ஆகியோர் சிறப்புரைகளை ஆற்றியிருந்தார்கள்.

நூற்றுக்கணக்கான மாணவர்களும், பெற்றோர்களும் பங்கேற்றிருந்த இந்நிகழ்ச்சியில் மாணவர்கள் அனைவருக்கும் ரொறன்ரோவின் மனிதநேயக்குரல் அமைப்பால் சூழல் விழிப்புணர்வுக் குறிப்பேடுகள் வழங்கி வைக்கப்பட்டிருந்தமையும் குறிப்பிடத்தக்கது.

தமிழ்த்தேசியப் பசுமை இயக்கத்தால்

உலருணவுப் பொதிகள் வழங்கி வைப்பு

தமிழ்த்தேசியப் பசுமை இயக்கம் பொருளாதார ரீதியாக மிகவும் பின்தங்கிய குடும்பங்களுக்கு உலருணவுப் பொதிகளை வழங்கும் அற்றார் அழிபசி தீர்த்தல் என்ற திட்டத்தை முன்னெடுத்து வருகிறது. பகிர்ந்துண்டு வாழ்வோம் என்ற கருப்பொருளில் முன்னெடுக்கப்படும் இத்திட்டத்தின்கீழ் நேற்று சனிக்கிழமை (09.12.2023) கொட்டடி, இருபாலை ஆகிய பகுதிகளில் இருந்து தெரிவுசெய்யப்பட்ட 60 குடும்பங்களுக்கு அத்தியாவசிய உலருணவுகள் அடங்கிய பொதிகள் வழங்கி வைக்கப்பட்டுள்ளன.

உலருணவுப் பொதிகள் வழங்கும் நிகழ்ச்சி யாழ்ப்பாணத்தில் அமைந்துள்ள தனியார் கல்வி நிறுவனம் ஒன்றில் பசுமை இயக்கத்தின் தலைவர் பொ. ஐங்கரநேசன் தலைமையில் இடம்பெற்றது. இதற்கான நிதி அனுசரணையை அமரர் பொ.பரமேஸ்வரனின் பிறந்த தினத்தை முன்னிட்டு அவரது குடும்பத்தினர் வழங்கியிருந்தார்கள். இந்நிகழ்ச்சியில் திருமதி பராசக்தி பரமேஸ்வரன் கலந்துகொண்டு உலருணவுப் பொதிகளை வழங்கி வைத்துள்ளார்.

கொரோனாப் பேரிடர்க் காலத்தில் ஏற்பட்ட பொதுமுடக்கம் மற்றும் அதனைத் தொடர்ந்து நாட்டில் ஏற்பட்டுள்ள பொருளாதாரச் சீர்குலைவு காரணமாக வறுமைக்கோட்டுக்குக்கீழ் வாழும் குடும்பங்கள் பெரும் நெருக்கடியை எதிர்கொண்டு வருகின்றன. இதனைக் கருத்திற்கொண்டே கொரோனாத் தொற்று ஏற்பட்ட காலப்பகுதியில் இருந்து தமிழ்த்தேசியப் பசுமை இயக்கம் நன்கொடையாளர்களின் அனுசரணையோடு அற்றார் அழிபசி தீர்த்தல் என்ற உலருணவுப் பொதிகளை வழங்கும் திட்டத்தைத் தொடர்ந்து முன்னெடுத்து வருகின்றமை குறிப்பிடத்தக்கது.

வாஸ்துவின் பெயரால் வீட்டுக்குள் நுழையும் ஆகாயத் தாமரை

மூடநம்பிக்கை பெரும் சூழற்பேரழிவுகளை ஏற்படுத்தும்

பொ. ஐங்கரநேசன் எச்சரிக்கை

அதிர்ஸ்ட மூங்கிலத்தைத் தொடர்ந்து வாஸ்துவின் பெயரால் இப்போது ஆகாயத்தாமரை வீடுகளுக்குள் நுழைய ஆரம்பித்துள்ளது. அந்நிய நீர்க்களையான ஆகாயத் தாமரையை அதிர்ஸ்டம் தரும் தாவரமாகப் பலரும் வீடுகளில் நீர்த்தொட்டிகளில் வளர்க்க ஆரம்பித்துள்ளார்கள். பூச்செடிகள் விற்பனையாளர்களும் பின்விளைவுகளை அறியாது இதனை விற்பனை செய்யத்தொடங்கி உள்ளார்கள். இந்தப்போக்கு மிகவும் ஆபத்தானது. மூடநம்பிக்கை சூழற்பேரழிவுகளை ஏற்படுத்தும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் எச்சரித்துள்ளார்.

ஆகாயத் தாமரை வீடுகளில் வளர்க்கப்படுவது தொடர்பாக பொ.ஐங்கரநேசன் விடுத்திருக்கும் ஊடக அறிக்கையிலே இவ்வாறு எச்சரித்துள்ளார்.

அந்த அறிக்கையில் அவர் மேலும் தெரிவிக்கையில்,

இயற்கை எந்த உயிரியையுமே தேவையற்றுப் படைப்பதில்லை. ஒவ்வொரு உயிரியும் முக்கியத்துவம் மிக்கவை. அவை பரிணாமிக்கும் சூழலின் சமநிலையில் இன்றியமையாத பங்களிப்பை நல்கி வருகின்றன. ஆனால், அவை இயற்கையாகத் தோன்றிய பிரதேசத்தில் இருந்து வேறு இடங்களுக்கு மாற்றப்படும்போது அவற்றுள் சில இனங்கள் ஆக்கிரமிப்பு இனங்கள் ஆகிவிடுகின்றன. புதிய சூழலின் சமநிலையைக் குழப்பிச் சரிசெய்யமுடியாத அளவுக்குப் பாதகமான விளைவுகளை ஏற்படுத்தி வருகின்றன. உலகின் உயிர்ப்பல்வகைமையை அழித்துவரும் பிரதான காரணிகளில் ஒன்றாக இவ்வந்நிய ஊடுருவல் இனங்கள் உள்ளன. அத்தகைய ஒரு அந்நிய ஆக்கிரமிப்புத் தாவரமே ஆகாயத்தாமரை ஆகும்.

ஆகாயத் தாமரை தென் அமெரிக்காவைத் தாயகமாகக்கொண்ட ஒரு அசுர நீர்க்களை. நீரே தெரியாத அளவுக்கு விரைந்து மூடிவளரும் ஆற்றல் பெற்றவை. இதனால், நீர்ச்சூழற் தொகுதியில் ஏனைய உயிரினங்களின் வளர்ச்சியைப் பாதிப்பதோடு, நுளம்புகளின் பெருக்கத்துக்குக் காரணமாக அமைந்து விடுகின்றன. குளங்களில் இருந்து தப்பிச்செல்லும் இக்களை வயல் நிலங்களில் பல்கிப்பெருகி நெல் உற்பத்தியில் பாரிய வீழ்ச்சியை ஏற்படுத்தி வருகிறது. இதனால், இலங்கை அரசாங்கம் ஆகாயத் தாமரையை அந்நிய ஊடுருவல் ஆக்கிரமிப்பு இனமாகக் கருதி அழிக்கத் தலைப்பட்டுள்ளது. யாழ்ப்பாணம் ஆரியகுளத்திலிருந்து இதனை முற்றாக அகற்றுவதற்கு மிகப் பெருந்தொகைப் பணமும் பெருங்காலமும் எடுத்தது என்பது நினைவிற் கொள்ளத்தக்கது.

இன்னும் ஏராளமான குளங்கள் ஆகாயத் தாமரையின் ஆக்கிரமிப்புக்குள் திணறிக்கொண்டிருக்கும் நிலையில் அதிர்ஸ்ட தேவதை என்ற அந்தஸ்தை வழங்குவது அதற்கு அசுரப் பலத்தைப் பெற்றுக்கொடுத்துவிடும். வீடுகளிலிருந்து தவறுதலாக வெளியேறும் இதன் சிறு அரும்பே அதன் பல்கிப்பெருகும் ஆற்றலால் சூழலை அதன் ஆக்கிரமிப்பின்கீழ் விரைந்து கொண்டுவந்துவிடும். ஏற்கனவே பார்த்தீனியம், சீமைக்கருவேலம், இப்பில்இப்பில் போன்ற அந்நியன்களால் அவதிப்பட்டுக்கொண்டிருக்கும் எம் நிலம் ஆகாயத் தாமரையினாலும் வலிகளைச் சுமக்க நேரிடும். எமது விவசாயத் திணைக்களம் ஆகாயத் தாமரை தொடர்பான விழிப்புணர்வைச் சமூகத்தின் சகல மட்டங்களிலும் ஏற்படுத்த முன்வரவேண்டும் என்றும் குறிப்பிட்டுள்ளார்.

சங்கிலியன் பூங்கா கார்த்திகை வாசம் மலர்க்கண்காட்சி

30ஆம் திகதி வியாழக் கிழமையுடன் நிறைவுறுகின்றது.

நல்லூர் சங்கிலியன் பூங்காவில் நடைபெற்றுவரும் கார்த்திகை வாசம் மலர்க்கண்காட்சி நாளை மறுதினம் வியாழக்கிழமையுடன் நிறைவடையவுள்ளது.வடமாகாண சபையின் பிரகடனத்துக்கு அமைவாகக் கார்த்திகை மாதம் ஆண்டுதோறும் வடமாகாண மர நடுகை மாதமாகக் கடைப்பிடிக்கப்பட்டுவருகிறது .இம்மாதத்தில் மரநடுகையை ஊக்குவிக்கும் முகமாகவும் தரமான மரக்கன்றுகளைப் பொது மக்கள் பெற்றுக்கொள்ளும் வகையிலும் தமிழ்த் தேசியப் பசுமை இயக்கம் ஆண்டு தோறும் நல்லூர் சங்கிலியன் பூங்காவில் தாவர உற்பத்தியாளர்களின் பங்கேற்புடன் கார்த்திகை வாசம் என்ற பெயரில் மலர்க் கண்காட்சியொன்றை நடாத்தி வருகிறது.இந்த ஆண்டில் கடந்த 22ஆம் திகதி ஆரம்பமான இக்கண்காட்சி 30ஆம் திகதி வியாழக் கிழமையுடன் நிறைவுறுகின்றது.

காலை 8.30 மணிக்கு ஆரம்பமாகி முன்னிரவு 7 மணிக்கு நிறைவுறும் இக்கண்காட்சியைத் தினமும் ஆயிரக்கணக்கானவர்கள் ஆர்வத்தோடு பார்வையிட்டு வருவதோடு மலர்ச் செடிகளையும் ,மரக்கன்றுகளையும், வீட்டுத் தோட்டத்துக்கான செடிகளையும் வாங்கிச் செல்கின்றனர் . கண்காட்சியைப் பார்வையிட வருகின்ற மாணவர்கள் அனைவருக்கும் தமிழ்த் தேசியப் பசுமை இயக்கம் இலவசமாக மரக்கன்றுகளை வழங்கி வருகின்றமையும் குறிப்பிடத்தக்கது

பசுமை இயக்கத்தின் கார்த்திகை வாசம்

கார்த்திகைப் பூச்சூடி உணர்வுபொங்க ஆரம்பம்

பெருந்திரளானோர் பங்கேற்பு

தமிழ்த் தேசியப் பசுமை இயக்கத்தின் கார்த்திகை வாசம் மலர்க் கண்காட்சி நல்லூர் சங்கிலியன் பூங்காவில் கார்த்திகைப் பூச்சூடி நேற்று புதன்கிழமை (22.11.2023) உணர்வுபூர்வமாக ஆரம்பமாகியுள்ளது. கண்காட்சி நடைபெறும் மலர்முற்றம் காட்சித்திடலை வடக்கு மாகாண சபையின் அவைத்தலைவர் சீ.வீ.கே சிவஞானம் சம்பிரதாய பூர்வமாகத் திறந்து வைத்துள்ளார். ஓய்வுநிலை உதவிக் கல்விப் பணிப்பாளர் கௌரி முகுந்தன் தலைமையில் நடைபெற்ற தொடக்க விழாவில் அவைத் தலைவர் சீ.வீ.கே சிவஞானம், சமூக-அரசியற் செயற்பாட்டாளர் க. அருந்தவபாலன், பசுமை இயக்கத்தின் தலைவர் பொ. ஐங்கரநேசன் ஆகியோர் சிறப்புரைகளை ஆற்றியிருந்தார்கள். பெருந்திரளானோர் கலந்து கொண்ட இவ்விழாவில் நீர்வையூர் பொன்சக்தி கலாகேந்திரா மாணவிகளின் மரநடுகைப்பாடல் நடன நிகழ்ச்சியும் இடம் பெற்றது.

வடக்கு மாகாணசபை கார்த்திகை மாதத்தைத் தமிழர் வாழ்வியலில் இம் மாதம் சுற்றுச்சூழல், ஆன்மீகம், பண்பாடு மற்றும் அரசியல் ரீதியாக கொண்டிருக்கும் பல்பரிமாண முக்கியத்துவம் காரணமாக 2014ஆம் ஆண்டு வடமாகாண மரநடுகை மாதமாகப் பிரகடனப்படுத்தியிருந்தது. பசுமை இயக்கம் ஆண்டுதோறும் இம் மாதத்தில் மரநடுகையில் ஈடுபட்டுவருகிறது. அத்தோடு, பொதுமக்கள் தரமான மரக்கன்றுகளைப் பெற்றுக்கொள்ளும் நோக்கில் உள்ளூர் தாவர உற்பத்தியாளர்களின் பங்கேற்புடன் மலர்க்கண்காட்சியையும் ஏற்பாடு செய்து வருகிறது.

நல்லூர் சங்கிலியன் பூங்காவில் ஆரம்பமாகியுள்ள கார்த்திகை வாசம் கண்காட்சி எதிர்வரும் 30ஆம் திகதிவரை தினமும் காலை 8.30 மணி முதல் முன்னிரவு 7.00 மணி வரை நடைபெறவுள்ளது. கண்காட்சியைப் பார்வையிடவரும் மாணவர்கள் அனைவருக்கும் பசுமை இயக்கத்தால் மரக்கன்றுகள் இலவசமாக வழங்கப்பட்டு வருகின்றமையும் குறிப்பிடத்தக்கது.

தமிழ்த்தேசியப் பசுமை இயக்கத்தால்

கறுவா மரக்கன்றுகள் விநியோகம்

தமிழ்த்தேசியப் பசுமை இயக்கம் வடமாகாண மரநடுகை மாதத்தை முன்னிட்டு மாணவர்களுக்கு இலவசமாக மரக்கன்றுகளை வழங்கி வருவதோடு மரநடுகையிலும் ஈடுபட்டு வருகிறது. இதன் ஒரு கட்டமாக இன்று வியாழக்கிழமை (09.11.2023) பலாலி வடக்கு அரசினர் தமிழ்க்கலவன் பாடசாலையில் மாணவர்களுக்கு கறுவா மரக்கன்றுகளை வழங்கியுள்ளது. பாடசாலை அதிபர் ச. விஜயகுமார் தலைமையில் நடைபெற்ற இந்நிகழ்ச்சியில் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் கலந்துகொண்டு மரநடுகையில் மாணவர்களின் வகிபாகம் குறித்து உரையாற்றியதோடு, மரக்கன்றுகளையும் வழங்கியிருந்தார்.

இந்நிகழ்ச்சியில் வடக்குக் கிழக்கில் யுத்தத்தின் பின்னர் பல்வேறு மேம்பாட்டுத் திட்டங்களை முன்னெடுத்துவரும் பெங்களுர் அல்சூர் றோட்டரிக் கழகத்தினரும் , கல்வி சக்தி அமைப்பினரும் பங்கேற்றிருந்தனர்.

கறுவா மரம் தென் இலங்கையில் காணப்படுகின்ற இலங்கைக்கு மட்டுமே உரித்தான ஒரு தாவரம் என்பதோடு பெருமளவு அந்நிய செலவாணியை ஈட்டித்தரும் வர்த்தகப் பயிராகவும் விளங்குகின்றது. இதன் பொருளாதாரப் பயன்கருதி அண்மைக்காலமாக வடக்கிலும் கறுவாச் செய்கை முக்கியத்துவம் பெற்று வருகின்றமை குறிப்பிடத்தக்கது.

தாவடியில் பசுமை இயக்கத்தின்

அற்றார் அழிபசி தீர்த்தல்

தமிழ்த் தேசியப் பசுமை இயக்கம் பொருளாதார ரீதியாக மிகவும் பின்தங்கிய நிலையில் உள்ள மக்களுக்கு உல ர் உணவுப் பொருட்களை வழங்கும் அற்றார் அற்றார் அழிபசி தீர்த்தல் திட்டம் தாவடியில் நேற்று திங்கட் கிழமை [06-11-2023] முன்னெடுக்கப்பட்டுள்ளது . தாவடியின் பல்வேறு பகுதிகளிலும் இருந்து தெரிவு செய்யப்பட்ட 107 குடும்பங்களுக்கு அத்தியாவசிய உலர் உணவுப் பொருட்கள் அடங்கிய பொதிகள் வழங்கி வைக்கப்பட்டுள்ளன. இதற்கான அனுசரணையை அல்சூர் றோட்டரிக் கழகம் வழங்கி இருந்தது .

தமிழ்த் தேசியப் பசுமை இயக்கத்தால்

உலருணவுப் பொதிகள் விநியோகம்

தமிழ்த் தேசியப் பசுமை இயக்கம் பொருளாதாரரீதியாக மிகவும் பின்தங்கியுள்ள குடும்பங்களுக்கு உலருணவுப்பொதிகளை வழங்கும் ‘அற்றார் அழி பசி தீர்த்தல்’ என்ற திட்டத்தைச் செயற்படுத்தி வருகிறது. ‘பகிர்ந்துண்டு வாழ்வோம்’ என்ற கருப்பொருளில் செயற்படுத்தப்பட்டுவரும் இத்திட்டம் நேற்று ஞாயிற்றுக்கிழமை (05.11.2023) அரியாலையில் முன்னெடுக்கப்பட்டுள்ளது.

தமிழ்த் தேசியப் பசுமை இயக்கத்தின் தலைவர் பொ.ஐங்கரநேசன் தலைமையில் நடைபெற்ற இந்நிகழ்ச்சியில் தெரிவு செய்யப்பட்ட 50 குடும்பங்களுக்கு அத்தியாவசிய உலருணவுகள் அடங்கிய பொதிகள் வழங்கி வைக்கப்பட்டுள்ளன. பொருளாதாரரீதியான வருவாயைத் தேடித்தரவல்ல கறுவாச் செய்கையை ஊக்குவிக்கும் பொருட்டு அனைவருக்கும் கறுவா மரக்கன்றுகளும் வழங்கப்பட்டுள்ளன. இதற்கான நிதி அனுசரணையை கனடாவின் இலங்கை முன்னாள் வர்த்தக சங்கத்தின் சார்பில் அதன் தலைவர் ந.கேதீஸ்வரசிவம் அனுப்பிவைத்துள்ளார்.

கொரானாப் பேரிடர்க்காலத்தில் ஏற்பட்ட தொழில் இழப்பைத் தொடர்ந்து தற்போது நாட்டின் பொருளாதாரத்தில் ஏற்பட்டுள்ள வீழ்ச்சி பொருளாதாரரீதியாக ஏற்கனவே நலிவுற்ற குடும்பங்களை வெகுவாகப் பாதித்துள்ளது. இதனைக் கருத்திற்கொண்டு தமிழ்த் தேசியப் பசுமை இயக்கம் கொரானாப் பேரிடர்க்காலத்தில் ஆரம்பித்த ‘அற்றார் அழி பசி தீர்த்தல்’ திட்டத்தைக் கைவிடாது தொடர்ந்து முன்னெடுத்து வருகின்றமை குறிப்பிடத்தக்கது.

தமிழ்த் தேசியப் பசுமை இயக்கத்தால்

மரக்கன்றுகள் விநியோகம்

தமிழ்த் தேசியப் பசுமை இயக்கம் ஆண்டுதோறும் கார்த்திகை மாதத்தில் கொண்டாடப்பட்டுவரும் வடமாகாண மரநடுகை மாதத்தை மிகச் சிறப்பாகக் கடைப்பிடித்து வருகிறது. இக்காலப் பகுதியில் மரக்கன்றுகளை நடுகை செய்து சிறப்பாகப் பராமரிப்போம் என்ற உத்தரவாதத்தை வழங்கும் பொது அமைப்புகளுக்கும் பொதுமக்களுக்கும் இலவசமாக மரக் கன்றுகளை வழங்கி வருகிறது. இந்த ஆண்டும், வடமாகாண மரநடுகை மாதம் நொவெம்பர் 1ஆம் திகதி ஆரம்பமாகியுள்ள நிலையில் கிளிநொச்சி மாவட்ட கால்நடை உற்பத்தி சுகாதாரத் திணைக்களத்தின் கோரிக்கையின் பேரில் அவர்களுக்கு இன்று (03.11.2023) மரக்கன்றுகள் வழங்கி வைக்கப்பட்டுள்ளன.

காலநிலை மாற்றங்களை எதிர்கொள்ளவும் மாவீரர்கள் நினைவாகவும்

பண்பாட்டின் தொடர்ச்சியைப்பேணிக் கார்த்திகையில் மரம் நடுவோம்

மரநடுகை மாத அறிக்கையில் பொ.ஐங்கரநேசன் தெரிவிப்பு

இயற்கையைக் குறிஞ்சி, முல்லை, நெய்தல், மருதம், பாலை என்று வகுத்து இயல்பாகவே இயற்கையோடு இசைந்த வாழ்வியலைக் கொண்டவர்கள் தமிழ் மக்கள். நெருக்கடிகள் மிகுந்த போர்ச் சூழலிற்கூட இயற்கை எனது நண்பன் என்று சொல்லி எமது சூழலைப் பேணி பாதுகாத்த மரபினர் நாங்கள். மரங்களை ஆதித் தெய்வங்களாக வழிபட்ட நாம் இறந்தவர்கள் நினைவாக மரங்களை நாட்டும் தொல் மரபையும் கொண்டிருக்கிறோம். இந்தப் பண்பாட்டு மரபே காலநிலை மாற்றங்களின் கடுமையான விளைவுகளில் இருந்தும் எம்மைக் காப்பாற்றும். அந்த வகையில் மாவீரர்களைப் போற்றும் இக்கார்த்திகை மாதத்தில் பண்பாட்டின் தொடர்ச்சியைப்பேணி அவர்களின் நினைவாகவும், காலநிலை மாற்றத்தை எதிர்கொள்ளவும் ஆளுக்கொரு மரம் நடுவோம் என்று தமிழ்த் தேசியப் பசுமை இயக்கத்தின் தலைவர பொ. ஐங்கரநேசன் தெரிவித்துள்ளார்.

ஆண்டுதோறும் கார்த்திகை மாதம் மரநடுகை மாதமாக வடக்கு மாகாண சபையால் கடைப்பிடிக்கப்பட்டு வருகிறது. இதை முன்னிட்டு பொ. ஐங்கரநேசன் ஊடகங்களுக்கு அனுப்பி வைத்திருக்கும் அறிக்கையிலேயே இவ்வாறு தெரிவித்துள்ளார்.

அந்த அறிக்கையில் அவர் மேலும் தெரிவிக்கையில்,

காலநிலை மாற்றம் மிக மோசமாகத் தனது தாக்குதல்களைத் தொடுக்க ஆரம்பித்திருக்கிறது. இதுவரை இல்லாத அளவுக்கு உயர்ந்த பூகோளச் சராசரி வெப்பநிலையைக் கொண்ட மாதமாக இந்த ஆண்டின் யூலை மாதம் பதிவாகியுள்ளது. காட்டுத்தீயும் வெப்ப அலைகளும் முன்னெப்போதையும்விட மூர்க்கம் கொண்டு பொசுக்கி வருகிறது. இந்த ஆண்டில் கனடாவில் மட்டும் காட்டுத்தீ ஒன்றரை இலட்சம் சதுரக் கிலோ மீற்றர்களுக்கும் அதிகமான காட்டுப் பரப்பை சாம்பலாக்கியிருக்கிறது. கடந்த கோடையில் ஐரோப்பிய நாடுகளில் வெப்ப அலைகள் 61,000க்கும் அதிகமான மக்களைப் பலியெடுத்திருக்கிறது. இன்னொருபுறம், இந்த ஆண்டு லிபியாவில் கடும்மழை கொட்டித்தீர்த்ததில் ஏற்பட்ட வெள்ளப்பெருக்கில் ஐயாயிரத்துக்கும் அதிகமானோர் பலியானதோடு பத்தாயிரத்துக்கும் மேலானோர் காணாமல் போயுள்ளனர்.

காலநிலை மாற்றத்தின் தாக்குதல்களுக்கு இலங்கையும் விதிவிலக்கல்ல. பூமி சூடாகுவதால் துருவப் பகுதிகளில் பனிமலைகள் உருகி வருவதன் காரணமாக உயர்ந்து வரும் கடலால் இலங்கையின் கரையோரப் பகுதிகள் மூழ்கடிக்கப்படும் அபாயம் ஏற்பட்டுள்ளது. கடல் மட்ட உயர்வால் யாழ் குடாநாடு ஆனையிறவுப்பகுதியில் கடலால் துண்டிக்கப்பட்டுத் தனித் தீவாக உருவாகும் என் எதிர்வு கூறப்பட்டுள்ளது. உலகம் இன்று அனுபவிக்கத் தொடங்கியுள்ள இந்த அனர்த்தங்களுக்குக் கரிக்காற்றை உறிஞ்சுகின்ற காடுகளை அளவுகணக்கில்லாமல் கபளீகரம் செய்துவருவதே அடிப்படைக் காரணமாகும். நாமும் யுத்தம் தின்றது போக எஞ்சியிருக்கும் காடுகளையும் அபிவிருத்தியின் பெயரால் அழிக்கத் தலைப்பட்டிருக்கிறோம். தமிழின் அடையாளமான பனை மரங்களைக்கூட நாம் விட்டுவைப்பதாக இல்லை.

பூமி வெப்பமடைதல் வெறுமனே காலநிலை மாற்றத்துடன் அடங்கிப் போய்விடும் ஒன்று அல்ல இதன் எதிர்விளைவுகளாகக் கடும் வரட்சி ஏற்பட்டுக் குடிநீருக்காக நெடுந்தொலைவு அலைய வேண்டி ஏற்படும். பயிர்களின் உற்பத்தி வீழ்ச்சியடைந்து உணவுப் பாதுகாப்பு கேள்விக்குறியாகும். கால்நடை வளர்ப்பைக் கைவிடவேண்டி ஏற்படும். வளியில் மாசுகள் அதிகரித்துச் சுவாசநோய்களால் அல்லாட வேண்டி ஏற்படும். மனஅழுத்தம் உருவாகித் தற்கொலை உணர்வு தூண்டப்படும் எனவும் விஞ்ஞானிகள் எச்சரித்துள்ளனர். ஏற்கனவே போரின் கொடிய வலிகளைச் சுமந்து நிற்கும் ஈழத்தமிழினம் காலநிலை மாற்றங்களை எதிர்கொள்வதற்கு இப்போதிருந்தே பொருத்தமான நடவடிக்கைகளை மேற்கொள்ளாவிடில் கற்பனைக்கும் எட்டாத் தாங்கொணாத் துயரங்களை அனுபவிக்க நேரிடும் என்றும் குறிப்பிட்டுள்ளார்.

பாலஸ்தீனத்துக்கு ஆதரவாக

யாழ்ப்பாணத்தில் கவனயீர்ப்பு

காசாவில் இஸ்ரேலியப் படைகள் மேற்கொண்டுவரும் யுத்த நெறிமுறைகளையும் மீறிய தாக்குதல்களினால் மிகப்பெரும் மனிதப்பேரழிவுக்கு ஆளாகியிருக்கும் பாலஸ்தீன மக்களுக்கு ஆதரவாக அவர்களுக்கு நீதி வேண்டியும், இஸ்ரேலைக் கண்டித்தும் இன்று சனிக்கிழமை (21.10.2023) யாழ் மத்திய பேருந்து நிலையத்துக்கு முன்பாகக் கவனயீர்ப்புப் போராட்டம் இடம்பெற்றது. சமூக நீதிக்கான வெகுஜன அமைப்பினால் அழைப்பு விடுக்கப்பட்ட இப்போராட்டத்தில் தமிழ்த்தேசியப் பசுமை இயக்கமும் கலந்துகொண்டு பாலஸ்தீன மக்களுக்குத் தனது ஆதரவை வெளிப்படுத்தியது.

இனவழிப்புக்கு ஆளாகும் பாலஸ்தீனிய மக்களுடன்

மனதளவிலாவது தமிழ்மக்கள் துணைநிற்க வேண்டும்

பொ. ஐங்கரநேசன் தெரிவிப்பு

காசாப் பகுதியிலிருந்து ஹமாஸ் இயக்கத்தினர் இஸ்ரேல் மீது தாக்குதல்களை மேற்கொண்டு பெரும் எண்ணிக்கையிலான இறப்புகளுக்கு வழிவகுத்ததையடுத்து இஸ்ரேல் காசாவின் மீது கொடூரமான யுத்தமொன்றை ஆரம்பித்திருக்கிறது. மக்கள் குடியிருப்புகள், மருத்துவமனைகள் என்று பாராது தடை செய்யப்பட்ட பொஸ்பரஸ் குண்டுகளை வீசி காசா முழுவதையுமே துடைத்தழிக்கும் நோக்கில் இஸ்ரேல் மூர்க்கத்தனமாகத் தாக்கி வருகிறது. இந்த யுத்தம் ஹமாஸ் இயக்கத்தினரைச் சாட்டாக வைத்து பாலஸ்தீனியர்களைக் கருவறுக்கும் இனவழிப்பு யுத்தம் ஆகும். இந்நேரத்தில், இலங்கையில் இனவழிப்புக்குத் தொடர்ச்சியாக முகங்கொடுத்துவரும் ஈழத்தமிழ் மக்கள் இனவழிப்புக்கு ஆளாகும் பாலஸ்தீனிய மக்களுடன் மனதளவிலாவது துணைநிற்க வேண்டும் என்று தமிழ்த் தேசிய பசுமை இயக்கத்தின் தலைவர் பொ. ஐங்கரநேசன் தெரிவித்துள்ளார்.

காசா மீது இஸ்ரேல் நிகழ்த்திவரும் தாக்குதல் தொடர்பாக பொ.ஐங்கரநேசன் ஊடகங்களுக்கு அனுப்பி வைத்திருக்கும் அறிக்கையிலேயே இவ்வாறு தெரிவித்துள்ளார்.

அந்த அறிக்கையில் அவர் மேலும் தெரிவிக்கையில்,

பாலஸ்தீனத்தின் ஒரு பகுதியான காசா நிலப்பரப்பை இஸ்ரேல் 1967ஆம் ஆண்டு பலவந்தமாக ஆக்கிரமித்ததைத் தொடர்ந்து அங்கு வாழும் பாலஸ்தீனியர்கள் சொந்த நாட்டிலேயே அகதிகளாக ஆக்கப்பட்டுள்ளார்கள். காசா வெறும் 365 சதுரகிலோமீற்றர் பரப்பளவைக் கொண்டது. உலகின் அடர்த்தியான மக்கள் தொகை கொண்ட பகுதியாக விளங்கும் இங்கு 20 இலட்சத்துக்கும் அதிகமான மக்கள் வசிக்கிறார்கள். இவர்களில் பாதிப்பேர் 18 வயதுக்குட்பட்ட இளயதலை முறையினராவர். இலங்கை அரசு முள்ளிவாய்க்கால் என்னும் குறுகிய நிலப்பரப்பில் இலட்சக்கணக்கான தமிழ் மக்களைத் திட்டமிட்டுச் சிக்கவைத்து அவர்களைக் கொத்துக்குண்டுகள் வீசி அழித்தொழித்ததைப் போன்றே இன்று மிகக்குறுகிய காசா நிலத்துண்டில் பாலஸ்தீனியர்களை இஸ்ரேல் கொன்று குவித்து வருகிறது.

தமிழ்த் தேசிய விடுதலைப் போராட்டம் ஐனநாயக வழிமுறைகளிலிருந்து ஆயுதப் போராட்டமாகப் பரிணாமித்தபோது தமிழ் விடுதலை இயக்கங்களில் பலர் பாலஸ்தீன விடுதலைப் போராளிகளிடம் இருந்து ஆயுதப் பயிற்சி பெற்றிருக்கிறார்கள். இதைத் தங்களின் பெருமையாகவும் வலிமையாகவும் சிலாகித்தவர்கள் இன்றும் எம்மத்தியில் உள்ளனர். பாலஸ்தீனியர்களிடமிருந்து ஆயுதப் பயிற்சி பெற்றதை நாம் எவ்வாறு மறக்கவியலாதோ, அதே போன்று இஸ்ரேலின் மொசாட் உளவுப்பிரிவினரின் ஆலோசனையின்பேரில் தமிழ் மக்களை இலங்கை அரசு தாக்கி அழித்ததையும் நாம் மறந்துவிடலாகாது. ஒடுக்கப்பட்ட பாலஸ்தீனிய மக்களுக்காக நாம் குறைந்த பட்சம் தற்போது அனுதாபங்களையாவது வெளிப்படுத்தாதுவிடின் வரலாறு எம்மை ஒருபோதும் மன்னிக்காது என்றும் குறிப்பிட்டுள்ளார்.

தமிழ் அரசியற் கட்சிகளை வழிப்படுத்த

மக்கள் இயக்கமொன்று பலம் பெற வேண்டும்

பொ.ஐங்கரநேசன் சுட்டிக்காட்டு

விடுதலைப் புலிகள் இருந்தவரைக்கும் அவர்களின் அரசியல் துறையே தமிழ்த் தேசியக் கட்சிகளின் வழிகாட்டும் பீடமாக இருந்தது. அவர்கள் எதை முன்மொழிந்தார்களோ அதையே எமது கட்சித் தலைவர்கள் வழிமொழிந்தார்கள். தமிழ் மக்களுக்கான ஒரு தேசியத் தலைமை இல்லாத நிலையில் தமிழ் அரசியற் கட்சிகள் ஒவ்வொன்றும் திக்கொன்றாக அவற்றினது எஐமானர்களின் அல்லது நிதியூட்டு நபர்களின் மனங்கோணாதவாறு செயற்பட்டுக்கொண்டிருக்கின்றன. இந்நிலையில் கட்சிகளை வழிப்படுத்த மக்கள் இயக்கமொன்று பலம் பெற வேண்டும் என்று தமிழ்த் தேசிய பசுமை இயக்கத்தின் தலைவர் பொ. ஐங்கரநேசன் சுட்டிக்காட்டிள்ளார்.

தமிழ்த் தேசியப் பசுமை இயக்கத்தின் சமகால அரசியல் உரையரங்கு நேற்று ஞாயிற்றுக் கிழமை.(15.10.2023.) நல்லூர் இளங்கலைஞர் மன்றத்தில் நடைபெற்றது இந்நிகழ்ச்சிக்குத் தலைமை வகித்து உரையாற்றியபோதே பொ.ஐங்கரநேசன் இவ்வாறு சுட்டிக்காட்டியுள்ளார்.

அங்கு அவர் தொடர்ந்து உரையாற்றுகையில்,

ஆறுகள் ஒரு போதும் பின்னோக்கிப் பாய்வதில்லை. அது போன்றுதான் வரலாறும் பின்னோக்கிப் பாயாது. வரலாறு எங்களை எந்த இடத்தில் கொண்டு வந்து நிறுத்தியிருக்கிறதோ, அந்த இடத்திலிருந்துதான் வரலாறு தந்த படிப்பினைகளையும் உள்வாங்கிக் கொண்டு நாம் முன்னோக்கிப் பயணிக்க வேண்டும். ஆனால, இந்தக் கசப்பான உண்மையை ஏற்றுக்கொள்ள தமிழ்க் கட்சிகளின் தலைவர்கள் தயாராக இல்லை. முள்ளிவாய்க்காலில் ஆயுதப் போராட்டம் தோற்கடிக்கப்பட்டதன் பின்னர் அவர்கள் முப்பது, நாற்பது வருடங்கள் பின்னால் சென்று அங்கிருந்து போராட நினைக்கிறார்கள். அதன் வெளிப்பாடுகளில் ஒன்றுதான் காலப்பொருத்தமற்று அடிக்கடி அறிவிக்கப்படும் கடையடைப்புப் போராட்டங்கள்.

தமிழ்க்கட்சி ஒன்றின் தலைவர் தாங்கள் ஆயுதங்களைக் கைவிட்டதைப் பிழையென்று தற்போது உணர்வதாக அண்மையில் தெரிவித்திருக்கிறார். ஆயுதங்களைக் கீழே போட்டு ஓடி விட்டு இப்போது கைவிட்டது என்று கூறுவது நகைப்புக்கிடமானது. ஆயுதம் பற்றிய வெட்டிப் பேச்சை மக்கள் இனியொருபோதும் இரசிக்க மாட்டார்கள். அதற்கு நிகரான வீச்சுடன் மக்களை அணிதிரட்டி காலிமுகத்திடல் அரகலிய போன்று போராட முன்வாருங்கள். புகைப்படங்கள் எடுப்பதற்கு முண்டியடித்து முன்னால் நிற்கும் தலைவர்களாக இல்லாமல் சொல்லாலும் செயலாலும் முன்மாதிரியாக உள்ள தலைவர்களின் பின்னால் அணிவகுத்து வருவதற்கு மக்கள் தயராக இருக்கிறார்கள்.

தமிழ் மக்களின் தேசிய விடுதலைப் போராட்டத்தைத் தேர்தலை மாத்திரமே இலக்காக கொண்டுள்ள கட்சிகளிடம் ஒப்படைத்து விட்டு ஒதுங்கியிருக்கிறோம். இந்தக் கையறு நிலையிலேயே வலுவான சிவில் சமூகம் அல்லது மக்கள் இயக்கம் ஒன்றின் அவசியம் உணரப்படுகிறது. இருக்கின்ற மக்கள் அமைப்புகள் ஒன்றில் அரசியற் கட்சிகளின் பினாமிகளாகச் செயற்படுகின்றன. அல்லது சிவில் சமூகப் பிரதிநிதியாகப் பிரபலம் பெற்று விட்டால் அவரிடம் தேர்தல் ஆசை தொற்றிக் கொள்கிறது. இவற்றுக்கு இடங்கொடாது கட்சிகளின் மூக்கணாங் கயிறாகச் செயற்படக்கூடிய மக்கள் இயக்கமொன்றைக் கட்டியெழுப்ப எமது புத்திஜீவிகள் முன்வர வேண்டும் என்றும் குறிப்பிட்டுள்ளார்.

தமிழ்த் தேசியப் பசுமை இயக்கத்தின்

சமகால அரசியல் உரையரங்கு.

தமிழ்த் தேசியப் பசுமை இயக்கத்தின் சமகால அரசியல் உரையரங்கு நேற்று ஞாயிறுக்கிழமை [15-10-2023] நல்லூர் இளங்கலைஞர் மன்ற மண்டபத்தில் இடம்பெற்றுள்ளது.

தமிழ்த் தேசியப் பசுமை இயக்கத்தின் தலைவர் பொ..ஐங்கரநேசன் தலைமையில் நடைபெற்ற இவ்வுரையரங்கில் தமிழ் மக்களுக்கு யார் பொறுப்பு? என்ற தலைப்பில் அரசியல் ஆய்வாளர் நிலாந்தன் அவர்களும் , இஸ்ரேல் - ஹமாஸ் போர் :பிராந்திய அரசியலில் மாற்றங்களும் விளைவுகளும் என்ற தலைப்பில் யாழ் .பல்கலைக்கழக அரசறிவியல் துறைத் தலைவர் பேராசிரியர் கே .ரி .கணேசலிங்கம் அவர்களும்

உரையாற்றியிருந்தார்கள்.வரவேற்புரையை தமிழ்த் தேசியப் பசுமை இயக்கத்தின் துணைப் பொதுச் செயலாளர் சண் . தயாளன் அவர்கள் நிகழ்த்தியிருந்தார்.

போரில் உயிரிழந்தவர்களுக்கான பொது நினைவுச்சின்னம்

பேரினவாதம் உயிரோடிருக்கும்வரை தமிழினம் அனுமதியாது

பசுமை இயக்கத்தலைவர் ஐங்கரநேசன்

ஜனாதிபதிச் செயலகம் போரில் இறந்த இராணுவத்தினர், விடுதலைப் போராளிகள், பொதுமக்கள் ஆகிய முத்தரப்பினருக்கும் பொதுவான நினைவுச்சின்னம் ஒன்றை அமைப்பதாக முடிவெடுத்து அதனை விரைவில் நிறுவுவதற்கான தீவிர முயற்சியில் இறங்கியுள்ளது. இது தொடர்பாக அரசதரப்பால் நியமிக்கப்பட்ட நிபுணர்குழு யாழ் - மாவட்டச் செயலகத்தில் கடந்த சனிக்கிழமை கலந்துரையாடலொன்றை நிகழ்த்தியுள்ளது. தமிழர் தாயகத்தின் ஏனைய மாவட்டங்களிலும் இக்கலந்துரையாடல் தொடர்ந்து இடம்பெறவுள்ளது. ஆனால், அரசதரப்பு எத்தகைய தீவிரங்காட்டினாலும் போரில் உயிரிழந்த அனைவருக்கம் பொதுவான நினைவுச்சின்னம் ஒன்றை அமைப்பதற்குப் பேரினவாதம் உயிரோடிருக்கும்வரை தமிழினம் அனுமதியாது. என்று தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் உறுதிபடத் தெரிவித்துள்ளார்.

ஜனாதிபதிச் செயலகம் போரில் உயிர்நீத்தவர்களுக்கான பொதுநினைவுச் சின்னமொன்றை அமைக்க முற்பட்டிருப்பது தொடர்பாக பொ.ஐங்கரநேசன் ஊடகங்களுக்கு அனுப்பிவைத்திருக்கும் அறிக்கையிலேயே இவ்வாறு தெரிவித்துள்ளார்.

அந்த அறிக்கையில் அவர் மேலும் தெரிவிக்கையில்,

ஐக்கியநாடுகள் சபையின் மனித உரிமைகள் ஆணையத்தின் தீர்மானத்துக்கமைவாக நல்லாட்சி அரசாங்கம் தான் ஏற்றுக்கொண்ட நிலைமாறுகால நீதிப்பொறிமுறையின் கீழ் இனங்களுக்கிடையில் நல்லிணக்கத்தை ஏற்படுத்தும் விதமாகப் போரில் உயிர்நீத்தவர்களுக்கான பொது நினைவுச் சின்னமொன்றை அமைப்பதற்கு முடிவெடுத்திருந்தது. போராளிகளையும் பொதுமக்களையும் அவர்களைக் கொன்றொழித்த படைத்தரப்பையும் ஒன்றாக நினைவிற் கொள்ளும் இம்முடிவிற்குத் தமிழ் மக்கள் அப்போதே தமது எதிர்ப்பை வெளிக்காட்டியிருந்தார்கள். இவ்வெதிர்ப்பைக் கருத்தில் கொள்ளாது, அதனை எவ்வடிவத்தில் அமைப்பது என்பது தொடர்பான கலந்துரையாடல் தற்போது முன்னெடுக்கப்பட்டு வருகின்றது. இக்கலந்துரையாடல் பொது அழைப்பும் ஊடகங்களின் பங்கேற்பும் இல்லாது நிபுணர்குழு தெரிவுசெய்து அழைத்திருந்த மட்டுப்படுத்தப்பட்ட எண்ணிக்கையினருடன் மட்டுமே இடம்பெற்று வருகின்றது.

போர்முடிவுற்று பதின்னான்கு வருடங்கள் கடந்துவிட்ட போதிலும் இனங்களுக்கிடையில் நல்லிணக்கத்தை ஏற்படுத்துவதற்கான எந்தவொரு ஆக்கபூர்வ சமிக்ஞையினையும் அரசதரப்பு வெளிக்காட்டவில்லை. போர்மரபுகளையும் மீறி மாவீரர் துயிலுமில்லங்களைச் சிதைத்தழித்த அரசதரப்பு, யுத்தவெற்றியைப் பறைசாற்றும் விதமாகப் படைத்தரப்பினருக்கான நினைவுச் சின்னங்களைத் தமிழர்தாயகப் பகுதியெங்கும் அமைத்துள்ளது. ஆனால், அகிம்சை வழியில் போராடி உயிர்துறந்த திலீபனின் நினைவுகூருதலை சிங்களக் குண்டர்களின் மூலமும், தனது ஏவல்துறையான காவல் துறையின் மூலமும் குழப்பி வருகின்றது. திலீபனின் நினைவேந்தல் நாட்களிலேயே இனநல்லிணக்கத்தின் பெயரால் பொது நினைவுச் சின்னமொன்றை அமைப்பதற்கான கலந்துரையாடலையும் நிகழ்த்துகிறது. உலகை ஏமாற்றும் அரசாங்கத்தின் இந்நிகழ்ச்சி நிரலுக்குத் தமிழ்மக்கள் ஒருபோதும் ஒப்புதல் வழங்கமாட்டார்கள் என்றும் குறிப்பிட்டுள்ளார்.

தமிழ்த்தேசியப் பசுமை இயக்கத்தால்

உலருணவுப் பொதிகள் விநியோகம்

தமிழ்த்தேசியப் பசுமை இயக்கம் பொருளாதார ரீதியாக மிகவும் நலிவுற்ற குடும்பங்களுக்கு உலருணவுப் பொதிகளை வழங்கும் அற்றார் அழிபசி தீர்த்தல் என்ற திட்டத்தை முன்னெடுத்து வருகிறது. பகிர்ந்துண்டு வாழ்வோம் என்ற கருப்பொருளுடன் முன்னெடுக்கப்பட்டுவரும் இத்திட்டத்தின்கீழ் வேலணை, உரும்பிராய், நாவற்குழி ஆகிய பகுதிகளிலிருந்து தெரிவுசெய்யப்பட்ட 60 குடும்பங்களுக்கு உலருணவுப் பொதிகள் நேற்று சனிக்கிழமை (09.09.2023) வழங்கிவைக்கப்பட்டுள்ளன.

தமிழ்த்தேசியப் பசுமை இயக்கத்தின் தலைமை அலுவலகத்தில் பொ. ஐங்கரநேசன் தலைமையில் நடைபெற்ற இந்நிகழ்ச்சியில் நன்கொடையாளர் நடராஜா குகானந்தன் கலந்துகொண்டு உலருணவுப்பொதிகளை வழங்கி வைத்துள்ளார்.

யுத்தம், கொரோனாப் பேரிடர் போன்ற காரணங்களால் ஏற்கனவே பொருளாதாரரீதியாகப் பாதிக்கப்பட்டுள்ள குடும்பங்கள், அப்பாதிப்புகளில் இருந்து மீண்டெழுவதற்கு முன்பாகத் தற்போது நாட்டில் நிலவுகின்ற பொருளாதார நெருக்கடியும் சேர்ந்துகொண்டு அவர்களை மோசமாகப் பாதித்துள்ளது.

இதனைக்கருத்திற்கொண்டே தமிழ்த்தேசியப் பசுமை இயக்கம் நன்கொடையாளர்களின் அனுசரணையுடன் கொரோனாப் பேரிடர் காலத்தில் ஆரம்பித்த அற்றார் அழிபசி தீர்த்தல் திட்டத்தைத் தொடர்ந்து முன்னெடுத்துவருகின்றமை குறிப்பிடத்தக்கது.

மாணாக்க உழவர் - 2023

வீட்டுத்தோட்டப் போட்டிக்கான விதைகள்

இலவச விநியோகம்

தமிழ்த்தேசியப் பசுமை இயக்கம் மாணவர்களிடையே வீட்டுத்தோட்டச் செய்கையை ஊக்குவிக்கும் முகமாக மாணாக்க உழவர் என்னும் வீட்டுத்தோட்டப் போட்டியை ஆண்டுதோறும் நடாத்தி வருகிறது. நாட்டில் நிலவும் பொருளாதார நெருக்கடி, உணவுப்பற்றாக்குறை, நஞ்சற்ற உணவுற்பத்தி, மாணவர்களை மனஅழுத்தங்களில் இருந்து விடுவித்தல் ஆகியவனவற்றை நோக்காகக் கொண்டு முன்னெடுக்கப்படும் இப்போட்டி இந்த ஆண்டும் நடைபெறவுள்ளது. இதில் கலந்து கொள்ளும் மாணவர்களுக்குத் தமிழ்த் தேசியப் பசுமை இயக்கம் தற்போது இலவசமாக விதைப்பொதிகளை வழங்கி வருகின்றது.

இப்போட்டியில் கலந்துகொள்ள விரும்பும் மாணவர்கள் யாழ்ப்பாணம், அரசடிவீதி, கந்தர்மடத்தில் அமைந்துள்ள தமிழ்த் தேசியப் பசுமை இயக்கத்தின் தலைமை அலுவலகத்தில் போட்டிக்கான விண்ணப்பப் படிவத்தையும், விதைகளையும் பெற்றுக்கொள்ள முடியும். இம் மாதம் 16, 17, 18 ஆகிய திகதிகளில் தினமும் பிற்பகல் 1.30 மணி முதல் 4.30 மணி வரை பெற்றோர் சகிதம் வந்து மாணவர்கள் இவற்றைப் பெற்றுக்கொள்ளலாம் எனத் தமிழ்த்தேசியப் பசுமை இயக்கம் தெரிவித்துள்ளது.

- பாராளுமன்றில் பதின்மூன்று -

தமிழர்களுக்குத் தலையையும் சிங்களவர்களுக்கு வாலையும் காட்டும்

ரணில் விக்கிரமசிங்கவின் விலாங்குத் தந்திரம்

ரணில் விக்கிரமசிங்க ஏற்கனவே அரசியல் அமைப்பில் இருக்கும் 13ஆவது திருத்தச் சட்டத்தை ஜனாதிபதியாக அவர் கொண்டிருக்கும் நிறைவேற்று அதிகாரத்தைப் பயன்படுத்தி நடைமுறைக்குக் கொண்டுவந்திருக்க முடியும். ஆனால், மிகவும் நாசூக்காக நாடாளுமன்றத்துக்கு அதனைக் கொண்டு சென்றிருப்பதோடு 13 தொடர்பாக தமிழர் தரப்புக்குச் சாதகம் போலக் காட்டும் சில பரிந்துரைகளையும் முன்வைத்திருக்கிறார். ஆனால் இப்பரிந்துரைகள் எதையும் சிங்களவர்கள் மிகப்பெரும்பான்மையாக உள்ள பாராளுமன்றில் நிறைவேற்ற முடியாது என்று தெரிந்திருந்தும் பாராளுமன்றத்துக்குக் கொண்டு சென்றிருப்பது தமிழர்களுக்குத் தலையையும் சிங்களவர்களுக்கு வாலையும் காட்டுகின்ற அவரின் விலாங்குத் தந்திரமே ஆகும் என்று தமிழ்த் தேசியப் பசுமை இயக்கத்தின் தலைவர் பொ.ஐங்கரநேசன் சுட்டிக்காட்டியுள்ளார்.

ஜனாதிபதி ரணில் விக்கிரமசிங்க பாராளுமன்றில் 13ஆவது திருத்தச் சட்டத்தில் மாற்றங்கள் செய்வது பற்றி ஆலோசனைகளைச் சமர்ப்பித்திருப்பது தொடர்பாக பொ. ஐங்கரநேசன் வெளியிட்டிருக்கும் ஊடக அறிக்கையிலேயே இவ்வாறு சுட்டிக்காட்டியுள்ளார்.

அந்த ஊடக அறிக்கையில் அவர் மேலும் தெரிவிக்கையில்

ஜனாதிபதி ரணில் விக்கிரமசிங்க மாகாணசபைச் சட்டங்களில் உடனடியாகச் சில மாற்றங்களைச் செய்து விரைவில் மாகாணசபைத் தேர்தலை நடாத்தவுள்ளார் என்ற தோற்றத்தைத் தனது பாராளுமன்ற உரையின்போது வெளிப்படுத்தியிருக்கிறார். மாகாணசபைச் சட்டம் நடைமுறைக்கு வருவதோ, மாகாணசபைத் தேர்தல் நடைபெறப்போவதோ உடனடிச் சாத்தியம் இல்லாதவை. உள்ளூராட்சித் தேர்தலையே நடாத்தவிடாமல், வேட்புமனுத் தாக்கல் செய்த பின்பும் பல தந்திரங்களைச் செய்து தேர்தலைக் காலவரையின்றி ஒத்திப்போட்ட ரணில் விக்கிரமசிங்க மாகாணசபைத் தேர்தலை நடாத்துவார் என்று எதிர்பார்ப்பது அரசியல் அறிவிலித்தனம் மாகாணசபைச் சட்டங்களில் திருத்தங்கள் செய்து தமிழ்மக்களுடன் அதிகாரங்களைப் பகிர்வார் என்று நினைப்பது அதைவிட அறிவிலித்தனமானது

ரணில் விக்கிரமசிங்க மாகாணசபை விவகாரத்தைக் கையிலெடுத்திருப்பதன் முதலாவது நோக்கம் மாகாணசபைத் தேர்தலை நடாத்துமாறு கோரும் இந்தியாவின் அழுத்தங்களில் இருந்து விடுபடுவதாகும். இரண்டாவது நோக்கம், ஐனாதிபதித் தேர்தலை முன்கூட்டியே நடாத்தி அறுதிப் பெரும்பான்மையுடன் தான் ஜனாதிபதியாக நீடிப்பதை உறுதி செய்வதாகும். ரணில் தீர்வு தருவார் என்ற நம்பிக்கையைத் தமிழ்மக்களிடையே ஏற்படுத்தி அவர்களின் வாக்குகளைக் கபளீகரிப்பதும், மாகாணசபை விவகாரத்தைப் பாராளுமன்றத்துக்குக் கொண்டு சென்று அதனை நிறைவேற்ற முடியாமல் செய்வதன் மூலம் சிங்கள மக்களினது வாக்குகளை வாரிச் சுரட்டுவதுமே அவரது இலக்குகளாகும். தமிழ் மக்கள் ரணில் விக்கிரமசிங்கவின் இந்த விலாங்குத்தனத்தைப் புரிந்துகொள்ள வேண்டும் என்றும் குறிப்பிட்டுள்ளார்.

மாணவர்களை மனஅழுத்தங்களில் இருந்து மீட்க

வீட்டுத்தோட்டம் சிறந்த பரிகாரமாக அமையும்

மாணாக்க உழவர் நிகழ்சியில் ஐங்கரநேசன் சுட்டிக்காட்டு

எமது மாணவர்கள் பல்வேறு காரணங்களினால் மனஅழுத்தங்களுக்கு ஆளாகி வருகிறார்கள். இதன் வெளிப்பாடுகளில் ஒன்றாகவே அவர்களால் சரிவரக் கற்றலை மேற்கொள்ள முடியவில்லை. போதை, வன்முறை என்று சமூகப்பிறழ்வான நடவடிக்கைகளில் ஈடுபடுகிறார்கள். இவர்களில் ஒருசாரார் தற்கொலை முடிவை நோக்கியும் செல்கிறார்கள். இவர்களை மனஅழுத்தங்களில் இருந்து விடுவிக்க வீட்டுத்தோட்டங்களில் அவர்களை ஈடுபடுத்துவதுதான் சிறந்த பரிகாரமாக அமையும். இது அறிவியல் பூர்வமாக நிரூபிக்கப்பட்ட வழிமுறையாகும் என்று தமிழ்த் தேசிய பசுமை இயக்கத்தின் தலைவர் பொ.ஐங்கரநேசன் சுட்டிக்காட்டி உள்ளார்.

தமிழ்த் தேசியப் பசுமை இயக்கத்தின் மாணாக்க உழவர் திட்டத்தின் கீழ் மாணவர்களுக்கு விதைப் பொதிகளையும் செயன்முறைப் பயிற்சிகளையும் வழங்கும் நிகழ்சி நேற்று ஞாயிற்றுக்கிழமை (06.08.2023) நல்லூர் இளங்கலைஞர் மன்றத்தில் இடம்பெற்றது. இந்நிகழ்சிக்குத் தலைமை வகித்து உரையாற்றியபோதே ஐங்கரநேசன் இவ்வாறு சுட்டிக்காட்டி உள்ளார்.

அங்கு அவர் தொடர்ந்து உரையாற்றுகையில்,

வீட்டுத்தோட்டங்கள் சுயசார்புப் பொருளாதாரத்தின் முதற்படி. வீட்டிலேயே எங்களுக்குத் தேவையான உணவுப் பயிர்களை உற்பத்தி செய்யக் கூடியதாக இருப்பதோடு வீட்டுக்கழிவுகளைப் பசளையாகப் பயன்படுத்துவதால் நஞ்சற்ற உணவையும் நாம் பெறக்கூடியதாக உள்ளது. நாட்டில் நிலவும் பொருளாதார நெருக்கடிக்கும், உணவு நெருக்கடிக்கும் வீட்டுத்தோட்டம் சிறந்த தீர்வாக அமையும். இந்த அனுகூலங்களைவிட மேலான அனுகூலமாக வீட்டுத்தோட்டங்கள் மனதை அலைபாயவிடாமல் சிந்தனைகளை ஒருமுகப்படுத்தவும் உதவுகின்றது.

தோட்டங்களில் மண்ணைக் கைகளால் அளையும்போது, மண்ணில் உள்ள பக்றீரியங்களைத் தொடும்போது உடலில் செரற்ரோனின் என்ற ஓமோன் சுரப்பது தூண்டப்படுகிறது. ஆய்வுரீதியாக நிரூபிக்கப்பட்ட ஓர் உண்மை இது. செரற்ரோனின் மனச்சோர்வைக் களைந்து, மனஅழுத்தங்களில் இருந்து விடுபடவைத்து, மனஆரோக்கியத்தை மேம்படுத்தும் ஒரு இரசாயனம் ஆகும். இயற்கையாக செரற்ரோனின் உருவாகுவதைத் தூண்டும் வீட்டுத்தோட்டச் செய்கையில் மாணவர்களை ஈடுபடுத்தினால் செயற்கையாக உற்சாகத்தைத் தூண்டும் ஆபத்தான போதைக்கு அவர்கள் அடிமையாக மாட்டார்கள்.

ஆசிரியர்கள் வீட்டுத்தோட்டம் என்றால் அது விவசாயம் பயிலுகின்ற மாணவர்களுக்கு மாத்திரம்தான் என்று நினைக்கிறார்கள். பெற்றோர்கள் வீட்டுத்தோட்டங்களில் மாணவர்கள் ஈடுபட்டால் அவர்களின் படிப்புப் பாழாகிவிடும் என்று கருதுகிறார்கள். இந்த மனோநிலைகளில் மாற்றம் வேண்டும். பயிர்களைப் பீடிக்கும் பூச்சிகளால் பயிர்களுக்கு மாத்திரம்தான் சேதம். ஆனால், புத்தகப் பூச்சிகளாகவே வளரும் மாணவர்கள் தமக்கும் சமூகத்துக்கும் கேடாகவே அமைவார்கள். இதைப் புரிந்துகொண்டு ஆசிரியர்களும் பெற்றோர்களும் மாணவர்களை வீட்டுத்தோட்டங்களில் ஈடுபடவைக்க வேண்டும் என்றும் குறிப்பிட்டுள்ளார்.

பசுமை இயக்கத்தின் மாணாக்க உழவர் - 2023

விதைப்பொதிகள் விநியோகமும் செயன்முறை விளக்கமும்

தமிழ்த்தேசியப் பசுமை இயக்கம் மாணவர்களிடையே வீட்டுத்தோட்டச் செய்கையை ஊக்குவிக்கும் நோக்கில் ‘மாணாக்க உழவர்’ எனும் வீட்டுத்தோட்டப் போட்டியை நடாத்தி வருகின்றது. இந்த ஆண்டுக்கான போட்டிக்குரிய விதைப்பொதிகளையும் செயன்முறை விளக்கங்களையும் மாணவர்களுக்கு வழங்கும் நிகழ்ச்சி நேற்று ஞாயிற்றுக்கிழமை (06.08.2023) நல்லூர் இளங்கலைஞர் மன்ற மண்டபத்தில் நடைபெற்றது.

தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் நடைபெற்ற இந்நிகழ்ச்சியில் விவசாய நவீனமயமாக்கல் திட்டத்தின் பிரதித்திட்டப் பணிப்பாளர் வி விஜிதன் , விவசாயப் போதனாசிரியர் ச.பாலகிருஸ்ணன் ஆகியோர் வீட்டுத்தோட்டச் செயன்முறை தொடர்பான வழிகாட்டுதல்களை வழங்கியிருந்தார்கள்.

இந்நிகழ்ச்சியில் பல்வேறு பாடசாலைகளைச் சேர்ந்த ஏராளமான மாணவர்களும்,ஆசிரியர்களும் பெற்றோர்களும் கலந்து கொண்டிருந்தனர். மாணவர்கள் அனைவருக்கும் வீட்டுத்தோட்டத்துக்கான பத்து வகையான விதைகள் அடங்கிய பொதிகள் வழங்கி வைக்கப்பட்டன. போட்டியில் பங்கேற்கும் மாணவர்கள் அனைவருக்கும் மாணாக்க உழவர் சான்றிதழ்களும்; தொடர் மதிப்பீட்டின் அடிப்படையில் சிறந்த செய்கையாளர்களுக்கு விசேட பரிசுகளும் வழங்கப்படவுள்ளன.

தமிழ்த்தேசியப் பசுமை இயக்கம் நாட்டில் நிலவுகின்ற பொருளாதார நெருக்கடி, உணவுக்கான நெருக்கடி, இயற்கைப் பசளைகளின் மூலம் நஞ்சற்ற உணவு உற்;பத்தி, பாரம்பரிய விதைகளின் பாதுகாப்பு, மாணவர்கள் தங்கள் ஓய்வு நேரங்களை பயனுள்ளதாக் கழிக்க வேண்டிய அவசியம் ஆகிய பல காரணங்களைக் கருத்தில் கொண்டே மாணாக்க உழவர் என்னும் திட்டத்தை கடந்த ஆண்டிலிருந்து முன்னெடுத்து வருகின்றமை குறிப்பிடத்தக்கது.

யுத்தத்துக்குப் பின்னரான தமிழ்த்தேசிய அரசியலில்

கலை, இலக்கியம், பண்பாடு பற்றிய சிந்தனை இல்லை

ஆடிப்பிறப்பு விழாவில் ஐங்கரநேசன் ஆதங்கம்

இலங்கையின் சுதந்திரத்துக்குப் பின்னரான தமிழர் அரசியலில் விடுதலைப் புலிகளின் காலத்திலேயே தமிழ் இனத்தின் பண்பாடு குறித்தும் கலை, இலக்கியங்கள் குறித்தும் அதிக கவனம் செலுத்தப்பட்டது. இதற்கெனக் கலை பண்பாட்டுக் கழகம் என்று தனியான ஒரு அலகே உருவாக்கப்பட்டது.; போராளிகளிடம் மாத்திரமல்லாமல் தமிழ்ப் பண்பாடு குறித்த உணர்வுபூர்வமான பிரக்ஞை மக்களிடமும் ஏற்படுத்தப்பட்டது. தென்னிலங்கையிலும் தமிழ்-சிங்கள கலைக்கூடல் முன்னெடுக்கப்பட்டது. ஆனால், முள்ளிவாய்க்கால் யுத்தத்துக்குப் பின்னரான தமிழ்த்தேசிய அரசியலில் கலை, இலக்கியம், பண்பாடு பற்றிய சிந்தனை இல்லாமல் போய்விட்டது என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தனது ஆதங்கத்தை வெளிப்படுத்தியுள்ளார்.

தமிழ்த்தேசியப் பசுமை இயக்கத்தின் ஆடிப்பிறப்பு விழா நேற்று திங்கட்கிழமை (17.07.2023) அராலியில் கொண்டாடப்பட்டது. இவ்விழாவில் கலந்துகொண்டு உரையாற்றும்போதே பொ. ஐங்கரநேசன் இவ்வாறு தனது ஆதங்கத்தைத் தெரிவித்துள்ளார்.

அங்கு அவர் தொடர்ந்து உரையாற்றுகையில்,

ஆடிப்பிறப்பு தமிழ் மக்களின் பண்பாட்டை வெளிப்படுத்துகின்ற ஒரு பண்டிகை. பன்மைத்துவம் மிக்க ஆரோக்கிய உணவைக் கூடிப்பகிர்ந்துண்ணும் உணவுப் பண்பாட்டை எடுத்தியம்புகின்ற ஆடிப்பிறப்பு நாளில் பாடசாலைகளில் விடுமுறை வழங்கிய காலம் ஒன்றிருந்தது. ஆனால், இன்று “ஆடிப்பிறப்புக்கு நாளை விடுதலை ஆனந்தம் ஆனந்தம் தோழர்களே” என்று பாடிய சோமசுந்தரப் புலவரின் பாடல் மாத்திரம்தான் மிஞ்சியுள்ளது. பண்பாட்டுச் செயற்பாடுகளுக்காகத் தனியார்கல்வி நிறுவனங்களிடம் விடுமுறையைக் கோருகின்ற நாம் பாடசாலைகளில் ஆடிப்பிறப்புக்கான விடுமுறையை மீளப் பெறுவதற்கும் முன்வரவேண்டும்.

சிங்களபௌத்த மேலாதிக்கத்தினாலும் உலகமயமாக்கலினாலும் ஒருபுறம் தமிழ்ப் பண்பாடு சிதைக்கப்பட்டுக் கொண்டிருக்கிறது. இன்னொருபுறம் தமிழ் மக்களினது உதாசீனத்தாலும் தமிழ்ப் பண்பாடு அரிக்கப்பட்டுக் கொண்டிருக்கின்றது. மேடைகளில் தமிழ்த் தேசியம் குறித்து முழங்கும் எங்களது அரசியல் கட்சிகள் எதுவும்; தேசியத்தில் பண்பாட்டின் வகிபாகம் குறித்துக் கருத்தில் எடுப்பதாகத் தெரியவில்லை. பண்பாட்டை உள்வாங்காத தேசியம்; ஒருபோதும் முழுமை பெறாது. அது உள்ளீடற்ற கொழுக்கட்டை போன்றதே என்பதை எல்லோரும் புரிந்து கொள்ள வேண்டும்.

தேசியம் பற்றி அரசியல்வாதிகள் அதிகம் பேசினாலும் அது மக்களிடம்தான் உள்ளது. மக்களே அதனை அடைகாக்கிறார்கள். ஓர் இனத்தை மற்றைய இனங்களிடமிருந்து வேறுபிரித்துக்காட்டும் தனித்துவமான வாழ்வியல் முறைமையே தேசியமாகும். இதில் முதுகெலும்பு போன்று பண்பாடு வகிக்கும் பாத்திரம் பிரதானமானது. இதனாலேயே ஓர் இனத்தை அழிக்க நினைப்பவர்கள் முதலில் பண்பாட்டைச் சிதைப்பதற்கு முயற்சிக்கிறார்கள். இதனை எதிர்கொள்வதற்கு நாம் கலை, இலக்கிய, பண்பாட்டுச் செயற்பாடுகளை அரசியலுடன் சேர்த்து ஒர் பேரியக்கமாக முன்னெடுக்க வேண்டும் என்றும் தெரிவித்தார்.

பசுமை இயக்கத்தின் ஆடிப்பிறப்பு விழா

அராலியில் சிறப்பாக இடம்பெற்றது

தமிழ்த்தேசியப் பசுமை இயக்கம் ஆடிப்பிறப்பு நாளான நேற்று திங்கட்கிழமை (17.07.2023) ஆடிப்பிறப்பைத் தமிழர் பண்பாட்டின் திருநாளாக அராலியில் கொண்டாடியுள்ளது. அராலி களவத்துறை விளையாட்டு மைதானத்தில் தமிழ்த்தேசியப் பசுமை இயக்கத்தின் கலை இலக்கிய அணியின் துணைச் செயலாளர் கை. சரவணன் தலைமையில் நடைபெற்ற இவ்விழாவில் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன், துணைப் பொதுச் செயளாளர் சண். தயாளன் ஆகியோர் கலந்து கொண்டிருந்தார்கள்.

களவத்துறை விளையாட்டுக் கழகத்தைச் சேர்ந்த செல்வி மு.அகநிலாவின் வரவேற்புரையுடன் ஆரம்பமான இவ்விழாவில் ஆடிக்கூழும் கொழுக்கட்டையும் பரிமாறப்பட்டதோடு கலை நிகழ்ச்சிகளும் இடம்பெற்றன. கலை நிகழ்ச்சிகளில் பங்கேற்றவர்களுக்குத் தமிழ்த்தேசியப் பசுமை இயக்கத்தினால் பரிசுப்பொருட்களும் வழங்கப்பட்டன. விழா நிறைவில் விளையாட்டு மைதானத்தில் மரநடுகையும் மேற்கொள்ளப்பட்டது.

தமிழர்களுக்கே உரித்தான ஒரு பண்பாட்டு அடையாளமான ஆடிப்பிறப்பும் அது சார்ந்த கொண்டாட்டங்களும் தற்போது அருகிவந்துள்ளன. இந்நிலையில், மீளவும் அதனை வெகுசனமயப்படுத்தும் நோக்கிலேயே தமிழ்த்தேசியப் பசுமை இயக்கம் ஆண்டுதோறம் கிராம மட்டத்தில் பொதுமக்களுடன் இணைந்து ஆடிப்பிறப்பைச் சிறப்பான முறையில் கொண்டாடி வருவது குறிப்பிடத்தக்கது.

தமிழ்த்தேசியப் பசுமை இயக்கத்தால்

உலருணவுப் பொதிகள் விநியோகம்

தமிழ்த்தேசியப் பசுமை இயக்கம் பொருளாதாரரீதியாக மிகவும் நலிவுற்றுள்ள குடும்பங்களுக்கு உலர் உணவுப் பொதிகளை வழங்கும் அற்றார் அழிபசி தீர்த்தல் என்ற திட்டத்தை முன்னெடுத்து வருகின்றது. இத்திட்டத்தின் கீழ் நேற்று ஞாயிற்றுக்கிழமை (16.07.2023) நாவற்குழி வடக்கு மற்றும் அராலி மேற்கு ஆகிய பகுதிகளில் இருந்து தெரிவு செய்யப்பட்ட 50 குடும்பங்களுக்கு உலருணவுப் பொதிகள் வழங்கப்பட்டுள்ளன. அத்தியாவசிய உலருணவுப் பொருட்கள் அடங்கிய இப்பொதிகளைக் தமிழ்த்;தேசியப் பசுமை இயக்கத்தின் தலைவர் பொ. ஐங்கரநேசன் அப்பகுதிகளுக்குச் சென்று வழங்கிவைத்துள்ளார்.

ஏற்கனவே பொருளாதார ரீதியாகப் பின்தங்கிய குடும்பங்கள் நாட்டில் தற்போது நிலவும் பொருளாதார நெருக்கடியால் மேலும் மோசமாகப் பாதிக்கப்பட்டுள்ளமை குறிப்பிடத்தக்கது.

வடமாகாண பனைஅபிவிருத்தி வாரம் மாகாணசபையின் ஏற்பாடு

கைவிடவோ மாற்றியமைக்கவோ திணைக்களத்துக்கு அதிகாரமில்லை

பொ.ஐங்கரநேசன் கண்டனம்

வடக்கு மாகாணக் கூட்டுறவு அமைச்சு கூடடுறவுத் திணைக்களத்தையும் பனை, தென்னைவள அபிவிருத்தி கூட்டுறவுச்சங்கங்களையும்; பனை அபிவிருத்திச்சபையையும் இணைத்து ஆண்டுதோறும் யூலை 22 தொடங்கி 28 வரையான ஒரு வார காலப்பகுதியை வடமாகாண பனைஅபிவிருத்தி வாரமாக 2015ஆம் ஆண்டிலிருந்து மிகச்சிறப்பாகக் கொண்டாடி வந்துள்ளது. ஆனால், கடந்த சில வருடங்களாகப் பனை அபிவிருத்தி வாரத்தின் நோக்கத்தைச் சிதைக்கும் வகையில் அதனைக் கொண்டாடாமல் தவிர்த்தோ அல்லது மாற்றியமைத்தோ மாகாணக் கூட்டுறவுத் திணைக்களம் செயற்பட்டு வருகின்றது பனைஅபிவிருத்தி வாரம் வடக்கு மாகாண அமைச்சரவையின் ஒப்புதலுடன் தீர்மானிக்கப்பட்ட ஒன்றாகும். இதனைக் கைவிடவோ, மாற்றியமைக்கவோ கூட்டுறவுத் திணைக்களத்துக்கு எவ்வித அதிகாரமும் இல்லை என்று தமிழ்த் தேசியப் பசுமை இயக்கத்தின் தலைவர் பொ.ஐங்கரநேசன் தனது கண்டனத்தை வெளிப்படுத்தியுள்ளார்.

வடமாகாணக் கூட்டுறவுத் திணைக்களம் ஆடிப்பிறப்பை முன்னிட்டு யூலை 14 தொடங்கி 16 வரையான மூன்று நாட்கள் நல்லூர் கிட்டு பூங்காவில் பனையுற்பத்திப் பொருட்களின் கண்காட்சியை ஏற்பாடு செய்துள்ளது. இது தொடர்பாக பொ.ஐங்கரநேசன் வெளியிட்டுள்ள ஊடக அறிக்கையிலேயே இவ்வாறு தனது கண்டனத்தைத் தெரிவித்துள்ளார்.

அந்த அறிக்கையில் அவர் மேலும் தெரிவிக்கையில்,

தமிழ்மக்களின் பண்பாட்டைப் ‘பனைப் பண்பாடு’ என்று சொல்லும் அளவுக்கு உணவு முதல் உறையுள் வரை எமது வாழ்வியலில் பிரதான இடம் பிடித்துவந்த பனைவளம் தற்போது எமக்கு அந்நியமான ஒரு வளமாக மாறியுள்ளது. பனைப் பொருட்களின் பயன்பாடு அருகிவருவதன் காரணமாக, இப்பனை வளத்தைத் தொழில் மூலாதாரமாகப் பயன்படுத்தி வந்த மக்கள் திரளின் பொருளாதாரம் பெரும் பாதிப்புக்கு ஆளாகியுள்ளது. அத்தோடு, போரக்காலத்தில் பெரும் அழிவைச் சந்தித்த எமது பனைவளம் போருக்குப் பின்னரும் அனுமதியின்றிப் பெருமளவுக்கு அழிக்கப்படுகிறது. இது இயற்கைச் சூழலின் சமநிலையைப் பெரிதும் பாதிப்பதாக உள்ளது.

இவற்றைக் கருத்திற் கொண்டே பனை வளத்தைப் பெருக்கவும், நவீனகாலத்துக்கு ஏற்பப் பனைப் பயன்பாட்டை நுகர்வோரை ஈர்க்கும் வகையில் அபிவிருத்தி செய்யவும், இதன்மூலம் பனைப் பொருளாதாரத்தை விருத்தி செய்யவும் அறிஞர்களினதும் பொதுமக்களினதும் கவனத்தை ஈர்க்கும் விதமாக ஆண்டுதோறும் தாலகாவலர் அமரர் கலாநிதி கந்தையா கனகராசா அவர்களின் நினைவு தினமான யூலை 22ஆம் திகதியில் இருந்து ஒரு வார காலப்பகுதியை வடமாகாண பனை அபிவிருத்தி வாரமாகக் கடைப்பிடிப்பதற்கு வடக்கு மாகாண சபையின் அமைச்சரவை 2015ம் ஆண்டில் ஒப்புதல் வழங்கியுள்ளது.

அமரர் கலாநிதி கந்தையா கனகராசா அவர்கள் பனை அபிவிருத்திச்சபை தோற்றம் பெறுவதற்கு முன்பாகவே தனியொருவராகத் தமிழர் தாயகம் முழுவதும் பனை விதைகளை விநியோகித்து பனந்தோப்புகள் உருவாகக் காரணமாக அமைந்தார். இவர் பனை அபிவிருத்திச் சபையி;ன் இயக்குநர்களில் ஒருவராகவும் இருந்து பனை அபிவிருத்தியில் பெரும் பங்காற்றியவர். இவர் ஆற்றிய பணிகளுக்காக அமரத்துவத்தின் பின்னர் இவருக்கு யாழ்ப்பாணப் பல்கலைக்கழகம் கலாநிதிப் பட்டம் வழங்கிக் கௌரவித்துள்ளது. தாலகாவலரான அன்னாருக்கு உயரிய கௌரவம் வழங்கும் பொருட்டே வடமாகாண பனை அபிவிருத்தி வாரத்துக்குரிய காலப்பகுதியாக, அவரது நினைவு தினமான யூலை 22ஆம் திகதி தொடக்கம் 28ஆம் திகதி வரையான காலப்பகுதி தேர்வு செய்யப்பட்டுள்ளது.

வடக்கு மாகாண சபையின் ஒப்புதலுடன் உயரிய நோக்குடன் கொண்டாடப்பட்டு வந்த பனை அபிவிருத்தி வாரத்தைத் தனியே ஆடிப்பிறப்புக் கூழுக்குத் பனங்கட்டி விற்பதுடன் சுருக்கிக் கொள்வது எவ்விதத்திலும் ஏற்புடையது அல்ல. இதன் பல்பரிமாணத்தை வடமாகாணக் கூட்டுறவுத் திணைக்களம் புரிந்துகொண்டு அடுத்த ஆண்டிலிருந்தாவது உரிய காலப்பகுதியில், உரியமுறையில் கண்காட்சிகள், கலை நிகழ்ச்சிகள், ஆய்வரங்குகளோடு மிகச் சிறப்பாகக் கொண்டாட முன்வர வேண்டும். தவறின் தமிழரின் மாண்புமிகு அடையாளமான பனைக்குத் தவறிழைத்த வரலாற்றுப் பிழையைச் சுமக்க நேரிடும் என்றும் குறிப்பிடப்பட்டுள்ளது.

வடக்கில் சீனித்தொழிற்சாலை இனிப்புத் தடவிய விஷம்

பொ.ஐங்கரநேசன் எச்சரிக்கை!

வவுனியாவில் அந்நிய முதலீட்டுடன் பாரிய சீனித் தொழிற்சாலையொன்றை அமைப்பதற்கும், அதற்குரிய பாரிய கரும்புத் தோட்டங்களை அமைப்பதற்கும் அமைச்சரவை அண்மையில் அவசரம் அவசரமாக ஒப்புதல் வழங்கியுள்ளது. அத்தோடு, தொழிற்சாலையின் அமைவிடத்துக்கெனவும் கரும்புத் தோட்டங்களை அமைப்பதற்கெனவும் முதற்கட்டமாக 74,100 ஏக்கர்கள் அளவு காணியை விடுவிக்கவும் அனுமதி வழங்கியுள்ளது. இத்திட்டத்தை முன்னெடுத்துள்ள தரப்பு, இது போரினால் பாதிக்கப்பட்ட வன்னி மக்களுக்கு வேலை வாய்ப்புகளை வழங்குவதற்கென வாராதுவந்த வரப்பிரசாதம் என்று இனிப்பாய்ச் சிலாகித்து வருகிறது. ஆனால், இதன் உண்மைகள் மிகவும் கசப்பானவை. வடக்கில் சீனித் தொழிற்சாலை இனிப்புத் தடவிய விஷம் என்று தமிழ்த் தேசியப் பசுமை இயக்கத்தின் தலைவர் பொ.ஐங்கரநேசன் எச்சரித்துள்ளார்.

வவுனியாவில் சீனித்தொழிற்சாலையொன்றை அமைப்பதற்கு அமைச்சரவை அனுமதி வழங்கியுள்ளமை தொடர்பாகத் தமிழ்த் தேசியப் பசுமை இயக்கத்தின் தலைமை அலுவலகத்தில் பொ.ஐங்கரநேசன் இன்று வெள்ளிக்கிழமை {07.07.2023} நிகழ்த்திய ஊடகவியலாளர் சந்திப்பிலேயே இவ்வாறு எச்சரித்துள்ளார்.

ஊடகச் சந்திப்பில் அவர் மேலும் தெரிவிக்கையில்,

அபிவிருத்தித் திட்டமொன்றை முன்னெடுக்கும்போது திட்டத்தின் பொருத்தப்பாட்டை அறிந்துகொள்ள நீர் அடிச்சுவடு றயவநச கழழவ pசiவெ} என்ற நீர்த் தேவையே சூழலியற் குறிகாட்டியாக முதலில் கவனத்தில் கொள்ளப்படுகிறது. கரும்பினதும் சீனியினதும் நீர்அடிச்சுவடு மிகவும் உயர்வானது. ஒரு கிலோ கரும்பை உற்பத்தி செய்வதற்கு 210 இலீற்றர் தண்ணீரும் ஒரு கிலோ சுத்திகரிக்கப்பட்ட சீனியை உற்பத்தி செய்வற்கு 1780 இலீற்றர் தண்ணீரும் தேவைப்படுகிறது. கரும்பு வருடம் முழுவதும் நீர் பாய்ச்ச வேண்டிய ஒரு பல்லாண்டுப் பயிருமாகும். இவற்றின் அடிப்படையில் பேராறுகள் எதுவுமே இல்லாத வறண்ட வலயமான வடக்கில் பெருமளவு நீரை விழுங்கும் சீனி உற்பத்தியை முன்னெடுப்பது பேராபத்தாகும். நீர்ச்சமநிலையைக் குழப்பி அத்தியாவசிய உணவுப்பயிர்களின் உற்பத்தியிலும் பாரிய பாதிப்புகளை ஏற்படுத்தும். ஈற்றில் அம்மண்ணைப் பாலையாக்கியும் விடும்.

கரும்பு மிக அதிகளவில் இரசாயன உரங்களையும், பீடைகொல்லி – களைகொல்லி நஞ்சுகளையும் வேண்டி நிற்கும் ஒரு பயிர். தொடர்ச்சியாக விவசாய இரசாயனங்களால் குளிப்பாட்டப்படும் மண்ணில் நுண்ணங்கிகள் அழிந்து தொடர்ந்து பயிரிடமுடியாதவாறு மண் மலடாகி விடுகிறது. கந்தளாய்ச் சீனித்தொழிற்சாலை இழுத்து மூடப்பட்டிருப்பதற்குக் கரும்பில் இருந்து இனிமேலும் அதிக விளைச்சலைப் பெறமுடியாத அளவுக்கு நிலம் தரம் இழந்ததும் ஒரு காரணம். விவசாய இரசாயனங்கள் நீரோடு கலந்து குடிநீரையும் மாசடையச் செய்கிறது. வவுனியா ஏற்கனவே சிறுநீரக நோய்களின் ஆபத்து அதிகமாகவுள்ள மாவட்டமாக அடையாளப்படுத்தப்பட்டுள்ளது. விவசாய இரசாயனங்கள் கலந்த குடிநீரை அருந்தியதால் ஏராளமானோர் சிறுநீரகங்கள் செயலிழந்து அவதிப்படுகின்றனர். இந்நிலையில் கரும்புச் செய்கை வவுனியாவின் நிலத்தினதும் மக்களினதும் ஆரோக்கியத்துக்குப் பெருங்கேடாகவே முடியும்.

கரும்புச் செய்கைக்கும் சீனித்தொழிற்சாலைக்கும் ஒதுக்கப்பட்ட காணியின் அளவு வவுனியாவின் மொத்தப்பரப்பில் ஆறு விழுக்காடுக்கும் அதிகம். இந்தப் பாரிய இடத்தைக் காடுகளை அழித்தே பெறமுடியும். மக்கள் போரினால் இடம்பெயர்ந்ததன் காரணமாகக் கைவிடப்பட்ட மேயிச்சல் தரைகளையெல்லாம் அங்கு மரங்கள் வளர்ந்ததைக் காரணங்காட்டிக் காடுகள் என எல்லைகள் போட்ட வனவிலங்குத் திணைக்களம் இப்போது அதே காடுகளை கரும்புச் செய்கைக்கு விடுவிப்பதற்கு இணங்கியுள்ளது. காலநிலை மாற்றங்களால் பாதிக்கப்படப்போகும் நாடுகளது பட்டியலில் இலங்கையும் அடங்கியுள்ள நிலையில் அதனைக் கருத்திற் கொள்ளாது காடுகளை அழித்து சீனித் தொழிற்சாலையை அமைப்பது குருட்டுத்தனமான முடிவாகும். இது தமிழ் மக்களின் பூர்வீக நிலங்களை அபிவிருத்தி என்ற பெயரால் நிரந்தரமாகவே கையகப்படுத்தும் ஒரு தந்திரமுமாகும்.

சீனித்தொழிற்சாலை சிங்களக் குடியேற்றத்துக்கும் வித்திடும் என்ற சந்தேகமும் உள்ளது. மகாவலி அபிவிருத்தித் திட்டத்தின் நோக்கம் விவசாயத்தை மேம்படுத்தல் என்று சொல்லப்பட்டபோதும் அதன் உள்ளார்ந்த நோக்கம் சிங்களக் குடியேற்றமாகும். அதுவும், குடியேற்றப்படும் இடத்தின் இனவகிதாசாரப்படி இல்லாமல் இலங்கையின் இனவிகிதாசாரத்தின்படியே குடியேற்றங்களை மேற்கொள்வது மகாவலி அதிகார சபையின் எழுதப்படாத அதிகாரம். மகாவலியுடன் இணைக்கப்பட்ட கந்தளாய்க் குளத்தை மையப்படுத்தி நிகழ்ந்த பயிர்ச்செய்கையே தமிழ் நிலமான கந்தளாயை இன்று முற்றுமுழுதாக சிங்களவர்களின் நிலமாக்கியது. வவுனியாவிலும் கரும்புக்கு நீர்பாய்ச்சுகிறோம் என்று சொல்லி வவுனியாவின் குளங்களோடு மகாவலியைத் தொடுத்து நிலங்களை மகாவலி அதிகாரசபை தன்வசமாக்கலாம். மகாவலியில் நீர்வரத்து இருக்கிறதோ இல்லையோ இதனூடாகச் சிங்களக் குடியேற்றம் வருவதற்கான வாய்ப்பு மிக அதிகமாகவே உள்ளது.

போரினால் பாதிக்கப்பட்ட எம்மக்களின் வாழ்வை மேம்படுத்த அபிவிருத்தித் திட்டங்களை முன்னெடுப்பது அவசியம். ஆனால், வடக்கின் மண்ணுக்கும் மக்களுக்கும் பொருத்தமான அபிவிருத்தித் திட்டங்கள் எத்தனையோ இருக்கும்போது எவ்வித்திலும் பொருந்தாத சீனித் தொழிற்சாலையை வரவேற்பது அறிவுடையோரினதோ, தமிழ்த் தேசியப் பற்றாளர்களினதோ செயலாக இருக்காது. நீண்ட நெடிய வலிமிகுந்த தேசிய விடுதபை; போராட்டத்தை முன்னெடுத்த இனம் நாம். இப் போராட்டம் எதிர்கால சந்ததியின் வளமான வாழ்வுக்காக மண்ணிண் வளங்களைக் காப்பாற்றி அவர்களிடம் கையளிப்பதையும் உள்ளடக்கியதுதான். மண்மீட்கப் புறப்பட்ட நாம் அம்மண் பாலையாகுவதற்கோ மலடாகுவதற்கோ எதன் பொருட்டும் அனுமதிக்க முடியாது என்றும் குறிப்பிட்டுள்ளார்.

நாவற்குழியில் பசுமை அறிவொளி

பசுமை இயக்கத்தின் சூழல்தின நிகழ்ச்சி

தமிழ்த்தேசியப் பசுமை இயக்கம் சுற்றுச்சூழல் தினத்தை முன்னிட்டு நாவற்குழியில் நேற்று திங்கட்கிழமை (05.06.2023) பசுமை அறிவொளி நிகழ்ச்சியை நடாத்தியுள்ளது. தமிழ்த்தேசியப் பசுமை இயக்கம் மாணவர்களிடையே சூழல் அறிவைப்புகட்டி விழிப்புணர்வை ஏற்படுத்துவதன் மூலம் அவர்களைச் சூழல் பாதுகாப்பில் பங்குபற்றுநர்களாக்கும் நோக்குடன் பசுமை அறிவொளி என்ற நிகழ்ச்சித் திட்டத்தை முன்னெடுத்து வருகிறது. இதன் தொடர்ச்சியாகவே உலக சுற்றுச்சூழல் தினத்தை முன்னிட்டு நாவற்குழி முத்தமிழ் கிராமத்தில் இந்நிகழ்ச்சி நடைபெற்றுள்ளது.

இந்த ஆண்டின் சுற்றுச்சூழல் தினத்தின் கருப்பொருளாக ஐக்கிய நாடுகள் சபை ‘பிளாஸ்ரிக் மாசைத் தோற்கடிப்போம்’ என்ற கருப்பொருளைத் தேர்வு செய்துள்ளது. இக்கருப்பொருளுக்கு அமைவாகத் தமிழ்த்தேசியப் பசுமை இயக்கத்தின் தலைவர் பொ.ஐங்கரநேசன் இந்நிகழ்ச்சியில் உரையாற்றியதோடு, பங்கேற்ற மாணவர்களுக்கு ‘பிளாஸ்ரிக்கின் பிடியில்’ என்ற கைநூலையும் வழங்கி வைத்தார். அத்தோடு, ரொறன்ரோவின் மனிதநேயக் குரலின் அனுசரணையோடு மாணவர்கள் அனைவருக்கும் அப்பியாசக்கொப்பிகள் வழங்கி வைக்கப்பட்டமையும் குறிப்பிடத்தக்கது.

பிளாஸ்ரிக் மயமாகிறது மனித உடல்

விழித்துக் கொள்ளாவிடில் விபரீதம்

சூழல் தின அறிக்கையில் பொ. ஐங்கரநேசன் எச்சரிக்கை

எங்கு பார்த்தாலும் பிளாஸ்ரிக் மயமாகிவரும் உலகில் மனித உடலும் பிளாஸ்ரிக் மயமாகிக் கொண்டிருக்கிறது. காற்றிலும் நீரிலும் நிரம்பியுள்ள பிளாஸ்ரிக் நுண்துகள்கள் சுவாசத்தின் மூலமும் உணவின் மூலமும் மனித உடலினுள் நுழைந்து நுரையீரலிலும் உள் இழையங்களிலும் தேங்கி வருகிறது. இவ்வாறு வாரமொன்றுக்கு 5 கிராமளவுப் பிளாஸ்ரிக் நுண்துகள்கள் மனித உடலைச் சென்றடைந்து கொண்டிருப்பதாக மருத்துவ விஞ்ஞானிகள் கண்டறிந்துள்ளனர். பலநூறு இரசாயனங்களின் சேர்க்கையினால் ஆன பிளாஸ்ரிக் நுண்துகள்கள் தொடர்பாக விழித்துக் கொள்ளாவிடில் சுவாசக் கோளாறுகள் முதல் புற்றுநோய்கள் வரை பல்வேறு விபரீதங்களை எதிர் கொள்ள நேரிடும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் எச்சரித்துள்ளார்.

ஆண்டுதோறும் சுற்றுச்சூழல் தினம் யூன் 5ஆம் திகதி உலகளாவிய ரீதியில் கடைப்பிடிக்கப்படுகிறது. இத்தினத்தை முன்னிட்டு பொ. ஐங்கரநேசன் விடுத்திருக்கும் ஊடக அறிக்கையிலேயே இவ்வாறு எச்சரித்துள்ளார்.

அந்த ஊடக அறிக்கையில் அவர் மேலும் தெரிவிக்கையில்,

பிளாஸ்ரிக் மனுக்குலத்துக்குப் பெறுமதியான பல பயன்களைத் தந்து கொண்டிருந்தபோதும், கூடவே சீர்செய்ய முடியாத பல மோசமான பாதிப்புகளையும் ஏற்படுத்தி வருகிறது. இயற்கைப் பொருட்கள் யாவும் காலவோட்டத்தில் உக்கிக் கரைந்துபோக, செயற்கைப் பிளாஸ்ரிக் மட்டும் அதன் பிரம்மாவான மனிதனிடம் சாகாவரம் வாங்கி வந்துள்ளது. காலன் இல்லாததால் கழிவுகளாக மலைபோலக் குவிந்து சூழலுக்குத் தாங்கொணாத உபாதைகளை ஏற்படுத்தி வருகிறது. இன்று நிலம், நீர், காற்று என்று இயற்கையின் மேனி முழுவதும் பிளாஸ்ரிக் கழிவுகளின் கோரப் பற்கள் ஆழப்பதிந்துள்ளன.

பிளாஸ்ரிக் கழிவுகள் நிலத்தைப் போர்த்தி மண்ணினுள் மழைநீர் இறங்குவதை அனுமதிக்காததோடு காற்றுப்புகுவதையும் தடை செய்கிறது. பிளாஸ்ரிக் கழிவுகளை உயிரினங்கள் உணவோடு சேர்த்தும், உணவென நினைத்தும் விழுங்குவதால் தரையில் யானைகள் முதல் கடலில் மீன்கள் வரை பல மில்லியன் கணக்கான உயிர்கள் ஆண்டுதோறும் அற்ப ஆயுளில் பலியாகி வருகின்றன. பிளாஸ்ரிக் கழிவுகளை எரிப்பதால் வெளிவரும் கொடும் டையொக்சின் வாயு மனிதர்களை மலடாக்கி வருகிறது. தற்போது பிளாஸ்ரிக் கழிவுகள் நுண்துகள்களாக மனித உடலினுள்ளும் தேங்க ஆரம்பித்துள்ளது.

பிளாஸ்ரிக்கின் நல்லாட்சியைவிடச் சமநிலையைச் சீர்குலைத்து இயற்கையைச் சாகடிக்கும் அதன் வல்லாட்சியே மேலோங்கியுள்ளது. இதனாலேயே ஐக்கிய நாடுகள் சபை 2023ஆம் ஆண்டின் சுற்றுச்சூழல் தினக் கவனக்குவிப்பாகப் ‘பிளாஸ்ரிக் மாசைத் தோற்கடிப்போம்’ என்ற கருப்பொருளைத் தேர்வு செய்துள்ளது. முற்றுகையிட்டிருக்கும் பிளாஸ்ரிக் கழிவுகளில் இருந்து இயற்கையையும் எம்மையையும் உடனடியாக மீட்டெடுப்பது இலேசானதொன்றல்ல. எனினும், அதன் தாக்குதல்களின் வீரியத்தைக் குறைக்கவல்ல வியூகங்களையேனும் வகுக்கவேண்டிய கட்டாய நிலைக்கு இன்று நாம் தள்ளப்பட்டுள்ளோம்.

தேவையற்ற பிளாஸ்ரிக் பொருட்களை வாங்குவதைத் தவிர்ப்பது எம்முன்னால் உள்ள முதற்தெரிவாகும். இயன்றவரை நீண்டகாலம் பயன்படுத்துவது, கழிக்க முன்னர் இன்னொருமுறை பயன்படுமா என்று சிந்திப்பது, கழிவுகளில் இருந்து பிளாஸ்ரிக்கைப் பிரித்தெடுப்பது போன்ற கழிவு மேலாண்மைகளையும் கையில் எடுக்க வேண்டும். கூடவே, ஒரு நாள் பயன்படுத்தித் தூக்கி வீசும் பிளாஸ்ரிக்குக்கு மாற்றாகக் கடதாசி, துணி, இலைகள் போன்றவற்றினாலான இயற்கைப் பொருட்களுக்குத் தாமதமின்றித் திரும்பவேண்டும். தவறின் பிளாஸ்ரிக் அதனைப் பிரசவித்த மனுக்குலத்தையே விரைவில் தின்று செரித்து விடும் என்றும் குறிப்பிட்டுள்ளார்.

வாக்காளர் கணக்கெடுப்புக்கான காலக்கெடு - மே 31

பதிவை உறுதிசெய்யுமாறு பசுமை இயக்கம் வேண்டுகோள்

இலங்கைத் தேர்தல்கள் ஆணையம் 2023ஆம் ஆண்டுக்கான வாக்காளர் கணக்கெடுப்பின் இறுதித் திகதி மே மாதம் 31ஆம் திகதி என அறிவித்துள்ளது. இக்காலப்பகுதிக்குள் கிராம சேவையாளர்கள் கணக்கெடுப்பை மேற்கொள்வதற்கு வீடுகளுக்கு வருகை தராவிடில் வாக்காளர்கள் உடனடியாகத் தங்கள் பகுதிக்குரிய கிராம சேவையாளரைத் தொடர்புகொள்ள வேண்டும் என்றும் தேர்தல் ஆணையம் கேட்டுக்கொண்டுள்ளது. தேர்தல் ஆணையத்தின் இந்த அறிவிப்பை உதாசீனம் செய்யாது வாக்காளர்கள் அனைவரும் இந்த ஆண்டுக் கணக்கெடுப்பில் தங்கள் பெயர் பதிவு செய்யப்படுவதை உறுதிசெய்துகொள்ள வேண்டும் என்று தமிழ்த் தேசியப் பசுமை இயக்கம் வேண்டுகோள் விடுத்துள்ளது.

இதுதொடர்பாகத் தமிழ்த் தேசியப் பசுமை இயக்கத்தின் பொதுச்செயலாளர் மகேசன் கஜேந்திரன் அவர்கள் ஊடகங்களுக்கு அனுப்பி வைத்திருக்கும் அறிக்கையிலேயே இவ்வாறு தெரிவிக்கப்பட்டுள்ளது.

அந்த அறிக்கையில்,

வாக்காளர் கணக்கெடுப்பில் ஒருதடவை பெயர்களைப் பதிவுசெய்தால் போதுமானது எனக்கருதிப் பலர் தொடர்கணக்கெடுப்புக் குறித்து அக்கறை செலுத்துவதில்லை. இதனால், புதிய தேருநர் இடாப்பில் அவர்களது பெயர் நீக்கப்பட்டு விடுகிறது. இதைக் கருத்திற்கொண்டு கிராமசேவையாளர்கள் தற்போது மேற்கொண்டுவரும் 2023ஆம் ஆண்டுக்கான கணக்கெடுப்பில் வாக்காளர்கள் ஒவ்வொருவரும் தங்கள் பெயர் இடம்பெறுவதை உறுதிசெய்வது அவசியமாகும்.

இலங்கையில் வாக்காளர் தினம் கொண்டாடப்பட்டுவரும் யூன் 01 ஆம் திகதியன்று 18 வயது பூர்த்தியடைந்த இலங்கைக் குடிமகனாகவுள்ள எவரும் வாக்களிக்கும் உரிமை பெற்றவர்களாகக் கருதப்படுவார்கள். வாக்காளர்களாகத் தகுதி பெற்றுள்ள புதியவர்களும் இந்தச் சந்தர்ப்பத்தைப் பயன்படுத்தித் தேருநர் இடாப்பில் தங்கள் பெயர்களைப் பதிவு செய்துகொள்ள வேண்டும். இதன்மூலம் மாத்திரமே வாக்களிக்கும் உரிமை உறுதி செய்யப்படும்.

ஒவ்வொரு மாவட்டத்திலுமுள்ள வாக்காளர்களின் எண்ணிக்கையின் அடிப்படையிலேயே பாராளுமன்ற உறுப்பினர்களின் எண்ணிக்கை தீர்மானிக்கப்படும். உதாரணமாக, 1989ஆம் ஆண்டு யாழ் - கிளிநொச்சி தேர்தல் மாவட்டத்தில் 11 பாராளுமன்ற உறுப்பினர்கள் தெரிவுசெய்யப் பட்டிருந்தனர். தற்போது வாக்காளர்களின் எண்ணிக்கை வீழ்ச்சியடைந்ததன் காரணமாகப் பாராளுமன்ற உறுப்பினர்களின் எண்ணிக்கை 7ஆகக் குறைவடைந்துள்ளது.

வாக்காளர்களின் எண்ணிக்கை குறைந்து செல்லுதல் பாராளுமன்ற உறுப்பினர்களின் ஆசனங்களில் மாத்திரம் குறைவை ஏற்படுத்தும் ஒன்றல்ல. மாவட்டத்தின் அபிவிருத்திக்கு ஒதுக்கப்படும் நிதி, மாவட்டத்திலிருந்து பல்கலைக்கழகத்துக்குத் தெரிவாகும் மாணவர்களின் எண்ணிக்கை போன்றவற்றிலும் குறைவை ஏற்படுத்தும். அந்தவகையில், வாக்களிக்கத் தகுதி பெற்ற அனைவரும் தங்களை வாக்காளராகப் பதிவு செய்தல் ஒரு தேசியக் கடமையாகும்.

எனவே, வாக்காளர்கள் அனைவரும் தாமதமின்றித் தமது கிராமசேவையாளருடன் தொடர்பு கொண்டு இந்த ஆண்டுக்கான வாக்காளர் கணக்கெடுப்பில் தங்கள் பெயர் இடம்பெறுவதைத் தவறாது உறுதிசெய்துகொள்ள வேண்டும் என்றும் குறிப்பிடப்பட்டுள்ளது.

தமிழ்த்தேசியப் பசுமை இயக்கத்தால்

முள்ளிவாய்க்கால் கஞ்சி வார்ப்பு

முள்ளிவாய்க்கால் நினைவேந்தல் வாரத்தின் இறுதி நாளான இன்று வியாழக்கிழமை (18.05.2023) தமிழ்த்தேசியப் பசுமை இயக்கத்தினால் அதன் தலைமைப் பணிமனையில் முள்ளிவாய்க்கால் கஞ்சி காய்ச்சி பகிர்ந்தளிக்கப்பட்டது. போரில் புதுமாத்தளனில் தனது கணவனைப் பலிகொடுத்த திருமதி தக்சாயினி அருள்நேசநாதன் நினைவுத்தீபம் ஏற்றி வைக்க, போரில் கொல்லப்பட்டவர்களுக்கு மௌன அஞ்சலி செலுத்தப்பட்டது. இதனைத் தொடர்ந்து முள்ளிவாய்க்கால் கஞ்சி வழங்கல் இடம்பெற்றது.

இக்கஞ்சி வழங்கல் நிகழ்ச்சியில் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன், பொதுச்செயலாளர் ம. கஜேந்திரன், துணைப் பொதுச்செயலாளர் சண்.தயாளன், பொருளாளர் க. கேதீஸ்வரநாதன் ஆகியோர் பங்கேற்றிருந்தனர். வீதியால் பயணித்தோர் மற்றும் பாடசாலை மாணவர்கள் என நூற்றுக்கணக்கானோர் முள்ளிவாய்க்கால் கஞ்சியை உணர்வுடன் வாங்கி அருந்திச்சென்றனர்.

2009ஆம் ஆண்டு இறுதிப்போரில் முள்ளிவாய்க்காலில் மேற்கொள்ளப்பட்ட தமிழ் இனவழிப்பை நினைவுகூரும் முகமாக மே 12 தொடங்கி 18 வரையான நாட்கள் முள்ளிவாய்க்கால் நினைவேந்தல் வாரமாகத் தமிழ் மக்களால் உணர்வெழுச்சியுடன் கடைப்பிடிக்கப்படுகிறது. இந்நாட்களில், போரின் இறுதிக்காலத்தில் முற்றுகைக்குள் ஆளாகியிருந்த தமிழ் மக்களின் ஒரேயொரு உயிர்காப்பு ஆகாரமாக விளங்கிய கஞ்சி முள்ளிவாய்க்கால் கஞ்சி என்ற பெயரில் வழங்கப்பட்டு வருகிறது. போர்க்காலத்தில் தமிழ் மக்கள் பட்ட வதைகளை நினைவிற்கொள்ளும் முகமாகவும், பட்ட வலிகளை அடுத்த தலைமுறைக்குக் கடத்திச் செல்லும் விதமாகவும் முள்ளிவாய்க்கால் கஞ்சி வார்ப்பு ஒரு குறியீடாக இடம்பெற்று வருகின்றமை குறிப்பிடத்தக்கது.

கந்தரோடையில் புதிதாக விகாரை அமைக்கப்படுவதற்கு

எதிரான போராட்டம்

இலங்கை அரசாங்கம் வடக்குக்கிழக்கு எங்கும் பௌத்த விகாரைகளைப் புதிதாக அமைத்து வருவதன் தொடர்ச்சியாகக் கந்தரோடையிலும் அதற்கான பணிகள் முன்னெடுக்கப்பட்டுள்ளன. கந்தரோடையில் தமிழ்ப் பௌத்தத் துறவிகளின் சமாதிகள் காணப்படும் இடத்திற்கு அருகாமையில் உள்ள தனியார் காணியொன்றை நாடாளுமன்ற உறுப்பினர் திலங்க சுமதிபால கொள்வனவு செய்து விகாரை கட்டுவதற்கு வழங்கியுள்ளார்.

தொல்லியல் திணைக்களத்தினால் பாதுகாக்கப்பட்ட பிரதேசமாக அறிவிக்கப்பட்டுள்ள தமிழ்ப் பௌத்தத் துறவிகளின் சமாதிகள் அமைந்துள்ள இடத்திலும் புத்தர் சிலையொன்று நிறுவப்பட்டு இராணுவம் பாதுகாப்புக்காக நிறுத்தப்பட்டுள்ளது. இலங்கை அரசாங்கம் தொடர்ச்சியாகத் தமிழர் பிரதேசங்களில் மேற்கொண்டுவரும் பௌத்த மயமாக்கலைக் கண்டித்தும் கந்தரோடையில் புதிதாக விகாரை அமைப்பதை நிறுத்துமாறு கோரியும் பொது அமைப்புகள், பிரதேச மக்கள் மற்றும் அரசியல் தரப்பினர் ஒருங்கிணைந்து இன்று ஞாயிற்றுக்கிழமை (07.05.2023) ஆர்ப்பாட்டப்போராட்டம் ஒன்றை முன்னெடுத்திருந்தனர்.

தமிழ்ப் பௌத்தத் துறவிகளின் சமாதிகள் அமைந்துள்ள இடத்திலிருந்து ஊர்வலமாகப் புறப்பட்ட போராட்டக்காரர்கள் புதிதாக விகாரை அமையவுள்ள இடத்திற்குச் சென்று அங்கு போராட்டத்தை முன்னெடுத்தனர். இப்போராட்டத்தில் தமிழ்த்தேசியப் பசுமை இயக்கமும் கலந்துகொண்டிருந்தது.

வடக்குக்கிழக்கைத் தனித்தனியாகக் கையாளும்

ரணிலின் தந்திரத்துக்குப் பலியாக வேண்டாம்

நாடாளுமன்ற உறுப்பினர்களிடம் பொ. ஐங்கரநேசன் வேண்டுகோள்

இனப்பிரச்சினைக்கு விரைந்து தீர்வு காண்பேன் என்று கூறிவருகின்ற ஜனாதிபதி ரணில் விக்கிரமசிங்க அதற்கான பேச்சுவார்த்தைகளுக்கு அழைப்பு விடுத்திருக்கிறார். முதற்கட்டமாகத் தமிழ்த்தேசியக் கூட்டமைப்பின் நாடாளுமன்ற உறுப்பினர்களுடன் மே 09ஆம் திகதி பேசவுள்ள ஜனாதிபதி, மே 11, 12, 13ஆம் திகதிகளில் வடக்கு மாகாணத்தைப் பிரதிநிதித்துவப்படுத்தும் நாடாளுமன்ற உறுப்பினர்களைச் சந்திப்பதற்கான அழைப்பையும் விடுத்திருக்கிறார். வடக்குக்கிழக்கைத் தனித்தனியாகக் கையாளும் ரணிலின் இந்தத் தந்திரத்துக்கு எமது நாடாளுமன்ற உறுப்பினர்கள் பலியாக வேண்டாம் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் வேண்டுகோள் விடுத்துள்ளார்.

ஜனாதிபதி இனப்பிரச்சினைக்கான தீர்வு பற்றிப் பேசுவதற்கு விடுத்திருக்கும் அழைப்புத் தொடர்பாக பொ. ஐங்கரநேசன் வெளியிட்டுள்ள ஊடகஅறிக்கையிலேயே இந்த வேண்டுகோளை விடுத்துள்ளார்.

அந்த அறிக்கையில் அவர் தொடர்ந்து தெரிவிக்கையில்,

ஜனாதிபதி விடுக்கும் அழைப்பொன்றைத் தமிழர்தரப்பு நிராகரிக்க முடியாது. அவர் தீவிர சிங்கள-பௌத்த மேலாதிக்க நிலைப்பாடு உடையவராக இருப்பினுங்கூட நாட்டின் தலைவர் என்ற ரீதியில் இனப்பிரச்சினைக்கான தீர்வுக்கு அவருடன் பேசியே ஆகவேண்டும். ஆனால், தனித்தனிக்கட்சிகளாக அல்லாது அனைத்துத் தமிழ்த்தேசியக் கட்சிகளின் நிலைப்பாடுகளையும் உள்வாங்கி ஒருமித்த தமிழ்த்தேசியத்தின் குரலாகப் பேச்சுவார்த்தை மேடையில் அமருதல் வேண்டும். அப்போதே பேச்சுவார்த்தையை வலுவுடன் எதிர்கொள்ளமுடியும்.

தமிழ் மக்களின் இனப்பிரச்சினையை வடக்குக்கான பிரச்சினையாகத் தென்னிலங்கை உருவகித்து வருகிறது. கிழக்கு மாகாணத்தில் திட்டமிடப்பட்ட குடியேற்றங்களினால் தமிழ் நாடாளுமன்ற உறுப்பினர்களின் பிரதிநிதித்துவம் வெகுவாகக் குறைக்கப்பட்டுள்ளது. இவர்களிலும் அரச ஆதரவு நிலைபாடு உடையவர்களே அதிகம். இந்நிலையில் பேச்சுவார்த்தை மேடையில் வடக்கும் கிழக்கும் தனித்தனியாகப் பங்கேற்பது தமிழ்த்தேசியத்தின் குரலைப் பலவீனப்படுத்துவதாகவே அமையும்.

ரணில் விக்கிரமசிங்க தந்திரமான அரசியல் நகர்வுகளுக்கு மிகவும் பிரசித்தமானவர். நல்லாட்சிக் காலாத்தில் அவர் ஆரம்பித்த தீர்வுத்திட்டம் பிசுபிசுத்துப்போனதையும் நாடறியும். அவரது தற்போதைய பேச்சுவார்த்தைக்கான அழைப்பின் பின்னால் இருக்கக்கூடிய அபாயங்களைத் தமிழ்த்தேசியக் கூட்டமைப்புப் புரிந்துகொள்ளவேண்டும். தமிழர்தரப்பில் தாமே பெரும்பாண்மை என்ற இறுமாப்பைப் புறந்தள்ளி, ஏனைய தமிழ்த்தேசியக் கட்சிகளின் கருத்துகளையும் உள்வாங்கித் தனது சந்திப்பின்போது பிரதிபலிக்க வேண்டும்.

தமிழ்த்தேசியக் கூட்டமைப்பு தனது சந்திப்பில் ஜனாதிபதி வடக்குக்கிழக்கு நாடாளுமன்ற உறுப்பினர்களைத் தனியாகச் சந்திக்கும் அழைப்பை அடியோடு நிராகரிக்க வேண்டும். வடக்குக்கிழக்கு நாடாளுமன்ற உறுப்பினர்கள் அனைவரையும் ஒன்றாகச் சந்திப்பதற்கான கோரிக்கையை அழுத்தமாக முன்வைக்க வேண்டும். தவறின், ரணில் விக்கிரமசிங்கவின் தந்திரத்துக்கு முன்னால் மீண்டும் தோற்றவர்களாகிவிடுவோம். மீண்டும் மீண்டும் தவறிழைத்த தரப்பாகவே தமிழர்கள் இருந்ததாக வரலாறும் பதிவுசெய்ய நேரிடும் என்றும் குறிப்பிட்டுள்ளார்.

தையிட்டியில் சட்டவிரோத புத்தவிகாரையை அகற்றக்கோரிப் போராட்டம்

யாழ்ப்பாணத்தில் வலிகாமம் வடக்கு பிரதேச எல்லைக்கு உட்பட்ட தையிட்டியில் இராணுவம் நூறு அடி உயரமான புத்தவிகாரை ஒன்றை அமைத்து வருவதற்கு எதிராக இன்று அப்பகுதி மக்களும் அரசியல் தரப்பினரும் இணைந்து கவனயீர்ப்புப் போராட்டம் ஒன்றை முன்னெடுத்திருந்தனர்,கடந்த 40 ஆண்டுகளுக்கு மேலாகப் பொதுமக்களின் காணிகளைக் கையகப்படுத்தியிருக்கும் இராணுவம் அவர்களிடம் காணிகளை விடுவிக்காது சட்டவிரோதமான முறையில் அப்பகுதியில் புத்தவிகாரையை அமைத்துவருகின்றது.

பொதுமக்களின் காணிகளை அவர்களிடமே மீளவும் ஒப்படைக்கக்கோரியும், புத்தவிகாரையை உடனடியாக அகற்றக்கோரியும் இப்போராட்டம் விகாரைக்கு முன்பாக ஒழுங்கு செய்யப்பட்டிருந்தது.இப்போராட்டத்தை வெசாக் தினமான ஜூன் 5ஆம் திகதிவரை தொடர்ந்து முன்னெடுப்பதற்குத் தீர்மானிக்கப்பட்டுள்ளது. பௌத்த மயமாக்கலுக்கு எதிர்ப்பைத்தெரிவிக்கும் முகமாகவும், போராட்டத்தில் ஈடுபட்ட காணிச் சொந்தக்காரர்களுக்கும் பொதுமக்களுக்கும் ஆதரவைத் தெரிவுக்கும் முகமாகவும் தமிழ்த்தேசியப் பசுமைஇயக்கமும் இப்போராட்டத்தில் கலந்து கொண்டிருந்தது.

நல்லூரில்

எழுச்சி பூர்வமாக இடம்பெற்ற

பசுமை இயக்கத்தின்

செம்பசுமை மேதினம்

தமிழ்த் தேசியப் பசுமை இயக்கத்தின் செம்பசுமை மேதினப் பொதுக் கூட்டம் நேற்;று திங்கட்கிழமை (01.05.2023) நல்லூரில் எழுச்சி பூர்வமாக இடம்பெற்றது. நல்லூர் இளங்கலைஞர் மன்ற மண்டபத்தில் நடைபெற்ற இப்பொதுக் கூட்டத்துக்குத் தமிழ்த் தேசியப் பசுமை இயக்கத்தின் இணைப்பாளர் நா.பார்த்தீபன் தலைமை தாங்கினார். யாழ்ப்பாணப் பல்கலைக்கழகத்தின் அரசறிவியல்துறைத் தலைவர் பேராசிரியர் கே.ரி.கணேசலிங்கம் ,அரசியல் ஆய்வாளர் நிலாந்தன் ,தமிழ்த் தேசிய வாழ்வுரிமை இயக்கத்தின் தலைவர் வி.எஸ்.சிவகரன் தமிழ்த் தேசியப் பசுமை இயக்கத்தின் தலைவர் பொ.ஐங்கரநேசன் ஆகியோர் சிறப்புரை ஆற்றியிருந்தார்கள்.

உலகம் பூராவும் கொரோனாப் பெருங்கொள்ளை நோய் தொழில் முடக்கத்தை ஏற்படுத்திப் பொருளாதாரத்தைப் பாரியளவில் வீழ்ச்சியடையச் செய்துள்ளது. இந்நிலையில்,காலநிலை மாற்றம் காரணமாக விரைவில் பில்லியன் கணக்கானோர் தொழில் வாய்ப்பை இழக்க வேண்டி ஏற்படுமென்று ஐக்கியநாடுகள் சபை எச்சரித்துள்ளது. இதனைக் கருத்திற்கொண்டே தமிழ்த் தேசியப் பசுமை இயக்கம் தொழிலாளர் தினத்தைச் ‘சுற்றுச்சூழல் பாதுகாப்பே உழைப்புக்கான உத்தரவாதம்’ என்ற கருப்பொருளில் செம்பசுமை மேதினமாகக் கொண்டாடி வருவது குறிப்பிடத்தக்கது.

வாழ்க்கைக்கான கல்வியை மாணவர்கள் பெறுவதற்கு

எமது பெற்றோர்களே தடையாக இருக்கிறார்கள்

ஐங்கரநேசன் சுட்டிக்காட்டு

பாடசாலைக் கல்வியும் பல்கலைக்கழகக் கல்வியும் மட்டுமே ஒரு மாணவனை முழு மனிதனாக்கும் என்ற நம்பிக்கை பெரும்பாலான பெற்றோர்களிடம் இருக்கிறது. ஆனால், ஒரு மாணவனை முழு மனிதனாக்கும் வாழ்க்கைக்கான கல்வி வகுப்பறைகளுக்கு வெளியேயே இருக்கிறது. துரதிஸ்டவசமாக அந்தக் கல்வியை மாணவர்கள் பெறுவதற்கு எமது பெற்றோர்களே தடையாக இருக்கிறார்கள் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

தமிழ்த்தேசியப் பசுமை இயக்கத்தினால் முன்னெடுக்கப்பட்டுவரும் பசுமை அறிவொளி நிகழ்ச்சி நேற்று சனிக்கிழமை (29.04.2023) நல்லூர் இளங்கலைஞர் மன்ற மண்டபத்தில் நடைபெற்றது. நூற்றுக்கணக்கான மாணவர்களும் பெற்றோர்களும் கலந்துகொண்டிருந்த இந்நிகழ்ச்சியில் உரையாற்றும்போதே பொ. ஐங்கரநேசன் இவ்வாறு குறிப்பிட்டுள்ளார்.

அவர் அங்கு தொடர்ந்து உரையாற்றுகையில்,

அனுபவத்தைவிட சிறந்த ஆசான் உலகில் வேறெதுவும் இருக்கமுடியாது. ஆனால், அந்த அனுபவத்தைப் பெறமுடியாதவாறு பாடசாலை வகுப்பறைகளுக்குள்ளும் தனியார் கல்வி நிறுவனங்களின் கொட்டகைகளுக்குள்ளுமே எமது மாணவர்களின் பெரும்பொழுது கழிகிறது. பிறநிகழ்ச்சிகளில் மாணவர்கள் கலந்துகொண்டால் கல்வி பாதிக்கப்படும் என்றே பெற்றோர்கள் கருதுகிறார்கள். இதனால், உயர்ந்த சித்திகளைப் பெற்றிருந்தாலுங்கூட கல்வியை முடித்து வெளியே வரும் மாணவன் வாழ்க்கையில் தடுமாற நேரிடுகின்றது.

வாள்வெட்டும், போதைப்பொருள் பாவனையும் என்று எமது பண்பாட்டுச் சூழல் சீர்கெட்டிருக்கும் நிலையில் பிள்ளைகளை வெளியே அனுப்பினால் அவர்களும் தவறாக வழிநடத்தப்படுவார்கள் என்று பெற்றோர்கள் அஞ்சுகிறார்கள். வெளியே மாத்திரமல்ல ; இன்று பிரபல்யமான பாடசாலைகளில் பயிலுகின்ற மாணவர்கள்கூட போதைக்கு அடிமையாகி இருக்கிறார்கள். எனவே, பெற்றோர்கள் பிள்ளைகள் மீது சந்தேகம் கொள்ளாமல் அதேசமயம் அவர்களைக் கண்காணித்தவாறு இதர நிகழ்ச்சிகளிலும் மாணவர்கள் பங்கேற்பதற்கு அனுமதிக்க வேண்டும்.

வகுப்பறைகளுக்கு வெளியே இயற்கை எங்களுக்கு ஏராளமான விடயங்களைக் கற்றுத் தருகிறது. இயற்கையைப் புரிந்துகொண்டதும் இயற்கையின் மீதான நேசிப்புத் தானாகவே ஏற்பட்டுவிடும். இயற்கையை நேசிப்பவர்கள் சுற்றுச்சூழலைச் சீரழிக்காதவாறு இயற்கையுடன் இசைந்து வாழ்வதற்குக் கற்றுக்கொள்வார்கள். அதுமாத்திரமல்ல, மனிதன் உட்பட சகல உயிரிகளையும் நேசிக்க ஆரம்பிப்பார்கள். சகமனிதர்கள் மீதான நேசமே இன்று சமூக வன்முறைகளைக் களைவதற்கான தீர்வாகவும் அமையும் என்றும் தெரிவித்துள்ளார்.

நல்லூரில் பசுமை இயக்கத்தின்

பசுமை அறிவொளி நிகழ்ச்சி

தமிழ்த்தேசியப் பசுமை இயக்கத்தின் பசுமை அறிவொளி நிகழ்ச்சி நேற்று சனிக்கிழமை (29.04.2023) நல்லூரில் நடைபெற்றது. மாணவர்களுக்குச் சுற்றுச்சூழல் பற்றிய அறிவையூட்டிச் சூழல் விழிப்புணர்வை ஏற்படுத்துவதன் மூலம் அவர்களைச் சூழற்பாதுகாப்பில் பங்கேற்க வைக்கும் நோக்குடனும், அவர்களின் பன்முக ஆளுமையை விருத்திசெய்யும் நோக்குடனும் தமிழ்த்தேசிய பசுமை இயக்கம் பசுமை அறிவொளி என்ற பெயரில் மாணவர்களுக்கான வலுவூட்டல் திட்டமொன்றை முன்னெடுத்து வருகிறது. இதன் தொடர்ச்சியாகவே நல்லூரில் இளங்கலைஞர் மன்ற மண்டபத்தில் இந்நிகழ்ச்சி இடம்பெற்றுள்ளது.

ஓய்வுநிலைப் பிரதிக்கல்விப் பணிப்பாளர் கௌரி முகுந்தன் தலைமையில் நடைபெற்ற இந்நிகழ்ச்சியில் கனடா உதயன் பத்திரிகையின் பிரதம ஆசிரியரும், ரொறன்ரோவின் மனித நேயக் குரல் அமைப்பின் தாபகத் தலைவருமான ஆர்.என். லோகேந்திரலிங்கம் பிரதம விருந்தினராகக் கலந்துகொண்டிருந்தார். சிறப்புரைஞர்களாகத் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன், நீர்ப்பாசனத் திணைக்களப் பொறியியலாளர் ச.சர்வராஜா ஆகியோர் பங்கேற்றிருந்தார்கள்.

ஓய்வுநிலை ஆசிரியர் பா. காசிநாதன் வரவேற்புரையாற்றியிருந்த இந்நிகழ்ச்சியில் நூற்றுக்கணக்கான மாணவர்களும் பெற்றோர்களும் ஆர்வத்துடன் கலந்துகொண்டிருந்தார்கள். கலந்துகொண்டிருந்த மாணவர்கள் அனைவருக்கும் ரொறன்ரோவின் மனித நேயக் குரல் அனுசரணையுடன் சூழல் விழிப்புணர்வுக் குறிப்பேடுகள் வழங்கி வைக்கப்பட்டமையும் குறிப்பிடத்தக்கது.

பூமி தினத்தில் வெப்ப அலைகளின் மூலம்

பூமி எமக்கான செய்தியை அனுப்பியுள்ளது

-பொ. ஐங்கரநேசன் சுட்டிக்காட்டு

பூமியின் வளங்களை வருங்காலச் சந்ததிகளுக்காகப் பாதுகாக்கவேண்டியதன் அவசியத்தை வலியுறுத்தி ஆண்டுதோறும் ஏப்ரல் 22ஆம் திகதி பூமி தினம் கொண்டாடப்படுகிறது. பூமி தினம் மட்டுமல்ல ; சுற்றுச்சூழல் தினம், உயிர்ப்பல்வகைமை தினம், தண்ணீர் தினம், மண் தினம், சமுத்திரங்கள் தினம், வனவிலங்குகள் தினம், மலைகள் தினம், காடுகள் தினம், ஓசோன் பாதுகாப்புத் தினம் என்று சர்வதேச நாட்காட்டியில் ஏனைய விடயங்கள் தொடர்பான தினங்களைவிடப் பூமியைப் பாதுகாப்பதற்கான தினங்களே அதிகம். எனினும் எமது தலைமுறைக்குக்கூட மிச்சம்மீதி எதையுமே விட்டுவைக்காத வேகத்தில் வளங்களை நாம் சுரண்டி வருகிறோம். இவற்றுக்கான எதிர்வினைகளைப் பூமி அவ்வப்போது ஆற்றிவருகின்றபோதும் நாம் கண்டுகொள்வதாக இல்லை. இந்தப் பூமி தினத்திலும் வெப்ப அலைகளின் மூலம் பூமி 'இயற்கையை நீ அழித்தால் இயற்கையால் நீ அழிவாய்' என்று எமக்கான வலுவான செய்தியை அனுப்பியுள்ளது என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

பூமி தினம் தொடர்பாக பொ. ஐங்கரநேசன் வெளியிட்டுள்ள (22.04.2023) ஊடக அறிக்கையிலேயே இவ்வாறு சுட்டிக்காட்டியுள்ளார்.

அந்த அறிக்கையில் அவர் மேலும் குறிப்பிடுகையில்,

பூமியின் மத்திய கோட்டுப் பகுதியில் அமைந்துள்ள தென்னாசிய நாடுகளில் கோடைகால மாதங்களில் அதிக வெப்பநிலை நிலவுவது வழமை. ஆனால், அண்மைய வருடங்களில் இக்காலப்பகுதியில் வழமைக்கு மாறாகத் தாங்கொணாத வெப்பம் உணரப்பட்டுள்ளது. இந்தியாவில் 2022ஆம் ஆண்டு மார்ச் மாதம் கடந்த ஒரு நூற்றாண்டின் மார்ச் மாதங்களில் நிலவிய வெப்பநிலையைவிட மிகக் கூடுதலான வெப்பநிலை பதிவாகியுள்ளது. மார்ச் தொடங்கி மே மாதம் வரையில் 280 தடவைகள் வெப்ப அலைகளின் தாக்குதலுக்கு ஆளாகியுள்ளது. இந்த ஆண்டும் சித்திரையில் கடந்த ஒரு நூற்றாண்டின் சித்திரை மாதங்களில் நிலவியதைவிட கூடுதலான வெப்பநிலை பதிவாகியுள்ளது. வெப்ப அலைகளின் தாக்குதலுக்கு இலங்கையும் தப்பவில்லை.

தாக்குகின்ற வெப்பஅலைகளின் எண்ணிக்கையும் அவற்றின் சூட்டுத்திறனும் அண்மைய வருடங்களில் அதிகரித்து வருவதற்குப் பூமியின் வெப்பநிலை அதிகரித்து வருவதே பிரதான காரணமாகும். நாம் பெற்றோலியப் பொருட்களை அளவுகணக்கின்றி எரித்துத்தள்ளுவதும், கரிக்காற்றை உறிஞ்சவேண்டிய காடுகளை வரம்பின்றி அழித்துத்தள்ளுவதுமே பூமி சூடாகி வருவதற்கான காரணங்களாகும். காலநிலை மாற்றம் குறித்த அரசாங்கங்களுக்கிடையேயான குழு இன்னும் இருபது வருடங்களில் பூமியின் சராசரி வெப்பநிலை 1.5பாகை செல்சியஸ் அளவால் அதிகரிக்கும் என்று எச்சரித்திருக்கிறது. இது வருங்காலங்களில் நாம் வெப்ப அலைகளின் தாக்குதல்களுக்கு மேலும் மிகமோசமாக ஆளாகவுள்ளோம் என்பதற்கான எச்சரிக்கையாகும்.

வெப்ப அலைகள் எமது இதயம், நுரையீரல், சிறுநீரகங்களின் ஆரோக்கியத்தைப் பாதிப்பதோடு, வெப்பவாதத்துக்கு ஆட்படுத்தி மரணத்துக்கும் இட்டுச்செல்கிறது. பூமியை வெப்பப்படுத்தி எம்மில் நாமே எரிதணலைக் கொட்டுகிறோம் என்பதற்கும் அப்பால், பூமியின் ஆரோக்கியத்திலும் பாரதூரமான பாதிப்புகளை ஏற்படுத்தி வருகிறோம். பூமி சூடாகுவதால் பனி மலைகள் உருகிக் கடல் மட்டம் உயரத்தொடங்கியுள்ளது. சூறாவளிகளின் தாக்குதிறன் மூர்க்கமாகி வருகிறது. ஒருபுறம் வறட்சி வாட்ட இன்னொருபுறம் வெள்ளம் பெருக்கெடுக்கிறது. உயிர்ப்பல்வகைமை அழிய ஆரம்பித்துள்ளது. பூமி வெப்பஅலைகளின் மூலம் விடுத்திருக்கும் செய்தியை நாம் உணர்ந்து இயற்கையோடு இசைந்து வாழ இப்புவி தினத்திலாவது உறுதியேற்போம் தவறின், ஒட்டுமொத்தப் பூமியின் அழிவுக்கும் நாமே காரணமாகி விடுவோம் என்றும் தெரிவித்துள்ளார்.

குரங்குகளின் ஏற்றுமதி -

விவசாய அமைச்சர் துறைசார் அறிவு இல்லாததால்

தவறான முடிவுகளை எடுத்து வருகிறார்

ஊடகவியலாளர் சந்திப்பில் (21.04.2023) பொ. ஐங்கரநேசன்

342445982_1223297941907767_5616457699923033318_n.mp4

குரங்குகளின் ஏற்றுமதி குருட்டுத்தனமான முடிவு

சூழல் விரோதமானதும் சாத்தியம் இல்லாததும்

- ஐங்கரநேசன் சாடல்

குரங்குகளினால் விவசாயத்தில் ஏற்பட்டுவரும் பாதிப்புகளைக் கருத்திற்கொண்டு இலங்கையிலிருந்து ஒரு இலட்சம் செங்குரங்குகளைச் சீனாவின் மிருகக்காட்சிச் சாலைகளுக்கு ஏற்றுமதி செய்வதற்கு தீர்மானித்திருப்பதாக விவசாய அமைச்சு தெரிவித்ததையடுத்துப் பலத்த வாதப்பிரதிவாதங்கள் ஏற்பட்டுள்ளன. இதையடுத்து, கொழும்பு சீனத்தூதுவராலயம் இவ்வாறானதொரு கோரிக்கையைத் தாம் முன்வைக்கவில்லையெனத் தற்போது அறிவித்துள்ளது. சீனாவின் தனியார் விலங்குப் பண்ணையொன்றின் எழுத்துமூல கோரிக்கையின் அடிப்படையில் ஏற்றுமதி முடிவெடுத்த விவசாய அமைச்சும் சுருதி இறங்கி முதற்கட்டமாக ஐந்நூறு குரங்குகளை அனுப்ப இருப்பதாகத் தெரிவித்துள்ளது. இம்முடிவு குருட்டுத்தனமானதும் சூழல் விரோதமானதும் நடைமுறைச் சாத்தியம் இல்லாததும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சாடியுள்ளார்.

இலங்கையில் இருந்து சீனாவுக்குக் குரங்குகளை ஏற்றுமதி செய்வது தொடர்பாக பொ. ஐங்கரநேசன் விடுத்துள்ள (20.04.2023) ஊடக அறிக்கையிலேயே இவ்வாறு தெரிவித்துள்ளார்.

அந்த அறிக்கையில் அவர் மேலும் குறிப்பிடுகையில்,

அழிந்துவரும் காட்டுயிரிகளின் வர்த்தகத்தைக் கட்டுப்படுத்தும் சர்வதேச உடன்படிக்கையைச் சீனா ஏற்றுக் கொண்டிருப்பதால் குரங்குகளின் இறக்குமதிக்கு அனுமதி இல்லை என்றும் சீனத் தூதுவராலயம் தெரிவித்திருக்கிறது. ஆனால், சட்டபூர்வமான அனுமதி இல்லாத நிலையிலும்; குரங்குகள் உட்பட அழிந்துவரும் பல காட்டுயிரிகளின் மிகப்பெரும் கறுப்புச்சந்தையாக இன்றளவும் சீனாவே இயங்கி வருகிறது. சீன உணவகங்களில் குரங்கிறைச்சி அதிவிருப்பத்திற்குரிய தெரிவு என்பதாலும் ஆய்வகங்களில் குரங்குகள் சோதனை விலங்குகளாக அதிகம் தேவைப்படுவதாலும் சீனாவில் குரங்குகளுக்கான தட்டுப்பாடு எப்போதுமே நிலவுகிறது. இதனை ஈடுகட்டவே, ஜீவகாருண்யர்களின் தண்டனைகளில் இருந்து தப்ப மிருகக்காட்சிச் சாலைகளுக்கென்ற பெயரில் குரங்குகளின் வர்த்தகத்திற்குத் திட்டமிடப்பட்டுள்ளது.

குரங்குகளால்; பயிர்களின் உற்பத்திக்கும் விவசாயிகளுக்கும் ஏற்பட்டுவரும் பாதிப்புகள் பாரதூரமானவை. ஆனால், கடந்த சில தசாப்தங்களாகக் குரங்குகளின் கணக்கெடுப்பு நிகழாத நிலையில் குரங்குகளை ஏற்றுமதி செய்ய முற்படுவது இதற்கான தீர்வாக அமையாது. மாறாக, பின்நோக்கிச் சுடுவது போன்று பாதகமான விளைவுகளையே ஏற்படுத்தும். குரங்குகள் தமது உணவு முறையால் காட்டுவெளியெங்கும் விதைகளைத் தூவி மரங்களை இயற்கையாகவே நடவு செய்கின்றன. இதனால், காடுகளின் கட்டுமானத்தில் மையக்கல் இனங்களாகக் (key stone species) கருதப்படும் இக்குரங்குகள் அழிந்தால் காட்டுப் பரப்பளவு சுருங்கி இயற்கைச்சூழலின் சமநிலை குலையும். காபன் உறிஞ்சிகளான காடுகள் சுருங்குவதால் பாதகமான காலநிலை மாற்றங்கள் விரைவுபடுத்தப்பட்டு விவசாயமும் வீழ்ச்சியுறும்.

செங்குரங்குகள் இலங்கைக்கு மட்டுமே உரித்தான ஓர் உள்நாட்டு இனம். இதனைச் சர்வதேச இயற்கைப் பாதுகாப்பு ஒன்றியம் அழிவை எதிர்நோக்கியுள்ள விலங்குகளில் ஒன்றாகப் பட்டியலிட்டுள்ளது. சீனாவைப் போன்றே இலங்கையும் அழிந்து வரும் காட்டுயிரிகளின் சர்வதேச ஒப்பந்தத்தில் கையெழுத்திட்டுள்ளது. இந்நிலையில் எதனையுமே விற்று டொலர்களாக்கும் முனைப்பில் உள்ள அரசாங்கம் சட்டபூர்வமான முறையில் நடைமுறைச்சாத்தியமற்ற செங்குரங்குகளின் ஏற்றுமதி குறித்துத் தொடர்ந்து பேசிக் கொண்டிருப்பதை உடனடியாக நிறுத்துதல் வேண்டும். கூடவே, குரங்குகளினால் விவசாயத்துறைக்கு ஏற்பட்டுவரும் பாதிப்புகளைக் களைய ஒருங்கிணைந்த மாற்றுப் பொறிமுறையொன்றையும் விரைந்து நடைமுறைப்படுத்த முன்வர வேண்டும் என்றும் தெரிவித்துள்ளார்.

சிறுப்பிட்டியில் பசுமை இயக்கத்தின்

பசுமை அறிவொளி நிகழ்ச்சி

தமிழ்த்தேசியப் பசுமை இயக்கத்தின் பசுமை அறிவொளி நிகழ்ச்சி நேற்று சனிக்கிழமை (01.04.2023) சிறுப்பிட்டியில் நடைபெற்றது. மாணவர்களுக்குச் சுற்றுச்சூழல் பற்றிய அறிவைப்புகட்டி அதனூடாக சூழல் விழிப்புணர்வை ஏற்படுத்தி அவர்களைச் சூழல் பாதுகாப்பில் பங்குபற்றுநர்களாக்கும் நோக்குடனும், மாணர்களிடையே பன்முக ஆளுமைத்திறனை விருத்தி செய்யும் நோக்குடனும் தமிழ்த்தேசியப் பசுமை இயக்கம் பசுமை அறிவொளி நிகழ்ச்சித் திட்டம் ஒன்றை கிராமங்களில் முன்னெடுத்து வருகின்றது. இதன் தொடர்ச்சியாகவே இப்பசுமை அறிவொளி நிகழ்ச்சி சிறுப்பிட்டியில் அண்ணமா மகேஸ்வரர் ஆலய கலாசார மண்படத்தில் நடைபெற்றுள்ளது.

தமிழ்த்தேசியப் பசுமை இயக்கத்தின் சிறுப்பிட்டி மேற்கின் இணைப்பாளர் கு. மயூதரன் தலைமையில் நடைபெற்ற இந்நிகழ்ச்சியில் பிரதம விருந்தினராக ரொறன்ரோவின் மனிதநேயக்குரல் அமைப்பைச் சார்ந்த மரியாம்பிள்ளை மரியராசா கலந்துகொண்டிருந்தார். தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுற்றுச்சூழல் பாதுகாப்பில் மாணவர்களின் வகிபாகம் தொடர்பாக உரையாற்றினார். தமிழ்த்தேசியப் பசுமை இயக்கத்தின் பொருளாளர் க. கேதீஸ்வரநாதனும் கலந்துகொண்டிருந்த இந்நிகழ்ச்சியில் நூற்றுக்கணக்கான மாணவர்களும் பெற்றோர்களும் பங்கேற்றிருந்தனர். நிகழ்ச்சியின் இறுதியில் மாணவர்கள் அனைவருக்கும் சூழல் விழிப்புணர்வு மேற்கோள்கள் மற்றும் புகைப்படங்கள் அடங்கிய அப்பியாசக் கொப்பிகள் வழங்கப்பட்டன. இதற்கான அனுசரணையை ரொறன்ரோவின் மனிதநேயக்குரல் அமைப்பு வழங்கியிருந்தமை குறிப்பிடத்தக்கது.

கோலாகலமாக நிகழ்ந்தேறிய

பசுமை அமைதி விருதுகள் விழா

தமிழ்த்தேசியப் பசுமை இயக்கத்தின் பசுமை அமைதி விருதுகள் விழா நேற்று சனிக்கிழமை (18.03.2023) கோலாகலமாக நிகழ்ந்தேறியுள்ளது. பொதுமக்களிடையே சூழற் கல்வியினூடாகச் சூழல் விழிப்புணர்வை ஏற்படுத்தி அவர்களைச் சூழல்பாதுகாப்புச் செயற்பாடுகளில் பங்குபற்றுநர்களாக்கும் நோக்குடன் தமிழ்த்தேசியப் பசுமை இயக்கம் ஆண்டுதோறும் பசுமை அமைதி விருதுகளை வழங்கி வருகிறது. 2022ஆம் ஆண்டுக்கான விருதுகளை வழங்கும் விழா நேற்று யாழ்ப்பாணம் தந்தை செல்வா கலையரங்கத்தில் இடம்பெற்றுள்ளது.

தமிழ்த்தேசியப் பசுமை இயக்கத்தின் தலைவர் பொ.ஐங்கரநேசன் தலைமையில் நடைபெற்ற இவ்விழாவில் பிரதம விருந்தினராகக் கிழக்குப் பல்கலைக்கழகத்தின் துணைவேந்தர் பேராசிரியர் வ. கனகசிங்கம் கலந்துகொண்டிருந்தார். சிறப்பு விருந்தினர்களாக யாழ்ப்பாணப் பல்கலைக்கழகத்தின் மீன்பிடியியல் விஞ்ஞானத்துறையின் தலைவர் பேராசிரியர் சிவசாந்தினி குகநாதன், வடக்கு மாகாண நீர்ப்பாசனப் பொறியியலாளர் ச. சர்வராஜா ஆகியோர் கலந்துகொண்டிருந்தார்கள்.

மாணவர்களிடையே அகில இலங்கை ரீதியாக நடாத்தப்பட்ட சூழல் பொதுஅறிவுப் பரீட்சையில் சித்தியடைந்த மாணவர்களில் முதல் 100 மாணவர்கள் பசுமை அமைதிச் சான்றிதழ் வழங்கி கௌரவிக்கப்பட்டார்கள். இவர்களில் முதல் மூன்று இடங்களைப் பெற்ற வெற்றியாளர்களுக்குச் சூழலியல் ஆசான் க.சி. குகதாசன் ஞாபகார்த்தப் பசுமை அமைதி விருதுகள் வழங்கப்பட்டன. முதலாம் இடத்தைப் பெற்ற யாழ்ப்பாணம் மகாஜனக் கல்லூரி மாணவி அபிநயா சிவகரன் தங்கப்பதக்கம் வழங்கியும், இரண்டாம் இடத்தைப் பெற்ற திருகோணமலை ஸ்ரீ சண்முகா இந்து மகளிர் கல்லூரி மாணவி அம்சனா பேரின்பசிவம் வெள்ளிப்பதக்கம் வழங்கியும், மூன்றாம் இடத்தைப்பெற்ற யாழ்ப்பாணம் மகாஜனக் கல்லூரி மாணவன் சிவகரன் அபிசாய்ராம் வெண்கலப் பதக்கம் வழங்கியும் கௌரவிக்கப்பட்டனர்.

தாலகாவலர் மு.க. கனகராசா ஞாபகார்த்தமாக வழங்கப் பட்டுவரும் சிறந்த சூழல்நேயச் செயற்பாட்டாளருக்கான விருதை இம்முறை முல்லைத் தீவைச் சேர்ந்த திரு. நாகலிங்கம் கனகசபாபதிநேசன் பெற்றிருந்தார். இவருக்கு விருதோடு ஒரு இலட்சம் ரூபா பணப்பரிசும் வழங்கப்பட்டது. மேலும், தமிழ்த்தேசியப் பசுமை இயக்கத்தால் மாணவர்களிடையே நடாத்தப்பட்ட வீட்டுத்தோட்டப் போட்டியில் சிறந்த செய்கையாளர்களாக அடையாளம் காணப்பட்டவர்கள் மாணாக்க உழவர்களாகவும், இராசதானியத் திட்டத்தின் கீழ் சிறுதானியச் செய்கையைச் சிறப்பாக மேற்கொண்டவர்கள் மாண்புறு உழவர்களாகவும் சான்றிதழ்களும் பரிசுகளும் வழங்கிக் கௌரவிக்கப்பட்டிருந்தனர்.

புலம்பெயர் தமிழர் கூட்டமைப்பின் அனுசரணையுடன் நடைபெற்ற இவ்விழா அரங்கு நிறைந்த பார்வையாளர் களுடன் மிகச் சிறப்பாக இடம்பெற்றுள்ளது.

பசுமை அமைதி விருதுகள்

2022

பரிசளிப்பு விழா

18.03.2023

தமிழ்த்தேசியப் பசுமை இயக்கத்தின் 2022 ஆம் ஆண்டுக்கான பசுமை அமைதி விருதுகளை வழங்கும் பரிசளிப்பு விழா இம்மாதம் 18ஆம் திகதி (சனிக்கிழமை) தந்தை செல்வா கலையரங்கத்தில் (யாழ்ப்பாணம் மத்திய கல்லூரிக்கு அருகில்) பிற்பகல் 2.30 மணிக்கு நடை பெறவுள்ளது.

இவ்விழாவில் கடந்த ஆண்டு தமிழ்த் தேசியப் பசுமை இயக்கத்தினால் அகில இலங்கை ரீதியாக நடாத்தப்பட்ட சூழல் பொதுஅறிவுப் பரீட்சையில் வெற்றிபெற்ற மாணவர்கள் சூழலியல் ஆசான் க.சி. குகதாசன் ஞாபகார்த்தப் பசுமை அமைதி விருதுகளும், 2022ஆம் ஆண்டின் சிறந்த சூழல்நேயச் செயற்பாட்டாளர் தால காவலர் மு.க.கனகராசா ஞாபகார்த்தப் பசுமை அமைதி விருதும் வழங்கிக் கௌரவிக்கப்படவுள்ளனர்.

மேலும், இவ்விழாவில் 2022ஆம் ஆண்டில் மாணவர்களிடையே நடாத்தப்பட்ட வீட்டுத்தோட்டப் போட்டியில் வெற்றிபெற்ற மாணவர்களுக்கு மாணாக்க உழவர் மதிப்பளிப்பும், இராசதானியத் திட்டத்தின்கீழ் சிறுதானியச் செய்கையைச் சிறப்பாக மேற்கொண்டவர்களுக்கு மாண்புறு உழவர் மதிப்பளிப்பும் இடம் பெறவுள்ளது.

இவ்விழாவில் பிரதம விருந்தினராகக் கிழக்குப் பல்கலைக்கழகத்தின் துணைவேந்தர் பேராசிரியர் வ.கனகசிங்கம் அவர்களும், சிறப்பு விருந்தினர்களாக யாழ்ப்பாணப் பல்கலைக்கழகத்தின் மீன்பிடியியல் விஞ்ஞானத்துறையின் தலைவர் பேராசிரியர் சிவசாந்தினி குகநாதன் அவர்களும் வடக்கு மாகாண நீர்ப்பாசனத் திணைக்களத்தின் பொறியியலாளர் ச. சர்வராஜா அவர்களும் கலந்து சிறப்பிக்க வுள்ளனர்.

தேர்தல்களை எதிர்கொள்ளும் திராணியற்ற ரணில்

ஜனாதிபதியாகத் தொடர்வது ஜனநாயகத்துக்குச் சவால்

பொ. ஐங்கரநேசன் சுட்டிக்காட்டு

உள்ளூராட்சித் தேர்தல்களை நடாத்துவதற்கு ஆரம்பம் முதலே முட்டுக்கட்டைகளைப் போட்டுவந்த ஜனாதிபதி ரணில் விக்கிரமசிங்க அதற்கான காரணமாக நாட்டில் நிலவுகின்ற பொருளாதார நெருக்கடிகளையே சுட்டிக்காட்டி வந்தார். இப்போது, இன்னுமொரு காரணமாகத் தேர்தல்கள் ஆணையம் தேர்தல்களை அறிவித்தது சட்டபூர்வமற்றது என்று தெரிவித்திருக்கிறார். புதிதுபுதிதாகக் காரணங்களை அவர் தேடிக்கொண்டிருந்தாலும் உண்மைக்காரணம் தேர்தல் தோல்விப் பயம்தான். தேர்தல்களை எதிர்கொள்ளும் திராணியற்ற ரணில் ஜனாதிபதியாகத் தொடர்வது எதிர்காலத்தில் ஜனநாயகத்துக்குப் பெரும் சவாலாகவே அமையும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

உள்ளூராட்சித் தேர்தல்கள் தொடர்பாக பொ. ஐங்கரநேசன் விடுத்திருக்கும் ஊடக அறிக்கையிலேயே இவ்வாறு சுட்டிக்காட்டியுள்ளார்.

அந்த அறிக்கையில் அவர் மேலும் தெரிவிக்கையில்,

தேர்தல்கள் ஆணையம் உள்ளூராட்சித் தேர்தல்களுக்கான வேட்பு மனுக்களைக்கோரி ஒன்றரை மாதங்கள் கடந்து விட்டன. உள்ளூராட்சித் தேர்தல்களில் போட்டியிடுவதற்கு ஜனாதிபதி ரணில் விக்கிரமசிங்கவினது ஐக்கியதேசியக் கட்சியும் வேட்பு மனுக்களைத் தாக்கல் செய்துள்ளது. தேர்தல்களை நடாத்துவதற்கென ஜனாதிபதி தான் நிதியமைச்சர் என்ற வகையில் ஒரு தொகுதி நிதியைத் தேர்தல்கள் ஆணையத்துக்கு விடுவித்தும் உள்ளார். இந்நிலையில், இப்போது தேர்தல்கள் ஆணையம் விடுத்த தேர்தல் அறிவிப்பு செல்லாது என்று அவர் தெரிவித்திருப்பது எந்தக் கீழ்நிலைக்கு இறங்கியேனும் தேர்தல்களை நிறுத்துவதற்கு அவர் தவியாய்த் தவிக்கின்றார் என்பதையே காட்டுகின்றது.

கடந்த நாடாளுமன்றத் தேர்தலில் ரணில் விக்கிரமசிங்கவினது ஐக்கிய தேசியக் கட்சி எந்தவொரு ஆசனத்தையும் வென்றிருக்கவில்லை. தேசியப் பட்டியலின் மூலம் பாராளுமன்றத்துக்குள் நுழைந்த ரணில் விக்கிரமசிங்க ராஜபக்ச சகோதரர்களுக்கு எதிரான போராட்டங்களை மிகத் தந்திரமாகக் கையாண்டு தனது நெடுங்காலக் கனவான ஜனாதிபதிக் கதிரையை எட்டிப்பிடித்துள்ளார். வாராது வந்த அந்தக் கதிரையை விட்டு இறங்குவதற்கு அவர் தயாரில்லை. உள்ளூராட்சித் தேர்தல்கள் தனது ஐக்கியதேசியக் கட்சிக்கும் தன்னைத் தாங்கிக் கொண்டிருக்கும் பொதுஜன பெரமுன கட்சிக்கும் பெரும் பின்னடைவை ஏற்படுத்தும் என்பதாலேயே தேர்தல்களுக்குத் தன்னாலான சகல தடைகளையும் ஏற்படுத்தி வருகிறார்.

வாக்களிப்பது ஒருவரின் ஜனநாயக உரிமை. அரசின் அதியுயர் பதவி வகிக்கும் ரணில் விக்கிரமசிங்க வாக்களிப்பு உரிமைக்கு எதிராகத் தேர்தல்களுக்குத் தடை ஏற்படுத்துவது முற்றிலும் ஜனநாயக விரோதமானது. உள்ளூராட்சித் தேர்தல்கள் மாத்திரமல்ல; பாராளுமன்றத் தேர்தல் மற்றும் ஜனாதிபதித் தேர்தல்களிலும் மக்கள் அவருக்கு எதிராகவே வாக்களிப்பர் என்பதால் இத்தேர்தல்களையும் ஏதாவது காரணங்களைக்காட்டி நிறுத்தவே முயல்வார். இந்த ஜனநாயக விரோதச் செயற்பாடு கடைசியில் சர்வாதிகார ஆட்சியை நோக்கியே இட்டுச்செல்லும். இதற்கு இடங்கொடாது தேர்தல்களை உரிய காலத்தில் நடாத்துவதற்கு அனைத்து ஜனநாயக சக்திகளும் கட்சி பேதங்களைக் கடந்து போராட முன்வரவேண்டும் என்றும் தெரிவித்துள்ளார்.

போதை அரசியல்வாதிகளால் மக்களுக்குச்

சரியான பாதையை வழிகாட்ட முடியாது

போதை ஒழிப்பை உள்ளூராட்சி வேட்பாளர்களில் இருந்து ஆரம்பிப்போம்

பொ. ஐங்கரநேசன் வேண்டுகோள்

யுத்தத்துக்குப் பின்னர் தமிழ் மக்களிடையே போதைப்பொருட் பாவனையும் இதன் விளைவாக வன்முறைச் சம்பவங்களும் அதிகரித்துள்ளது. போதையில் மிதக்கும் அரசியல்வாதிகள் போதைப்பொருள் எதிர்ப்பு ஊர்வலத்துக்குத் தலைமை தாங்கும் இழிவு அரசியலே இங்கு நிலவுகிறது. போதை அரசியல்வாதிகளால் மக்களுக்கு ஒருபோதும் சரியான பாதையை வழிகாட்ட முடியாது. எனவே இந்த உள்ளூராட்சித் தேர்தலில் போதை வேட்பாளர்களையும் வாக்குகளுக்காக மதுபானங்களை விநியோகிக்கும் வேட்பாளர்களையும் நிராகரிப்போம். போதை ஒழிப்பை உள்ளூராட்சி வேட்பாளர்களில் இருந்து ஆரம்பிப்போம் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் வேண்டுகோள் விடுத்துள்ளார்.

தமிழ்த்தேசியப் பசுமை இயக்கம் நல்லூர் பிரதேசசபைத் தேர்தலில் மாம்பழம் சின்னத்தில் சுயேச்சைக் குழுவாகப் போட்டியிடுகின்றது. இதன் பரப்புரைக்கூட்டம் நேற்று ஞாயிற்றுக்கிழமை (05.02.2023) கோண்டாவிலில் இடம்பெற்றபோதே பொ. ஐங்கரநேசன் இவ்வாறு தெரிவித்துள்ளார்.

அங்கு அவர் தொடர்ந்து உரையாற்றுகையில்,

விகிதாசார முறையில் நடைபெறும் உள்ளூராட்சித் தேர்தலில் ஒவ்வொரு சபைக்கும் நூற்றுக்கணக்கானவர்கள் போட்டியிடுகின்றார்கள். இவர்கள் நண்பர்களாகவும் அயலவர்களாகவும் உறவினர்களாகவும் இருக்கும்போது யாருக்கு வாக்களிப்பதென்று முடிவெடுக்க முடியாத நிலையில் மக்கள் உள்ளனர். தேர்தல்களில் வேட்பாளர்களின் தெரிவு நட்புநிலை சார்ந்தும் உறவுநிலை சார்ந்தும் அமைந்தால் ஒருபோதும் தகுதியான வேட்பாளர்களைத் தெரிவு செய்யமுடியாது. எனவே, மக்கள் தெரிந்தவர்கள், உறவினர்கள் என்ற வட்டங்களையும் தாண்டிச் சிந்தித்துத் தகுதியானவர்களை அடையாளங்கண்டு வாக்களிக்க முன்வர வேண்டும்.

உள்ளூராட்சிச் சபைகள் மக்களின் அடிப்படைத் தேவைகளைக் நிறைவேற்றிக் கொடுப்பதற்கென உருவாக்கப்பட்ட அமைப்புகள். மக்களின் நல்வாழ்வை உறுதிசெய்யும் வகையில் அபிவிருத்திப் பணிகளைத் தெரிவுசெய்யப்பட்ட உறுப்பினர்களினூடாக முன்னெடுப்பதே இவற்றின் முதன்மைப்பணி. இவை தேசிய அரசியலைப் பேசும் களங்கள் அல்ல. ஆனாலும், தெரிவுசெய்யப்படும் உறுப்பினர்களின் அரசியல் நிலைப்பாடு பற்றிக் கவனங்கொள்ள வேண்டும். தமிழ் மக்களின் அரசியல் உரிமைப் பிரச்சினைகள் இன்னமும் தீர்க்கப்படாத நிலையில் தெரிவுசெய்யப்படுபவர்கள் தமிழ்த்தேசிய அரசியலில் இருந்து ஒருபோதும் வழுவாதவர்களாக இருப்பதை வாக்காளர்கள் உறுதிசெய்யவேண்டும்.

தமிழ்த்தேசிய நிலைப்பாடு மட்டுமே ஒரு வேட்பாளரின் தகுதியாக இருக்கமுடியாது. உள்ளூராட்சிச் சபைகளில் அங்கம் வகிக்கும் தமிழ்த்தேசியம் பேசும் கட்சிகளைச் சார்ந்த உறுப்பினர்களிற் பலரின் நடவடிக்கைகள் முகஞ்சுழிக்க வைப்பதாகவே இருக்கின்றன. மக்கள் நலன்களைப் புறந்தள்ளி ஆட்சிக்கவிழ்ப்பிலே குறியாக இருப்பவர்களாகவும் சபையிலேயே சாதியம் பேசுபவர்களாவும் இருக்கிறார்கள். வாக்கு வங்கிக்காக வன்முறைக் கும்பல்களை வளர்த்தெடுப்பவர்களாகவும் இருக்கிறார்கள். எனவே, தெரிவுசெய்யப்படும் ஒருவர் அரசியல் அறம் கொண்டவராகவும் தனிமனித ஒழுக்கம் பேணுபவராகவும் இருப்பதை வாக்காளர்கள் உறுதிசெய்யவேண்டும் என்றும் தெரிவித்தார்.

இலங்கையின் சுதந்திரதினம் இனிமேல்

சிங்களதேசத்துக்கும் இருண்ட கரிநாள்தான்

பொ. ஐங்கரநேசன் சுட்டிக்காட்டு

இலங்கையை விட்டுப் பிரித்தானிய ஆட்சி நீங்கிய நாளைத் தென்னிலங்கைச் சிங்களதேசம் சுதந்திர நாளாகக் கொண்டாடி மகிழ, தமிழர் தேசம் அதனைக் கரிநாளாகவே தொடர்ந்து கடைப்பிடித்து வருகிறது. தமிழர் தேசத்தை ஒற்றையாட்சி என்ற சிறைக்குள் வலுக்கட்டாயமாக முடக்கி வைத்திருக்கும் அரசியலமைப்பில் இந்நாளைச் சுதந்திர நாளாகத் தமிழர்களால் ஒருபோதும் கொண்டாட இயலாது. ஆனால், 75ஆவது சுதந்திர தினத்தைக் கோலாகலமாக இலங்கை அரசாங்கம் கொண்டாடுவதற்குத் தயாராகிவரும் நிலையில் அது சிங்கள தேசத்துக்கும் இருண்ட கரிநாளாகவே அமைந்திருக்கிறது என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

இலங்கையின் சுதந்திரதினம் தொடர்பாக பொ. ஐங்கரநேசன் வெளியிட்டுள்ள ஊடக அறிக்கையிலேயே இவ்வாறு சுட்டிக்காட்டியுள்ளார்.

அந்த அறிக்கையில் அவர் மேலும் தெரிவிக்கையில்,

பொருளாதார நெருக்கடிகளுக்கு ஆளாகியுள்ள தன்சானியா நாடு அண்மையில் தனது சுதந்திர தினக் கொண்டாட்டங்களை இரத்துச் செய்துள்ளது. அவற்றுக்கென ஒதுக்கப்பட்ட நிதியை மாற்றுத்திறன் மாணவர்களுக்கான தங்கும் இல்லங்களை அமைப்பதற்குப் பயன்படுத்துமாறு அந்நாட்டின் பிரதமர் உத்தரவிட்டுள்ளார். ஆனால், தன்சானியாவைவிட மிகவும் மோசமான பொருளாதாரச் சீரழிவுக்குள் சிக்கித்திணறிக் கொண்டிருக்கும் இலங்கையில் ஜனாதிபதி உணவின்றித் தவிக்கும் தன் சிங்களதேசத்தைப் பற்றியேனும் சிந்திப்பவராக இல்லை. பெருமெடுப்பில் சுதந்திர தினக்கொண்டாட்டங்களுக்குத் தயாராகி வருகிறார்.

இலங்கைத் தீவின் பொருளாதாரம் இன்று மீண்டெழ முடியாத படுகுழிக்குள் வீழ்ந்து கிடப்பதற்குத் தென்னிலங்கை ஆட்சியாளர்கள் தமிழர் தேசத்தின் மீது தொடுத்து வந்த யுத்தமே பிரதான காரணம். இதற்கு வித்திட்டது பௌத்த, சிங்கள மேலாதிக்கத்தை நிறுவுகின்ற இலங்கையின் ஒற்றையாட்சி அரசியல் அமைப்பு முறைமையே ஆகும். பிரித்தானியர்களிடம் இருந்து சிங்களத் தலைமைகளிடம் ஆட்சி கைமாறிய நாளில் இருந்து ஒற்றையாட்சி முறைமையின்கீழ் தமிழர் தேசம் தொடர்ந்து அடக்கி ஒடுக்கப்பட்டதன் விளைவாகவே தமிழ் மக்கள் ஆயுதம் ஏந்தத் தலைப்பட்டனர்.

போரின் தாங்கொணாக் கடன் சுமையை தமிழ் மக்களுடன் சேர்ந்து சிங்கள மக்களும் சுமந்து நிற்கின்றனர். தென்னிலங்கை அரசியல் தலைமைகள் இது குறித்து அக்கறை கொள்ளவில்லை. மாறாக, தொடர்ந்தும் தமிழர் தேசத்தை அடக்கி ஒடுக்குவதில் மட்டுமே குறியாக இருக்கின்றன. தமிழர் தனியானதொரு தேசம் என்று இலங்கையின் அரசியலமைப்பு அங்கீகரிக்காதவரை தமிழர்களுக்குச் சுதந்திரதினம் கரிநாளாகவே இருக்கும். தமிழர்களுக்கு விடிவு கிடைக்காத வரைக்கும் சிங்களதேசமும் இருண்டதாகவே இருக்கும் என்ற நிதர்சனத்தைச் சிங்கள மக்கள் புரிந்துகொள்ளவேண்டும் என்றும் தெரிவித்துள்ளார்.

தமிழ்த் தேசியப் பசுமை இயக்கத்தால்

உலர் உணவுப் பொதிகள் விநியோகம்

தமிழ்த் தேசியப் பசுமை இயக்கம் அற்றார் அழி பசி தீர்த்தல் என்ற திட்டத்தின் மூலம் பொருளாதார ரீதியாக மிகவும் நலிவுற்ற குடும்பங்களுக்கு உலர் உணவுப் பொதிகளை வழங்கி வருகின்றது. இதன் ஒரு கட்டமாக கடந்த வெள்ளிக்கிழமை [20-01-2023] சங்கானையில் தெரிவு செய்யப்பட்ட நூறு குடும்பங்களுக்கு உலர் உணவுப் பொதிகளை வழங்கி வைத்துள்ளது.

இதற்கான நிகழ்ச்சியில் தமிழ்த் தேசியப் பசுமை இயக்கத்தின் தலைவர் பொ .ஐங்கரநேசன் கலந்து கொண்டு உலருணவுப் பொதிகளை வழங்கி வைத்துள்ளார்.

பசுமை இயக்கத்தின் இராசபோசனம்

சிறப்பாக இடம்பெற்ற

சிறுதானியப் பொங்கல் விழா

தமிழ்த்தேசியப் பசுமை இயக்கம் பொங்கல் விழாவை இம்முறை சிறுதானியங்களுக்கு முக்கியத்துவம் கொடுக்கும் வகையில் கொண்டாடியுள்ளது. இராசபோசனம் என்ற பெயரில் இப்பொங்கல் விழா நேற்று திங்கட்கிழமை (16.01.2023) மல்லாகத்தில் இடம்பெற்றுள்ளது. கல்லாரை வளர்பிறை முன்பள்ளியின் விளையாட்டு மைதானத்தில் இடம்பெற்ற இவ்விழாவில் கலாநிதி பாலசிவகடாட்சத்தின் சிறுதானியங்களின் முக்கியத்துவத்தை எடுத்தியம்பும் ‘பயன் அறிந்து உண்க’ என்ற நூலும் வெளியிடப்பட்டது.

தமிழ்த்தேசியப் பசுமை இயக்கத்தின் தலைவர் பொ. ஐங்கரநேசனின் தலைமையில் நடைபெற்ற இவ்விழாவில் யாழ்ப்பாணப் பல்கலைக்கழகத்தின் இந்து நாகரிகத்துறைத் தலைவர் கலாநிதி ச.முகுந்தன் பிரதம விருந்தினராகக் கலந்துகொண்டிருந்தார். சிறப்பு விருந்தினராகக் கவிஞர் சோ. பத்மநாதன் பங்கேற்றிருந்தார்.

தமிழ்த்தேசியப் பசுமை இயக்கம் தமிழ் மக்களின் பண்டைய உணவுப் பண்பாட்டில் பிரதான இடத்தைப் பெற்றிருந்த சிறுதானியங்களை மீளவும் பயன்பாட்டுக்குக் கொண்டுவரும் நோக்கில் ஏற்கனவே இராசதானியம் என்ற திட்டத்தை முன்னெடுத்து வருகின்றது. சிறுதானியங்களை மீளவும் முடிசூட்டுவோம் என்ற கருப்பொருளில் அமைந்த இத்திட்டத்தின்கீழ் விவசாயிகளுக்குச் சிறுதானிய விதைகள் இலவசமாக வழங்கி வருகிறது. இதன் தொடர்ச்சியாகவே இம்முறை பொங்கல் விழாவை சாமை அரிசியில் பொங்கிச் சிறுதானியப் பொங்கல் விழாவாகக் கொண்டாடியுள்ளது.

கலை நிகழ்ச்சிகளும் பாராம்பரிய விளையாட்டுகளும் இடம்பெற்றிருந்த இப்பொங்கல் விழாவில் ஏராளமானோர் கலந்துகொண்டிருந்தார்கள்.

சீன அரிசியில் மனிதாபிமானம் இல்லை ;

வல்லாதிக்கப் போட்டி அரசியலே அதிகம்

பொ. ஐங்கரநேசன் தெரிவிப்பு

கடந்த சில நாட்களாகச் சீன அரிசி பற்றி அதிகம் பேசப்படுகிறது. சமைத்த பலர் சாப்பிட முடியாதவாறு குழைந்துபோய் இருப்பதாகக் குறைப்பட்டுக்கொள்கிறார்கள். இது சீனர்களின் உணவுப் பண்பாட்டில் இடம்பிடித்துள்ள பசைத் தன்மைகூடிய ஸ்ரிக்கி றைஸ் (sticky rice) ஆகும். தமிழ் மக்களின் உணவுப் பண்பாட்டில் கடலட்டை எவ்வாறு இல்லையோ, அதேபோன்றே இந்த ரக அரிசியும் இல்லை. சீனா மனிதாபிமான நோக்கில் அரிசியை வழங்கியிருந்தால் எங்களது பயன்பாட்டிலுள்ள அரிசியைத் தெரிவு செய்து வழங்கியிருக்கும். ஆனால், இந்தச் சீன அரிசியில் மனிதாபிமானம் இல்லை ; வல்லாதிக்கப் போட்டி அரசியலே அதிகமாகவுள்ளது என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தெரிவித்துள்ளார்.

தமிழ்த்தேசியப் பசுமை இயக்கம் “அற்றார் அழிபசி தீர்த்தல்” என்ற திட்டத்தின்கீழ் பொருளாதார ரீதியாக நலிவுற்றிருக்கும் குடும்பங்களுக்கு உலருணவுப் பொதிகளை வழங்கி வருகிறது. நேற்று 29.12.2022 (வியாழக்கிழமை) பல்வேறு பகுதிகளில் இருந்தும் தெரிவுசெய்யப்பட்ட 100 குடும்பங்களுக்கு உலருணவுப் பொதிகளை வழங்கும் நிகழ்ச்சி திருநெல்வேலியில் இடம்பெற்றது. இந்நிகழ்ச்சியில் உரையாற்றும்போதே பொ.ஐங்கரநேசன் இவ்வாறு தெரிவித்துள்ளார்.

அங்கு அவர் தொடர்ந்து உரையாற்றுகையில்,

பொருளாதார நெருக்கடியால் முழு இலங்கையிலும் உணவுப் பாதுகாப்பு கேள்விக்குறியாகி உள்ளது. அதிலும் ஏற்கனவே யுத்தத்தினாலும் கொரோனாவாலும் பாதிக்கப்பட்ட தமிழ் மக்கள் உணவுப் பற்றாக்குறையால் மோசமாகப் பாதிக்கப்பட்டுள்ளனர். பட்டினியால் குடும்பங்கள் படும் அவலத்தை சீனா சாதகமாகப் பயன்படுத்தித் தமிழ் மக்களின் மனதிலும் தமிழ் மண்ணிலும் வேரூன்றும் முயற்சியாகவே அரிசியை வழங்கி வருகிறது. பசியோடு இருக்கும் மக்களைச் சீன அரிசியை நிராகரிக்குமாறு எவருமே கோரமுடியாதபோதும் இந்த அரிசியிலுள்ள அரசியலை எமது மக்களுக்குப் புரியவைக்க வேண்டும்.

நாட்டில் ஏற்பட்டுள்ள உணவு நெருக்கடி உடனடியாகத் தீரப்போவதில்லை. இதனாலேயே அரசாங்கம் பயன்படுத்தாமலுள்ள காணிகளை எடுத்து இராணுவத்தைப் பயன்படுத்தி விவசாயம் செய்யப்போவதாகத் தெரிவித்துள்ளது. இது உணவு உற்பத்தி என்ற பெயரில் காணிகளை கையகப்படுத்தும் மறைமுக நோக்கத்தையும் கொண்டுள்ளது. வடக்குக் கிழக்கில் உள்ள வெற்றுக் காணிகளில் எமது பொது அமைப்புகள் அல்லது தன்னார்வலர்கள் உணவு உற்பத்தியில் ஈடுபட முன்வரவேண்டும். பல வெற்றுக் காணிகளின் உரிமையாளர்கள் புலம்பெயர்ந்து வாழுகிறார்கள். குத்தகை அடிப்படையிலேனும் பயிர்ச்செய்கைக்கு காணிகளை வழங்க அவர்கள் முன்வரவேண்டும்.

கிழக்கு மாகாணத்தில் பசியால் ஒரு சிறுவன் இறந்ததாகப் பத்திரிகைகளில் செய்தி வந்துள்ளது. இது ஒட்டுமொத்த ஈழத்தமிழ்ச் சமூகத்துக்குமே இழுக்காகும். போர்க்காலத்தில் பொருளாதாரத்தடை விதிக்கப்பட்டிருந்தபோதுகூட பட்டினியால் எவரும் இறந்ததில்லை. பிரதேச செயலகங்களில் கிராம சேவையாளர் பிரிவுரீதியாகப் பட்டினியை எதிர்நோக்கியுள்ள வறிய குடும்பங்களின் விபரங்கள் உள்ளன. திருவிழாக் காலங்களில் மட்டுமே அன்னதானங்கள் என்று இல்லாமல் இக்குடும்பங்களின் சிலநாள் பசியையேனும் போக்க எமது ஆலயங்களும் முன்வரவேண்டும் என்றும் தெரிவித்துள்ளார்.

கடல்சார் வளங்களைச் சூறையாடுவதை நிறுத்துவதே

கடற்கோளில் பலியானவர்களுக்கு நாம் செலுத்தும் அஞ்சலி

பொ. ஐங்கரநேசன் இடித்துரைப்பு

இலங்கையைக் கடற்கோள் தாக்கியபோது கரையோரச் சூழற்தொகுதிகள் அழிக்கப்பட்ட இடங்களில் உயிர்ப்பலியெடுப்பு உச்சத்தைத் தொட்டது. இதன்மூலம் கடற்கோள் “இயற்கையை நீ அழித்தால் இயற்கையால் நீ அழிவாய்” என்ற வலுவான பாடத்தை எமக்குப் போதித்தது. ஆனால், நாம் பட்டும் திருந்தாத பாவிகளாகவே இன்னமும் உள்ளோம். ஒருபுறம், தொடர்ந்தும் கடல்சார் வளங்களைச் சூறையாடிகொண்டு, இன்னொருபுறம் கடற்கோளில் பலியானவர்களுக்கு அஞ்சலி நிகழ்ச்சிகளையும் செய்து வருகிறோம். கடல்சார் வளங்களைச் சூறையாடுவதை உடனடியாக நிறுத்துவதே கடற்கோளில் பலியானவர்களுக்கு நாம் செலுத்தும் உண்மையான அஞ்சலியாக அமையும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் இடித்துரைத்துள்ளார்.

இலங்கையை 2004 ஆம் ஆண்டு டிசம்பர் 26ஆம் திகதி கடற்கோள் தாக்கி முப்பத்தையாயிரத்துக்கும் அதிகமானோரைப் பலியெடுத்திருந்தது. அதன் 18ஆவது நினைவை முன்னிட்டு பொ. ஐங்கரநேசன் விடுத்திருக்கும் ஊடக அறிக்கையிலேயே இவ்வாறு உரைத்துள்ளார்.

அந்த அறிக்கையில் மேலும் அவர் தெரிவிக்கையில்,

எல்லா வளங்களையும் போன்றே கடல்சார் வளங்களும் மனிதன் உட்பட உலகின் அனைத்து உயிரினங்களுக்கும் அவற்றின் வருங்காலத் தலைமுறைகளுக்குமானவை. இங்கு உண்ணுவதும் உணவாவதும், எடுப்பதும் கொடுப்பதும் இயற்கையின் நியதி. இயற்கைச் சூழலின் சமநிலை விதியும் இதுவே. ஆனால், பேராசை மிக்க மனிதர்கள் கடல் வளங்கள் அனைத்தும் தமக்கு மட்டுமே உரித்தானதென வளங்களைச் சூறையாடுவதற்குத் தலைப்பட்டுள்ளார்கள். இதனால், இயற்கைச் சமநிலை குழம்பி இயற்கைச் சீற்றங்கள் பேரனர்த்தங்களாக வெளிப்பட்டு வருகின்றன.

இழுவைப் படகுகளின் மூலம் கடலடி வளங்களை வாரிச்சுருட்டி வருகின்றோம். கடலகப் பவளப் பாறைகள் துவம்சம் செய்யப்படுகின்றன. கடலட்டைப் பண்ணைகளையும் இறாற் பண்ணைகளையும் இயற்கைக்கு விரோதமான ஒற்றையினக் கடல் வேளாண்மையாக விரிவாக்கி வருகிறோம். கரையோரக் கண்டற்காடுகள் தீமூட்டி அழிக்கப்படுகின்றன. மணல் மலைகள் அனுதினமும் கொள்ளை போகின்றன. இப்படி, வருங்காலத் தலைமுறைகளுக்கும் சேர்த்து வாழ்வளிக்க வேண்டிய கடல்சார்ந்த வளங்களை இலாப வேட்கைக்காகத் தொடர்ந்தும் சீரழித்து வருகிறோம்.

அளவுக்கு மிஞ்சிய மீன்பிடியால் கடலில் மீனினங்கள் அருகி வருகின்றன. ஒற்றையினக் கடற்ப் பண்ணைகளால் கடலின் உயிர்ப்பல்வகைமை கேள்விக்குறியாகி வருகிறது. கடலில் நாம் சேர்த்துவரும் இரசாயனங்களால் கரையோரக்கடல் இறக்கத் தொடங்கியுள்ளது. விரோதமான செயற்பாடுகளைப் பொறுத்துக்கொள்ளாத கடல் இன்னுமொருதடவை பொங்கிச் சீறமாட்டாது என்பதற்கு எவ்வித உத்தரவாதமும் இல்லை. கடற்கோளின் படிப்பினையை ஏற்று கடற்சூழற்தொகுதிக்கு விரோதமான செயற்பாடுகளை நிறுத்துவோமெனக் கடற்கோள் நினைவுநாளில் உறுதியேற்போம் என்றும் குறிப்பிட்டுள்ளார்.

ஈழ மண்ணின் விவசாயிகள் ஒவ்வொருவரும்

தமிழ்த்தேசியப் போராளிகளே!

விதைகள் மீளளிப்பு நிகழ்ச்சியில்

ஐங்கரநேசன் புகழாராம்

தமிழ் மக்களின் ஆயுதப்போராட்டம் தோற்கடிக்கப்பட்டதற்குப் பிறகு நமது அரசியல்வாதிகளிற் பெரும்பாலானவர்கள் தங்களைத் தமிழ்த்தேசியப் போராளிகளாக வெளிக்காட்டி வருகின்றனர். அவர்கள் வாய்ச்சொல் வீரர்களாக இருக்கும்போது, எமது விவசாயிகள் செயல்வீரர்களாக இருக்கிறார்கள். உண்மையில், ஈழ மண்ணின் விவசாயிகள் ஒவ்வொருவரும் தமிழ்த்தேசியப் போராளிகளே!. இவ்வாறு, தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் விவசாயிகளுக்குப் புகழாராம் சூட்டியுள்ளார்.

தமிழ்த்தேசியப் பசுமை இயக்கத்தின் இராசதானியத் திட்டத்தின்கீழ் விதைகளைப் பெற்ற விவசாயிகளிடமிருந்து அறுவடையின் பின்னர் விதைகளை மீளப்பெறும் நிகழ்ச்சி சனிக்கிழமை (17.12.2022) அளவெட்டியில் நடைபெற்றது. இங்கு உரையாற்றியபோதே பொ. ஐங்கரநேசன் இவ்வாறு தெரிவித்துள்ளார்.

அங்கு அவர் தொடர்ந்து உரையாற்றுகையில்,

தமிழ்த்தேசியம் என்ற வார்த்தை இன்று அரசியல்வாதிகள் உச்சரிக்கும் ஒரு சொல்லாக மாத்திரமே உள்ளது. தேசியம் என்பது அரசியல்வாதிகளுக்குரிய ஒன்றாக மாத்திரமே மக்களாலும் கருதப்படும் சூழ்நிலை உருவாகியுள்ளது. ஆனால், தேசியம் என்பது மக்களின் வாழ்நிலம், அவர்கள் பேசும் மொழி, அவர்களின் பண்பாடு, அவர்களின் பொருளாதாரம் ஆகிய நான்கு தூண்களில் கட்டப்பட்ட ஓர் உணர்வுபூர்வமான பிரக்ஞை ஆகும். அந்தவகையில், தமிழ்த்தேசியம் என்பது தமிழ் மக்களிடமேயே வாழ்கின்றது.

நாட்டில் தற்போது நிலவும் பொருளாதாரநெருக்கடியால் இலங்கையிலுள்ள விவசாயிகள் அனைவரும் பிரச்சினைகளை எதிர்கொண்டு வருகின்றனர். பசளைகள் இல்லாததாலும், எரிபொருள் இல்லாததாலும் எந்தவொரு விவசாயியாலும் உரிய அறுவடையைப் பெறமுடியவில்லை. ஆனால், வடக்குக்கிழக்கு விவசாயிகள் ஏற்கனவே போரால் அதிகம் பாதிக்கப்பட்டவர்கள் என்றவகையில் தற்போது இரட்டிப்பு மடங்காகப் பிரச்சினைகளை எதிர்கொண்டு வருகின்றனர்.

போர் நெருக்கடிகளின்போதும் எமது விவசாயிகள் மண்ணைவிட்டு இடம்பெயரவில்லை. அறுவடை பொய்த்தபோதும் விவசாயத்தைவிட்டு விலகவில்லை. அடுத்தமுறையாவது அறுவடை கிடைக்கும் என்ற நம்பிக்கையோடு வயலில் கண்ணீரோடும் வியர்வையோடும் இன்றளவும் உழுது கொண்டுதான் இருக்கிறார்கள். எமது மக்களின் உணவுப்பாதுகாப்பு கேள்விக்குறியாகியிருக்கும் இன்றையநிலையில் விளைநிலங்களில் நாளாந்தம் போராடும் எங்களின் விவசாயிகளை விடவா வேறு தமிழ்த்தேசியப் போராளிகள் இருக்கப்போகிறார்கள்? என்றும் தெரிவித்தார்.

தமிழ்த்தேசியப் பசுமை இயக்கத்தால்

உலருணவுப் பொதிகள் விநியோகம்

தமிழ்த்தேசியப் பசுமை இயக்கம் வறுமைக் கோட்டுக்குக்கீழ் வாழுகின்ற பொருளாதார ரீதியாக மிகவும் நலிவுற்றிருக்கும் குடும்பங்களுக்கு உலருணவுப் பொதிகளை வழங்கி வருகிறது. இதன் தொடர்ச்சியாக, நாட்டில் நிலவுகின்ற பொருளாதார நெருக்கடி மற்றும் சீரற்ற காலநிலையால் அதிகம் பாதிக்கப்பட்ட 100 குடும்பங்களுக்கு நேற்று புதன்கிழமை (14.12.2022) உலருணவுப் பொதிகளை வழங்கியுள்ளது. நாவாந்துறை மற்றும் பழம் வீதி ஆகிய பகுதிகளில் இருந்து இக்குடும்பங்கள் தெரிவுசெய்யப்பட்டுள்ளன.

உலருணவுப் பொதிகள் தமிழ்த்தேசியப் பசுமை இயக்கத்தின் தலைமைச் செயலகத்தில் அதன் தலைவர் பொ. ஐங்கரநேசன் தலைமையில் வழங்கிவைக்கப்பட்டுள்ளன. இதற்கான நிதியை அமரர் பொ. பரமேஸ்வரனின் பிறந்த தினத்தை முன்னிட்டு அவரது பிள்ளைகள் வழங்கியிருந்தனர். இந்நிகழ்ச்சியில் திருமதி பராசக்தி பரமேஸ்வரன் கலந்துகொண்டு உலருணவுப் பொதிகளை வழங்கி வைத்துள்ளார்.

ஜனாதிபதியின் சர்வகட்சிக் கூட்டம் தொடர்பாகத்

தமிழ்த்தேசியக் கட்சிகள் கூடி ஆராய்வு

தமிழர் விவகாரத்தைக் கையாளுவதற்குத் தனியானதொரு கட்டமைப்பை உருவாக்க முடிவு

ஜனாதிபதி ரணில் விக்ரமசிங்க டிசம்பர் 13ஆம் திகதி தேசிய இனப் பிரச்சினைக்குத் தீர்வுகாண்பது குறித்து ஆராய்வதற்காகப் பாராளுமன்றத்தில் அங்கம் வகிக்கும் அனைத்துக் கட்சிகளதும் கூட்டத்தை நடாத்துவதற்கு அழைப்பை விடுத்துள்ளார். இது தொடர்பாகத் தமிழ்க்கட்சிகள் எடுக்கவேண்டிய பொது நிலைப்பாடு தொடர்பாக ஆராய்வதற்காகக் கடந்த ஞாயிற்றுக்கிழமை (11.12.2022) தமிழ்த்தேசியக் கட்சிகளின் கூட்டம் நடைபெற்றுள்ளது.

யாழ்ப்பாணம் ராஜா கிறிம் ஹவுஸ் சரஸ்வதி மண்டபத்தில் தமிழ்த்தேசிய வாழ்வுரிமை இயக்கத்தின் தலைவர் வி.எஸ். சிவகரனின் தலைமையில் இக்கூட்டம் நடைபெற்றது. இதில் தமிழரசுக் கட்சியின் சார்பில் மாவை. சேனாதிராஜா, எம்.ஏ. சுமந்திரன், கே. தவராசா, ஈழமக்கள் புரட்சிகர முன்னணியின் சார்பில் சுரேஸ் பிரேமச்சந்திரன், தமிழ் மக்கள் கூட்டணி சார்பில் க. அருந்தவபாலன், ஜனநாயக மக்கள் விடுதலை முன்னணியின் சார்வில் பா. கஜதீபன், தமிழ்த்தேசியப் பசுமை இயக்கத்தின் சார்பில் பொ. ஐங்கரநேசன் பங்கேற்றிருந்தார்கள். இவர்களுடன் யாழ்ப்பாண பல்கலைக்கழக அரசியல் துறைத் தலைவர் கே.ரி. கணேசலிங்கம், அரசியல் ஆய்வாளர் நிலாந்தன், சமூகச் செயற்பாட்டாளர் ம. இரேனியஸ் செல்வின் ஆகியோரும் கலந்துகொண்டிருந்தனர். இவர்களுடன் பொது அமைப்புகளின் பிரதிநிதிகளும் பத்திரிகை ஆசிரியர்களும் கலந்துகொண்டிருந்தார்கள்.

கலந்துகொண்ட பலரும், அரசாங்கம் நாட்டில் நிலவும் பொருளாதார நெருக்கடியைச் சர்வதேச உதவிகளைப்பெற்றுத் தணிவிக்கும் உள்நோக்குடனேயே பேச்சு வார்த்தைக்கு அழைத்துள்ளது. இதில் தமிழர் தரப்பிற்குத் தீர்வு கிட்டப்போவதில்லையாயினும் அரசின் அழைப்பை நிராகரிப்பது அரசாங்கத்துக்கே சாதகமாக அமைந்துவிடும் என்பதால் பங்கேற்பதே பொருத்தமானது என்ற கருத்தை முன்வைத்தனர். மேலும், பேச்சு வார்த்தையில் பங்கேற்பவர்கள் உடனடிப் பிரச்சினைகளான காணி அபகரிப்புக்கு முற்றுப்புள்ளி, அரசியல் கைதிகளின் விடுதலை போன்றவற்றை வலியுறுத்துவதோடு, அரசியல் அமைப்பில் குறிப்பிட்டுள்ள அதிகாரப் பகிர்வு ஏற்பாடுகளையும் உடனடியாக நடைமுறைப்படுத்த வலியுறுத்த வேண்டும் என்பதையும் தெரிவித்தனர். அத்தோடு, தமிழ் மக்களின் அரசியல் பிரச்சினைக்கு நிரந்தரமானதொரு தீர்வை எட்டக் கால எல்லை நிர்ணயித்துப் பேச்சுவார்த்தை நடைபெறவேண்டும், இது வேறு நாடுகளின் மத்தியஸ்தத்துடன் நடைபெற வேண்டும் எனவும் வலியுறுத்தியிருந்தார்கள்.

கலந்துரையாடலில் பங்கேற்றிருந்த பெரும்பாலானவர்கள், அரச தரப்புகள் பேச்சுவார்த்தைக்குக் கூப்பிடும்போது மாத்திரம் கூடிக்கலைந்து போகாமல் தமிழ் மக்களின் பிரச்சினைகள் தொடர்பாகக் கையாள்வதற்கு நிலையானதொரு கட்டமைப்பின் அவசியத்தை வலியுறுத்தினர். அது வெறுமனே அரசியல் ரீதியான பிரச்சினைகளை மட்டும் கையாளாமல் பொருளாதாரம், அபிவிருத்தி, பண்பாடு சார்ந்த பல்வேறுபட்ட செயற்பாடுகளிலும் ஈடுபடும் வகையில் உருவாக்கப்பட வேண்டும் என்பதையும் சுட்டிக் காட்டினார்கள். இதற்கு அமைவாகக் கலந்துரையாடலின் முடிவில், இலங்கை அரசாங்கத்துடனான பேச்சு வார்த்தைகள் உள்ளிட்ட தமிழர்தரப்பின் அரசியல் முன்னெடுப்புகளையும் இதர விடயங்களையும் கையாள்வதற்கான துறைசார் நிபுணத்துவம் கொண்டவர்களையும் தமிழ்த்தேசியக் கட்சிகளையும் உள்ளடக்கித் தனியானதொரு கட்டமைப்பை உருவாக்குவதற்கு உடன்பாடு எட்டப்பட்டுள்ளது.

Vaname - Music Video.mp4

தமிழ்த்தேசியப் பசுமை இயக்கத்தின் தயாரிப்பில் உருவான பூவன் மீடியாக் கலைஞர்களின்

வனமே என் இனமே - காணொலிப்பாடல்

வனமே என் இனமே காணொலிப்பாடல் வெளியீடு

வனம் இன்றிப்போனால் எம் இனம் இன்றிப்போகும் என்ற கருப்பொருளில் வனங்களின் முக்கியத்துவத்தை எடுத்துச்சொல்லும் வனமே என் இனமே என்ற காணொலிப்பாடல் தமிழ்த்தேசியப் பசுமை இயக்கத்தால் நேற்று வெள்ளிக்கிழமை (25.11.2022) வெளியிடப்பட்டுள்ளது. வடமாகாண மரநடுகை மாதத்தை முன்னிட்டு தமிழ்த்தேசியப் பசுமை இயக்கம் நல்லூர் சங்கிலியன் பூங்காவில் ஏற்பாடு செய்துள்ள மலர்க்கண்காட்சியின்போதே இக் காணொலிப்பாடல் வெளியிடப்பட்டுள்ளது. தமிழ்த்தேசியப் பசுமை இயக்கத்தின் கலை இலக்கிய அணியின் துணைச்செயலாளர் கை. சரவணனின் தலைமையில் நடைபெற்ற வெளியீட்டு நிகழ்ச்சியில் இசைவாணர் கண்ணன் பிரதம விருந்தினராகக் கலந்துகொண்டு காணொலிப்பாடலின் முதல் திரையிடலைத் தொடக்கி வைத்தார். திரையிடலைத் தொடர்ந்து யாழ்ப்பாணப் பல்கலைக்கழகத்தின் ஊடகக் கற்கைகள் துறையின் தலைவர் பேராசிரியர் சி. ரகுராம் கருத்துரையை வழங்கினார்.

வனமே என் இனமே பாடலை பூவன் மதீசன் எழுதிப்பாடி நடிக்க ராஜ் சிவராஜ் இயக்கியுள்ளார். இது தமிழ்த்தேசியப் பசுமை இயக்கத்தின் ஒரு தயாரிப்பாகும்.

பெரும் வரவேற்பைப் பெற்றுள்ள

சங்கிலியன் பூங்காவின்

கார்த்திகை வாசம்

ஞாயிறு இறுதி நாள்

தமிழ்த்தேசியப் பசுமை இயக்கம் வடமாகாண மரநடுகை மாதத்தை முன்னிட்டு நல்லூர் சங்கிலியன் பூங்காவில் கார்த்திகை வாசம் என்ற மலர்க் கண்காட்சியை ஏற்பாடு செய்துள்ளது. மலர்ச்செடிகள் மற்றும் மரக்கன்றுகளைக் காட்சிப்படுத்தி விற்பனை செய்யும் ‘மலர் முற்றம்’ என்ற காட்சித் திடல் சங்கிலியன் பூங்காவில் கடந்த 18ஆம் திகதி (வெள்ளிக் கிழமை) திறந்து வைக்கப்பட்டுள்ளது. இம்மலர் முற்றத்தில் யாழ்ப்பாணம், கிளிநொச்சி மாவட்டங்களைச் சேர்ந்த தாவர உற்பத்தியாளர்கள் காட்சிக்கூடங்களை அமைத்துள்ளனர். இதனைத் தினமும் பல நூற்றுக்கணக்கானவர்கள் ஆர்வத்துடன் பார்வையிட்டு வருவதோடு மலர்ச் செடிகளையும் மரக்கன்றுகளையும் வாங்கிச் செல்கின்றனர்.

தமிழ்த்தேசியப் பசுமை இயக்கம் வழமைபோன்றே இந்த ஆண்டும் பாடசாலை மாணவர்களுக்கு இலவசமாக மரக்கன்றுகளை வழங்கி வருவதோடு, ஆலயங்களுக்கும் அதன் பழமுதிர்ச்சோலை திட்டத்தின் கீழ் இலவசமாகப் பழமரக்கன்றுகளை வழங்கி வருகிறது. பொது மக்களிடம் பெரும் வரவேற்பைப் பெற்றுள்ள இக் கார்த்திகை வாசத்தில் காட்சிக் கூடங்கள் எதிர்வரும் 27ஆம் திகதிவரை (ஞாயிற்றுக் கிழமை) தினமும் காலை 8.30 மணிமுதல் முன்னிரவு 7.00 மணிவரை திறந்திருக்கும் என்பது குறிப்பிடத்தக்கது.

தமிழ்த்தேசியப் பசுமை இயக்கத்தால்

முள்ளியான் ஆலயங்களில் பழமரநடுகை

தமிழ்த்தேசிய பசுமை இயக்கம் வடமாகாண மரநடுகை மாதத்தை முன்னிட்டு ஆலயங்களில் பழமரச் செய்கையை ஊக்குவிக்கும் நோக்கில் பழமுதிர்ச்சோலை என்ற திட்டத்தை முன்னெடுத்து வருகிறது. இத்திட்டத்தின்கீழ் நேற்று ஞாயிற்றுக் கிழமை (20.11.2022) வடமராட்சி கிழக்கு முள்ளியான் பகுதியிலுள்ள ஆலயங்களில் பழமரக்கன்றுகள் நடுகை செய்யப்பட்டுள்ளன. தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் கேவில் முத்துமாரியம்மன் ஆலயம், வேதக்குளம் மயிலிய வைரவர் ஆலயம், உணவத்தை கண்ணகை அம்மன் கோவில், வெற்றிலைக்கேணி செல்வவிநாயகர் ஆலயம் ஆகிய ஆலயங்களின் அறங்காவல் குழுவினரிடம் பழமரக்கன்றுகளைக் கையளித்ததோடு பழமரக்கன்றுகளை நாட்டியும் வைத்தார்.

தமிழ்த்தேசியப் பசுமை இயக்கம் நல்லூர் சங்கிலியன் பூங்காவில் மரநடுகை மாதத்தை முன்னிட்டுக் கார்த்திகை வாசம் என்ற மலர்க்கண்காட்சியை ஏற்பாடு செய்துள்ளது. இம்மாதம் 27ஆம் திகதி வரை நடைபெறவுள்ள இக்கண்காட்சியில் முறையாகப் பராமரிக்கக்கூடிய ஆலயங்களுக்குத் தமிழ்த்தேசியப் பசுமை இயக்கம் பழமரக்கன்றுகளை இலவசமாக வழங்கி வருகின்றமையும் குறிப்பிடத்தக்கது.

கார்த்திகைப்பூ தமிழ்த்தேசிய இனத்தின் அடையாளம்

பொ. ஐங்கரநேசன் சுட்டிக்காட்டு

கார்த்திகைப்பூவை இலங்கை அரசாங்கம் விடுதலைப்புலிகளின் அடையாளமாகவே பார்க்கிறது. கார்த்திகைப்பூவை ஏன் முதன்மைப்படுத்துகிறீர்கள் என்று பயங்கரவாதக் குற்றப் புலனாய்வுத் துறையினர் என்னிடம் கேட்டு வாக்குமூலம் பெற்றிருக்கிறார்கள். கார்த்திகைப்பூவை விடுதலைப் புலிகள் தேசியமலராகத் தெரிவுசெய்திருந்தார்கள் என்பதால் அது விடுதலைப்புலிகளை அடையாளப்படுத்தும் பூ அல்ல. அது தமிழ்த்தேசிய இனத்தின் தாயகச் சூழலின் அடையாளம். அந்தவகையில், அது தமிழ்த்தேசிய இனத்தின் அடையாளம் ஆகும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

வடமாகாண மரநடுகை மாதத்தை முன்னிட்டுத் தமிழ்த்தேசியப் பசுமை இயக்கத்தின் கார்த்திகை வாசம் மலர்க்கண்காட்சி நல்லூர் கிட்டு பூங்காவில் நேற்று வெள்ளிக்கிழமை (18.11.2022) ஆரம்பமாகியுள்ளது. கார்த்திகைப்பூச்சூடி ஆரம்பமான இதன் தொடக்கவிழாவுக்குத் தலைமை வகித்து உரையாற்றும்போதே பொ. ஐங்கரநேசன் இவ்வாறு சுட்டிக்காட்டியுள்ளார்.

அங்கு அவர் தொடர்ந்து உரையாற்றுகையில்,

சங்கக்கவி கபிலர் தொடங்கி தாயகக்கவி புதுவை இரத்தினதுரை வரை கார்த்திகைப் பூவைப் பற்றிப்பாடாத புலவர்களே இல்லை. அந்த அளவுக்குத் தமிழ்மக்களின் வாழ்வியலில் கார்த்திகைப் பூவுக்குத் தனியானதொரு இடமுண்டு. இதனாலேயே, இந்தியாவில் தமிழ்நாடு தனது மாநில மலராகக் கார்த்திகைப்பூவைத் தெரிவுசெய்துள்ளது. கார்த்திகைப்பூவின் பிரகாசமான மஞ்சள், சிவப்பு வர்ணங்களும் மாவீரர்களை நினைவேந்தும் கார்த்திகையில் மலரும் அதன் பண்பும் மேலதிக காரணங்களாக அமைய, விடுதலைப்புலிகளும் கார்த்திகைப்பூவைத் தேசியமலராக அறிவித்தார்கள்.

விடுதலைப்புலிகள் இப்போது இல்லை என்பதற்காகக் கார்த்திகைப்பூ தமிழ்மக்களின் தேசிய அடையாளங்களில் ஒன்று என்ற அந்தஸ்தை ஒருபோதும் இழந்துவிடாது. அது யார் இருந்தாலும் இல்லாவிட்டாலும் மாவீரர்களுக்கு அஞ்சலி செலுத்துவதுபோன்று ஆண்டுதோறும் கார்த்திகையில் மொட்டவிழ்ந்து கொண்டுதான் இருக்கிறது. இவை காரணமாகவே கார்த்திகை மாத மரநடுகை விழாக்களில் கார்த்திகைப்பூச்சூடுவதை நாம் வழக்கமாக்கிக் கொண்டிருக்கிறோம். இதன்மூலம் எமது சுற்றுச்சூழல் பற்றியும் வரலாறுபற்றியும் இளையதலைமுறைகளுக்கு நாம் எடுத்தியம்புகிறோம்.

கார்த்திகைப்பூவை அதிலுள்ள நஞ்சு காரணமாக நிராகரிப்பவர்களும் இருக்கிறார்கள். பூக்கும் தாவரங்கள் எல்லாமே ஏதோவொரு அளவில் ஏதோவொரு நஞ்சை எதிரிகளிலிருந்து தங்களைத் தற்காத்துக் கொள்வதற்காகக் கொண்டிருக்கின்றன. கார்த்திகைப்பூச்செடியிலுள்ள நஞ்சு மருந்தாகவும் பயன்படுகிறது. இதனால், தமிழகத்தில் ஆயிரக்கணக்கான ஏக்கர்களில் கார்த்திகைப் பூச்செடி பயிரிடப்படுகிறது. பலகோடி ரூபாய்கள் அந்நியச்செலாவணியாகக் கிடைக்கிறது. நாமும் கார்த்திகைச்பூச்செடிகளை பெரும்பண்ணைகளாக அமைக்க முன்வரவேண்டும் என்றும் தெரிவித்தார்.

பசுமை இயக்கத்தின் பழமுதிர்ச்சோலை

மரநடுகைமாத செயற்றிட்டம் ஆரம்பம்

தமிழ்த்தேசியப் பசுமை இயக்கம் வடமாகாண மரநடுகை மாதச் செயற்பாடுகளில் ஒன்றாகப் பழமுதிர்ச்சோலை என்ற திட்டத்தை இந்த ஆண்டு முன்னெடுத்துள்ளது. ஆலயங்கள் தோறும் பழமரங்கள் நாட்டுவோம் என்ற கருப்பொருளில் முன்னெடுக்கப்பட்டுள்ள இத்திட்டத்தின் தொடக்க நிகழ்ச்சி நேற்று திங்கட்கிழமை (07.11.2022) சம்பிரதாயபூர்வமாகப் பூநகரியில் இடம்பெற்றுள்ளது. பூநகரி ஸ்ரீ சர்வவிக்கின விநாயகர் ஆலயத்தில் நடைபெற்ற இந்நிகழ்ச்சியில் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன், பொருளாளர் க. கேதீஸ்வரநாதன் ஆகியோர் கலந்துகொண்டு ஆலய அறங்காவலர் குழுவினர்களிடம் பழமரக்கன்றுகளை வழங்கியதோடு, மரக்கன்றுகளை நாட்டியும் வைத்தனர். இந்நிகழ்ச்சியில் பூநகரி பிரதேசமருத்துவமனை மருத்துவ பொறுப்பு அதிகாரி ஸ்ரீ. ஆனந்தசிறி அவர்களும் கலந்துகொண்டிருந்தார். தொடர்ந்து, பூநகரி ஞானிமடம் கொட்டிலுப் பிள்ளையார் ஆலயம் மற்றும் பூநகரி பிரதேசமருத்துவமனைக்கும் பழமரக்கன்றுகள் வழங்கி வைக்கப்பட்டன.

வடக்கு மாகாணசபை 2014ஆம் ஆண்டு கார்த்திகையை வடமாகாண மரநடுகை மாதமாகப் பிரகடனப்படுத்தியிருந்தது. கார்த்திகை மழைவீழ்ச்சிகூடிய மாதம் என்பதோடு தமிழ்த்தேசிய அரசியலிலும் முக்கியத்துவம் வாய்ந்த ஒரு மாதமாகும். தமிழ்மக்கள் இறந்தவர்களின் நினைவாக மரங்களை நடுகைசெய்யும் பண்பாட்டு மரபைக் கொண்டுள்ளனர். மாவீரர்களை நினைவேந்தும் நாட்களும் இம்மாதத்திலேயே அடங்குவதால் இம்மரநடுகை மாதத்தைப் பொதுஅமைப்புகளும் பொதுமக்களும் ஆண்டுதோறும் உணர்வுபூர்வமாகக் கடைப்பிடித்து வருகின்றமை குறிப்பிடத்தக்கது.

கார்த்திகையில் மரநடுகை தேசத்தை மாத்திரமல்ல;

தமிழ்த்தேசியத்தின் ஆன்மாவையும் குளிரச்செய்யும்

- பொ. ஐங்கரநேசன் தெரிவிப்பு

வடக்கு மாகாணசபையின் தீர்மானத்துக்கு அமைவாக 2014ஆம் ஆண்டுமுதல் கார்த்திகை மாதம் வடமாகாண மரநடுகை மாதமாக கடைப்பிடிக்கப்படுகிறது. இதனை முன்னிட்டு பொ. ஐங்கரநேசன் வெளியிட்டுள்ள ஊடகஅறிக்கையிலேயே இவ்வாறு தெரிவித்துள்ளார்.

அந்த அறிக்கையின் முழுவிபரம் வருமாறு;

பூமி சூடேறி வருவதால் காலநிலையில் படுபாதகமான மாற்றங்கள் ஏற்படத்தொடங்கியுள்ளன. கடும் வறட்சி, காலம்தப்பிய பெருமழை, வேகமெடுக்கும் சூறாவளிகள், கடல்மட்ட உயர்வு, உயிரினங்களின் அழிவு என்று காலநிலை மாற்றத்தின் விளைவுகளை நாம் தற்போது அனுபவிக்கத் தொடங்கியுள்ளோம். இதனால், வெப்பநிலை அதிகரிப்புக்குக் காரணமான கரியமிலவாயுவை உறிஞ்சி அகற்றுவதற்கு மரங்களின் நடுகையை ஒரு பேரியக்கமாக முன்னெடுக்கவேண்டிய கட்டாயநிலைக்கு நாம் தள்ளப்பட்டுள்ளோம்.

மரநடுகையைப் பெருமளவில் மேற்கொள்வதற்கு கூடுதலான மழைவீழ்ச்சியைப் பெறும் கார்த்திகை மிகப்பொருத்தமான மாதமாகும். ஈழத்தமிழர்களின் வாழ்வியலிலும் கார்த்திகை மாதம் தனித்துவமான இன்னுமொரு சிறப்பினைக் கொண்டுள்ளது. இம்மாதத்திலேயே மண்ணுக்காக மரணித்த மறவர்களைக் கூட்டாக நினைவிற்கொள்ளும் நாள் அடங்குகிறது. மரவழிபாட்டைத் தமது தொல்வழிபாட்டு முறையாகக்கொண்ட தமிழர்கள், இறந்தவர்களின் நினைவாக மரங்களை நடுகைசெய்து, அவற்றை உயிருள்ள நினைவுச் சின்னங்களாகப் போற்றிய பண்பாட்டு மரபைக் கொண்டிருக்கின்றனர்.

தேசியம் என்பது வெறுமனே தட்டையான ஒர் அரசியற் சொல்லாடல் அல்ல. இது ஒரு இனத்தின் வாழ்புலம், மொழி, வரலாறு, பண்பாடு, மத நம்பிக்கைகள் ஆகிய கூறுகளின் திரட்சியான ஒரு வாழ்க்கை முறையாகும். அந்த வகையில், கார்த்திகைமாத மரநடுகை என்பது தமிழ்த்தேசிய நோக்கிலும் மிகவும் பொருத்தப்பாடான ஒன்றாகும். எனவே தமிழ்மக்கள் கார்த்திகை மரநடுகையை ஒரு சூழல்பேண் நடவடிக்கையாக மாத்திரமல்லாது உணர்வெழுச்சியுடன்கூடிய ஒரு தமிழ்த்தேசியச் செயற்பாடாகவும் கொண்டாட வேண்டியது அவசியமாகும்.

- இவ்வாறு அந்த அறிக்கையில் தெரிவிக்கப்பட்டுள்ளது.

சமூக நலனோம்புச் செயற்பாடுகளுக்கான நன்கொடை வழங்கல் - Donation for Social Welfare Activities

Donate

திலீபனின் தூபியை அன்று படையினர் அழித்தார்கள்

எஞ்சிய நினைவுகளை இன்று நாமே அழிக்கிறோம்

ஐங்கரநேசன் ஆதங்கம்

திலீபனின் நினைவேந்தலில் ஏற்பட்ட குழப்பங்களும் அதையொட்டிய ஊடகச் சந்திப்புகளும் பேரினவாதிகளுக்கு மிகுந்த மகிழ்ச்சியை ஏற்படுத்தியுள்ளன. ஆனால், தமிழ் மக்கள் இவற்றால் வெட்கித் தலை குனிந்துள்ளார்கள். திலீபனின் தூபியை அன்று படையினர் அழித்தார்கள். அவர்களால் மக்கள் மனங்களிலிருந்து நினைவுகளை அழிக்க முடியவில்லை. ஆனால், எஞ்சிய நினைவுகளை இன்று நாமே அழிக்கிறோம் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தனது ஆதங்கத்தை வெளிப்படுத்தியுள்ளார்.

தியாக திலீபன் நினைவேந்தல் குழப்பங்கள் தொடர்பாக பொ. ஐங்கரநேசன் வெளியிட்டுள்ள ஊடக அறிக்கையிலேயே இவ்வாறு தனது ஆதங்கத்தை வெளிப்படுத்தியுள்ளார்.

அந்த ஊடக அறிக்கையில் அவர் மேலும் தெரிவிக்கையில்,

தமிழ்த்தேசிய விடுதலைப் போராட்டத்தில் தங்கள் இன்னுயிர்களை ஈந்தவர்கள் எந்நாளும் நினைவுகூரப்படவேண்டியவர்கள். இது வெறுமனே நினைவுகளை மனத்திரையில் மீட்கும் சடங்குகள் அல்ல. மாறாக, அவர்களின் போராட்ட நியாயங்களையும் போராட்டத் தியாகங்களையும் அடுத்த தலைமுறைகளுக்குக் கடத்துகின்ற உயிர்ப்பான அரசியற் செயற்பாடுகளுமாகும்.

அரசியற் காரணங்களுக்காகப் போராடி மடிந்தவர்களின் நினைவேந்தல்களில் அரசியல் நீக்கம் செய்வது அவர்களின் போராட்ட நியாயங்களைக் குழிதோண்டிப் புதைப்பதாகும். இத்தகைய நினைவேந்தல்களில் இனத்துவ அரசியலைத் தாண்டிக் கட்சி அரசியல் மேலோங்குவது போராட்டத் தியாகங்களைச் சூறையாடுவதாகும். ஆனால், துரதிர்ஷ்டமாகத் தமிழ்த்தேசிய அரசியற் களத்தில் இன்று இவையே அதிகம் நிகழ்ந்தேறுகின்றன.

நினைவேந்தல் குழப்பங்களுக்கு யார் காரணம் என்ற கேள்விக்கும் அப்பால் இவை நிகழ்ந்திருக்கவே கூடாது என்பதுதான் ஒட்டுமொத்தத் தமிழ் மக்களினதும் வேதனைக் குரலாக உள்ளது. கட்சி வேறுபாடுகள் தாண்டிப் பேரினவாதிகள் ஒன்றுபட்டு நினைவேந்தியவர்களைக் கைதுசெய்யுமாறு கொக்கரிக்கிறார்கள். ஆனால், நாமோ பொது நினைவேந்தல்களிற்கூட ஒன்றுபட முடியாமல் தமிழ்த்தேசியத்தை மழுங்கடித்து வருகிறோம் என்றும் குறிப்பிட்டுள்ளார்.

பசுமை இயக்கத்திடம் விதைகளை மீளளித்த விவசாயிகள்

மாண்புறு உழவர் சான்றிதழ் வழங்கிக் கௌரவிப்பு

தமிழ்த்தேசியப் பசுமை இயக்கம் சிறுதானியங்களின் உற்பத்தியை ஊக்குவிக்கும் நோக்கில் இராசதானியம் என்ற திட்டத்தை முன்னெடுத்து வருகிறது. இத்திட்டத்தில் விதைகளைப் பெற்ற விவசாயிகள் அறுவடையின் பின்னர் விதைகளைத் தமிழ்த்தேசியப் பசுமை இயக்கத்திடம் மீள வழங்கும் மாண்புறு உழவர் நிகழ்ச்சி நேற்று சனிக்கிழமை (24.09.2022) நவக்கிரியில் நடைபெற்றது. இந்நிகழ்ச்சியின்போது விதைகளை மீளக்கையளித்த விவசாயிகள் மாண்புறு உழவர் சான்றிதழ்கள் வழங்கிக் கௌரவிக்கப்பட்டனர்.

தமிழ் மக்களின் பண்டைய உணவுப் பண்பாட்டில் பிரதான இடத்தைப் பெற்றிருந்த சிறுதானியங்கள் தற்போது வழக்கொழிந்து வருகின்றன. சிறுதானியங்கள் வறண்ட நிலத்துக்குப் பொருத்தமான அதிக கவனிப்புத் தேவையில்லாத போசாக்கு நிறைந்த பயிர்களாகும். நாட்டில் நிலவுகின்ற பொருளாதார நெருக்கடியினால் ஏற்பட்டிருக்கும் உணவுப்பற்றாக்குறைவைக் கருத்திற்கொண்டு தமிழ்த்தேசியப் பசுமை இயக்கம் சிறுதானியங்களை மீள மூடிசூட்டுவோம் என்ற கருப்பொருளில் இராசதானியத் திட்டத்தை முன்னெடுத்துள்ளது.

இராசதானியத் திட்டத்தில் விதைகளைப் பெறும் விவசாயிகள் அறுவடையின் பின்னர் பெற்றுக்கொண்ட விதைகளின் இரட்டிப்பு மடங்கு விதைகளை ஏனைய விவசாயிகளுக்கு வழங்குவதற்காகத் தமிழ்த்தேசியப் பசுமை இயக்கத்திடம் மீளக் கையளிக்கவேண்டும் என்ற உடன்பாட்டுடன் விதைகள் வழங்கப்பட்டு வருகின்றன. இத்திட்டத்தின்கீழ் நூற்றுக்கணக்கான விவசாயிகள் விதைகளைப் பெற்று ஆர்வத்தோடு சிறுதானியச் செய்கையில் ஈடுபட்டுள்ளனர். இவர்களில் அறுவடையை முடித்த ஒரு தொகுதி விவசாயிகளே தமிழ்த்தேசியப் பசுமை இயக்கத்தின் தலைவர் பொ. ஐங்கரநேசனிடம் விதைகளைக் கையளித்துள்ளனர்.

நவக்கிரி மாணிக்கப் பிள்ளையார் கோவில் மண்டபத்தில் பொ. ஐங்கரநேசன் தலைமையில் நடைபெற்ற இந்நிகழ்ச்சியில் பிரதம விருந்தினராக விவசாய விஞ்ஞானி கலாநிதி எஸ். ஜே. அரசகேசரி கலந்துகொண்டிருந்தார். சிறப்பு விருந்தினர்களாகச் சமூகச் செயற்பாட்டாளர் ம. இரேனியஸ் செல்வின், நீர்ப்பாசனப் பொறியியலாளர் ச. சர்வராஜா ஆகியோர் பங்கேற்றிருந்தனர். இந்நிகழ்ச்சியில் குரக்கன் கஞ்சி வழங்கி உபசரிக்கப்பட்டமையும் குறிப்பிடத்தக்கது.

அரசியல் கைதிகளைச் சந்திக்க உறவினர்கள் கொழும்பு பயணம்

சர்வதேசக் கவனத்தை ஈர்க்கும் வகையில் ஏற்பாடு

நீண்டகாலமாகச் சிறைச்சாலைகளில் தடுத்து வைக்கப்பட்டிருக்கும் தமிழ் அரசியல் கைதிகளைச் சந்திப்பதற்காக அவர்களின் உறவினர்கள் யாழ்ப்பாணத்தில் இருந்து கொழும்பு மகசீன் சிறைச்சாலையை நோக்கிய பயணம் ஒன்றை ஆரம்பித்துள்ளனர். ஐக்கிய நாடுகள் சர்வதேச மனித உரிமைகள் பேரவையின் அமர்வு ஜெனீவாவில் திங்கட்கிழமை (12.09.2022) ஆரம்பமாகின்ற நிலையில் பயங்கரவாதத் தடைச்சட்டம் மற்றும் அதன்கீழ் கைதுசெய்யப்பட்டுச் சிறைகளில் அடைக்கப்பட்டுள்ள அரசியல் கைதிகள் தொடர்பாகச் சர்வதேசக் கவனத்தை ஈர்க்கும் வகையில் உறவினர்களது இந்தப் பயணம் கடந்த சனிக்கிழமை (10.09.2022) ஆரம்பமாகியது. குரல் அற்றவர்கள் குரல் அமைப்பு யாழ். ஊடக அமையத்தில் இது தொடர்பான ஊடகவியலாளர் சந்திப்பை நிகழ்த்திய பின்னர், ஊடக அமையத்தின் முன்றலில் இருந்து ஒழுங்குசெய்யப்பட்ட பேருந்தில் கொழும்பை நோக்கிய இப்பயணம் ஆரம்பமானது.

கொழும்பு மகசீன் சிறைச்சாலையில் தமிழ் அரசியல் கைதிகள் உணவு தவிர்ப்புப் போராட்டத்தில் ஈடுபட்டுள்ளனர். இந்நிலையில் தமிழ் அரசியல் கைதிகளின் உறவினர்கள் சிறைச்சாலையை நோக்கி மேற்கொண்டுள்ள இந்தப் பயணத்துக்கு வலுச்சேர்க்கும் விதமாக அவர்களை அரசியற்கட்சிகளின் பிரதிநிதிகள் மற்றும் சிவில் அமைப்புகளின் பிரதிநிதிகள் சந்தித்து வழியனுப்பி வைத்துள்ளனர். வழியனுப்பு நிகழ்ச்சியில் நாடாளுமன்ற உறுப்பினர் க.வி.விக்னேஸ்வரன், முன்னாள் நாடாளுமன்ற உறுப்பினர் எம்.கே. சிவாஜிலிங்கம், தமிழ்த்தேசியப்பசுமை இயக்கத்தின் தலைவர் பொ. ஐங்கரநேசன், பொருளாளர் க. கேதீஸ்வரநாதன், யாழ் மறைமாவட்ட குருமுதல்வர் ஜெபரட்ணம் அடிகளார், சிவபூமி அறக்கட்டளையின் முதல்வர் கலாநிதி ஆறு. திருமுருகன், பொத்துவில் தொடக்கம் பொலிகண்டி வரையான பேரெழுச்சி இயக்கத்தின் ஒருங்கிணைப்பாளர் வேலன் சுவாமிகள், யாழ் மாநகரசபையின் பிரதி மாநகரபிதா து. ஈசன், மாநகரசபை உறுப்பினர் வ. பார்த்தீபன், காணாமல் ஆக்கப்பட்ட உறவினர்கள் சங்கத்தின் யாழ். மாவட்டப் பிரதிநிதிகள் எனப் பலர் கலந்து கொண்டனர். இவர்களால், அரசியல் கைதிகளுக்கு வழங்குவதற்கென உலர் உணவுகள் அடங்கிய அத்தியாவசியப் பொருட்கள் உறவினர்களிடம் கையளிக்கப்பட்டுள்ளன.

பயணத்துக்கான ஒழுங்குபடுத்தல்களை குரல் அற்றவர்களின் குரல் அமைப்பின் ஒருங்கிணைப்பாளர் மு. கோமகன் மேற்கொண்டிருந்தார்.

பசுமை இயக்கத்தின் மாணாக்க உழவர்

வீட்டுத்தோட்டப் போட்டிக்கான விதைகள் விநியோகம்

தமிழ்த்தேசியப் பசுமை இயக்கம் மாணவர்களிடையே வீட்டுத்தோட்டச் செய்கையை ஊக்குவிக்கும் பொருட்டு ‘மாணாக்க உழவர்’ எனும் வீட்டுத்தோட்டப் போட்டியை நடாத்துகின்றது. இதற்கான விதைப் பொதிகளை மாணவர்களுக்கு வழங்கும் நிகழ்ச்சி சனிக்கிழமை (03.09.2022) நல்லூர் இளங்கலைஞர் மன்ற மண்டபத்தில் நடைபெற்றது.

தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் நடைபெற்ற விதைப்பொதிகள் வழங்கி வைக்கும் நிகழ்ச்சியில் விவசாய விஞ்ஞானியும், யாழ் பல்கலைக்கழக விவசாயபீட சிரேஷ்ட பேராசிரியருமான கலாநிதி எஸ். ஜே. அரசகேசரி, ஓய்வுநிலைப் பிரதி விவசாயப் பணிப்பாளர் பொ. அற்புதச்சந்திரன் ஆகியோர் வீட்டுத்தோட்டச் செயன்முறை தொடர்பான வழிகாட்டுதல்களை வழங்கியிருந்தார்கள்.

இந்நிகழ்ச்சியில் ஏராளமான மாணவர்களும், பெற்றோர்களும் ஆசிரியர்களும் கலந்து கொண்டிருந்தனர். மாணவர்கள் அனைவருக்கும் வீட்டுத்தோட்டத்துக்கான பத்து வகையான விதைகள் அடங்கிய பொதிகள் வழங்கி வைக்கப்பட்டன. போட்டியில் பங்கேற்கும் மாணவர்கள் அனைவருக்கும் மாணாக்க உழவர் சான்றிதழ்களும் தொடர் மதிப்பீட்டின் அடிப்படையில் சிறந்த செய்கையாளர்களுக்கு விசேட பரிசுகளும் வழங்கப்படவுள்ளன.

தமிழ்த்தேசியப் பசுமை இயக்கம் மாணவர்களுக்குச் சுற்றுச்சூழல் அறிவைப்புகட்டி அவர்களிடையே சூழல் விழிப்புணர்வை ஏற்படுத்துவதன் மூலம் அவர்களைச் சூழற்பாதுகாப்பில் பங்குபற்றுநர்களாக்கும் நோக்கில் பசுமை அறிவொளி என்னும் நிகழ்ச்சித் திட்டத்தைத் தொடர்ச்சியாக முன்னெடுத்து வருகிறது. இதன் ஒரு கட்டமாகவே நாட்டில் நிலவும் பொருளாதார நெருக்கடி மற்றும் உணவுப் பிரச்சினையைக் கருத்திற்கொண்டும் சூழலுக்கு இசைவான சேதன விவசாயத்தை ஊக்குவிக்கும் நோக்கிலும் தற்போது ‘மாணாக்க உழவர்’ என்னும் வீட்டுத்தோட்டப் போட்டியை நடாத்துவது குறிப்பிடத்தக்கது.

பசுமை இயக்கத்தின் மாணாக்க உழவர்

மாணவர்களுக்கான வீட்டுத்தோட்டப் போட்டி

தமிழ்த்தேசியப் பசுமை இயக்கம் ‘மாணாக்க உழவர்’ என்ற பெயரில் மாணவர்களுக்கான வீட்டுத்தோட்டப் போட்டியொன்றை நடாத்துகின்றது. போட்டியில் பங்கேற்கும் மாணவர்களுக்கான செயன்முறை வழிகாட்டற் கருத்தமர்வும் விதைப்பொதிகள் விநியோகமும் எதிர்வரும் 03.09.2022 (சனிக்கிழமை) காலை 9.30 மணிக்கு நல்லூர், சட்டநாதர் வீதியில் அமைந்துள்ள இளங்கலைஞர் மன்ற மண்டபத்தில் நடைபெறவுள்ளது.

தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் நடைபெறவுள்ள இந்நிகழ்ச்சியில் ஓய்வுநிலைப்பிரதி விவசாயப் பணிப்பாளர் பொ. அற்புதச்சந்திரன், விவசாய விஞ்ஞானி கலாநிதி எஸ். ஜே அரசகேசரி ஆகியோர் உரையாற்ற உள்ளனர்.

நாட்டில் நிலவுகின்ற பொருளாதாரப் பிரச்சினை மற்றும் உணவுக்கான நெருக்கடி ஆகியனவற்றைக் கருத்திற்கொண்டு வீட்டுத்தோட்டம் தொடர்பான விழிப்புணர்வை ஏற்படுத்தும் நோக்குடன் இப்போட்டி முன்னெடுக்கப்பட்டுள்ளது. இப்போட்டியில் கலந்துகொள்ள விரும்பும் மாணவர்களை 01.09.2022 மாலை 5.00 மணிக்கு முன்பாக 0777969644 அல்லது 0741471759 என்ற தொலைபேசி இலக்கத்துடன் தொடர்புகொண்டு பெயர்களை முன்பதிவு செய்துகொள்ளுமாறு தமிழ்த்தேசியப் பசுமை இயக்கம் கேட்டுக்கொண்டுள்ளது. இப்போட்டியில் கலந்துகொள்ளும் மாணவர்கள் அனைவருக்கும் ‘மாணாக்க உழவர்’ சான்றிதழ்களும், சிறந்த செய்கையாளர்களுக்கு விசேட பரிசுகளும் வழங்கப்படவுள்ளதாகவும் அறிவிக்கப்பட்டுள்ளது.

பசுமை இயக்கத்தின்

ஆடிப்பிறப்பு விழா

உரும்பிராயில் சிறப்பாக இடம்பெற்றது

தமிழ்த்தேசியப் பசுமை இயக்கம் ஆடிப்பிறப்பு நாளான நேற்று ஞாயிற்றுக்கிழமை (17.07.2022) ஆடிப்பிறப்பைத் தமிழர் பண்பாட்டின் திருநாளாக உரும்பிராயில் கொண்டாடியுள்ளது. உரும்பிராய் கிழக்கு பாரதிதாசன் சனசமூகநிலைய முன்றலில் நடைபெற்ற இவ்விழாவில் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன்> கலை இலக்கிய அணியின் துணைச் செயலாளர் கை. சரவணன் ஆகியோருடன் பிரதம விருந்தினராக யாழ்ப்பாணப் பல்கலைக்கழகத்தின் முன்னாள் துணைவேந்தர் கலாநிதி நா. சண்முகலிங்கன் கலந்து கொண்டிருந்தார்.

திருமதி ரேணுகா அன்ரன்குமார் தலைமையில் நடைபெற்ற இவ்விழாவில் ஆடிக்கூழும் கொழுக்கட்டையும் பரிமாறப்பட்டதோடு கலை நிகழ்ச்சிகளும் இடம்பெற்றன. கலை நிகழ்ச்சிகளில் பங்கேற்றவர்களுக்குத் தமிழ்த்தேசியப் பசுமை இயக்கத்தினால் பரிசுப்பொருட்களும் வழங்கப்பட்டன.

தமிழர்களுக்கே உரித்தான ஒரு பண்பாட்டு அடையாளமான ஆடிப்பிறப்பும் அது சார்ந்த கொண்டாட்டங்களும் தற்போது அருகிவந்துள்ளன. இந்நிலையில், மீளவும் அதனை வெகுசனமயப்படுத்தும் நோக்கிலேயே தமிழ்த்தேசியப் பசுமை இயக்கம் பொதுமக்களுடன் இணைந்து ஆடிப்பிறப்பைச் சிறப்பான முறையில் கொண்டாடியுள்ளது.

வவுனியாவில்

தமிழ்த்தேசியப் பசுமை இயக்கத்தின்

பசுமை அறிவொளி நிகழ்ச்சி இடம்பெற்றது

தமிழ்த்தேசியப் பசுமை இயக்கத்தின் பசுமை அறிவொளி நிகழ்ச்சி நேற்று வெள்ளிக்கிழமை (15.07.2022) வவுனியாவில் நடைபெற்றது. மாணவர்களுக்குச் சுற்றுச்சூழல் சார்ந்த அறிவைப் புகட்டி அவர்களிடையே சூழல் விழிப்புணர்வை ஏற்படுத்துவதன் மூலம் அவர்களைச் சூழல் பாதுகாப்பில் பங்குபற்றுநர்களாக்கும் நோக்குடனும், மாணவர்களின் பன்முக ஆளுமைத்திறனை விருத்தி செய்யும் நோக்குடனும் தமிழ்த்தேசியப் பசுமை இயக்கம் பசுமை அறிவொளி என்ற நிகழ்ச்சித் திட்டத்தை முன்னெடுத்து வருகின்றது. இதன் தொடர்ச்சியாகவே வவுனியா கோயிற்குளத்தில் இந்நிகழ்ச்சி இடம்பெற்றுள்ளது.

தமிழ்த்தேசியப் பசுமை இயக்கத்தின் வவுனியா மாவட்ட இணைப்பாளர் சோ. சிவநேசன் தலைமையில் கோயிற்குளம் விஷ்ணு ஆலய மண்டபத்தில் நடைபெற்ற இந்நிகழ்ச்சியில் பிரதம விருந்தினராகக் கனடா உதயன் பத்திரிகையின் பிரதம ஆசிரியர் ஆர். என். லோகேந்திரலிங்கம் பங்கேற்றிருந்தார். சிறப்பு விருந்தினராகச் சிரேஸ்ட ஊடகவியலாளர் வி. தேவராஜ் கலந்துகொண்டிருந்தார். பசுமை இயக்கத்தின் தலைவர் பொ. ஐங்கரநேசன் சூழல் பாதுகாப்பில் மாணவர்களின் பங்களிப்புக் குறித்து உரையாற்றியிருந்தார். இந்நிகழ்ச்சியில் கண்ணன் அறநெறிப் பாடசாலையின் மாணவர்கள், ஆசிரியர்கள், ஆலய அறங்காவற் குழுவினர்கள் கலந்து கொண்டிருந்தார்கள். மாணவர்கள் அனைவருக்கும் கனடா ரொறன்ரோவின் மனிதநேயக் குரல் அமைப்பின் அனுசரணையுடன் சூழல் விழிப்புணர்வு மேற்கோள்கள் அச்சிடப்பட்ட அப்பியாசக் கொப்பிகள் வழங்கப்பட்டன.

தமிழ்த்தேசியப் பசுமை இயக்கத்தால்

சிறுப்பிட்டியில் சிறுதானிய விதைகள் விநியோகம்

தமிழ்த்தேசியப் பசுமை இயக்கத்தால் சிறுப்பிட்டியைச் சேர்ந்த விவசாயிகளுக்குச் சிறுதானிய விதைகள் விநியோகிக்கப்பட்டுள்ளன. நாட்டில் நிலவுகின்ற கடுமையான பொருளாதார நெருக்கடி காரணமாக உரங்கள் மற்றும் எரிபொருளுக்குப் பாரிய தட்டுப்பாடு நிலவுவதால் உணவுற்பத்தி மிகமோசமாகப் பாதிக்கப்பட்டுள்ளது. இதைக் கருத்திற்கொண்டு குறைந்தளவு நீரும் பசளைகளுமே போதுமான சிறுதானியச் செய்கையை ஊக்குவிக்கும் நோக்கில் தமிழ்த்தேசியப் பசுமை இயக்கம் இராசதானியம் என்ற திட்டத்தைக் கடந்த மாதம் முதல் முன்னெடுத்து வருகிறது. இதன் ஒரு கட்டமாகவே நேற்று திங்கட்கிழமை (27.06.2022) சிறுப்பிட்டியில் 50 விவசாயிகளுக்குக் குரக்கன், பயறு, காராமணி ஆகியவற்றின் விதைகள் வழங்கப்பட்டுள்ளன.

சிறுப்பிட்டி ஜனசக்தி சனசமூக நிலையத்தில் கு. மயூரதன் தலைமையில் நடைபெற்ற விதைகள் வழங்கும் நிகழ்ச்சியில் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் இராசதானியத் திட்டத்தின் நோக்கம் குறித்து விளக்கமளித்தார். வளவாளராகக் கலந்துகொண்ட ஓய்வுநிலைப் பிரதி விவசாயப் பணிப்பாளர் பொ. அற்புதச்சந்திரன் குறைந்தளவு நீர்ப்பாசனத்துடனும் பசளைகளுடனும் எவ்வாறு சிறுதானியச் செய்கையினை மேற்கொள்ளலாம் என்பது தொடர்பாகவும் பயிர்களில் பீடைகளின் தாக்கங்களைக் கட்டுப்படுத்தும் இயற்கை வழிமுறைகள் பற்றியும் தெளிவுபடுத்தினார்.

வழங்கப்படுகின்ற விதைகளின் நிறையின் இரட்டிப்பு மடங்கு விதைகளை விவசாயிகள் அறுவடையின் பின்னர் சுழற்சி முறையில் ஏனைய விவசாயிகளுக்கு வழங்கும் பொருட்டுத் தமிழ்த்தேசியப் பசுமை இயக்கத்திடம் கையளிக்க வேண்டும் என்ற புரிந்துணர்வின் அடிப்படையிலேயே இராசதானியத் திட்டம் முனனெடுக்கப்பட்டு வருகின்றது. விதை இரட்டி என்ற இந்த முறைமை எமது பண்டைய விவசாய மரபில் இருந்து வந்தமை குறிப்பிடத்தக்கது.

திக்கம் வடிசாலை தென்னிலங்கை நிறுவனத்துக்குத் தாரை வார்ப்பு

பனை அபிவிருத்திச்சபைத் தலைவரின் பேரினவாத எதேச்சாதிகாரம்

பொ. ஐங்கரநேசன் கடுங்கண்டனம்

எதிர்த்துப் போராட அணிதிரளுமாறும் அழைப்பு

திக்கம் வடிசாலையின் உரிமத்தைத் தங்களிடம் மீளவும் கையளிக்குமாறு அதை நிர்வகித்துவரும் வடமராட்சி பனைசார் உற்பத்தித் தொழிலாளர்கள் நீண்டகாலமாகக்கோரி வருகின்றனர். பல போராட்டங்களையும் முன்னெடுத்துள்ளனர். ஆனால், இப்போது இவர்களைப் புறந்தள்ளி, இவர்களுக்கே தெரியாமல் பனைஅபிவிருத்திச் சபையின் தலைவர் கிரிசாந்த பத்திராஜ திக்கம் வடிசாலையைத் தென்னிலங்கையைச் சேர்ந்த வி.ஏ டிஸ்ரிலறிஸ் என்ற நிறுவனத்துக்கு 25 வருடக் குத்தகைக்குத் தாரை வார்த்துள்ளார். பேரினவாத எதேச்சாதிகாரப் போக்குடன் வடமராட்சி பனைத் தொழிலாளர்களின் வாழ்வுரிமையைத் தட்டிப்பறித்து தனது இனத்தவர்களிடம் கையளித்துள்ளார் என்று தமிழ்த்தேசியப்பசுமை இயக்கத்தின் தலைவர் பொ. ஐங்கரநேசன் தனது கடுமையான கண்டனத்தை வெளிப்படுத்தியுள்ளார்.

திக்கம் வடிசாலை தொடர்பாக இன்று சனிக்கிழமை (25.06.2022) பொ. ஐங்கரநேசன் யாழ்ப்பாணத்தில் அமைந்துள்ள தமிழ்த்தேசியப்பசுமை இயக்கத்தின் அலுவலகத்தில் நிகழ்த்திய ஊடகவியலாளர் சந்திப்பிலேயே இவ்வாறு தனது கண்டனத்தைத் தெரிவித்துள்ளார்.

ஊடகவியலாளர் சந்திப்பில் அவர் தொடர்ந்து தெரிவிக்கையில்,

பனை தமிழ் மக்களின் இயற்கை வளங்களில் முதன்மையானது. இதிலிருந்து பொருளாதார ரீதியாக அதியுச்சப் பயனை அறுவடை செய்யவேண்டும் என்ற நோக்குடனேயே பனை அபிவிருத்திச்சபை தாபிக்கப்பட்டது. ஆனால், இதன் தலைவர்களாக நியமிக்கப்பட்டவர்களில் ஒரு சிலரைத்தவிர ஏனையோர் பனை பற்றிய பட்டறிவையோ, படிப்பறிவையோ கொண்டிராமல் அரசியற் சிபார்சை மட்டுமே தகுதியாகக் கொண்டிருந்தார்கள். ஆளுங்கட்சியில் அல்லது அதற்கு முண்டு கொடுக்கும் தமிழ்க்கட்சிகளில் இருந்து தேர்தலில் தோற்றுப்போனவர்களுக்குப் பிரதியுபகாரமாகத் தலைவர் பதவி வழங்கப்பட்டது. இவர்களால் பனைத் தொழில் சீரழிந்து இறங்கு முகமே கண்டது. இப்போதைய தலைவர் கிரிசாந்த பத்திராஜவும் அதையே கனக்கச்சிதமாகச் செய்து கொண்டிருக்கிறார்.

திக்கம் வடிசாலை 1983 ஆம் ஆண்டு பாராளுமன்ற உறுப்பினர்களின் பன்முகப்படுத்தப்பட்ட நிதியிலும் பனை, தென்னைவள அபிவிருத்திக்கூட்டுறவுச் சங்கங்களின் நிதியிலும் உருவாக்கப்பட்டது. சுயாதீனமாக இலாபத்தோடு இயங்கிவந்த இந்த வடிசாலை 1987இல் வடமராட்சியில் இடம்பெற்ற ஒப்பறேசன் லிபறேசன் இராணுவத் தாக்குதல் காரணமாகப் பலத்த சேதமடைந்தது. இதனால், பனை அபிவிருத்திச்சபையிடம் இருந்து உதவிபெற நேரிட்டது. ஆனால். ஒட்டகத்துக்கு இடம்கொடுத்த கதையாகப் பனைத் தொழிலாளர்களின் கடுமையான எதிர்ப்பையும் மீறி 2001ஆம் ஆண்டு அமைச்சரவைப் பத்திரத்தின் மூலம் திக்கம் வடிசாலை பனை அபிவிருத்திச் சபையின்கீழ்க் கொண்டுவரப்பட்டது. அப்போதிருந்தே திக்கம் வடிசாலையின் சுயாதீனம் பறிபோனது.

பனை அபிவிருத்திச் சபையின் தலைவர்கள் அரசியல் நியமனம் என்பதால் அவர்களின்கீழ் இருந்துவந்த திக்கம் வடிசாலையின் வளங்களும் அரசியற் தேவைகளுக்கே பயன்படுத்த நிர்ப்பந்திக்கப்பட்டது. இதனாலேயே, திக்கம் வடிசாலையை பனைஅபிவிருத்திச் சபையிடமிருந்து விடுவிக்க வடமராட்சி பனைசார் உற்பத்தித் தொழிலாளர்கள் நீண்டகாலமாகப் போராடி வருகின்றனர். பனை தமிழர்களின் தேசியவளம் என்பதால் இது ஒட்டுமொத்தத் தமிழர்களின் பிரச்சினையும் ஆகும். திக்கம் வடிசாலையைத் தென்னிலங்கை முதலாளிகளிடமிருந்து மீட்கவும் பனைஅபிவிருத்திச் சபையின் தலைவர் கிரிசாந்த பத்திராஜவின் பேரினவாத எதேச்சாதிகாரத்தைக் கண்டித்தும் பனைசார் உற்பத்தித் தொழிலாளர்களின் பின்னால் தமிழர்களாக நாம் அனைவரும் அணிதிரண்டு போராடுவோம் என்றும் தெரிவித்துள்ளார்.

பசுமை இயக்கத்தின் இராசதானியத் திட்டம்

அளவெட்டியிலும் முன்னெடுப்பு

தமிழ்த்தேசியப் பசுமை இயக்கம் இராசதானியத் திட்டத்தின்கீழ் அளவெட்டியில் விவசாயிகளுக்குத் தானியங்களை வழங்கியுள்ளது. நாட்டில் நிலவுகின்ற கடுமையான பொருளாதார நெருக்கடி காரணமாக விரைவில் உணவுப்பஞ்சம் ஏற்படலாமென பல்வேறு தரப்பினரும் எச்சரித்து வருகின்றனர். இதற்கு முகங்கொடுக்கும் விதமாகத் தமிழ்த்தேசியப் பசுமை இயக்கம் தமிழ் மக்களின் உணவுப் பண்பாட்டில் இருந்து வழக்கொழிந்து போய்க்கொண்டிருக்கும் சிறுதானியங்களின் உற்பத்தியை ஊக்குவிக்கும் நோக்கில் இராசதானியம் என்ற திட்டத்தை முன்னெடுத்து வருகின்றது. சிறுதானியங்களை மீள முடிசூட்டுவோம் என்ற தொனிப்பொருளுடன் முன்னெடுக்கப்பட்டுவரும் இத்திட்டத்தின் தொடர்ச்சியாகவே அளவெட்டியில் நேற்று திங்கட்கிழமை (20.06.2022) விதைகள் விநியோகிக்கப்பட்டுள்ளன.

அளவெட்டி தெற்கு கிராம அபிவிருத்திச்சங்க மண்டபத்தில் விவசாயச் சம்மேளனத்தின் தலைவர் வை. சின்னப்பு தலைமையில் விதைகள் வழங்கும் நிகழ்ச்சி நடைபெற்றது. இந்நிகழ்ச்சியில் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் இத்திட்டத்தின் நோக்கம் குறித்து விளக்கமளித்தார். ஓய்வுநிலைப்பிரதி விவசாயப் பணிப்பாளர் பொ. அற்புதச்சந்திரன் தானியங்களின் செய்கைமுறை பற்றி விளக்கமளித்ததோடு விவசாயிகளின் சந்தேகங்களையும் தெளிவுபடுத்தினார். இந்நிகழ்ச்சியில் அளவெட்டி மற்றும் அயற்கிராமமான மல்லாகம் கல்லாரையைச் சேர்ந்த 25 விவசாயிகளுக்குக் குரக்கன், வரகு, பயறு, காராமணி விதைகள் உடனடி விதைப்புக்கென வழங்கப்பட்டுள்ளன.

வழங்கப்படும் விதைகளின் எடையின் இரட்டிப்பு மடங்கு விதைகளைச் சுழற்சிமுறையில் வேறு விவசாயிகளுக்கு வழங்கும்பொருட்டு அறுவடையின் பின்னர் தமிழ்த்தேசியப் பசுமை இயக்கத்திடம் கையளிக்கவேண்டும் என்ற உடன்படிக்கையின் அடிப்படையில் இத்திட்டம் முன்னெடுக்கப்படுவதும் விளைபொருட்களைச் சந்தைப்படுத்துவதற்குத் தமிழ்த்தேசியப் பசுமை இயக்கம் தேவையான ஏற்பாடுகளைச் செய்துகொடுக்கும் என்ற உத்தரவாதத்தை வழங்கியிருப்பதும் குறிப்பிடத்தக்கன.

மீட்பர்கள் எவருமிலர்;

பட்டினிச் சாவில் இருந்து

எங்களை நாங்களேதான் காப்பாற்ற வேண்டும்

பொ. ஐங்கரநேசன் எச்சரிக்கை

நாடு நாளுக்கு நாள் மிகப்பெரும் உணவுப் பஞ்சத்தை நோக்கி நகர்ந்துகொண்டிருக்கிறது. புதிய பிரதமர் வந்திருப்பதாலோ, ஜனாதிபதியை வீட்டுக்கு அனுப்பினாலோ தற்போது ஏற்பட்டுள்ள உணவு நெருக்கடி உடனடியாகத் தீர்ந்து விடப்போவதில்லை. உணவுப் பற்றாக்குறைவு தானாகத் தீரும் என்று எவரும் காத்திருக்கவேண்டாம். மீட்பர்கள் எவருமிலர்; பட்டினிச் சாவில் இருந்து எங்களை நாங்களேதான் காப்பாற்ற வேண்டும் என்று தமிழ்த்தேசியப்பசுமை இயக்கத்தின் தலைவர் பொ. ஐங்கரநேசன் எச்சரித்துள்ளார்.

தமிழ்த்தேசியப்பசுமை இயக்கத்தின் இராசதானியத் திட்டத்தின் கீழ் விவசாயிகளுக்கு விதைகள் வழங்கும் நிகழ்ச்சி நேற்று செவ்வாய்க்கிழமை (14.06.2022) அராலி ஸ்ரீமுருகன் சனசமூக நிலையத்தில் நடைபெற்றது. இதில் கலந்துகொண்டு உரையாற்றியபோதே பொ. ஐங்கரநேசன் இவ்வாறு எச்சரித்துள்ளார்.

புதிய பிரதமர் ரணில் விக்கிரமசிங்க நாடு மீண்டெழப் பதினெட்டு மாதங்கள் ஆகும் என்று அறிவித்திருக்கிறார். எதிர்க்கட்சித் தலைவர் சஜித் பிரேமதாசா தங்களால் ஐந்து வருடங்களில் நாட்டை மீளக்கட்டியெழுப்ப முடியும் என்று தெரிவித்திருக்கிறார். ஆனால், சாதாரண மக்கள் அடுத்த மாதம் பற்றியோ, அடுத்த வருடம் பற்றியோ இப்போது சிந்திக்கவில்லை. அடுத்த வேளைக்குச் சாப்பாடு கிடைக்குமோ என்றே அங்கலாய்க்கின்றனர்.

இலங்கையில் ஏற்பட்டுள்ள பொருளாதார நெருக்கடி மிகப்பெரும் மனிதப் பேரவலத்தை ஏற்படுத்தலாம் என்று ஜக்கிய நாடுகள் சபை எச்சரித்துள்ளது. இது மிகைப்படுத்தப்பட்ட எச்சரிக்கை அல்ல. உணவுற்பத்தி குறைந்து வருவதாலும் உணவுப் பொருட்களின் விலை உச்சத்துக்குச் சென்றுகொண்டிருப்பதாலும் ஒருவர் நாளாந்தம் எடுக்கும் உணவின் அளவு குறைந்து வருகிறது. பசியால் மயங்கி விழுகின்ற சம்பவங்களும் பதிவாகி வருகின்றன.

பொருளாதார நெருக்கடி எப்போது தீரும் என்று எமது தலைவர்கள் சோதிடக்காரர்கள்போல ஆருடங்களை மட்டுமே கூறிக்கொண்டிருக்கின்றனர். உலக நாடுகளிடம் இருந்து கடன்பெறுவதில் மட்டுமே குறியாக இருக்கின்றனர். மக்கள் இன்றைக்கு எதிர்கொள்ளும் நெருக்கடிகளுக்கு எந்தவொரு தீர்வையும் அவர்கள் முன்வைக்கவில்லை. நாட்டைப் படுகுழிக்குள் தள்ளிய அவர்களால் அதற்கான தீர்வை முன்வைக்கவும் இயலாது.

போர்க்காலங்களில் தமிழ் மக்கள் தற்போது அனுபவிக்கும் நெருக்கடிகளைவிட மிகமோசமான நெருக்கடிகளையெல்லாம் அனுபவித்திருந்தார்கள். ஆனால், அப்போது மக்களின் பாதி வலிகளை விடுதலைப்புலிகள் தங்கள் தோள்களில் தாங்கியதால் நெருக்கடிகளை எங்களால் கடந்துவர முடிந்தது. தற்போது, ஒவ்வொருவரும் எங்களால் இயன்றளவு உணவை உற்பத்தி செய்ய ஆரம்பித்தால் மாத்திரமே ஏற்படவுள்ள உணவுப் பஞ்சத்துக்கு முகங்கொடுக்க முடியும் என்றும் தெரிவித்துள்ளார்.

பசுமை இயக்கத்தின் இராசதானியத் திட்டம் அராலியில் முன்னெடுப்பு

தமிழ்த்தேசியப்பசுமை இயக்கத்தின் இராசதானியத் திட்டத்தின் கீழ் அராலியில் 50 விவசாயிகளுக்கு நேற்று செவ்வாய்க்கிழமை (14.06.2022) விதைகள் வழங்கப்பட்டுள்ளன. இதற்கான நிகழ்ச்சி அராலி ஸ்ரீமுருகன் சனசமூக நிலைய மண்டபத்தில் தே. மிதுசன் தலைமையில் நடைபெற்றது. இதில் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன், செயலாளர் ம. கஜேந்திரன், ஓய்வுநிலைப் பிரதி விவசாயப்பணிப்பாளர் பொ. அற்புதச்சந்திரன் ஆகியோர் கலந்துகொண்டு உரையாற்றியதோடு, தெரிவுசெய்யப்பட்ட 50 விவசாயிகளுக்குக் குரக்கன், காராமணி (கௌபி), பயறு ஆகிய விதைகளையும் வழங்கி வைத்துள்ளனர்.

தமிழ்த்தேசியப் பசுமை இயக்கம் நாட்டில் ஏற்பட்டுள்ள பொருளாதார நெருக்கடிகளையும் காலநிலை மாற்றங்களையும் கருத்திற்கொண்டு, சிறுதானியச் செய்கைகளை ஊக்குவிக்கும் முகமாக இராசதானியம் திட்டத்தை விவசாயக் கிராமங்களில் முன்னெடுத்து வருகின்றமை குறிப்பிடத்தக்கது.

இராசதானியம் திட்டம் சங்கானையில் முன்னெடுப்பு

தமிழ்த்தேசியப் பசுமை இயக்கத்தின் இராசதானியத் திட்டம் நேற்று வெள்ளிக்கிழமை இரவு (12.06.2022) சங்கானையில் முன்னெடுக்கப்பட்டுள்ளது. தமிழ்த்தேசியப்பசுமை இயக்கம் சிறுதானியங்களின் உற்பத்தியை ஊக்குவிக்கும் நோக்கில் சிறுதானியங்களை மீள முடிசூட்டுவோம் என்று கருப்பொருளில் இராசதானியம் என்ற திட்டத்தை விவசாயக் கிராமங்களில் முன்னெடுத்து வருகிறது. இதன் தொடர்ச்சியாகவே இத்திட்டத்துக்கான விதைகள் வழங்கும் நிகழ்ச்சி சங்கானை மடத்தடியில் இடம்பெற்றுள்ளது.

மடத்தடி வரசித்தி விநாயகர் ஆலய முன்றலில் தி. சத்தியேந்திராவின் தலைமையில் இந்நிகழ்ச்சி நடைபெற்றது. இந்நிகழ்ச்சியில் தமிழ்த்தேசியப்பசுமை இயக்கத்தின் தலைவர் பொ. ஐங்கரநேசன், பொருளாளர் க. கேதீஸ்வரநாதன் ஆகியோர் இராசதானியத் திட்டம் தொடர்பான கருத்துரைகளை வழங்கியிருந்தார்கள். ஓய்வுநிலைப் பிரதி விவசாயப்பணிப்பாளர் பொ. அற்புதச்சந்திரன் சிறுதானியங்களின் செய்கை முறைபற்றிய வழிகாட்டுதல்களை வழங்கியிருந்தார்.

இதன்போது ஐம்பது விவசாயிகளுக்குக் குரக்கன், காராமணி (கௌபி), பயறு விதைகள் வழங்கி வைக்கப்பட்டன. இலவசமாக வழங்கப்பட்ட விதைகளின் இரட்டிப்பு மடங்கு விதைகள் சுழற்சி முறையில் ஏனைய விவசாயிகளுக்கு வழங்கும்பொருட்டுத் தமிழ்த்தேசியப் பசுமை இயக்கத்திடம் கையளிக்க வேண்டும் என்ற புரிந்துணர்வின் அடிப்படையிலேயே இவ்விதைகள் விநியோகிக்கப்பட்டுள்ளன. நாடு எதிர்நோக்கியுள்ள உணவுப் பஞ்சத்துக்கு முகங்கொடுக்கும் விதமாக அதிக நீரும், அதிக உரங்களும் தேவைப்படாத குறுகிய காலப்பயிர்களான சிறுதானியங்கள் மற்றும் அவரையினப் பயிர்களை உற்பத்தி செய்வதில் விவசாயிகள் தற்போது ஆர்வம் காட்டி வருகின்றமை குறிப்பிடத்தக்கது.

பசுமை இயக்கத்தின் பசுமை அறிவொளி நிகழ்ச்சி

கொல்லங்கலட்டியில் நடைபெற்றது

தமிழ்த்தேசியப் பசுமை இயக்கத்தின் பசுமை அறிவொளி நிகழ்ச்சி நேற்று ஞாயிறுக்கிழமை [09-06-2022]தெல்லிப்பளை கொல்லங்கலட்டியில் நடைபெற்றுள்ளது .தமிழ்த்தேசியப் பசுமை இயக்கம் மாணவர்களிடையே சூழல் விழிப்புணர்வை ஏற்படுத்தி அவர்களை சூழல் பாதுகாப்பில் ஈடுபடுத்தும் நோக்கோடும் அவர்களின் கல்வி வளர்ச்சி மற்றும் ஆளுமை விருத்தியை மேம்படுத்தும் நோக்கோடும் கிராமங்கள் தோறும் பசுமை அறிவொளி நிகழ்ச்சித் திட்டத்தை முன்னெடுத்து வருகின்றது. இதன் தொடர்ச்சியாகவே கொல்லங்கலட்டியில் இந்நிகழ்ச்சி நடைபெற்றுள்ளது.

பா.நவநேசன் தலைமையில் நடைபெற்ற இந்நிகழ்ச்சில் தமிழ்த்தேசியப் பசுமை இயக்கத்தின் தலைவர் பொ .ஐங்கரநேசன் , சி.சிவகஜன் ஆகியோர் கலந்துகொண்டு உரையாற்றியிருந்தார்கள். அதிக எண்ணிக்கையான மாணவர்களும் பெற்றோர்களும் பங்கேற்ற இந்நிகழ்ச்சியின் முடிவில் மாணவர்கள் அனைவருக்கும் மரநடுகை மேற்கோள்கள் அடங்கிய அப்பியாசக்கொப்பிகள் வழங்கப்பட்டன. இவ்வப்பியாசக்கொப்பிகள் ரொறன்ரோவின் மனித நேயக்குரல் என்னும் அமைப்பின் அனுசரணையுடன் வழங்கப்பட்டமை குறிப்பிடத்தக்கது.

பூமியை நாம் சூடுபடுத்துவதால் கொரோனாவைவிடக்

கொடும் நோய்கள் தாக்கும் அபாயம்

சூழல்தின நிகழ்ச்சியில் பொ. ஐங்கரநேசன் எச்சரிக்கை

கொரோனா நோய் இதுவரையில் ஆறு மில்லியனுக்கும் அதிகமான மனித உயிர்களைப் பலி எடுத்திருக்கிறது. ஒட்டுமொத்த உலகையும் முடக்கிப் பொருளாதாரத்தைத் தலைகீழாகப் புரட்டிப் போட்டிருக்கிறது. கொரோனா ஓர் முடிவல்ல. இதைவிடக் கொடிய நோய்களை எல்லாம் மனுக்குலம் அனுபவிக்கப்போகிறது. பூமியை நாம் சூடுபடுத்துவதால் கொரோனாவைவிடக் கொடும் நோய்கள் ஏற்படும் அபாயம் ஏற்பட்டுள்ளது என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் எச்சரித்துள்ளார்.

தமிழ்த்தேசியப் பசுமை இயக்கத்தின் உலக சுற்றுச்சூழல்தின உரையரங்கு சூழல்தினமான நேற்று ஞாயிற்றுக்கிழமை (05.06.2022) ஆவரங்கால் கூட்டுறவு மண்டபத்தில் இடம்பெற்றது. இங்கு உரையாற்றியபோதே அவர் இவ்வாறு எச்சரித்துள்ளார்.

அங்கு அவர் தொடர்ந்து உரையாற்றுகையில்,

நாம் எரிபொருட்களை அளவுகணக்கின்றி எரித்துத்தள்ளுகிறோம். இதனால் வெளியேறும் கரிக்காற்று நாளுக்கு நாள் பூமியைச் சூடுபடுத்தி வருகிறது. இவ்வெப்பம் காரணமாகத் துருவப்பகுதிகளில் உறைந்திருக்கும் பனி உருகிவழியத் தொடங்கியுள்ளது. பனிப்பாளங்களின் கீழே மனிதன் பூமியில் தோன்றுவதற்கு முன்னரே தோன்றிய வைரசுக்கள் இப்போதும் உறைநிலையில் இருப்பதாக ஆய்வாளர்கள் கண்டுபிடித்துள்ளார்கள். பனி உருகுவதால் இவ்வைரசுக்கள் வெளியேறி மனிதர்களைத் தாக்கும் என்று அஞ்சப்படுகிறது.

காட்டு விலங்குகளில் இருந்து மனிதர்களுக்குத் தாவித் திரிபடைந்த வைரசுக்களே கொரோனாக் கிருமிகள். இவை மனிதர்களுக்குப் புதியவை என்பதாலேயே இவற்றுக்கு எதிரான நோய் எதிர்ப்பு சக்தி மனிதர்களிடம் இருக்கவில்லை. இதனாலேயே கொரோனா பெருங்கொள்ளை நோயாக உருவெடுத்து உலகை ஆட்டிப்படைத்துக் கொண்டிருக்கிறது. உறைபனிகளின் கீழிருந்து வெளிப்படும் வைரசுக்களும் மனிதர்களுக்குப் புதியவை என்பதால் இவை தொற்றும்போதும் புதுப்புதுக் கொள்ளை நோய்களாகவே உருவெடுக்கும்.

எமது பிரபஞ்சத்தில் பில்லியன் கணக்கான வெள்ளுடுத்தொகுதிகள் உள்ளன. ஒவ்வொரு வெள்ளுடுத்தொகுதியிலும் பில்லியன் கணக்கான கிரகங்கள் உள்ளன. ஆனால், பூமிக் கிரகம் ஒன்றே ஒன்றுதான். உயிரினங்கள் வாழுகின்ற வேறு கிரகங்கள் இதுவரையில் கண்டறியப்படவில்லை. ஆனால், நாம் பூமியின் அத்தனை வளங்களையும் சூறையாடி வருகின்றோம். இருக்கின்ற ஒரேயொரு பூமியை நாம் பாதுகாத்தாலே நோய்நொடியின்றி நாமும் வாழ்ந்து ஏனைய உயிரினங்களும் இந்தப் பூமியில் வாழ முடியும் என்றும் தெரிவித்துள்ளார்.

பசுமை இயக்கத்தின்

சூழல்தின உரையரங்கு

ஆவரங்காலில் இடம்பெற்றது

தமிழ்த்தேசியப்பசுமை இயக்கத்தின் உலக சுற்றுச்சூழல்தின உரையரங்கு நேற்று ஞாயிற்றுக்கிழமை (05.06.2022) சிறப்பாக நடைபெற்றுள்ளது. இவ்வுரையரங்கு தமிழ்த்தேசியப்பசுமை இயக்கத்தின் சூழல் பாதுகாப்பு அணியின் துணைச் செயலாளர் த. யுகேஸ் தலைமையில் ஆவரங்கால் கூட்டுறவு மண்டபத்தில் இடம்பெற்றது. ஆசிரியர் சபா. குகதாசன் வரவேற்புரை நிகழ்த்த யாழ். பல்கலைக்கழகத்தின் புவியியல் துறை விரிவுரையாளர் ச. ரவி, தமிழ்த்தேசியப்பசுமை இயக்கத்தின் தலைவர் பொ. ஐங்கரநேசன் ஆகியோர் சுற்றுச்சூழல் தொடர்பாகச் சிறப்புரையை ஆற்றியிருந்தார்கள்.

தமிழ்த்தேசியப் பசுமை இயக்கம் மாணவர்களிடையே சூழல் விழிப்புணர்வை ஏற்படுத்தும் விதமாகவும் அவர்களின் கல்வி வளர்ச்சி மற்றும் ஆளுமை விருத்தியை மேம்படுத்தும் நோக்கிலும் பசுமை அறிவொளி நிகழ்ச்சித் திட்டம் ஒன்றை முன்னெடுத்து வருகிறது. இத்திட்டத்தின் ஒரு தொடர்ச்சியாகவே உலக சூழல் தின உரையரங்கு நடைபெற்றுள்ளது. இவ்வுரையரங்கில் ஆவரங்கால் பகுதியைச் சேர்ந்த மாணவர்களும் பெற்றோர்களும் அதிக எண்ணிக்கையில் கலந்து கொண்டிருந்தார்கள்.

நிகழ்ச்சியில் சுற்றுச்சூழல் தொடர்பான வினாக்கள் வினவப்பட்டுச் சரியாக விடையளித்த மாணவர்களுக்குப் பரிசுகள் வழங்கப்பட்டன. அத்தோடு பங்கேற்ற அனைத்து மாணவர்களுக்கும் சூழல் பாதுகாப்பு மேற்கோள்கள் அடங்கிய அப்பியாசக் கொப்பிகள் வழங்கப்பட்டன. கற்றலை ஊக்குவிக்கும் நோக்கில் அப்பியாசக் கொப்பிகளுக்கான அனுசரணையை கனடாவிலுள்ள ரொறன்ரோவின் மனிதநேயக் குரல் எனும் அமைப்பு வழங்கியிருந்தது.

விவசாயிகளுக்கு எரிபொருள் வழங்காவிடின்

உணவுத்தட்டுப்பாடு விரைவில் உக்கிரமடையும்

பொ. ஐங்கரநேசன் எச்சரிக்கை

விவசாயிகள் நிலத்தை உழுது பண்படுத்துவதற்கும் நீர் பாய்ச்சுவதற்கும் எரிபொருள் இன்றித் திண்டாடி வருகின்றனர். இதனால், ஏராளமான விவசாயிகள் சிறுபோகச் செய்கையைக் கைவிட்டுள்ளனர். இவர்களுக்கு வேண்டிய டீசலையும் மண்ணெண்ணையையும் தடையின்றிப் பெற்றுக்கொடுக்க அரச உயர் அதிகாரிகள் உடனடியாக ஆவன செய்ய வேண்டும். விவசாயிகளுக்கு முன்னுரிமை கொடுத்து எரிபொருள் வழங்காவிடின் உணவுத்தட்டுப்பாடு விரைவில் உக்கிரமடையும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் எச்சரித்துள்ளார்.

விவசாயிகள் எரிபொருட்களைப் பெறுவதிலுள்ள இடர்பாடுகள் தொடர்பாக பொ. ஐங்கரநேசன் விடுத்துள்ள ஊடக அறிக்கையிலேயே இவ்வாறு எச்சரித்துள்ளார்.

அந்த அறிக்கையில் அவர் மேலும் தெரிவிக்கையில்,

அரசின் தவறான நிதித் திட்டமிடுதலினாலும் தவறான விவசாயக் கொள்கையினாலும் நாடு உணவு உற்பத்தியில் வரலாற்றில் என்றுமில்லாத அளவுக்கு மோசமான வீழ்ச்சியைச் சந்தித்துள்ளது. கடந்த பெரும்போகம் எதிர்பார்த்த அறுவடையைத் தராத நிலையில், சிறுபோக விளைச்சலும் 50 வீதமாகக் குறைவடையும் அபாயம் நேர்ந்துள்ளது. உணவுத் தானியங்களின் இறக்குமதிக்கும் அரச கருவூலத்தில் பணம் இல்லாததால் நாடு மிகப்பெரும் உணவுப் பஞ்சத்தை நோக்கி வேகமாக நகர்ந்து கொண்டிருக்கிறது.

நாடு பட்டினியை எதிர்நோக்கியுள்ள நிலையிலுங்கூட உணவுற்பத்தியில் அரசு காத்திரமான நடவடிக்கைகள் எதனையும் மேற்கொள்ளவில்லை. இதுவரையில் சிறுபோகச் செய்கை மேற்கொள்ளப்படாத நிலங்களில் குறுகிய காலப் பயிர்களான சிறுதானியங்களினதும் அவரை இனப் பயிர்களினதும் செய்கையை ஊக்குவிப்பது அவசியமாகும். இதற்கு வேண்டிய விதைகள் கையிருப்பில் இருக்கின்றபோதும் உழவுக்கும் இறைப்புக்கும் வேண்டிய எரிபொருட்களை விவசாயிகளுக்கு வழங்குவதற்கு அரசு இதுவரையில் முன்னுரிமை வழங்கவில்லை.

உணவுற்பத்தியை ஓர் அவசர காலச் செயற்பாடாகக் கருதி விவசாயிகளுக்குத் தடையின்றி எரிபொருள் கிடைக்க வழி செய்யவேண்டும். இதற்கு மாவட்டச் செயலர்களும், பிரதேச செயலர்களும் கமநல அபிவிருத்தித் திணைக்கள அதிகாரிகளும் தாமதமின்றி நடவடிக்கைகளை மேற்கொள்ள வேண்டும். அரசியல்வாதிகளும் இதற்கான அழுத்தங்களைக் கொடுக்க முன்வரவேண்டும். தவறின் உணவுத்தட்டுப்பாடு மென்மேலும் உக்கிரமடைவதோடு பட்டினிச் சாவுகள் நேர்வதும் தவிர்க்க முடியாததாகிவிடும் என்றும் தெரிவித்துள்ளார்.

தமிழ்த்தேசியப் பசுமை இயக்கத்தின் இராசதானியம்

சிறுதானிய உற்பத்தி ஊக்குவிப்புத் திட்டம்

தமிழ்த்தேசியப் பசுமை இயக்கம் இராசதானியம் என்ற பெயரில் சிறுதானியங்களின் உற்பத்தியை ஊக்குவிக்கும் திட்டத்தை ஆரம்பித்துள்ளது. சிறுதானியங்களை மீள முடிசூட்டுவோம் என்ற மகுட வாசகத்துடன் முன்னெடுக்கப்பட்டுள்ள இராசதானியத் திட்டத்தின் தொடக்க நிகழ்ச்சி இன்று ஞாயிற்றுக்கிழமை (29.05.2022) அச்சுவேலி பத்தமேனியில் நடைபெற்றுள்ளது. தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் நடைபெற்ற இந்நிகழ்ச்சியில் வளவாளர்களாக ஓய்வுநிலை பிரதி விவசாயப் பணிப்பாளர் பொ. அற்புதச்சந்திரன், சமூகச் செயற்பாட்டாளர் ம. செல்வின் இரேனியஸ் ஆகியோர் கலந்துகொண்டிருந்தார்கள்.

சிறுதானியங்கள் தமிழ் மக்களின் பண்டைய உணவுப் பண்பாட்டில் முதன்மை இடத்தைப் பெற்றிருந்தன. தற்போது இவை வழக்கொழிந்து வரும் நிலையில் நாடு எதிர்நோக்கியுள்ள பொருளாதார நெருக்கடியையும், காலநிலை மாற்றங்களையும் கருத்திற்கொண்டு மீளவும் இவற்றின் பயன்பாட்டை அதிகரிக்கச் செய்யும் நோக்கில் இத்திட்டம் முன்னெடுக்கப்பட்டுள்ளது. இத்திட்டத்தில் அச்சுவேலிப் பகுதியிலிருந்து தெரிவுசெய்யப்பட்ட 100 விவசாயிகளுக்கு குரக்கன், வரகு, பயறு ஆகியவற்றின் விதைகள் இலவசமாக வழங்கப்பட்டன.

விவசாயிகள் பெற்றுக்கொண்ட விதைகளின் இரண்டு மடங்கு விதைகளை அறுவடையின் பின்னர் ஏனைய விவசாயிகளுக்கு வழங்கும் நோக்கில் தமிழ்த்தேசியப் பசுமை இயக்கத்திடம் கட்டணம் எதுவுமின்றி வழங்கவேண்டும் என்ற வேண்டுகோளுடனேயே விதைகள் விநியோகிக்கப்பட்டுள்ளன. சிறுதானிய உற்பத்திகளைச் சந்தைப்படுத்துவதற்கான வசதிகளைத் தமிழ்த்தேசியப் பசுமை இயக்கம் விவசாயிகளுக்குச் செய்துகொடுக்கும் எனவும் இத்திட்டத்தில் இணைந்து பயன்பெற விரும்பும் விவசாயிகள் தமிழ்த்தேசியப் பசுமை இயக்கத்துடன் தொடர்புகொண்டு சிறுதானிய விதைகளை இலவசமாகப் பெற்றுக்கொள்ளலாம் எனவும் இந்நிகழ்ச்சியின்போது அறிவிக்கப்பட்டுள்ளமை குறிப்பிடத்தக்கது.

நெருக்கடி காலங்களில் வழிகாட்டுவதற்குத்

தமிழர்களுக்கு இப்போது

தலைமை இல்லை

பசுமை அறிவொளி நிகழ்ச்சியில்

பொ. ஐங்கரநேசன்

இலங்கை முன்னெப்போதும் சந்தித்திராத பெரும் பொருளாதார நெருக்கடியில் சிக்கித்தவித்துக் கொண்டிருக்கிறது. சிங்கள மக்களைப் போன்றே தமிழ்மக்களும் பெரும் பொருளாதாரப் பிரச்சினைகளுக்கு முகம் கொடுத்துக்கொண்டிருக்கிறார்கள். ஆனால், யுத்த காலத்தில் பாரிய நெருக்கடிகளுக்குப் பழக்கப்பட்டுவிட்டோம் என்ற மனோநிலையில் இருக்கும் தமிழ்மக்கள் இந்தப் பிரச்சினைகளை அவற்றின் பாரதூரம் புரியாமல் இலகுவாக எடுத்துக் கொண்டிருக்கிறார்கள்.

யுத்த காலத்தில் தமிழ் மக்களை வழிப்படுத்த விடுதலைப்புலிகள் இருந்தார்கள். ஆனால், நெருக்கடி காலங்களில் வழிகாட்டுவதற்குத் தமிழர்களுக்கு இப்போது ஒரு தலைமை இல்லை. இப்போதைய நெருக்கடிச் சூழலை நாம் சரியான முறையில் கூட்டாக எதிர்கொள்ளத் தவறினால் தமிழினம் பாரிய எதிர்விளைவுகளைச் சந்திக்க நேரிடும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் எச்சரித்துள்ளார்.

தமிழ்த்தேசியப் பசுமை இயக்கத்தின் பசுமை அறிவொளி நிகழ்ச்சித் திட்டம் நேற்று திங்கட்கிழமை (23.05.2022) நாவற்குழியில் முன்னெடுக்கப்பட்டது. இந்நிகழ்ச்சியில் கலந்து கொண்டிருந்த பெற்றோர்களினதும் மாணவர்களினதும் மத்தியில் உரையாற்றும்போதே பொ. ஐங்கரநேசன் இவ்வாறு எச்சரித்துள்ளார்.

அங்கு அவர் தொடர்ந்து உரையாற்றுகையில்,

தமிழ் மக்களின் பெரும் மூலதனம் கல்வி ஒன்றுதான். இதனாலேயே யுத்த நெருக்கடிகளின் மத்தியிலும் விடுதலைப்புலிகள் கல்விக்கென்று தனியானதொரு பிரிவை உருவாக்கி மாணவர்களின் கல்வி வளர்ச்சியில் கூடிய சிரத்தை எடுத்திருந்தார்கள். இடப்பெயர்வுகளின் மத்தியில் குப்பி விளக்குகளில் படித்தும்கூட மாணவர்களால் சிறந்த பெறுபேறுகளை எட்டக்கூடியதாக இருந்தது. ஆனால், இப்போது தமிழ்மக்கள் தொடர்ந்து கல்வியில் வீழ்ச்சியையே சந்தித்துக் கொண்டிருக்கிறார்கள்.

விடுதலைப்புலிகள் காலத்தில் இருந்த இறுக்கமான கட்டுப்பாடுகள் இப்போது இல்லாத நிலையில் வன்முறைகளுக்கும் போதைப் பொருள் பாவனைக்கும் மாணவர்கள் திட்டமிட்டுப் பழக்கப்படுகிறார்கள். இந்தத் திசைதிருப்புதல்களுக்கும் மேலாக, கொரோனாப் பெருங்கொள்ளை நோயால் பல மாதங்களாகப் பாடசாலைகள் மூடப்பட்டதாலும் மாணவர்கள் கல்வியில் பெரும் பின்னடைவைச் சந்தித்தார்கள். இவற்றுடன் இப்போது நாட்டின் பொருளாதாரச் சீர்குலைவும் கல்வியைப் பாதித்துக் கொண்டிருக்கிறது.

போரின் பாதிப்புகளில் இருந்து மீண்டெழ முடியாமல் இருக்கும் தமிழ் மக்களைப் பொருட்களின் உச்ச விலையேற்றம் கடுமையாகப் பாதிக்கத் தொடங்கியுள்ளது. வறுமை கல்வியை மோசமாகப் பாதிக்கும். ஏழைக் குடும்பங்கள் மாணவர்களை வேலைக்கு அனுப்புகின்ற சூழ்நிலைக்குத் தள்ளப்பட்டுக் கொண்டிருக்கின்றன. எந்தக் கடுமையான சூழ்நிலையிலும் எதற்காகவேனும் பிள்ளைகளின் கல்வியை நாம் பலியிட்டுவிடக்கூடாது. இவ்விடயத்தில் தமிழ்த்தேசியம் பேசிக்கொண்டிருக்கும் அனைவரும் உடனடியாகக் கரிசனை கொள்ளவேண்டும் என்றும் தெரிவித்துள்ளார்.

நாவற்குழியில் தமிழ்த்தேசியப் பசுமை இயக்கத்தின்

பசுமை அறிவொளி நிகழ்ச்சித் திட்டம்

தமிழ்த்தேசியப் பசுமை இயக்கத்தின் பசுமை அறிவொளி நிகழ்ச்சித்திட்டம் நேற்று திங்கட்கிழமை (23.05.2022) நாவற்குழியில் இடம்பெற்றது. தமிழ்த்தேசியப் பசுமை இயக்கம் பின்தங்கிய கிராமங்களில் மாணவர்களிடையே சூழல் அறிவைப் புகட்டி சூழல் விழிப்புணர்வை ஏற்படுத்தும் முகமாகவும், அவர்களின் கல்வி வளர்ச்சி மற்றும் ஆளுமை விருத்தியை மேம்படுத்தும் நோக்கோடும் பசுமை அறிவொளி நிகழ்ச்சித் திட்டத்தை முன்னெடுத்து வருகிறது. இதன் ஒரு கட்டமாகவே நேற்று நாவற்குழி ஐயனார் கோவிலடியில் இந்நிகழ்ச்சி நடைபெற்றது.

தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் பங்கேற்ற இந்நிகழ்ச்சியில் அப்பகுதியைச் சேர்ந்த மாணவர்களும் பெற்றோர்களும் கலந்து கொண்டிருந்தார்கள். மாணவர்கள் அனைவருக்கும் சூழல் விழிப்புணர்வு வாசகங்கள் அச்சிட்ட மாணவர் குறிப்பேடுகள் வழங்கப்பட்டன. இக்குறிப்பேடுகளுக்கான அனுசரணையைக் கனடா ரொறன்ரோவின் மனித நேயக்குரல் அமைப்பு வழங்கியிருந்தது.

தமிழ்த்தேசியப் பசுமை இயக்கத்தின்

முள்ளிவாய்க்கால் நினைவேந்தல் நிகழ்ச்சி

தமிழ்த்தேசியப் பசுமை இயக்கத்தின் முள்ளிவாய்க்கால் நினைவேந்தல் நிகழ்ச்சி இன்று செவ்வாய்க்கிழமை (17.05.2022) இடம்பெற்றது.

தமிழினப் படுகொலை நாளான மே-18 ஐ நினைவுகூரும் முகமாக ஆண்டுதோறும் மே-12 இல் இருந்து 18 வரையான ஒருவார காலப்பகுதி முள்ளிவாய்க்கால் நினைவேந்தல் வாரமாகத் தமிழர் தாயகம் எங்கும் உணர்வுபூர்வமாகக் கடைப்பிடிக்கப்பட்டு வருகிறது. இதனை முன்னிட்டு தமிழ்த்தேசியப் பசுமை இயக்கத்தின் நினைவேந்தல் நிகழ்ச்சி யாழ்ப்பாணம் கந்தர்மடத்தில் அமைந்துள்ள அதன் தலைமைப் பணிமனையின் முன்பாக இடம்பெற்றுள்ளது.

தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் நினைவுச்சுடர் ஏற்றி முள்ளிவாய்க்காலில் உயிரிழந்தோருக்கு அஞ்சலி செலுத்தியதைத் தொடர்ந்து, முள்ளிவாய்க்கால் கஞ்சி அனைவருக்கும் பரிமாறப்பட்டது.

யுத்தத்தின்போது முள்ளிவாய்க்காலில் உணவின்றித் தவித்த மக்களுக்கு விடுதலைப் புலிகளினாலும், பொது அமைப்புகளினாலும் தயாரித்து வழங்கப்பட்ட உப்புக் கஞ்சியே ஒரேயொரு உயிர் ஆகாரமாக இருந்து வந்தது.

இதனால், எமது எதிர்கால சந்ததிகளுக்குப் போரின் வலியையும் தமிழினம் பட்ட வதையையும் எடுத்துச்சொல்லும் விதமாக முள்ளிவாய்க்கால் நினைவேந்தல் வாரத்தில் முள்ளிவாய்க்கால் கஞ்சி பரிமாறப்பட்டு வருவது குறிப்பிடத்தக்கது.

காலிமுகத்திடல் போராட்டக்காரர்கள்

மே18 இல் முள்ளிவாய்க்கால் வரவேண்டும்

மேதினக்கூட்டத்தில் பொ. ஐங்கரநேசன் அழைப்பு

அரசாங்கத்தில் இருந்து ராஜபக்சாக்களை வெளியேறக்கோரி கோட்டா கோ கம என்று காலி முகத்திடலில் முன்னெடுக்கப்படும் போராட்டங்களில் தமிழில் தேசியகீதம் பாடுவதாலோ, தமிழ் இசைக்கருவியான பறைகளை முழங்குவதாலோ போராட்டக்காரர்கள் தமிழ்மக்களின் மனங்களை வெல்லமுடியாது. பண்டாரநாயக்காவின் சிலையில் கண்களைக் கறுப்புத் துணியினால் கட்டுவதால் புரையோடிப்போயுள்ள பேரினவாதம் அற்றுப்போய்விடும் என்று தமிழ்மக்கள் நம்பத்தயாராக இல்லை. இந்த மாற்றங்கள் இதயசுத்தியானது என்பதைத் தமிழ்மக்கள் நம்புவதற்கு நீங்கள் இன்னும் அதிக தூரம் பயணிக்க வேண்டும். மே18 அன்று முள்ளிவாய்க்கால் நினைவேந்தல் நிகழ்ச்சிக்கு வாருங்கள். மாவீரர்களுக்கு விளக்கேற்ற நாம் கோரவில்லை. போரில் கொல்லப்பட்ட மக்களுக்கான நினைவேந்தல் நிகழ்ச்சிக்கு அரசாங்கம் இன்றுவரை தடைவிதித்து வரும் நிலையில் மே18 அன்று எங்களுடன் சேர்ந்து அஞ்சலிக்க வாருங்கள் என்றுதான் அழைக்கிறோம் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் காலி முகத்திடல் போராட்டக்காரர்களுக்கு அழைப்பு விடுத்துள்ளார்.

தமிழ்த்தேசியப் பசுமை இயக்கத்தின் செம்பசுமை மேதினப் பொதுக்கூட்டம் நேற்று ஞாயிற்றுக்கிழமை (01.05.2022) அன்று நல்லூர் இளங்கலைஞர் மன்ற மண்டபத்தில் நடைபெற்றது. இக் கூட்டத்தில் தலைமையுரை ஆற்றும்போதே அவர் இவ்வாறு அழைப்பு விடுத்துள்ளார்.

அங்கு அவர் தொடர்ந்து உரையாற்றுகையில்,

சிங்கள மக்களைப் போன்றே தமிழ்மக்களும் பெரும் பொருளாதார நெருக்கடிகளுக்குள் சிக்கித்தவித்துக் கொண்டிருக்கிறார்கள். ஆனாலும், அரசாங்கத்துக்கு எதிராகத் தென்னிலங்கையில் இடம்பெற்றுவரும் போராட்டங்களில் இன்றுவரையில் தமிழ்மக்கள் உணர்வுபூர்வமாக ஒன்றிக்கவில்லை. நாடுதழுவிய போராட்டங்களுக்கு அழைப்புகள் விடுக்கப்பட்டு வருகின்றபோதும் தமிழ்மக்கள் பார்வையாளர்களாக மாத்திரமே இருந்து வருகிறார்கள். இதற்கான காரணங்களைப் போராட்டக்காரர்கள் விளங்கிக்கொள்ள வேண்டும்.

போராட்டக்காரர்களின் இலக்கு ராஜபக்சாக்களை வீட்டுக்கு அனுப்புவதாக மாத்திரமே இருக்கிறது. இதற்கான காரணங்களாக ராஜபக்சாக்களின் குடும்ப ஆட்சி, ஊழல் ஆட்சி, சர்வாதிகார ஆட்சி என்பனவற்றையே முன்வைக்கிறார்கள். ஆனால், இவை எல்லாவற்றையும்விட இன்று ஏற்பட்டுள்ள பொருளாதாரச் சீர்குலைவுகளுக்குப் பின்னால் சிங்கள பௌத்தப் பேரினவாதமே உள்ளது. இதனைப்பற்றிப் போராட்டக்காரர்கள் இன்றுவரை பேச முன்வரவில்லை.

ராஜபக்சாக்களை வீட்டுக்கு அனுப்புவதால் தமிழ்மக்களின் அரசியல் பிரச்சினைகளுக்கான தீர்வு கிடைக்கப்போவதில்லை. தீர்வைப் போராட்டக்காரர்களிடம் இருந்து நாம் எதிர்பார்க்கவும் இல்லை. ஆனால், மாறி மாறி ஆட்சிபீடம் ஏறிய அரசாங்கங்கள் தமிழ் மக்கள் மீது மேற்கொண்ட இனவாத ஒடுக்குமுறைகளும் அதனால் மூண்டபோருமே இன்றைய பொருளாதார நெருக்கடிக்கு மூலகாரணம் என்ற உண்மையை வெளிப்படையாக நீங்கள் உரத்த குரலில் பேசவேண்டும் என்று தமிழ் மக்கள் எதிர்பார்க்கிறார்கள். அப்போதுதான் உங்களோடு சேர்ந்து போராடத் தமிழ்மக்கள் முன்வருவார்கள் என்றும் தெரிவித்துள்ளார்.

பசுமை அறிவொளி நிகழ்ச்சித்திட்டம்

தமிழ்த்தேசியப் பசுமை இயக்கம் முன்னெடுப்பு

தமிழ்த்தேசியப் பசுமை இயக்கம் பசுமை அறிவொளி நிகழ்ச்சித்திட்டத்தை முன்னெடுத்துள்ளது. மாணவர்களுக்குச் சூழல் அறிவைப் புகட்டிச் சூழல் விழிப்புணர்வை ஏற்படுத்துவதன் மூலம் சூழற் பாதுகாப்பில் அவர்களைப் பங்குபற்றுநர்களாக்கும் நோக்கோடு தமிழ்த்தேசியப் பசுமை இயக்கம் முன்னெடுத்துள்ள இத்திட்டம் நேற்று ஞாயிற்றுக்கிழமை (06.03.2022) அங்குரார்ப்பணம் செய்து வைக்கப்பட்டுள்ளது.

தமிழ்த்தேசியப் பசுமை இயக்கத்தின் சூழல் பாதுகாப்பு அணியின் துணைச் செயலாளர் த. யுகேஸ் தலைமையில் நடைபெற்ற இத்திட்டத் தொடக்க நிகழ்ச்சியில் கனடா உதயன் பத்திரிகையின் பிரதம ஆசிரியரும், ரொறன்ரோவின் மனிதநேயக்குரல் அமைப்பின் தலைவருமான என்.ஆர்.லோகேந்திரலிங்கம் பிரதம விருந்தினராகக் கலந்து கொண்டிருந்தார்.

இந்நிகழ்ச்சியில் வளவாளர்களாக யாழ்ப்பாணம் தேசிய கல்வியியற்கல்லூரியின் விரிவுரையாளர் பா.பாலகணேசன், கரவெட்டி விக்னேஸ்வரக் கல்லூரியின் ஓய்வுநிலை அதிபர் மு. கனகலிங்கம் ஆகியோர் கலந்துகொண்டு கருத்துரைகளை வழங்கியிருந்தார்கள். தமிழ்த்தேசியப் பசுமை இயக்கத்தின் தலைவர் திட்டம் தொடர்பான விளக்கவுரையை ஆற்றியிருந்தார்.

திட்டவுரையில் பொ. ஐங்கரநேசன் தெரிவிக்கையில்,

ஒரு அரசியற்கட்சி மேடைகளில் வெறுமனே அரசியலை மட்டும் பேசிக்கொண்டிருக்க முடியாது. அரசியல் மக்களுக்கானது என்ற வகையில், சமூகத்தைப் பாதிக்கும் அனைத்து விடயங்களிலும் அது கரிசனை கொள்வது கட்டாயமானதாகும். அதன் அடிப்படையிலேயே, பரீட்சைகளை மையப்படுத்திய கல்வி முறையால் வகுப்பறைகளுக்குள் புறொயிலர் கோழிகள் போல முடக்கப்பட்டிருக்கும் மாணவர்களை வகுப்பறைகளுக்கு வெளியே அழைத்து வந்து அவர்களிடையே இயல்பாகவே குடிகொண்டிருக்கும் இயற்கை மீதான ஆர்வத்தைச் சூழல் மீதான அக்கறையாக மாற்றும் வகையில் அவர்களுடன் சூழல் சார் அறிவைப் பகிர்ந்து கொள்ளவுள்ளோம். இதன் மூலம் சூழல் விழிப்புணர்வை ஏற்படுத்தி மாணவர்களைச் சூழல் பாதுகாப்பில் பார்வையாளர்களாக இல்லாது பங்குபற்றுநர்களாக ஆக்க முடியும். இதனை முன்னெடுப்பதற்கு வளவாளர்கள் கிராமங்கள் தோறும் மாணவர்களையும், பெற்றோர்களையும் சந்தித்துக் கலந்துரையாடல்களை நிகழ்த்தவுள்ளார்கள்.

தமிழ்த்தேசியப் பசுமை இயக்கத்தின் சூழல்பாதுகாப்பு அணியும் மாணவர் அணியும் இணைந்து முன்னெடுக்கும் இத்திட்டம் கட்சி அரசியலுக்கும் தேர்தல் அரசியலுக்கும் அப்பாற்பட்டது. சூழல் நலனை, அதன் மூலம் இனத்தின் நலனை மாத்திரமே குறியாகக் கொண்டதாகும். இத்திட்டம் தங்கள் பகுதிகளில் முன்னெடுக்கப்படவேண்டும் என்று விரும்பும் பொது அமைப்புகள், பொது மக்கள் பசுமை இயக்கத்துடன் தொடர்பு கொண்டால் ஒழுங்கு செய்து தரப்படும் என்று குறிப்பிட்டார்.

அதிக எண்ணிக்கையான மாணவர்களும் பெற்றோர்களும் கலந்துகொண்ட இத்திட்டத் தொடக்க நிகழ்ச்சியில் பங்கேற்ற மாணவர்கள் அனைவருக்கும் ரொறன்ரோவின் மனிதநேயக் குரலின் அனுசரணையில் கற்றல் உபகரணங்கள் வழங்கி வைக்கப்பட்டமையும் குறிப்பிடத்தக்கது.

மாணவர்கள் சுற்றுச்சூழலின்மீது

அக்கறை கொள்வது

தேசியத்துக்கான அவர்களின் அதிசிறந்த பங்களிப்பாக அமையும்

பசுமை அமைதி விருது விழாவில்

ஐங்கரநேசன் சுட்டிக்காட்டு

தேசியம் என்பது இன்று அரசியல்வாதிகளுக்கு மாத்திரமே உரித்தான ஒரு விடயம்போல ஆகிவிட்டது. அது மக்களுக்கானது. அது ஒரு இனத்தின் தனித்துவமான மொழி, உணவு, உடை, வாழிடம் என்று பலவற்றையும் உள்ளடக்கிய ஒரு வாழ்வியல் முறைமையாகும். மொழி, உணவு, உடை, வாழிடம் என்று எல்லாமே அவை சார்ந்துள்ள இயற்கைச் சூழலாலேயே தீர்மானிக்கப்படுகிறது. எனவே, இயற்கைச் சூழல்பாதிக்கப்படும்போது இவையாவுமே பாதிக்கப்பட்டுக் கடைசியில் தேசியமே கேள்விக்கு உள்ளாகிறது. அந்தவகையில், மாணவர்கள் இயற்கையோடு இசைந்து வாழ்வதும் சுற்றுச்சூழலின் மீது அக்கறை கொள்வதும் தேசியத்துக்கான அவர்களின் அதிசிறந்த பங்களிப்பாக அமையும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

தமிழ்த்தேசியப் பசுமை இயக்கத்தின் 2021ஆம் ஆண்டுக்கான பசுமை அமைதி விருதுகள் விழா கடந்த ஞாயிற்றுக்கிழமை (30.01.2022) யாழ் வீரசிங்கம் மண்டபத்தில் நடைபெற்றது. இவ்விழாவுக்குத் தலைமை வகித்து உரையாற்றியபோதே பொ. ஐங்கரநேசன் இவ்வாறு சுட்டிக்காட்டியுள்ளார்.

அங்கு தொடர்ந்து அவர் உரையாற்றுகையில்,

உலகம் இன்று எதிர்நோக்கியுள்ள பெரும் சவால்களாகக் கொரோனாப் பெருங்கொள்ளை நோயும், காலநிலை மாற்றமும் உள்ளன. இரண்டும் மனுக்குலத்துக்குப் பேரழிவுகளை ஏற்படுத்தி வருகின்றன. இரண்டும் இயற்கையை நாம் அழித்ததால் ஏற்பட்டுள்ள விளைவுகளேயாகும். இதனை, இயற்கையை நாம் அழித்ததால் இயற்கை எமக்கு வழங்கிய தண்டனைகளாகவே நாம் எடுத்துக்கொள்ள வேண்டும்.

கொரோனா சீனாவின் தயாரிப்பா இல்லையா என்பது விவாகத்துக்கு உரியது. ஆனால், இந்நோய் காட்டு விலங்குகளில் உறையும் வைரசுக்கள் விகாரம் பெற்று மனிதர்களுக்குத் தாவியதால் ஏற்பட்டுள்ளது என்பதே அறிவியல். அந்த வகையில், காடுகளில் இருக்க வேண்டிய விலங்குகளை, இயற்கையையும் மீறி நாட்டுச் சந்தைக்குள் கொண்டுவந்ததன் விளைவே இன்று முழு உலகத்தையும் முகக்கவசம் மாட்ட வைத்திருக்கிறது.

நாம் எரிபொருட்களை எரித்து வளியில் குவித்துக் கொண்டிருக்கும் கரிக்காற்றே பூமியைச் சூடுபோட்டு வருகிறது. பூமி வெப்பம் அடைவதால் துருவப் பகுதிகளில் உள்ள பனிமலைகள் உருகி வழிகின்றன. இதனால், இவற்றுக்கு கீழே உறங்கு நிலையிலுள்ள, மனிதன் தோன்ற முன்னரே தோற்றம் பெற்ற வைரசுக்கள் வெளிக்கிளம்பும் அபாயம் ஏற்பட்டுள்ளது. அவை பரவ ஆரம்பித்தால் அது கொரோனாவைவிடப் பன்மடங்கு கொடிய நோய்களை ஏற்படுத்துவதாக அமையும்.

கொரோனா என்ற கொள்ளை நோயாகவும், காலநிலை மாற்றங்களாகவும் இயற்கை விடுத்திருக்கும் எச்சரிக்கைகளைப் புறந்தள்ளாது, நாங்கள் அனைவருமே இயற்கையுடன் ஒரு பசுமை அமைதி ஒப்பந்தத்தை உடனடியாகவே செய்ய வேண்டியவர்களாக உள்ளோம். இதில் மாணவர்களே பெரும் பங்காற்ற முடியும். அதனாலேயே மாணவர்களுக்குச் சூழற்கல்வி, சூழல் விழிப்புணர்வு, சூழல்பாதுகாப்பு ஆகியவற்றை ஏற்படுத்தும் நோக்குடன் பசுமை அமைதி விருதுகள் வழங்கப்படுகின்றன என்றும் தெரிவித்துள்ளார்.

பசுமை அமைதி விருது விழாவில்

தவில்-நாத இசை மழை

தமிழ்த்தேசியப் பசுமை இயக்கத்தின் பசுமை அமைதி விருதுகள் வழங்கும் விழா தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் கடந்த ஞாயிற்றுக்கிழமை (30.01.2022) அன்று வீரசிங்கம் மண்டபத்தில் மிகச்சிறப்பாக நடைபெற்றது. பிரதம விருந்தினராக வவுனியாப் பல்கலைக்கழகத்தின் துணைவேந்தர் கலாநிதி த. மங்களேஸ்வரன், சிறப்பு விருந்தினர்களாக வடபிராந்திய விவசாய ஆராய்ச்சிப் பிரிவின் மேலதிக பணிப்பாளர் கலாநிதி எஸ். ஜே. அரசகேசரி, தென்கிழக்குப் பல்கலைக்கழகத்தின் சிரேஸ்ட விரிவுரையாளர் ஏ. எம். றியாஸ் அகமட் ஆகியோர் கலந்து கொண்டு மாணவர்களுக்கு விருதுகளை வழங்கி வைத்தனர்.

இந்நிகழ்ச்சிக்கு மேலும் சிறப்புச் சேர்க்கும் விதமாக விழாவின் தொடக்க நிகழ்ச்சியாக சிறார்களின் தவில்-நாத இசை மழை இடம்பெற்றது. பிரபல நாதஸ்வர வித்துவான் பாலமுருகன் அவர்களின் புதல்வர் சரண்ஜன், பிரபல தவில் வித்துவான் செந்தில்நாதன் அவர்களின் புதல்வர் சபரிஷன் ஆகிய இரு சிறார்களும் இணைந்து நாதஸ்வர இசை மழை பொழிய இவர்களுக்கு இணையாக செந்தில் நாதன் அவர்களின் இன்னுமொரு புதல்வரான பிருத்விகன், தவில் வித்துவான் பிரபாகரன் அவர்களின் புதல்வர் வேந்துஷன் ஆகிய இருவரும் இணைந்து தவில் வாத்திய இசை முழங்கினர்.

தங்கள் தவில் நாதஸ்வர இசையால் பார்வையாளர்களைக் கட்டிப்போட்டு ஏகோபித்த பாராட்டைப் பெற்ற இவர்களுக்குத் தமிழ்த்தேசியப் பசுமை இயக்கத்தின் கலை, இலக்கிய அணியின் துணைப் பொதுச் செயலாளர் கை. சரவணன் அவர்கள் பொன்னாடை போர்த்திக் கௌரவிப்பை வழங்கினார்.

மிகச்சிறப்பாக நிகழ்ந்தேறிய

பசுமைஅமைதி விருதுகள் விழா

தமிழ்த்தேசியப் பசுமை இயக்கத்தின் 2021 ஆம் ஆண்டுக்கான பசுமை அமைதி விருதுகள் வழங்கும் விழா நேற்று ஞாயிற்றுக்கிழமை (30.01.2022) யாழ்ப்பாணம் வீரசிங்கம் மண்டபத்தில் மிகச்சிறப்பாக நிகழ்ந்தேறியது. தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் நடைபெற்ற இவ்விழாவில் பிரதம விருந்தினராக வவுனியாப் பல்கலைக்கழகத்தின் துணைவேந்தர் கலாநிதி த. மங்களேஸ்வரன் பங்கேற்றிருந்தார். சிறப்பு விருந்தினர்களாக வடபிராந்திய விவசாய ஆராய்ச்சிப் பிரிவின் மேலதிக பணிப்பாளர் கலாநிதி எஸ். ஜே. அரசகேசரி, தென்கிழக்குப் பல்கலைக்கழகத்தின் சிரேஸ்ட விரிவுரையாளர் ஏ. எம். றியாஸ் அகமட் ஆகியோர் கலந்து கொண்டிருந்தார்கள்.

தமிழ்த்தேசியப் பசுமை இயக்கம் கடந்த ஆண்டு தேசிய ரீதியில் மாணவர்களிடையே இணைய வழியில் சூழல் பொதுஅறிவுப் பரீட்சையொன்றை நடாத்தியிருந்தது. இலங்கையில் அனைத்து மாவட்டங்களிலிருந்தும் மாணவர்கள் பங்கேற்றிருந்த இப்பரீட்சையில் கூடுதலான புள்ளிகளைப் பெற்ற முதல் மூன்று மாணவர்களும் இந்நிகழ்ச்சியில் பசுமை அமைதி விருதுகள் வழங்கிக் கௌரவிக்கப்பட்டனர். இவர்களோடு விசேட சித்தி மற்றும் அதிதிறமைச் சித்தி பெற்ற மாணவர்களில் ஒரு தொகுதியினர் பசுமை அமைதிச் சான்றிதழ்கள் வழங்கி மதிப்பளிக்கப்பட்டுள்ளனர்.

யாழ் மகாஜனாக் கல்லூரியைச் சேர்ந்த செல்வன் சிவகரன் அபிசாய்ராம் முதலாம் இடத்தினைப் பெற்று தங்கப் பதக்கத்தினையும், யாழ் வேம்படி மகளிர் கல்லூரியைச் சேர்ந்த செல்வி ஷண்முஹி கருணாநிதி இரண்டாம் இடத்தைப் பெற்று வெள்ளிப்பதக்கத்தினையும், மட்டக்களப்பு புனித ஜோசப் கல்லூரியைச் சேர்ந்த செல்வி டிலுக்சினி டன்ஸ்ரன் மூன்றாம் இடத்தைப் பெற்று வெண்கலப் பதக்கங்களையும் சுவீகரித்துக்கொண்டார்கள். இவ்விருதுகள் சூழலியல் ஆசான் க.சி. குகதாசன் ஞாபகார்த்தமாக வழங்கப்பட்டுள்ளன.

2021ஆம் ஆண்டுக்கான சிறந்த சூழல்நேயச் செயற்பாட்டாளருக்கான பசுமை அமைதி விருதை இயற்கை விவசாயி அல்லைப்பிட்டி மகேஸ்வரநாதன் கிரிசன் பெற்றுக்கொண்டார். தாலகாவலர் மு.க. கனகராசா ஞாபகார்த்தமாக வழங்கப்பட்ட இவ்விருதோடு, ஒரு இலட்சம் ரூபா பொற்கிழி வழங்கி வைக்கப்பட்டமையும் குறிப்பிடத்தக்கது.

வரவேற்புரையை தமிழ்த்தேசியப் பசுமை இயக்கத்தின் சூழல்பாதுகாப்பு அணியின் துணைச் செயலாளர் த. யுகேஸ் ஆற்ற, நன்றியுரையை பொதுச் செயலாளர் ம. கஜேந்திரன் நிகழ்த்தியிருந்தார். பெருந்திரளானோர் கலந்துகொண்டிருந்த இவ்விழாவுக்கான அனுசரணையை புலம்பெயர் தமிழர் கூட்டமைப்பு வழங்கியிருந்தது.

பசுமை அமைதி விருதுகள் - 2021

பரிசளிப்பு நிகழ்ச்சியில் கலந்துகொள்ளும்

மாணவர்களுக்கான அறிவுறுத்தல்கள்

தமிழ்த்தேசியப் பசுமை இயக்கத்தினால் 03.10.2021 அன்று இணைய வழியில் நடாத்தப்பட்ட சூழல் பொது அறிவுப் பரீட்சையில் கூடிய புள்ளிகளைப் பெற்ற முதல் 100 மாணவர்களுக்குப் பரிசுகள் வழங்கும் நிகழ்ச்சி யாழ். வீரசிங்கம் மண்டபத்தில் எதிர்வரும் 30.01.2022 (ஞாயிற்றுக்கிழமை) பிற்பகல் 2.30 மணிக்கு நடைபெறவுள்ளது.

இம்மாணவர்களுக்கு இதுதொடர்பான அழைப்புக் கடிதம் அனுப்பி வைக்கப்பட்டுள்ளது.

இம்மாணவர்கள் தங்களின் வருகையை இம்மாதம் 24, 25, 26ஆம் திகதிகளில் காலை 9.30 மணி தொடக்கம் மாலை 4.30 மணிவரை 0741471759 என்ற தொலைபேசி இலக்கத்துடன் தொடர்புகொண்டு அவர்களுக்கு அனுப்பப்பட்டுள்ள கடிதத்தில் குறிப்பிடப்பட்டுள்ள தொடர்பு இலக்கத்தைத் தெரியப்படுத்தி உறுதிப்படுத்துவது அவசியமாகும். அப்போது அவர்களுடன் சேர்ந்து வருகை தருபவர்களின் எண்ணிக்கையையும் குறிப்பிடுதல் வேண்டும்.

தொலைபேசியின் ஊடாக உறுதிப்படுத்துபவர்கள் மாத்திரமே பரிசளிப்பு நிகழ்ச்சியில் கலந்து கொள்வதற்கு அனுமதிக்கப்படுவார்கள்.

பரிசளிப்பு நிகழ்ச்சிக்கு வருகை தரும்போது அழைப்புக் கடிதத்தைத் தவறாது கொண்டு வருவதும், பாடசாலைச் சீருடையுடன் சமுகமளிப் பதும், தங்களை உறுதிப்படுத்தும் ஏதாவது ஆவணம் ஒன்றை எடுத்து வருவதும், அன்றைய தினம் பிற்பகல் 1.30 மணிக்கு முன்பாக ஒதுக்கப்பட்டுள்ள இருக்கையில் அமருவதும் அவசியமாகும்.

கொரோனா பேரிடர்க்கால சுகாதார நடைமுறை களைப் பின்பற்றுவது கட்டாயமானதாகும்.

தைப்பொங்கல் என்பது வெறும் பண்டிகை அல்ல - அது

தமிழ்ப் பண்பாட்டைக் கட்டிக்காப்பதற்கான வேட்கை

பொங்கல் வாழ்த்துச் செய்தியில் பொ. ஐங்கரநேசன்

தமிழ் மக்கள் தங்கள் வாழ்வில் எத்தனையோ பண்டிகைகளைக் கொண்டாடி வருகின்றனர். இவற்றுள் பெரும்பாலானவை மதம் சார்ந்தவையாகவும், அவர்களிடையே ஏற்றத்தாழ்வுகளை வெளிப்படுத்துபவையாகவும் அமைந்துள்ளன. ஆனால், தைப்பொங்கல் மட்டும் சாதி, மத, பொருளாதார பேதங்களைக் கடந்து ஒட்டுமொத்தத் தமிழர்களுக்கும் பொதுவான பண்டிகையாகக் கொண்டாடப்படுகிறது. இது வெறும் பண்டிகை அல்ல ; தமிழ்ப் பண்பாட்டைக் கட்டிக்காப்பதற்கான வேட்கை என்று தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் பொங்கல் வாழ்த்துச் செய்தியில் தெரிவித்துள்ளார்.

பொங்கல் வாழ்த்துச் செய்தியில் அவர் மேலும் தெரிவிக்கையில்,

தமிழ்மக்கள் இயற்கையைக் கடவுளாகப் பூசித்த தொல்வழிபாட்டுப் பண்பாட்டைக் கொண்டிருந்தவர்கள். அதன் தொடர்ச்சியாகவே மாரி மழை ஓய்ந்து கோடை ஆரம்பிக்கும்போது முதல் அறுவடையில் பொங்கல் செய்து சூரியனுக்குப் படைக்கும் பண்பாட்டு வெளிப்படுத்துகையாகக் தைப்பொங்கல் அமைந்துள்ளது. தமிழ் மக்கள் தங்களைப் போன்றே இயற்கையை நேசிக்கும் பண்பாட்டு மரபைக் கொண்டிருந்தவர்கள். அதன் தொடர்ச்சியாகவே அவர்களோடு உணவு உற்பத்தியில் உழைத்த காளைகளுக்கும் பொங்கல் செய்து படைக்கும் பண்பாட்டு நீட்சியாகப் பட்டிப்பொங்கலைக் கொண்டாடுகிறார்கள். தமிழ் மக்கள் புறமணம் புரியும் பண்பாட்டு உறவைக் கொண்டுள்ளவர்கள். கிராமங்களை இணைப்பதற்கு வீதிகள் இல்லாத அக்காலப்பகுதியில் தைபிறந்தால் வழிபிறக்கும் என்று மாரி மழை ஓயும்வரை காத்திருந்து பாதைகள் தெரிய ஆரம்பித்ததும் அயற் கிராமங்களுக்கு மாப்பிள்ளை தேடிச் செல்வர்.

ஆனால், இன்று நயத்தகு பண்பாட்டுக்குச் சொந்தக்காரர்களான தமிழ் மக்கள் இந்தத் தையிலாவது பௌத்த - சிங்களப் பண்பாட்டு மேலாதிக்கத்தில் இருந்துவிடுபட வழிபிறக்காதா என்று அங்கலாய்த்திருக்கின்றனர். பொங்கல் வாழ்த்துச் செய்திகளை அடுத்தவர்களுக்குப் பரிமாறும் இவ்வேளையில் தமிழ் மக்களின் சுதந்திரமானதும் சுபீட்சமானதுமான வாழ்வுக்கு வழிபிறக்கச் செய்ய இயற்கை என்ற பேரிறைவனை வேண்டி நிற்போமாக என்றும் குறிப்பிட்டுள்ளார்.

பேராயர் டெஸ்மன்ட் டுட்டு – அட்டூழியங்களுக்கு எதிரான உலகின் முகவரி

இரங்கற் செய்தியில் தமிழ்த்தேசியப் பசுமை இயக்கம்

மனித உரிமைகளுக்காகவும் உலக சமாதானத்துக்காகவும் தனது தள்ளாத வயதிலும் போராடிவந்த பேராயர் டெஸ்மன்ட் டுட்டுவின் மறைவு ஈழத்தமிழர்களுக்கு ஈடுசெய்ய முடியாத ஒரு பேரிழப்பு ஆகும். தென்னாபிரிக்காவில் தனது கறுப்பு இனத்தவர்களுக்கு எதிரான வெள்ளை நிறவெறிக்கு எதிராக ஜனநாயக வழியில் போராடிவந்த டெஸ்மன்ட் டுட்டு மனித உரிமைகளின் ஒரு சர்வதேச அடையாளமாக விளங்கிவந்துள்ளார். தென்னாபிரிக்காவைத் தாண்டியும் பூமிப்பந்தில் எங்கெல்லாம் மனிதம் வதைபடுகின்றதோ அங்கெல்லாங்கூட அட்டூழியங்களுக்கு எதிரான ஒரு உலகின் முகவரியாகத் திகழ்ந்தார் என்று தமிழ்த்தேசியப் பசுமை இயக்கம் தெரிவித்துள்ளது.

பேராயர் டெஸ்மன்ட் டுட்டுவின் மறைவையொட்டி தமிழ்த்தேசியப் பசுமை இயக்கம் விடுத்துள்ள இரங்கற் செய்தியிலேயெ இவ்வாறு தெரிவிக்கப்பட்டுள்ளது.

அந்த இரங்கற் செய்தியில் மேலும்,

பேராயரான டெஸ்மன்ட் டுட்டு மனிதம் என்பது இனம், மதம், மொழி என்ற எல்லைகளைக் கடந்த ஓர் உயரிய மாண்பு என்ற நிலைப்பாட்டைக் கொண்டிருந்தார். இதனால், இஸ்ரேலிய யூதர்களால் பாலஸ்தீனியர்கள் மீது கட்டவிழ்த்துவிடப்பட்டுக்கொண்டிருக்கும் வன்முறைகளுக்கு எதிராகக் குரலெழுப்பி வந்தார். ஈராக் மீது பொய்க் காரணங்கள்கூறிப் போர் தொடுத்தார்கள் என்று முன்னாள் அமெரிக்க ஜனாதிபதி ஜோர்ஜ் புஷ் முன்னாள் பிரித்தானியப் பிரதமர் ரொனி பிளேயர் இருவரையும் சர்வதேசக் குற்றவியல் நீதிமன்றில் நிறுத்துமாறு வலியுறுத்தி வந்தார்.

ஈழத்தமிழர்கள்மீது பௌத்த சிங்களப் பேரினவாதம் நிகழ்த்தியது யுத்தக் குற்றமல்ல; அது இனப்படுகொலையே என்று சர்வதேச அரங்கில் உறுதிபடக்கூறி நின்றார். விடுதலைப் புலிகளை உலகம் பயங்கரவாதிகளாகச் சித்திரித்தபோது புலிகளைத் தமிழர்களது பிரதிநிதிகளாகக் கண்டார். ஆனால், வெள்ளையர்களின் கரங்களைப்பற்ற விழைந்த எமது தலைவர்களின் இராஜதந்திரம் துரதிர்ஸ்டவசமாக, ஈழத்தமிழர்களின்பால் இக்கறுப்பினப் போராளி பரிவுடன் நீட்டிய கரங்களை இறுகப் பற்றத்தவறிவிட்டது.

உலக அமைதிக்கான குரலாக ஒலித்ததால் அமைதிக்கான நோபல் பரிசு வழங்கிக் கௌரவிக்கப்பட்ட டெஸ்மன்ட் டுட்டு தனது 90ஆவது வயதில், 26.12.2021 அன்று தனது குரலை நிரந்தரமாகவே நிறுத்திக்கொண்டார். உலகம் முழுவதிலுமிருந்து அவரை அஞ்சலித்துக் கொண்டிருக்கும் ஒடுக்கப்பட்ட மக்களுடன் ஈழத்தமிழ் மக்களின் சார்பில் தமிழ்த்தேசியப் பசுமை இயக்கமும் இணைந்து தனது அஞ்சலியைச் சிரம் தாழ்த்தித் தெரிவித்துக்கொள்கிறது என்று குறிப்பிடப்பட்டுள்ளது.

தமிழ்த்தேசிய அரசியலின் சரியான செல் திசைக்கு

வலுவான சிவில் சமூகக் கட்டமைப்பு அவசியம்

பொ. ஐங்கரநேசன் சுட்டிக்காட்டு

ஈழத்தமிழ் மக்களின் அரசியல் வரலாற்றில் மீண்டும் ஒருமுறை சர்வதேசம் அவர்களைக் கையாள ஆரம்பித்திருக்கிறது. ஜனாதிபதியாக ஜெ.ஆர்.ஜெயவர்த்தனா இருந்தபோது இலங்கையின் கதவுகளை அமெரிக்காவுக்கு அகலத் திறந்துவிட்டிருந்தார். அப்போது, அமெரிக்கப் பிரசன்னத்தை இலங்கையில் தவிர்ப்பதற்காக இந்தியா ஈழத்தமிழர்களைக் கையாண்டிருந்தது. இயக்கங்களுக்கு ஆயுதப் பயிற்சியளித்து இலங்கையைத்தன் வழிக்குக் கொண்டுவந்திருந்தது. இப்போது, ராஜபக்ச அரசாங்கம் இலங்கையைச் சீனாவுக்குத் திறந்துவிட்டுள்ள நிலையில் இந்தியாவும் அமெரிக்காவும் இணைந்து இலங்கையைப் பணியவைக்கும் முயற்சியில் தமிழ்க்கட்சிகளைக் கையாளத்தொடங்கியுள்ளன. இந்நிலையில், தமிழ்த்தேசிய அரசியலைச் சரியான செல்திசைக்கு நகர்த்துவதற்கு வலுவானதொரு சிவில் சமூகக் கட்டமைப்பை உருவாக்குவது அவசியமாகும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் சுட்டிக்காட்டியுள்ளார்.

தமிழ்த்தேசியப் பசுமை இயக்கத்தின் சமகால அரசியல் அரங்கு நேற்று ஞாயிற்றுக்கிழமை (26.12.2021) நல்லூர் இளங்கலைஞர் மன்ற மண்டபத்தில் நடைபெற்றது. இவ்வரங்குக்குத் தலைமை வகித்து உரையாற்றும்போதே பொ. ஐங்கரநேசன் இவ்வாறு சுட்டிக்காட்டியுள்ளார்.

அவர் அங்கு தொடர்ந்து உரையாற்றுகையில்,

இந்தியாவும், அமெரிக்காவும், சீனாவும் தமிழ்க் கட்சிகளைக் கையாளத் தொடங்கியிருக்கும் சூழ்நிலையில் இக்கட்சிகள் இராஜதந்திர ரீதியாக இந்நாடுகளைக் கையாளுவதில் தொடர்ந்தும் தவறிழைத்து வருகின்றன. தனித்தனிக் கட்சிகளாக ஏனைய கட்சிகளுக்கு எதுவும் தெரியாமலும், ஒரு கட்சிக்குள்ளேயே தனிநபர்களாக ஏனைய உறுப்பினர்களுக்குத் தெரியாமலும் இந்நாடுகளுடன் பேச்சு வார்த்தைகள் இடம்பெறுகின்றன. இவ்விடயங்களை மக்களுக்குப் பகிரங்கப்படுத்துவது இராஜதந்திரமாக ஆகாது என்று கூறிவருகின்றனர். மைத்திரி-ரணில் கூட்டை உருவாக்கியபோதும் தமிழ் மக்களின் நலன் தொடர்பாகப் பேசப்பட்டதென்றும் அதனை வெளிப்படையாகப் பேசுவது இராஜதந்திரம் அல்ல என்றும் கூறியிருந்தனர். தமிழ் மக்களின் தலைவிதியைத் தீர்மானிக்கும் பொறுப்பைத் தனிக் கட்சிகளிடமும் தனிநபர்களிடமும் இவ்வாறு விட்டுவிடுவது மிகவும் ஆபத்தானது.

இந்திய-இலங்கை ஒப்பந்தத்தின்படி 13ஆவது திருத்தச்சட்டத்தை நடைமுறைப்படுத்தவேண்டும் என்று இந்தியப் பிரதமரிடம் கூறுவதற்காகப் பல தமிழ்த்தேசியக் கட்சிகள் கூட்டுச்சேர்ந்துள்ளன. இக்கட்சிகளின் கூட்டில் முஸ்லிம் மக்களைப் பிரதிநிதித்துவப்படுத்தும் கட்சிகளும் இப்போது புதிதாக இணைக்கப்பட்டுள்ளன. இவை வடக்குக்கிழக்கு இணைப்பை ஒருபோதும் ஆதரித்தவை அல்ல. தொடர்ந்தும் எதிரான நிலைப்பாட்டையே வெளிப்படுத்தி வருகின்றன. இந்நிலையில் முஸ்லிம் கட்சிகளை இணைத்துக்கொண்டமை ஏற்கனவே பலவீனமாகவுள்ள 13ஆவது திருத்தச் சட்டத்தை மேலும் பலவீனப்படுத்துவதற்கான ஒரு நிகழ்ச்சி நிரலோ என்றே எண்ணத்தோன்றுகிறது. அவ்வாறுதான் அது அமையவும் போகின்றது.

கூட்டுக்கட்சிக்குள்ளே கட்சிகளாகவும், கட்சிகளுக்குள்ளே தனித்தனித் தலைவர்களாகவும் பிரிந்து நிற்பது ஈழத்தமிழர்களைக் கையாளுவதற்குச் சர்வதேசத்துக்கு இலகுவானதாக இருக்கும். ஆனால், ஈழத்தமிழ் இனத்துக்கு மிகவும் ஆபத்தானது. இந்நிலையிலேயே தேர்தல் அரசியலுக்கு அப்பாற்பட்டு கட்சிகளை ஒருங்கிணைக்கவும், சர்வதேசங்களைத் தமிழ்த் தரப்புக் கையாளுவதற்கான நிபுணத்துவ ஆலோசனைகளை வழங்குவதற்கும் சிவில் சமூகக் கட்டமைப்பு ஒன்றை உருவாக்க வேண்டிய தேவை எழுந்துள்ளது. இச்சிவில் சமூக அமைப்பு கடந்த காலத்தில் கட்டப்பட்ட சிவில் சமூக அமைப்புகளின் தோல்விகளைக் கருத்திற்கொண்டு அரசியல் கட்சிகளின் பினாமிகளாக அல்லாமலும் இவ்வமைப்பின் மூலம் கிடைக்கும் வெளிச்சத்தைப் பயன்படுத்தித் தனிப்பட்ட அரசியல் ஆதாயம் தேடுவனவாக அல்லாமலும் இருக்க வேண்டியது அவசியமாகும் என்றும் தெரிவித்துள்ளார்.

தமிழ்த்தேசியப் பசுமை இயக்கத்தின் சமகால அரசியல் உரையரங்கு

தமிழ்த்தேசியப் பசுமை இயக்கத்தின் சமகால அரசியல் உரையரங்கு நேற்று ஞாயிற்றுக்கிழமை (26.12.2021) நல்லூர் இளங்கலைஞர் மன்ற மண்டபத்தில் இடம்பெற்றுள்ளது. இவ்வுரையரங்கில் “தமிழர் தாயக அபிவிருத்தியில் அரசியலின் வகிபாகம்” என்ற கருப்பொருளில் சமூகச் செயற்பாட்டாளர் இ. செல்வின் அவர்களும், “தமிழ்த்தேசிய அரசியலில் சிவில் அமைப்புகளின் வகிபாகம்” என்ற கருப்பொருளில் யாழ். பல்கலைக்கழகத்தின் ஊடகக் கற்கைகள் துறையின் தலைவர் கலாநிதி சி. ரகுராம் அவர்களும், “தமிழ்த்தேசிய அரசியலில் பூகோள அரசியலின் வகிபாகம்” என்ற கருப்பொருளில் யாழ். பல்கலைக்கழகத்தின் அரசறிவியல் துறையின் தலைவர் பேராசிரியர் கே.ரி. கணேசலிங்கம் அவர்களும் உரையாற்றியிருந்தார்கள்.

தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் அவர்களின் தலைமையில் நடைபெற்ற இவ்வுரையரங்கில் கொழும்பு மாவட்ட இணைப்பாளர் வீ.ரீ. ராஜேந்திரா அவர்கள் வரவேற்றபுரையை நிகழ்த்தியதோடு நிகழ்ச்சியைத் தொகுத்தும் வழங்கினார்.

கொரோனாப் பேரிடர் காலச் சுகாதார நடைமுறைகளைப் பேணியவாறு நடைபெற்ற இந்நிகழ்ச்சியில் தமிழ்த்தேசியப் பசுமை இயக்கத்தின் உறுப்பினர்கள் மற்றும் பொதுமக்கள் என ஏராளமானோர் கலந்துகொண்டிருந்தார்கள்.

கடற்கோள் காவுகொண்ட உறவுகளுக்குத்

தமிழ்த்தேசியப் பசுமை இயக்கம் அஞ்சலி

இலங்கையைக் கடற்கோள் தாக்கிய 17ஆவது நினைவுநாளில், இந்த இயற்கைப் பேரனர்த்தத்தில் சிக்கிப் பலியானவர்களை நினைவுகூர்ந்து தமிழ்த்தேசியப் பசுமை இயக்கம் அஞ்சலி செலுத்தியுள்ளது. நேற்று ஞாயிற்றுக்கிழமை (26.12.2021) நல்லூர் இளங்கலைஞர் மன்ற மண்டபத்தில் தமிழ்த்தேசியப் பசுமை இயக்கத்தின் பொதுச் செயலாளர் மகேசன் கஜேந்திரன் அவர்களின் தலைமையில் இவ்வஞ்சலி நிகழ்ச்சி இடம் பெற்றது.

இந்தோனேசியாவின் சுமத்திரா தீவுக்கு அருகே இந்து சமுத்திரத்தின் அடித்தளத்தில் 2004ஆம் ஆண்டு டிசெம்பர் 26ஆம் திகதி நிகழ்ந்த பாரிய நில நடுக்கமே கடற்கோளைப் பிரசவித்திருந்தது. இதன்போது மேலெழுந்துவந்த இராட்சத ஆழிப்பேரலைகளில் சிக்கி இந்து சமுத்திரக் கரையோர நாடுகள் பலவற்றில் இரண்டரை இலட்சத்துக்கும் மேற்பட்டவர்கள் கொல்லப்பட்டிருந்தனர். இலங்கையில் மட்டும் முப்பத்திஐயாயிரத்துக்கும் அதிகமானோர் பலியாகி இருந்தார்கள். இவர்களை நினைவுகூர்ந்து ஆண்டுதோறும் கடற்கோள் நினைவுநாள் உணர்வுபூர்வமாகக் கடைப்பிடிக்கப்படுகின்றது.

வடக்கு மாகாணசபை இத்தினத்தை வடமாகாண இயற்கைப் பேரிடர் தணிப்புத் தினமாகப் பிரகடனப்படுத்தியிருப்பதும் குறிப்பிடத்தக்கது.

இனியொரு தடவை கடற்கோள் சூழ்ந்தால்

இறப்பு எண்ணிக்கை இன்னும் அதிகமாகவே இருக்கும்

கடற்கோள் நினைவுதினச் செய்தியில் ஐங்கரநேசன் எச்சரிக்கை

பதினேழு வருடங்களுக்கு முன்னால், 2004 டிசெம்பர் 26ஆம் திகதி இந்து சமுத்திரக் கரையோர நாடுகளைக் கடற்கோள் சூழ்ந்ததில் இரண்டரை இலட்சத்துக்கும் மேற்பட்டவர்கள் பலியாகியிருந்தனர். இலங்கையில் மட்டும் முப்பத்திஐயாயிரம் பேர் வரையில் கொல்லப் பட்டிருந்தனர். இனியொரு தடவை கடற்கோள் சூழ்ந்தால் இறப்பு எண்ணிக்கை இன்னும் அதிகமாகவே இருக்கும் என்று தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் எச்சரித்துள்ளார்.

கடற்கோள் நினைவுநாளை முன்னிட்டு அவர் வெளியிட்டிருக்கும் ஊடக அறிக்கையிலேயே இவ்வாறு எச்சரித்துள்ளார். அந்த அறிக்கையில் அவர் மேலும் தெரிவிக்கையில்,

இயற்கைப் பேரிடரான கடற்கோளைத் தடுக்க முடியாது போனாலும் அதனால் ஏற்படும் பாதிப்புகளைத் தணிவிக்க முடியும். இலங்கையில் அம்பாந்தோட்டை மாவட்டத்தில் கண்டல் மரங்கள் அடர்ந்திருந்த கப்புஹென்வல கிராமத்தில் கடற்கோளால் இரண்டே இரண்டு உயிர்களை மட்டுமே பறிக்க முடிந்திருந்தது. ஆனால், அதே மாவட்டத்தில் கண்டல்கள் அழிக்கப்பட்ட வாண்டுறுப்பா கிராமத்தில் ஆழிப்பேரலை ஆறாயிரம் உயிர்களை வாரிச் சென்றுள்ளது. கடல் அலைகளின் சீற்றத்தை 90 விழுக்காடு குறைத்துவிடும் வல்லமை கண்டற் காடுகளுக்கு உண்டு. ஆனால், கடற்கோள் “இயற்கையை நீ அழித்தால் இயற்கையால் நீ அழிவாய்” என்று உலகு அதிரப் போதித்த பின்பும் பட்டும் திருந்தாத பாவிகளாக இயற்கையை நாம் தொடர்ந்தும் சூறையாடி வருகிறோம்.

கடலோரக் கண்டற்காடுகளை நாம் மென்மேலும் கபளீகரம் செய்துவருகிறோம். கடற்கரையோர மணல் மலைகள் தினம் தினம் கொள்ளை போகின்றன. சுண்ணக் கற்பாறைகள் அகல பாதாளத்துக்குத் தோண்டப்படுகின்றன. கடலருகே இறாற் பண்ணைகள் அமைக்கப்படுகின்றன. கடலக முருகைக் கற்பாறைகள் அழிக்கப்படுகின்றன. இழுவைப் படகுகள் கடலடி வளங்களை இடையறாது துவம்சம் செய்து வருகின்றன. இப்படி, தலைமுறை தலைமுறையாக வளமூட்ட வேண்டிய கடலையும் கடல் சார்ந்த வளங்களையும் தொடர்ந்தும் சூறையாடி வருகின்றோம். இவற்றுக்கும் மேலாக நாம் வளியில் குவித்துக்கொண்டிருக்கும் கரிக்காற்று பூமியைச் சூடுபடுத்துவதால் கடல் மட்டம் உயர்ந்து வருகிறது.

மிகப்பெரும் மனிதப் பேரழிவை நிகழ்த்திவிட்டு எதுவுமே நடவாதது போல உறங்கிக்கிடக்கும் கடல் இன்னொரு முறை பொங்கிச் சீறமாட்டாது என்பதற்கு உத்தரவாதம் எதுவுமில்லை. இன்னுமொரு தடவை கடற்கோள் சூழ்ந்தால் அது ஏற்படுத்தும் அழிவு முன்பைவிட பன்மடங்கானோரைப் பலியெடுக்கும் பேரழிவாகவே அமையும். எனவே, கடற்கோளின் படிப்பினைகளை ஏற்று இயற்கையோடு இசைவுற வாழ்ந்து, இயற்கை வளங்களைப் பாதுகாத்து, அளவோடு நுகர்ந்து வளமோடு வாழ்வோமெனக் கடற்கோள் நினைவுநாளில் உறுதியேற்போம். இதுவே கடற்கோளில் மாண்ட நம் உறவுகளுக்கு நாம் செலுத்தும் உண்மையான அஞ்சலியாக அமையும். என்றும் குறிப்பிட்டுள்ளார்.

தமிழ்த்தேசியப் பசுமை இயக்கத்தால் வவுனியா தச்சன் குளத்தில்

உலருணவு விநியோகமும் மரநடுகையும்

தமிழ்த்தேசியப் பசுமை இயக்கம் நேற்று வியாழக்கிழமை (23.12.2021) வவுனியா தச்சன் குளத்தில் வசிக்கும் குடும்பங்களுக்கு உலருணவுப் பொதிகளை வழங்கியுள்ளது. தமிழ்த்தேசியப் பசுமை இயக்கம் கொரோனாப் பேரிடர் காரணமாக தொழில்வாய்ப்பிழந்த வறுமைக்கோட்டுக்குக்கீழ் வாழும் மக்களுக்கு உலர் உணவுப் பொதிகளை வழங்கி வருகிறது. அதன் தொடர்ச்சியாகவே வவுனியாவின் தச்சன் குளப்பகுதியில் உலருணவுப் பொதிகள் வழங்கி வைக்கப்பட்டுள்ளன. அக்கிராமத்தின் கிராம அபிவிருத்திச் சங்கத்தின் வேண்டுகோளுக்கு அமைவாக தெரிவு செய்யப்பட்ட குடும்பங்களுக்கு அத்தியாவசிய உலர் உணவுப் பொருட்கள் அடங்கிய பொதிகள் வழங்கி வைக்கப்பட்டுள்ளன.

தமிழ்த்தேசியப் பசுமை இயக்கத்தினால் அன்றைய தினம் இப்பகுதியில் மரக்கன்றுகளும் நடுகை செய்யப்பட்டுள்ளன. இந்நிகழ்ச்சியின்போது தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன், வவுனியா மாவட்ட இணைப்பாளர் கா.சோ.சிவநேசன், கிராம அபிவிருத்திச் சங்கத்தின் தலைவர் திருமதி வ. தேவிகா, உபதலைவர் சு. சுந்தரமூர்த்தி, செயலாளர் செ. விஜயரட்ணம் ஆகியோர் கலந்துகொண்டு உலருணவுப் பொதிகளை வழங்கி வைத்ததோடு, மரக்கன்றுகளையும் நடுகை செய்துள்ளனர்.

தமிழ்த்தேசியப் பசுமை இயக்கத்தினால்

வேலணையில் உலருணவு விநியோகம்

தமிழ்த்தேசியப் பசுமை இயக்கத்தினால் நேற்று 19.12.2021 (ஞாயிற்றுக்கிழமை) வேலணை, தாவடி, நாவற்குழி, மயிலிட்டி ஆகிய பகுதிகளைச் சேர்ந்த 100 குடும்பங்களுக்கு உலருணவுப் பொதிகள் வழங்கி வைக்கப்பட்டுள்ளன.

தமிழ்த்தேசியப் பசுமை இயக்கம் வறுமைக் கோட்டுக்குக்கீழ் வாழுகின்ற, தொழில்வாய்ப்பிழந்த மற்றும் கொரோனாப் பேரிடர் காரணமாகத் தனிமைப்படுத்தப்பட்டுள்ள குடும்பங்களை அடையாளங்கண்டு அவர்களுக்கு உலருணவுப் பொதிகளை வழங்கி வருகிறது. இதனொரு கட்டமாகவே ஞாயிற்றுக்கிழமை தெரிவுசெய்யப்பட்டுள்ள 100 குடும்பங்களுக்கு உலருணவுப் பொதிகளை வழங்கி வைத்துள்ளது.

பெரும் வரவேற்பைப் பெற்றுள்ள

கார்த்திகை வாசம் - மலர் முற்றம்

28 ஆம் திகதி வரை நீடிப்பு

தமிழ்த்தேசியப் பசுமை இயக்கம் நல்லூர் சங்கிலியன் பூங்காவில் கார்த்திகை வாசம் என்ற பெயரில் மலர்ச்செடிகள் மற்றும் மரக்கன்றுகளைக் காட்சிப்படுத்தி விற்பனை செய்யும் ‘மலர் முற்றம்’ என்ற காட்சித் திடலை கடந்த 20ஆம் திகதி (சனிக்கிழமை) திறந்து வைத்துள்ளது. வடமாகாண மரநடுகை மாதத்தை முன்னிட்டு ஏற்பாடு செய்யப்பட்டுள்ள இம்மலர் முற்றத்தில் யாழ்ப்பாணம், கிளிநொச்சி மாவட்டங்களைச் சேர்ந்த தாவர உற்பத்தியாளர்கள் காட்சிக்கூடங்களை அமைத்துள்ளனர். இம்மலர் முற்றத்தில் தினமும் பல நூற்றுக்கணக்கானவர்கள் மலர்ச் செடிகளையும் மரக்கன்றுகளையும் ஆர்வத்துடன் வாங்கிச் செல்வதைக் காணக்கூடியதாகவுள்ளது.

தமிழ்த்தேசியப் பசுமை இயக்கம் வழமைபோன்றே இந்த ஆண்டும் பாடசாலை மாணவர்களுக்கு இலவசமாக மரக்கன்றுகளை வழங்கி வருகின்றமையால் மாணவர்களும் ஆர்வத்துடன் கலந்துகொள்கின்றனர். பொது மக்களிடம் பெரும் வரவேற்பைப் பெற்றுள்ள இம் மலர் முற்றத்தில் காட்சிக்கூடங்களுடன் பார்வையாளர்களுக்கு ஆரோக்கிய இலைக்கஞ்சி வழங்கும் மையம் ஒன்றும் திறந்து வைக்கப்பட்டுள்ளது. இம்மலர் முற்றம் 26ஆம் திகதிவரை திறந்திருக்கும் என அறிவிக்கப்பட்டிருந்த நிலையில், தற்போது அநேகரின் வேண்டுகோளுக்கிணங்க 28ஆம் திகதி வரை நீடிக்கப்பட்டிருப்பதாக அறிவிக்கப்பட்டுள்ளது.

இம்மலர் முற்றம் தினமும் காலை 8.30 மணிமுதல் முன்னிரவு 7.00 மணிவரை திறந்திருக்கும் என்பது குறிப்பிடத்தக்கது.

தமிழ்த் தேசியப் பசுமை இயக்கத்தின் கார்த்திகை வாசம்

நல்லூர் கிட்டு பூங்காவில் கார்த்திகைப் பூச்சூடி இன்று ஆரம்பம்

தமிழ்த்தேசியப் பசுமை இயக்கம் வடமாகாண மரநடுகை மாதத்தை முன்னிட்டு நல்லூர் சங்கிலியன் பூங்காவில் கார்த்திகை வாசம் என்ற பெயரில் ‘மலர் முற்றம்’ என்ற காட்சித் திடலை இன்று சனிக்கிழமை (20.11.2021) திறந்து வைத்துள்ளது. இம்மலர் முற்றத்தை இந்தியத் துணைத்தூதர் ராகேஷ் நட்ராஜ் ஜெயபாஸ்கரன் அவர்கள் சம்பிரதாயபூர்வமாகத் திறந்து வைத்துள்ளார்.

தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் தலைமையில் கார்த்திகைப் பூச்சூடி ஆரம்பமான இத்திறப்பு நிகழ்ச்சியில் அவுஸ்திரேலிய இன்பத்தமிழ் வானொலியின் அனுசரணையுடன் ‘நடிகர் விவேக்கின் நற்பணியில் நாமும் நடுவோம் ஒரு மரம்’என்ற திட்டத்தின் கீழ் இலவசமாக மரக்கன்றுகள் விநியோகிக்கப்பட்டன. இந்தியத் துணைத்தூதர் ராகேஷ் நட்ராஜ் ஜெயபாஸ்கரன் அவர்கள் மரக்கன்றுகளை வழங்கி வைத்துள்ளார்.

வடக்கு மாகாணசபை 2014ஆம் ஆண்டு கார்த்திகை மாதத்தை வடமாகாண மரநடுகை மாதமாகப் பிரகடனப்படுத்தியிருந்தது. இதைக் கடைப்பிடிக்கும் முகமாக இம்மாதத்தில் தமிழ்த்தேசியப் பசுமை இயக்கம் ஆண்டுதோறும் பெரிய அளவில் மரநடுகையை மேற்கொள்வதோடு பொதுமக்களுக்கும் பொது அமைப்புகளுக்கும் இலவசமாக மரக்கன்றுகளை வழங்கியும் வருகிறது. இக்காலப்பகுதியில் உள்ளூர் தாவர உற்பத்தியாளர்களை ஊக்குவிக்கும் பொருட்டு ஆண்டுதோறும் மலர்ச்செடிகள் மற்றும் மரக்கன்றுகளைக் காட்சிப்படுத்தி விற்பனை செய்யும் ‘மலர் முற்றம்’ என்ற காட்சித் திடலையும் நல்லூர் கிட்டு பூங்காவில் மிகச் சிறப்பாக ஏற்பாடு செய்து வருகிறது.

இந்த ஆண்டு கொரோனாப் பேரிடர் காரணமாக மிகவும் எளிமையாகவே நடைபெற்ற மலர் முற்றத் திறப்பு நிகழ்ச்சியில் வரையறுக்கப்பட்ட எண்ணிக்கையில் பார்வையாளர்கள் அனுமதிக்கப் பட்டிருந்தனர். இம்மாதம் 26ஆம் திகதி வரை தினமும் காலை 8.30 மணியில் இருந்து முன்னிரவு 7.00 மணிவரை இம் மலர் முற்றம் திறந்திருக்கும் எனவும், இதனை பார்வையிட வரும் மாணவர்களுக்கு இலவசமாக மரக்கன்றுகள் வழங்கி வைக்கப்படும் எனவும் தமிழ்த்தேசியப் பசுமை இயக்கம் தெரிவித்துள்ளது.

தமிழ்த்தேசியப் பசுமை இயக்கம்

பளையில் மரநடுகை

தமிழ்த்தேசியப் பசுமை இயக்கம் வடமாகாண மரநடுகை மாதத்தை முன்னிட்டுப் பல்வேறு இடங்களிலும் மரநடுகையை மேற்கொண்டு வருகிறது. இதன் ஒருகட்டமாக 14.11.2021 (ஞாயிற்றுக்கிழமை) அன்று பளையில் மரநடுகை இடம் பெற்றுள்ளது.

முகமாலை தெற்கு தூய ஆரோக்கியமாதா ஆலய வளாகத்தில் நிழல் மரக்கன்றுகள் நாட்டி வைக்கப்பட்டதோடு, பொதுமக்களுக்கும் மரக்கன்றுகள் வழங்கப்பட்டன. இம்மரநடுகையில் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன், பொருளாளர் க. கேதீஸ்வரநாதன், சூழல் பாதுகாப்பு அணியின் துணைச் செயலாளர் த. யுகேஸ், ஆலயத்தின் அருட்பணிச் சபையின் அங்கத்தவர்கள் ஆகியோருடன் பொது மக்களும் கலந்து கொண்டிருந்தனர்.

தமிழ்த்தேசியப் பசுமை இயக்கம் வடமாகாண மரநடுகை மாதத்தை முன்னிட்டுப் பொதுமக்களுக்கும், பொது அமைப்புகளுக்கும் இலவசமாக மரக்கன்றுகளை வழங்கி வருகின்றமை குறிப்பிடத்தக்கது.

தமிழ்த்தேசியப் பசுமை இயக்கத்தால்

வடமராட்சியில் மரக்கன்றுகள் விநியோகம்

தமிழ்த்தேசியப் பசுமை இயக்கம் வடமாகாண மரநடுகை மாதத்தை முன்னிட்டுக் கார்த்திகை மாதத்தில் பொது மக்களிடையே மரங்களின் முக்கியத்துவம் தொடர்பாக விழிப்புணர்வுப் பரப்புரையை மேற்கொண்டு வருவதோடு, மரநடுகையையும் ஊக்குவித்து வருகிறது. இதனொரு கட்டமாக, வடமராட்சி அல்வாயிலுள்ள பொது அமைப்புகளின் வேண்டுகோள்களுக்கு இணங்க அவ்வமைப்புகளின் பிரதிநிதிகளிடம் 07.11.2021 (ஞாயிற்றுக்கிழமை) அன்று மரக்கன்றுகள் வழங்கி வைக்கப்பட்டுள்ளன.

தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன் மரக்கன்றுகளை வழங்கிவைத்து அப்பகுதிகளில் மரநடுகையையும் ஆரம்பித்து வைத்தார்.

வடக்கு மாகாணசபை கார்த்திகை மாதத்தை 2014ஆம் ஆண்டு வடமாகாண மரநடுகை மாதமாகப் பிரகடனப்படுத்தியது. இதையடுத்து ஆண்டுதோறும் இம்மாதத்தில் தமிழ் மக்கள் மரநடுகையை உணர்வுபூர்வமாக மேற்கொண்டு வருவது குறிப்பிடத்தக்கது.

தமிழ்த்தேசியப் பசுமை இயக்கத்தின்

வடமாகாண மரநடுகை மாத ஆரம்ப மரநடுகை

தமிழ்த்தேசியப் பசுமை இயக்கம் வடமாகாண மரநடுகை மாதத்தை முன்னிட்டு ஆண்டுதோறும் கார்த்திகை மாதத்தில் மரநடுகையை பெரிய அளவில் முன்னெடுத்து வருகிறது. பொதுமக்கள், பொதுஅமைப்புகளுக்கு மரக்கன்றுகளை விநியோகித்து மரநடுகையை ஊக்குவிப்பதோடு, தனது உறுப்பினர்கள் மூலமும் மரநடுகையை ஓர் பெரும் இயக்கமாகவே முன்னெடுத்து வருகிறது.

இந்த ஆண்டுக்கான மரநடுகை மாதத் தொடக்க நிகழ்ச்சி 01.11.2021 (திங்கட்கிழமை) அன்று கோண்டாவில் தில்லையம்பதி மத்திய கிராம முன்னேற்றச் சங்கத்தில் இடம்பெற்றது. கோண்டாவில் மத்திய கிராம முன்னேற்றச் சங்கத்தின் தலைவர் சி. ஆனந்தராஜா அவர்களின் தலைமையில் நடைபெற்ற இந்நிகழ்ச்சியில் தமிழ்த்தேசியப் பசுமை இயக்கத்தின் தலைவர் பொ. ஐங்கரநேசன், பொருளாளர் க. கேதீஸ்வரநாதன் ஆகியோர் கலந்துகொண்டி ருந்தனர். இந் நிகழ்ச்சியில் கலந்துகொண்டவர்களுக்கு மரக்கன்றுகள் வழங்கி வைக்கப்பட்டதோடு, மரநடுகையும் இடம்பெற்றது.

தமிழ்த் தேசிய பசுமை இயக்கத்தால்

சிறுப்பிட்டியில் குருதிக்கொடை முகாம்

தமிழ்த் தேசியப் பசுமை இயக்கத்தின் கோப்பாய்த் தொகுதிக் கிளையின் ஏற்பாட்டில் குருதிக்கொடை முகாம் நேற்று சனிக்கிழமை (18.09.2021) சிறுப்பிட்டியில் இடம்பெற்றது. சிறுப்பிட்டி அரசினர் தமிழ்க்கலவன் பாடசாலையில் நடைபெற்ற இந்த இரத்ததான முகாமில் வட பிராந்திய இரத்த வங்கியின் பொறுப்பதிகாரி வைத்திய கலாநிதி திரு. ம. பிரதீபன், பொதுச் சுகாதாரப் பரிசோதகர் திரு. த. ரவீனதாஸ் ஆகியோர் அடங்கிய குழுவினர் கலந்துகொண்டு இரத்த சேகரிப்பில் ஈடுபட்டனர்.

கொரோனாப் பெரும் தொற்றுக்காரணமாக மருத்துவமனை களுக்குச் சென்று குருதி வழங்குபவர்களின் எண்ணிக்கையில் வீழ்ச்சி ஏற்பட்டுள்ளதால் அவசர சிகிச்சைகளுக்குத் தேவையான குருதிக்குப் பெரும் தட்டுப்பாடு நிலவுகின்றது. இதனால் இரத்த தானம் செய்ய முன்வருமாறு இரத்த வங்கி விடுத்த அவசர வேண்டுகோளை ஏற்றுத் தமிழ்த் தேசிய பசுமை இயக்கம் இரத்த தான முகாம்களை ஏற்பாடு செய்து வருகின்றது. இதன் தொடர்ச்சியாக கோப்பாய்த் தொகுதிக் கிளையால் சிறுப்பிட்டியில் குருதிக் கொடை முகாம் ஏற்பாடு செய்யப்பட்டுள்ளது.

இம்முகாமில் தமிழ்த் தேசியப் பசுமை இயக்கத்தின் சூழல் பாதுகாப்பு அணியின் துணைப் பொதுச்செயலாளர் திரு. தா. யுகேஸ் அவர்கள் கலந்துகொண்டு பங்கேற்ற அனைவருக்கும் செவ்விரத்தம் பூச்செடிகளை வழங்கி வைத்தார்.

தமிழ்த் தேசியப் பசுமை இயக்கத்தால்

கிளிநொச்சியில் உலருணவு விநியோகம்

கொரோனாப் பேரிடர் காரணமாகத் தொழில் வாய்ப்பிழந்த குடும்பங்களிலும், தனிமைப்படுத்தப்பட்ட குடும்பங்களிலும் பொருளாதார ரீதியாக நலிவுற்ற குடும்பங்கள் பெரும் சிரமங்களை எதிர்நோக்கி வருகின்றன. இத்தகைய குடும்பங்களை அடையாளங்கண்டு உலர் உணவுப் பொதிகளை வழங்கும் பணியைத் தமிழ்த் தேசியப் பசுமை இயக்கம் முன்னெடுத்து வருகிறது. இதன் ஒரு கட்டமாக நேற்று செவ்வாய்க்கிழமை (07.09.2021) கிளிநொச்சி மாவட்டத்தில் உலர் உணவுப் பொதிகள் வழங்கி வைக்கப்பட்டுள்ளன.

பளை, பரந்தன், பிரமந்தனாறு, தருமபுரம், கனகாம்பிகைக்குளம் ஆகிய பகுதிகளில் இருந்து தெரிவு செய்யப்பட்ட 250 குடும்பங்களுக்கு இப்பொதிகள் வழங்கப்பட்டுள்ளன. அரிசி, கோதுமை மா, பருப்பு, சீனி, சோயா மீற், பால்மா, தேயிலை ஆகியவை அடங்கிய இப்பொதிகளை தமிழ்த் தேசியப் பசுமை இயக்கத்தின் தலைவர் பொ. ஐங்கரநேசன் நேரடியாகச் சென்று வழங்கி வைத்துள்ளார்.

கொரோனாப் பெருந்தொற்று கடந்த ஆண்டு ஆரம்பித்த காலப் பகுதியில் இருந்து தமிழ்த் தேசியப் பசுமை இயக்கம் இப்பணியைத் தொடர்ச்சியாக முன்னெடுத்து வருகின்றமை குறிப்பிடத்தக்கது.

தமிழ்த் தேசியப் பசுமை இயக்கத்தின் சமகால அரசியல் மெய்நிகர் உரையரங்கு 29-08-2021 அன்று நடைபெற்றபோது ஆப்கானிஸ்தானில் தலிபான்களின் மீளெழுச்சி - நடந்ததும் நடக்கப்போவதும் என்ற தலைப்பில் போரியல் ஆய்வாளர் திரு. இரவி பிரபாகரன் (அருஸ்) அவர்கள் ஆற்றிய உரையின் முழுமையான காணொலி

தமிழ்த் தேசியப் பசுமை இயக்கத்தின் சமகால அரசியல் மெய் நிகர் உரையரங்கு 29.08.2021 அன்று நடைபெற்றபோது இலங்கையில் கொரோனாவுக்குப் பின்னரான அரசியல் - நடப்பதும் நடக்கப்போவதும் என்ற தலைப்பில் அரசியல் ஆய்வாளர் திரு. குணா கவியழகன் அவர்கள் ஆற்றிய உரையின் முழுமையான காணொலி

Page updated

Google Sites

Report abuse